1, 2. Vɛɛ Belam ndoo kindiŋ yɛ le wanaa Chɛhowaa nyɛpalaa tusioo choo?

WANA wuu doŋnde wo, o kuŋgu o saaluŋ suwaa o yeema biyɔɔ wa wo o kua ni. Te o kuɛ pɛ, o vil malaleŋ o doŋnde okoŋ o wuu o peelo. Te o wuu pɛ, o chal niko chumndo. Te suuwo kundu pɛ, o naŋ doŋnde. Te doŋnde luɛi pɛ suuwo o yaaloo, o soli ndu.

² O nɛi pilɛ koŋ choo, mi waŋchieeya bɛɛ luɛi o yaŋɔɔleŋ niŋ. Le taamaseliiyo, Isɔluɛiya wa niŋ kpɛɛluŋ le fuuluu wo o Lɛŋnde Mɛyaaleŋ niŋ teleŋ nda wa o lɛŋnde Dɛŋgbɛleŋ Mowabi wo. Mi masaa Mowabi chuel Belam buŋgɛi le mbo ke ndu kanioŋ tau te o handu pɛ Isɔluɛiya sendioo choo. Haupa mi Belam sɔla nɛiyo mbo tosa mi Isɔluɛiya pila luɛi o sendioo niŋ. Mbo hɛli malale bɛnda leŋ. Mbo viam chuaa laanduaa Mowabi o dɔɔŋgɔ Isɔluɛiya wa wo le mi puaa Isɔluɛiya del nda kɔɔli.—Nɔmbaa 22:​1-7; 31:​15, 16; Sɔɔŋ Chɔɔmaŋndoŋ 2:​14.

3. Vɛɛ Isɔluɛiya mellɛ malale Belam ndeŋ?

³ Baa mi malale Belam ndeŋ le tosa pa wallo? Ei. Mi waŋpiaanduaa Isɔluɛiya o waalaŋ niŋ tiam “a waŋ  laanduaa Mowabaitiiya.” Ma kandu vɛlɛ pɛŋ mɛlɛkaa lachoowaa sooluuwo, kɔ bii a Baal, mɛlɛka suudɛiyo, o wa o pembii Piɔɔve wo. Fulamakɔɔlioo wa ni, mi Isɔluɛiya 24,000 sɔla piɔmndo o pɛŋgulaŋ le luɛiyɔɔ o Lɛŋnde Mɛyaaleŋ niŋ.—Nɔmbaa 25:​1-9.

4. Le yɛɛ Isɔluɛiya o waalaŋ niŋ tosa yɛ kaa ihini nɔɔlɛiyo?

⁴ Le yɛɛ Isɔluɛiyaa bɔɔbɔɔ del lɛ o yaŋɔɔle Belam ndeŋ niŋ? A yeemɛi ndɛi okɔɔ kinɛi nda wa yiyaŋndo ni, nduyɛ ma puɛɛnuŋ a nyɛ o nyɛ Chɛhowa tosal nda. Isɔluɛiya ndaa nɔ sabulaŋ tau le hiouwɔɔ a Chɛhowa loo kɔɔli. Mbo soli nda o chɛleŋ niŋ Ichipi, mbo ke nda nyɛdiaa o yondo pollo niŋ, nduyɛ mbo manda nda ma fuuluu kɛndiaa o pɛŋgula Lɛŋnde Mɛyaaleŋ. (Hibuluiya 3:​12) Kɛ a koŋ kpou, ma luei balaŋ o kaa ihini nɔɔlɛiyo niŋ. Mi Pɔɔl poonyiaa aa: “Naa naa ŋ wou laba o niilu suundɛi niŋ mɛɛ nda pum nda a tosa” yɛ le.—Kɔliŋtiaŋ Tasoo 10:​8.

5, 6. Yɛɛ naŋ pɛɛku yɛ o nyɛ yɔŋnuŋ o Lɛŋnde Dɛŋgbɛleŋ Mowabi wo niŋ?

