1, 2. Yɛɛ naŋ nɔ yɛ miŋ sina a Setana vɛlɛ a nyinaa nduaa wɔɔŋnda okɔɔ?

YOOMOO wa niŋ bɔɔ nyɛ yeelɛi bɛndu o chieeŋ sɛnɛi Chɛhowaa niŋ. O mɛɛlulaŋ yɔɔfɛɛ, ŋ cho wa achal mɛɛ Mɛlɛka ndoo yeema naa miŋ wa yɛ. Kɛ suŋ suŋ ndɔ, Setana nda nyinaa nduaa wɔɔŋnda nɔ kpaayaa chieeŋndo hoo choo ni. (Kɔliŋtiaŋ Tasoo 4:​4) Mi che bɛɛ ŋ chi nda le, kɛ a cho achal nduyɛ kpaayaa pila nda nɔ ni.

² O buŋgɛi hei niŋ, ŋ cho yaasiaa mɛɛ naŋ lo Chɛhowa ikɛi kpɛɛluŋ nduyɛ miŋ kpakpala Setana yɛ. Chɛhowa mɛi lediom maa o cho naa mala. Kɛ ŋ nɔ miŋ sina nɛila Setana nda nyinaa nduaa wɔɔŋnda soliŋ kpeku le naa huiyo nduyɛ ma simul naa laŋ.

3. Yɛɛnɛ Setana yeema yɛ naa tosallo?

³ Setana dimi maa le nyɛ Mɛlɛka cho waŋchieeya tosallo wo nda cho ndu piɛiyo ni, nduyɛ maa te sɔɔŋ kendu pɛ naa choo, ŋ cho Ndu malɔɔ piɛiyo. (Nuawɔ Choobu 2:​4, 5.) Te waŋndo chɔm pɛ maa o yeema pɛɛkoo a Chɛhowa okɔɔ, mi Setana nda nyinaa wɔɔŋnda sina. Okoŋ ma kindiŋ le ndu kuunaa. Te waŋndo yɔŋguŋ pɛ o Chɛhowa lo mbo sɔla yiŋɔɔ, ma tuulu kɔl tau. Baabuiyo tuu Setana a mɛɛ “kpɔkuŋ bɛndoo balu visiaa kɔɔli le nda biyɔɔ yɛ.” (Pitɛ Tasoo 5:​8) Setana  yeema mbo tɛɛmbuu chaŋyɛi cho naa tɛɛŋ a Chɛhowa ve.—Sam 7:​1, 2; Timoti Diiŋ Ndɔɔ 3:​12.

4, 5. (a) Yɛɛ Setana nɔla yɛ tosa le? (b) Yɛɛ o sim yɛ le Setana simullo?

⁴ Kɛ ŋ nɔ miŋ yɔŋ isiooŋ le Setana a nyinaa nduaa wɔɔŋnda le. Chɛhowa hendul nda kpeleŋndo. O cho nyɔɔŋ fau le nda nɔla naa tosal te. Chɛhowa mɛi lediom maa Kilisiɔŋaa tonyaa “faŋga bɛndu bɛndoo” cho hunɔɔ kinda o “nyɛ palaa bɛndoo niŋ.” (Sɔɔŋ Chɔɔmaŋndoŋ 7:​9, 14) Setana nɔla mbo tosa nyɛ  o nyɛ le keŋ kuunaa le kanifuule, Chɛhowa cho wanaa Nduaa mandaa.