⁵ Chieeŋ sɛnɛiyo cho niŋ kpɛɛluŋ. O dimi niŋ, ŋ cho ko mɛɛ Isɔluɛiya wa o pɛŋgula Lɛŋnde Mɛyaaleŋ yɛ. (Kɔliŋtiaŋ Tasoo 10:​11) Chieeŋ naŋ cho hau niŋndo cho o piaa cha a kaa ihini nɔɔlɛiyo mbo hiau mɛɛ Mowabaitiiya wa yɛ. I wa tɛtɛlɛ le mi kaa hoo paaliaŋ wanaa Chɛhowaa. Nduyɛ pɛŋ, malale Setana soliŋ kpeku tau leŋ le cho kaa ihini nɔɔlɛiyo ni.—Nɔmbaa 25:​6, 14; Kɔliŋtiaŋ Diiŋ Ndɔɔ 2:​11; Chudi 4.

⁶ Nyunaŋndɔ aa: ‘I yeema pa mi tuei suundaa a tiɔmɔɔ yeela suŋ suŋ okoŋ mi Mɛlɛka huŋ kuuna ya luɛiyɔɔ o chieeŋ sɛnɛiyo niŋ? I cho pa suɛi sɔvɛ le sawa Chɛhowaa hoo diikɔŋndo, ndu cho ni: “La wou baa o niilu suundɛi niŋ kposoŋ te.”?—Kɔliŋtiaŋ Tasoo 6:​18.

7, 8. Yɛɛ cho yɛ niilu kaa ihini nɔɔlɛiyo? Le yɛɛ i cho yɛ suɛi sɔvɛ le miŋ mal kaa ihini nɔɔlɛiyo?

⁷ Wanaa bɔɔbɔɔ vesa bɔɔ hau hɔltaŋ, nduyɛ ma chɔm kpendekele maa a nɔ lebɛɛ kposoŋ le sawala Mɛlɛkalaŋ a chiɛiniŋndo okɔɔ le. O Baabuiyo niŋ, niilu kaa ihini nɔɔlɛiyo cho ni, chiɛiniŋndo tosaa nya wana nya cho o nɔ niŋ te wo. O simi vɛlɛ wana pɔnɔɔ hinilaŋ a pɔnɔɔ, wana lanɔɔ hinilaŋ a wana lanɔɔ, ɔɔ waŋchieeya hinilaŋ a chɔluaa. O sim vɛlɛ sɔɔŋ nɔɔlɛiyoŋ dimulaŋndo le yeemɛi kpeeŋiaa, hiniei tosaa o tum, a labɛŋguniŋ waŋndo piiliaŋndo le yeemaŋ kpeeŋiaŋndo. Sɔɔŋ muŋ cho sɔɔŋ lasiɔmbu le tɛɛsiaa, kɛ ŋ nɔ miŋ bii muŋ bila nyɛkɛndɛi le halikpeŋ miŋ mal sɔɔŋ Mɛlɛka tul leyɛ woŋ tosaa.—Tofa Diomnda Chɔɔlaalaŋ 23.

⁸ Baabuiyo dimi kpendekele maa te waŋndo wa pɛ hiouwɔɔ lachi a kaa ihini nɔɔlɛiyo tosaa, o nɔ mbo wa o kunda leKilisiɔŋndo niŋ te. (Kɔliŋtiaŋ Tasoo 6:​9; Sɔɔŋ Chɔɔmaŋndoŋ 22:​15) Le handɔɔ lechoo, wana nɔ kaa nɔɔlɛiyo wo nɔ lɛ lebɛɛ le ndupila le. Nduyɛ, acheleŋnda laalaŋ a ndu le. Kaa nɔɔlɛiyo huŋ a bahawɛilaŋ tau. Mbo tosa mi kɔl naa iyamaa paaliaŋ naa, nduyɛ teleŋnda bɔɔbɔɔ, mi foli naŋ ve kɔl te wo fula. Mbo hiŋ a bahawɛilaŋ o nɔɔ niŋ, naa a piɔmndo. (Nuawɔ Kaleesiaŋnda 6:​7, 8.) Te waŋndo chua pɛ teleŋndo le mbo yiyaŋ naa kaa nɔɔlɛiyo yaa wana wa, naapum o yeema kposoŋ mbo luei baa o kaa hoo niŋ te. Kɛ teleŋnda bɔɔbɔɔ, waŋndo a yeemɛi nduɛi kinɛi o wa yiyaŋndo ni te o kandu pɛ nyɛ yaa ndu o kaa hoo niŋndo tosaa. Wunduma tum fonduaŋ tofaa ma cho nyɔɔ opilɛ le waŋndo yɔɔ o kaa hoo niŋ.

9. Le yɛɛ wunduma tum fonduaŋ ma cho yɛ nyɛ kpundɛ bɛndu?

⁹ A tosa wunduma tum fonduaŋ le naa yeemɛi kpeeŋiaa le hiniei tosaa. Hau, wunduma tum fonduaŋ ma cho ba o ba fee. Ma cho o yaulaŋ niŋ, o nyɛchaa niŋ, o tɛlivisiɔŋndo niŋ, a o Intanɛtiiyo choo. Apum yiyaŋ maa wunduma tum fonduaŋ tofaa ma yɔŋ nda nyɛ o nyɛ le, kɛ ma cho bɔɔ nyɛ kpundɛ bɛndu. Mi ma tosa mi kaa suundɛiyo luɛi waŋndo o koowaŋ niŋ nduyɛ mbo tosa nyɛ o nyɛ le yeemɛi nduɛi peeloo. Te waŋndo luei pɛ balaŋ o wunduma tum fonduaŋ nuaa niŋ, mbo kandu pisultaŋ a labɛŋguniŋndo, mi bahawɛilaŋ la hiŋ o nɔ ndɔɔ niŋ, nduyɛ pɛŋ ma mɛɛlu kɛyaŋ.—Luomaŋnda 1:​24-27; Ɛfisiaŋnda 4:​19; tofa Diomnda Chɔɔlaalaŋ 24.

10. Vɛɛ sawa mandaa cho o Chemisi 1:​14, 15 niŋndo mala yɛ naa le kaa nɔɔlɛiyo malɔɔ?

¹⁰ I cho suɛi sɔvɛ le sinaa mɛɛ kaa ihini nɔɔlɛiyo kpeeŋiaa naa yeemɛi yɛ. Kɛsiŋ sila cho o Chemisi 1:​14, 15 niŋndo o kɔl. O dimi aa: “Nyɛ dɛɛniaa waŋndo le yɔŋ wɔɔŋndo tosaa wo ndu cho yeemaŋ wɔɔŋ wa ndu o kɔl loŋ ni. Muŋ lo ndu vɛɛloo haaa ni mbo wou baa o yɔŋ wɔɔŋndo niŋ. Te yeemɛi wɔɔŋnde i luɛi o kɔl waŋndo niŋ pɛ, o koŋ kɔɔli, mi ndu pila yɔŋguŋ o yeemɛi keŋ niŋ pɛ, o koŋ kɔɔli, o wou baa o yɔŋ wɔɔŋndo niŋ. Te waŋndo tosa yɛ yɔŋ wɔɔŋndo pɛ, o mɛɛlulaŋ o sɔla piɔmndo.” Lelaŋ, te yiyaŋ wɔɔŋndo hiŋ num pɛ o kɔl, tosa tamala le ndu solioo le. Te a wa pɛ kɔmpitɛiyo soliŋndo kpeku ma cha wunduma tum fonduaŋ, faŋa hɔlla! Kinda kɔmpitɛiyo ɔɔ kumbi peele cheleŋ! Chɛl mi yeemaŋ wɔɔŋndoŋ luɛi num o kɔl te. Te o cho koŋ te, ŋ cho kiondɔɔ poŋ nduyɛ mbo wa ikala le ma nɔ muŋ kpaayaa choo.—Nuawɔ Maatiu 5:​29, 30, NW.