⁵ Te ŋ lo pɛ Chɛhowa ikɛi kpɛɛluŋ, Setana nɔla chaŋyɛi cho naa tɛɛŋ a Ndu ve tɛɛmbuu le. Diom Mɛlɛkaa ke naa tiindaŋndo aa: “Haaa mi la wa a Mɛlɛka Yaawɛɛ latulu, ndu bɛɛ o cho [wa] a nya latulu.” (Koloniku Diiŋ Ndɔɔ 15:​2; nuawɔ Kɔliŋtiaŋ Tasoo 10:​13) Puaa a waŋlaanduaa laalaŋnda o sindɔɔ niŋ mɛɛ Ebɛl, Inɔki, Nuuwa, Selua, a Muuse cho naa yɛ, ma simul Setana a mɛɛ ndaa lo Chɛhowa ikɛi kpɛɛluŋ yɛ. (Hibuluiya 11:​4-40) Naa bɛɛ nɔla miŋ tosa lende. Diom Mɛlɛkaa dimi aa: “La simul [Setana]. Te la simul ndu pɛ, o nyaanuŋ nya.”​—Chemisi 4:​7.

6. Vɛɛ Setana simullɛ naa?

⁶ Mi che bɛɛ naa Setana sina maa o cho nyɔɔŋ fau le Chɛhowa chɛl ndu le mbo tosal naa le, kɛ mbo kindiŋ o nɛi o nɛi niŋ le chaŋyɛi cho naa tɛɛŋ a Mɛlɛka ve tɛɛmbuuwo. Setana cho hau nɛila teŋgeŋ teŋgeŋndaŋ a taasila yɛ yɛlaŋ soliŋndo kpeku le naa simullo. O bii niŋ ndaŋ soliŋndo kpeku le wɔsilaŋ hiouwɔɔ o waalaŋ niŋ. Ɔɔ lapum?

7. Le yɛɛ Setana cho yɛ wanaa Chɛhowaa simullo?

⁷ Mi Chɔŋ dimi aa: “Chieeŋndo hoo kpede o cho [Setana] o ba bɛŋgu.” (Chɔŋ Tasoo 5:​19) Setana nɔ Chieeŋndo hoo ni, nduyɛ o yeema mi wanaa Chɛhowaa bɛɛ wa ndu o ba bɛŋgu. (Makal 4:​1; Chɔŋ 15:​19; Sɔɔŋ Chɔɔmaŋndoŋ 12:​12, 17) Setana sina maa teleŋ ndɔɔ lo lɛ o bɔɔ le, lelaŋ o cho naa kpou kindilaa tau ni le miŋ faŋaŋ Mɛlɛka kɔɔli. Lepum mi Setana simul naa kpele kpele, kɛ teleŋndaŋ lapum, wana yala simulta ndɔlaŋ biyɔɔ bila le.

8. Yɛɛ Kilisiɔŋnɔ kɛ kɛ nɔ yɛ mbo sina pɛŋgu?

 ⁸ Ɛfisiaŋnda 6:​12 dimul naa aa: “Sɔŋgɔ naa ŋ cho hoo wo, . . . a nyinaa wɔɔŋaa nɔ tɔɔ o halaa niŋ nda” naŋ cho ndu ni. Kilisiɔŋnɔ kɛ kɛ cho sɔŋgɔɔ a Setana nduyɛ a nyinaa nduaa wɔɔŋnda. Ŋ nɔ miŋ kɛsiŋ o kɔl maa wanaa yɔŋguŋ o Chɛhowa lo wa kpou cho sɔŋgɔɔ hoo. O yau Pɔɔl poonyial Ɛfisiaŋnda wo niŋ, mbo dimul Kilisiɔŋnda loŋ bɛmbɔɔ leyaa le ma “kɛɛ sɔɔŋ [Setana]” dɛɛniaa nda le ma tosa woŋ.

9. Yɛɛ Setana a nyinaa wɔɔŋnda kindiŋ yɛ le naa tosallo?

⁹ Mi Setana a nyinaa nduaa wɔɔŋnda kindiŋ le naa huiyo o nɛila yɛ yɛlaŋ niŋ. Te ŋ hɛluŋ pɛ tɔɔndaŋnda Setanalaŋ opilɛ, koŋ chɔm naa maa o tiu lɛ naa ba a tɔɔndaŋ cheleŋ te le. Le mi Setana yeŋ naa yaŋɔɔleŋ, o kindiŋ fɛŋ le sinaa fonda naŋ nɔ dialuŋ vilɛiyoŋ ndo. Kɛ ŋ nɔ miŋ del o yaŋɔɔla ndɔlaŋ niŋ te kanifuule, Baabuiyo pɛɛku naa a yaŋɔɔla Setanalaŋ okɔɔ. (Kɔliŋtiaŋ Diiŋ Ndɔɔ 2:​11; tofa Diomnda Chɔɔlaalaŋ 31.) Yaŋɔɔlaŋ ndaŋ opilɛ cho walta nyinaa wɔɔŋnda ni.