11. Vɛɛ Chɛhowa mala yɛ naa te yiyaŋnda wɔɔŋndaŋ la hiŋ pɛ naa o kɔl?

 ¹¹ Chɛhowa sina naa mbo hiau mɛɛ naŋ sina naapila yɛ. O sina maa wanaa lahakiaa naŋ cho ni. Kɛ o sina vɛlɛ maa ŋ tiuba miŋ chɔulaba yeemaŋ wɔɔŋndoŋ. Chɛhowa dimul naa aa: ‘Lelaŋ, la soli niko balaŋ po o yeemaŋ wanaa cho le chieeŋndo hoo wa a nɔ woŋ niŋ. Muŋ cho ni, suundaa, niilu nɔɔlɛiyo, yeemɛi suundɛi bɛnduei nɔɔ, yeemɛi le dɛnɛ wɔɔŋndo tosaa, a hɔlteŋ luɛiyɔɔ o nyɔɔŋ. Hɔlteŋ luɛiyɔɔ o nyɔɔŋ, sooluulaŋ nɔɔ la tiŋ la cho laŋ ni.’ (Kolosiaŋnda 3:​5) Mi che bɛɛ naa keŋ cho suɛi bɛɛŋ bɛɛŋ le tosaa le, kɛ Chɛhowa cho naa biuwɔŋndo nduyɛ o cho naa mala. (Sam 68:​19) Mi puaapilɛnɔ feleŋgɔnɔ pilɛ luɛi wunduma tum fonduaŋ tofaa a pisultaŋ a labɛŋguniŋ ndɔɔ. Mi chaaŋaa nduaa o sukuu dimi maa hei cho suɛi wɔɔŋ te. Kɛ mbo dimi aa: “Mi hei yɔŋul kɔl iyama nuu, nduyɛ mi luei balaŋ  o kaa nɔɔlɛiyo niŋ.” Mbo sina maa mɛɛ mbo nɔ kpaayaa yeemaŋ ndɔŋ choo. Nduyɛ a mala Chɛhowaa, mbo tiuba le balaŋ solioo o kaa hoo niŋ. Te yiyaŋnda nɔɔlɛilaŋ la hiŋ num pɛ o kɔl, nyuna Chɛhowa mbo ke num ‘kpaayaa’ le ma nɔ yiyaŋnda kɛndɛlaŋ.—Kɔliŋtiaŋ Diiŋ Ndɔɔ 4:​7; Kɔliŋtiaŋ Tasoo 9:​27.

12. Le yɛɛ naŋ nɔ yɛ miŋ manda kɔl naa?

¹² Mi Sɔlɔmɔŋ poonyiaa aa: “Mandaŋ a nyɛ ŋ yiyaŋ o kɔl numndo niŋ ndo, fondole, nyɛ wana chioo o yiyaŋ o kɔl ndɔɔ niŋ ndo, ndu cho yoomu wana chioo ni.” (Pulɔwaa 4:​23) “Kɔl” naa ndu chɔm wana suu naŋ cho wo ni, nduyɛ ndu Chɛhowa cha ni. Nyɛ naŋ tofa wo nɔla mbo siŋga yiyaŋ naa. Mi wana laalaŋndo Choobu dimi aa: “Ya Choobu, o cho wɔ suundaa naa wana lanɔ cheleŋ te, kɛ mi menaŋ po, maa fɛɛŋ a fɛɛŋ bɛɛ I tofa chua laandoo mi lo o koŋ mi del kɔl le hinilaŋ a ndu le.” (Choobu 31:​1) Maa Choobu, ŋ nɔ miŋ mandaŋ a nyɛ naŋ nua wo vɛlɛ a o naŋ yiyaŋ a ndu okɔɔ wo. Nduyɛ maa wana ŋchondoo, miŋ piɛi aa: “Faŋa ya kɔl lo o nyɛm fondoŋ Mɛlɛka.”—Sam 119:​37.

13. A wanaa suu kuɛɛ Daina ndoo tosa yɛ chaŋyɛi?

¹³ Chaaŋaa naa tiuba ma siiŋguu naa a kɛndɛ, te koŋ te, a wɔɔŋ. Te a tosa chaŋyɛi a wanaa cho sawala Mɛlɛkalaŋ tolɔɔ kɔɔli wa pɛ, a cho num mala mi num bɛɛ tosa lende. (Pulɔwaa 13:​20; nuawɔ Kɔliŋtiaŋ Tasoo 15:​33.) Nyɛ yɔŋnuŋ Daina wo mala naa miŋ che mɛɛ i cho suɛi sɔvɛ le chaŋyaŋ hɛlioo yɛ. Chekɔpu velu Daina ni, le hei o yuŋgu ndoo piɛi Chɛhowa wo niŋ o sul ni. Daina ve wana kaa nɔɔlɛi le, kɛ mbo tosa chaŋyɛi a chuaa laanduaa Kenanaitiiya. Kenanaitiiya ndaa piɛi Chɛhowa le. Isɔluɛiya ve wanaa kaa nɔɔlɛi  le, kɛ Kenanaitiiya nda, ndaa ke sawa Mɛlɛkaa bɛɛleŋ a chiɛiniŋndo okɔɔ le. (Lɛvitikɔɔ 18:​6-25) Mɛɛ Daina wa a chaaŋaa nduaa latulu, ma chiikaŋ nda po Kenanaitiinɔ pilɛ diolaŋ aa Siɛkɛm. Mbo luɛi Daina hɔlteŋ. Siɛkɛm wa wana nda “kɛsi kɔllo choo mbo hiau” a tuaa o yuŋgu ndɔɔ niŋ kpou wo ni. Kɛ ndoo kaala Chɛhowa le.—Chɛnɛsee 34:​18, 19.