10. (a) Yɛɛnɛ cho yɛ walta nyinaa wɔɔŋnda? (b) Vɛɛ Chɛhowa che yɛ walta nyinaa wɔɔŋnda?

¹⁰ Walta nyinaa wɔɔŋnda la vɛɛlu waŋndo le balaŋ lueiyo o sɔɔŋ nyinaa wɔɔŋnda niŋ. Ŋ pum cho ni, sɔɔŋ waa lachioŋ dimioo, kueeleŋ, piondɔŋndaŋ, a suɛi o waŋvilɛiya lo. Baabuiyo dimul naa maa walta nyinaa wɔɔŋnda la niŋ te. nduyɛ maa balaŋ la ve naa o walta nyinaa wɔɔŋnda niŋ, miŋ wa vɛlɛ Chɛhowa piɛiyo le. (Ditɔnɔmii 18:​10-12; Sɔɔŋ Chɔɔmaŋndoŋ 21:​8) Kilisiɔŋnda nɔ ma sɔɔŋguu walta nyinaa wɔɔŋnda ikɛi le.—Luomaŋnda 12:​9.

11. Kuɛɛ yeemɛi nɔɔ le sinaa tau a sɔɔŋ kɔndɔfilloŋ okɔɔ yaa yɛ naa?

 ¹¹ Setana sina maa te sɔɔŋ kɔndɔfilloŋ muŋ luɛi naa pɛ o kɔl, i cho wa tɛtɛlɛ le miŋ luei balaŋ o walta nyinaa wɔɔŋnda niŋ. Te ŋ luei pɛ balaŋ o walta nyinaa wɔɔŋaa kɛ kɛ niŋ, Chɛhowa ve lɛ chaaŋ naa le.

12. Vɛɛ Setana kindiŋ yɛ le yiyaŋnda naalaŋ lakasiaa?

¹² Mi Setana kindiŋ le yiyaŋnda waŋnda lakasiaa. Mbo dɔu waŋnda kiisaŋndaŋ o kɔl o pɔmpɔmbɔ haaa, ma che “sɔɔŋ tonyaŋ maa sɔɔŋ wɔɔŋ,” nduyɛ “sɔɔŋ wɔɔŋndoŋ maa sɔɔŋ tonya.” (Aisaya 5:​20) Mi Setana tosa miŋ yiyaŋ maa sila Baabuiyo cho nyɛ sɔvɛ le, nduyɛ maa te ŋ kɛɛ pɛ sawala Mɛlɛkalaŋ, ŋ cho wa a kɔl kɛndɛ tau.

13. Vɛɛ Setana kindiŋ yɛ niŋ le waŋnda kiisaŋndaŋ dɔwɔɔ o lakɔl?

¹³ Nɛi Setana sɔla niŋ hau batiuwaa tau wo cho kiisaŋndaŋ waŋnda dɔwɔɔ o kɔl ni. O soliŋ niŋ nɛiyo hoo kpeku le teleŋ vilɛi. O kpeloo Idɛŋ niŋ, mbo duau Ifi kiisaŋndo o kɔl mɛɛ o nyuna ndu aa: “Baa Mɛlɛka dimi ma dimiaa aa, ‘Yɔmnde o kpeloo hoo niŋ kinɛi maa la dia le.’” (Chɛnɛsee 3:​1) O teleŋ Choobu wo niŋ, mi Setana dimul Chɛhowa maalikɛiya o hɔl aa: ‘O cho fuule Choobu o nɔ bɛɛleŋ le num te.’ (Choobu 1:​9) Mɛɛ Chiisu sɔla yiŋɔɔ, mi Setana simul ndu mbo dimi aa: “Te Po Mɛlɛkaa ŋ cho ni, mɛɛ dimul lɔ poutaŋ ndaŋ la simnuŋ beedii.”—Maatiu 4:​3.

14. Vɛɛ Setana tosa yɛ mi waŋnda kiisaŋ te walta nyinaa wɔɔŋnda wɔu?

¹⁴ Hau bɛɛ, Setana cho hiouwɔɔ lachi a waŋnda kiisaŋndaŋ dɔwɔɔ o lakɔl. Mi Setana tosa walta nyinaa wɔɔŋnda lapum maa la wɔu le. Le hei, mbo tosa mi waŋnda kiisaŋ te walta nyinaa wɔɔŋnda la wɔu pɛ kɛsɛ  kɛsɛ. Kilisiɔŋnda apum bɛɛ chi lɛ pɛŋ kpundɛla cho leniŋ ndaŋ te. (Kɔliŋtiaŋ Diiŋ Ndɔɔ 11:​3) Lelaŋ, yɛɛ naŋ tosa yɛ le naapila mandaa? Vɛɛ naŋ tosa yɛ Setana nɔla naa hui a yaŋɔɔla ndɔlaŋ te? Ŋ yaasiaŋndɔ yaŋɔɔla Setanalaŋ latiɔɔŋ. A laŋ o hui naa lepum ni. Laŋ la cho yelelaŋndo a dandaa ni.

15. Vɛɛ yelelaŋndo looku yɛ naa balaŋ luei o walta nyinaa wɔɔŋnda niŋ?

¹⁵ Hau, vidueila bɔɔbɔɔ, sɔɔŋ nda chɔm o tɛlivisiɔŋndo choo woŋ, pisulta kɔmpitɛilaŋ, a Intanɛtiiyo nɔ walta nyinaa wɔɔŋnda, maŋgaliaalaŋ, a wanaa tuula sɔɔŋ nyinaa wɔɔŋnda wa. Wanaa bɔɔbɔɔ che sɔɔŋ muŋ maa pisultaŋ koni, ŋ yɔŋ wana nyɛ o nyɛ le. A sina pɛŋ maa kpundɔɔ le i cho le nyinaa wɔɔŋnda veeloo o yoomu ndaa niŋ te. Waŋndo luei vɛlɛ balaŋ o walta nyinaa wɔɔŋnda niŋ te o yɔŋ pɛ mbo wa sɔɔŋ muŋ tosaa. Muŋ cho ni, nuaa o tofaŋndo niŋ le sinaa a sɔɔŋ okɔɔ, waŋndo ba kɔllo tofaa le sinaa a chila ndɔlaŋ okɔɔ, kolii latɛnduei wuu wo, a nɛila cheleŋndaŋ. Mi Setana veŋ kpundɛ cho leniŋndo. Nduyɛ, mbo tosa mi waŋnda yiyaŋ maa ŋ cho sɔɔŋ kɛndɛ, nduyɛ ma che muŋ sɔɔŋ kaamaŋ, sɔɔŋ lapisul a sɔɔŋ mamaa. Mi waŋndo yiyaŋ maa nua bɛɛ sɔɔŋ nyinaa wɔɔŋnda, kɛ te a tosa muŋ te, mɛɛ keŋ wɔu le. Le yɛɛ yiyaŋ waa naa cho yɛ suɛi kpundɛ?—Kɔliŋtiaŋ Tasoo 10:​12.