14. Yɛɛ ndoo yɔŋnuŋ yɛ Daina?

¹⁴ Mi Siɛkɛm tosa nyɛ ndu yiyaŋ maa o bɛnda wo. Le mɛɛ yeemɛi Daina ve ndii bii ndu tau yɛ, mbo bii ndu nduyɛ mbo ‘kpuuwa ndu.’ (Nuawɔ Chɛnɛsee 34:​1-4.) Mi suɛi wɔɔŋ Siɛkɛm tosa hei ve kandu sɔɔŋ cheleŋ mɛlioo. Mi hei huŋ a kpundɔɔ le Daina a yuŋgu ndɔɔ kpou.—Chɛnɛsee 34:​7, 25-31; Kaleesiaŋnda 6:​7, 8.

15, 16. Vɛɛ naŋ looku yɛ simnɔŋ wanaa taasi?

¹⁵ Ŋ nɔ miŋ tosa biondɔŋ Daina tosa wo malaŋ naŋ sina maa sawala Chɛhowalaŋ la cho le tɔnɔ naa le. “Te wana balu a wana kɔl kaloo pɛ, num bɛɛ a simnuŋ wana kɔl kalu. Kɛ wana o wana balu a diɔmnda pɛ, a saŋga.” (Pulɔwaa 13:​20) Kɛɛsiaŋ o kɔl le ma “wa wana tosaa sɔɔŋ kɛndɛ.” O hei niŋ, kɔl tambɛi a nyɛpalaa komal waŋnda le sɔɔŋ muŋndo komal num te.—Pulɔwaa 2:​6-9; Sam 1:​1-3.

¹⁶ Tuupa miŋ tosa kɛɛsiaalaŋ, ŋ nɔ miŋ pɛɛku Diom Mɛlɛkaa nduyɛ miŋ piɛi o ndu lo. Okoŋ, miŋ tol sila buɛi cho sakpo nduyɛ mbo wa buɛi kɔl kalu wo kɔɔli. Ŋ tosa pɛ lende ŋ simnuŋ wanaa taasi. (Maatiu 24:​45; Chemisi 1:​5) A tonya, a sina maa naa kpou nɔ dialuŋ vilɛiyoŋ nduyɛ wanaa lahakiaa naŋ cho ni. (Chɛluimaya 17:​9) Kɛ yɛɛ ŋ cho yɛ tosa te waŋndo sila num pɛ maa suɛi ŋ cho tosaa ve cho num yɔɔ o kaa nɔɔlɛiyo niŋ? Baa a cho dɔunɔŋ tumbe, ɔɔ a cho tusiŋ  ma chɛl mala o cho numndo?—Masaa Bɛnduaa Diiŋ Nduaa 22:​18, 19.