16. Le yɛɛ naŋ nɔ yɛ miŋ kɛɛ yelelaŋnda cho a nyinaa wɔɔŋnda okɔɔ laŋ?

¹⁶ Setana a nyinaa wɔɔŋnda chi naa o lakɔl te. Kɛ a nɔla ma sina yiyaŋ naa a yeemɛi nɛi. A tiuba ma sina hei te a che pɛ yelelaŋ naŋ hɛnaŋndo, nduyɛ, a nyɛ  naŋ hɛli le naapila a yuŋgula naalaŋ ndo. Te o yɔŋ pɛ miŋ hɛli vidueilaŋ, nyɛchaa, yaulaŋ a wanaa ŋwaŋvilɛiya okɔɔ, yawalaŋ, wanaa nyinaa wɔɔŋnda cho kɔɔli wa, kueeleŋ, a sɔɔŋ cheleŋ a nyinaa wɔɔŋnda okɔɔ, Setana nda nyinaa wɔɔŋnda cho sina maa ŋ nɔ yeemɛi o muŋ niŋ. O hei niŋ, a cho niko kindiŋ le ma chɔɔlu naa nyindɔɔ leniŋ.—Nuawɔ Kaleesiaŋnda 6:​7.

17. Vɛɛ Setana soliŋ yɛ yeemɛi naŋ nɔ le kɛndiaa sɔlaa ve kpeku?

¹⁷ Setana soliŋ vɛlɛ yeemɛi naŋ nɔ le kɛndiaa sɔlaa ve kpeku. Hau, wanaa bɔɔbɔɔ cho saŋgaa a dialii nɛyɛi. Naapum mi waŋndo kuɛ o fondaŋnda yɛ yɛlaŋ le dandaa dɔunɔŋndo, kɛ o siŋgu le. (Maki 5:​25, 26)  Lepum, mbo yɔŋnuŋ lam lam, nduyɛ o hɛli lɛ danda kɛ kɛ le. Kɛ naa Kilisiɔŋnda, ŋ nɔ miŋ mandaŋ yɔŋi naŋ hɛli danda chiɛɛliaŋ a sɔɔŋ nyinaa wɔɔŋnda woŋ.—Aisaya 1:​13.

18. Danda yɛɛ Kilisiɔŋnɔɔ nɔ yɛ mbo kpakpala?

¹⁸ O Isɔluɛi niŋ sindɛ, mi waŋnda apum ndaa luei balaŋ o sɔɔŋ nyinaa wɔɔŋnda niŋ. Mi Chɛhowa dimul nda aa: “Te la heelu balaŋ choo choo le ya piɛiyo pɛ, I tofa nya bɛɛ le. Mɛɛ mɛɛ nya piɛi ya, I muli nya diom te.” (Aisaya 1:​15) Yiyaŋndɔ a keŋ, Chɛhowa ve pɛŋ nilaŋ yaŋɔɔ o piɛile ndaleŋ te! Te ŋ wa pɛ a naa, ŋ nɔ miŋ tosa nyɛ o nyɛ tɛɛmbuu chaŋyɛi nɛi a Chɛhowa wo le. Ŋ nɔ vɛlɛ miŋ tosa nyɛ o nyɛ kɛɛlu ndu naa malaa le. (Sam 41:​3) Lelaŋ, ŋ nɔ miŋ sina te danda naŋ yeema wo chiɛɛliaŋ pɛ o nɛi o nɛi niŋ a nyinaa wɔɔŋnda. (Maatiu 6:​13) Te ŋ che pɛ maa o chiɛɛliaŋ, ŋ nɔ miŋ kpakpala ndu!—Tofa Diomnda Chɔɔlaalaŋ 32.

19. Vɛɛ Setana luei yɛ hau wanaa bɔɔbɔɔ siooŋnde?

¹⁹ Waŋnda apum yiyaŋ maa Setana a nyinaa wɔɔŋnda cho kpeekpei le, kɛ acheleŋnda sina maa a cho kpeekpei a nyɛ yɔŋnuŋ niŋ nda wo. Wanaa bɔɔbɔɔ nɔ siooŋii nyinaa wɔɔŋnda, nduyɛ a simnuŋ chiaa le naamula cho a nda okɔɔ laŋ. Mi acheleŋnda dimul waŋnda sɔɔŋ wɔɔŋ nyinaa wɔɔŋnda tosal niŋ waŋchieeya woŋ le nda siooŋnde lueiyo. Teleŋnda bɔɔbɔɔ mi waŋnda hɛnaŋ le bundɔŋ muŋ tueiyɔɔ, nduyɛ a wa a dialuŋ fulaa le acheleŋnda dimullo a muŋ okɔɔ. Bundɔŋ muŋ tosa mi waŋnda nɔ siooŋnde le Setana.