17. Chɔmndɔ taamaseliiyo mɛɛ sila chaaŋ naa Kilisiɔŋnɔɔ ke naa wo mala naa yɛ.

¹⁷ Yiyaŋndɔ a taamaseliiyo hoo okɔɔ. O fondaŋ ndepilɛnɔɔ tosa wallo wo, poo pum kandu ndu hɔlla kioo. Paale pilɛ, mi poo hoo dimul ndu le ma kuɛ kelaa nda ŋiɔɔŋ. Poo hoo sina Chɛhowa le, kɛ o cho wana kɛndɛ nduyɛ o nɔ kɛndɛi. Mɛɛ ndepilɛnɔ cheleŋ che nda, mbo kindiŋ le ndepilɛnɔ kuɛ hoo kelaa nda poo hoo wo silaa. Yɛɛ ndepilɛnɔ nda sila hoo wo cho yɛ tosa? Baa o cho pa nɛilaŋ nuuviaa le kɔɔsɔɔ ɔɔ o cho taasioo chɔ o sila koŋ niŋ? Naapum ndepilɛnɔɔ hoo kaala Chɛhowa nduyɛ o yeema nyɛ bɛnda wo tosaa. Kɛ te o lambaŋ pɛ kɔlaŋ kelaa nda poo hoo, baa o cho pa kaa ihini nɔɔlɛiyo nyaanɔŋndo ɔɔ o cho ‘tiindaŋndo dɔwɔɔ o ndu pila niŋ’?—Pulɔwaa 22:​3; 28:​26; Maatiu 6:​13; 26:​41.

18, 19. Tɛɛsiaa mɛɛ Choosɛ nyaanuŋ kaa nɔɔlɛiyo yɛ.

¹⁸ Teleŋ Choosɛ wa o chɛleŋ niŋ Ichipi wo, o wa feleŋgɔnɔ. Lepaa o lepaa, lanɔɔ wana ndɔ bɛndoo wa ndu kɔɔli le mbo wa a ndu. Kɛ mi Choosɛ sina maa hei niŋ kposoŋ te. Choosɛ ndoo kaala Chɛhowa nduyɛ ndoo yeema mbo nɛŋi ndu kɔl. Teleŋ o teleŋ chuaa hoo ndoo kindiŋ pɛ le mi Choosɛ wa a ndu, Choosɛ kɛɛ. Le mɛɛ o wa chiɔɔ yɛ, ndoo nɔla mbo mal chiɛi wana ndɔ bɛndoo lende le. Paale pilɛ, mɛɛ lanɔɔ wana ndɔ bɛndoo kindiŋ le ndu baŋɔɔ le mbo wa a ndu, “mbo fulaŋ o bɛɛ a kiltaŋ”.—Nuawɔ Chɛnɛsee 39:​7-12.

¹⁹ Te Choosɛ ndoo wa pɛ yiyaŋndo o sɔɔŋ nɔɔlɛiyoŋ choo, ɔɔ mi ndoo wa yiyaŋndo a mɛɛ ndoo looku mbo wa a chuaa hoo yɛ, o wa chɛlɔɔ. Kɛ chaŋyɛi wa Choosɛ tɛɛŋ nda Chɛhowa ve wa isɔvɛ o yoomu ndɔɔ niŋ mbo hiau nyɛ o nyɛ. Mbo dimul chuaa aa: “Wana ni bɛndoo . . . hendul la sawa o sawa nyɛ o nyɛ choo chiɛi niŋ nanuŋ te, mɛɛ num, kani fondole, laa ndɔ ŋ cho ni. Vɛ mi tosa suɛi kɔl vesɛi bɛnduii waa lende? Vɛ mi tosa yɔŋ wɔɔŋ waa lende Mɛlɛka o hɔl?”—Chɛnɛsee 39:​8, 9.

20. Vɛɛ naŋ looku yɛ sina maa mi Chɛhowa hini kɔl a Choosɛ?

²⁰ Mi che bɛɛ Choosɛ wa landaŋ a yuŋgu ndɔɔ vɛlɛ a lɛŋnde ndɔleŋ, kɛ o wa lɔɔlɔɔ Mɛlɛka diikɔŋndo, nduyɛ mi Chɛhowa duau ndu sala. (Chɛnɛsee 41:​39-49) Mi Chɛhowa naŋ kɔl tau a diikɔŋ Choosɛ wa ndu wo. (Pulɔwaa 27:​11) I ve bɛɛŋ bɛɛŋ le kaa nɔɔlɛiyo nyaanɔŋndo le. Kɛ loonuŋ hei: ‘Wanaa kaala Mɛlɛka Yaawɛɛ wa kinɛi, la tul yɔŋ wɔɔŋndo leyɛ. Kani fondole, wanaa cho Mɛlɛka o hɔl sakpo wa, mandaa Mɛlɛka manda yoomula ndalaŋ ni, nduyɛ mbo kiindiaa yoomula ndalaŋ wanaa dɛnɛ wɔɔŋnda o ba.’—Sam 97:​10.