20. Vɛɛ naŋ mala yɛ le choola Setanalaŋ pɛŋgɛlaa?

²⁰ Yiyaŋndɔ a hei okɔɔ, Setana yeema mi waŋnda nɔ  siooŋii nduɛi. (Tɛsaloniaŋ Diiŋ Ndɔɔ 2:​9, 10) Wana lachoowaa o cho ni. Nduyɛ o sina mɛɛ o lakasiaa yiyaŋnda wanaa nɔ yeemɛi o walta nyinaa wɔɔŋnda niŋ yɛ. Nduyɛ mbo tosa nda ma laalaŋ sɔɔŋ cho tonya le woŋ. Mi waŋnda haa dimi bundɔŋ a nyɛ nda che nduyɛ ma tuɛiyo okɔɔ. Mɛɛ nda lambaŋ bundɔŋ muŋ dimioo fau, lende koni nda kuundiaa muŋ ni. Te ŋ wa pɛ bundɔŋ muŋ lambaŋndo dimioo, mɛɛ ŋ cho Setana malaa le waŋnda siooŋnde lueiyo, nduyɛ ŋ yeema miŋ tosa keŋ te.—Chɔŋ 8:​44; Timoti Diiŋ Ndɔɔ 2:​16.

21. Yɔŋi naŋ wa bundɔŋ nyinaa wɔɔŋnda dimioo, yɛɛ naŋ nɔ yɛ miŋ wa suɛi a ndu okɔɔ?

²¹ Te buɛi Chɛhowaa nɔ pɛ bundɛi a nyinaa wɔɔŋnda okɔɔ, o nɔ mbo lambaŋ acheleŋnda suɛi keŋ dimullo le. Wanaa Chɛhowaa nɔ ma yɔŋ isiooŋ le nyɛ Setana a nyinaa nduaa wɔɔŋnda tosa wo le. Kɛ ŋ nɔ miŋ handu kɔllo o Chiisu choo a kpaaya Chɛhowa ke ndu wo. (Hibuluiya 12:​2) Chiisu ndoo dimul buɛiyaa nduaa bundɔŋ a nyinaa wɔɔŋnda okɔɔ le. Kɛ mbo handu kɔllo o Masale Mɛlɛkaleŋ choo a “walta kɔndɔfilta Mɛlɛka tosa laŋ.”—Walta Wanaa Chiisuaa 2:​11; Luku 8:​1; Luomaŋnda 1:​11, 12.

22. Yɛɛ ŋ kɛɛsiaa yɛ le tosaa?

²² Ŋ nɔ miŋ sina maa Setana yeema mbo tɛɛmbuu chaŋyɛi cho naa tɛɛŋ a Chɛhowa ve. Mbo kindiŋ o nɛi o nɛi niŋ le mbo sɔla batiuwaa. Kɛ ŋ sina yaŋɔɔla ndɔlaŋ, nduyɛ ŋ cho a bɛɛndiaŋ le walta nyinaa wɔɔŋaa kɛ kɛ kpakpalaa. Ŋ nɔ miŋ “ke [Setana] fondaŋ o fondaŋ o kuŋgulaŋ” le naa dialloŋ diyɔɔ le. (Nuawɔ Ɛfisiaŋnda 4:​27.) Te ŋ simul pɛ Setana, ŋ del o yaŋɔɔla ndɔlaŋ niŋ te. Nduyɛ ŋ cho wa o manda Chɛhowaa bɛŋgu.—Ephesians 6:​11.