21. Vɛɛ puaapilɛnɔ feleŋgɔnɔ pilɛ tollɛ taamasi Choosɛ wo kɔɔli?

 ²¹ Lepaa o lepaa, wanaa Chɛhowaa cho chɔmndo maa a “tul yɔŋ wɔɔŋndo leyɛ” nduyɛ a “kaala o cho tonyaa wo.” (Emɔɔsi 5:​15) O wa chuaambɔ ɔɔ kaasoŋnɔ, a nɔla ma diikuŋ Chɛhowa. Paale pilɛ, mi tɔɔndaŋndo komal puaapilɛnɔ feleŋgɔnɔ pilɛ o sukuu. Mɛɛ nda wa tofa nda ke nda o sukuu wo tosaa, mi chuaambɔ laandoo dimul ndu maa te o chɔm ndu pɛ, o hini a ndu. Yɛɛ puaapilɛnɔɔ hoo ndoo tosa yɛ? Mbo tosa maa Choosɛ. Mbo dimi aa: “Mi kɛɛ suɛi o dimul la hei ve o foofo. Le mɛɛ ya luei baa o kaa hoo niŋ te yɛ, i pisi bɛɛle nileŋ te.” Te kaa nɔɔlɛiyo yelal naa pɛ suŋ suŋ, o cho naa kɔl tambɛiyo a nyɛ nɛiyaa chuu o chilaŋ niŋ. (Hibuluiya 11:​25) Chɛhowa diikɔŋndo lɔɔlɔɔ huŋ a nyaale fafɛɛŋndo ni.—Pulɔwaa 10:​22.

22, 23. Vɛɛ Chɛhowa mala yɛ naa o yɔŋ bɛɛ miŋ tosa haki wɔɔŋ wɔɔŋndo?

²² Setana cho kaa ihini nɔɔlɛiyo soliŋndo kpeku le miŋ del o yaŋɔɔle ndɔleŋ niŋ, nduyɛ simullo pila hei cho ni. Naa kpou, naapum mi yiyaŋnda wɔɔŋndaŋ la hiŋ naa o lakɔl teleŋnda bɔɔbɔɔ. (Luomaŋnda 7:​21-25) Chɛhowa bii hei bila nduyɛ o sina maa “a puuloo o toosiaa naa ni.” (Sam 103:​14) Te o wa yɛ niko mi Kilisiɔŋnɔɔ tosa kaa ihini nɔɔlɛiyo? Baa o nɔ lɛ tiindaŋ te? Sako. Te wana koŋ mal pɛ yɔŋndɔ wɔɔŋndo, Chɛhowa cho ndu mala. Mɛlɛka cho “o bɛɛndiaŋ le naa malɔɔ le yɔŋnda naala wɔɔŋndaŋ.”—Sam 86:​5; Chemisi 5:​16; nuawɔ Pulɔwaa 28:​13.

²³ Chɛhowa ke naa vɛlɛ bɛnduaa kundaa. A kaala naa nduyɛ a buulaŋ le naa. (Ɛfisiaŋnda 4:​8, 12; Chemisi 5:​14, 15) O ke naa bɛnduaa kundaa le naa malaa miŋ miŋgi chaŋyɛi cho naa tɛɛŋ a ndu ve bɛɛndiaa.—Pulɔwaa 15:​32.

24, 25. Vɛɛ “kɔl kalu” kpeekpeiyo mala yɛ naa miŋ kpakpala kaa nɔɔlɛiyo?

²⁴ Le miŋ tosa kɛɛsiaala kɛndɛlaŋ, ŋ nɔ fɛŋ miŋ bii bila mɛɛ sawala Chɛhowalaŋ la chuu naa tɔnɔɔ yɛ. Ŋ nɔ miŋ wa maa feleŋgɔnɔ Baabuiyo soo a ndu okɔɔ o Pulɔwaa 7:​6-23 niŋndo le. Ndoo nɔ “kɔl kalu” kpeekpei le, lelaŋ mbo del o kaa ihini nɔɔlɛiyo niŋ. Kɔl kaloo hiou dɛnɛ sinaa poloŋ. Te ŋ nɔ pɛ kɔl kalu kpeekpeiyo, miŋ che sɔɔŋ mɛɛ Mɛlɛka che muŋ yɛ, nduyɛ miŋ soliŋ ndu kpeku o yoomu naa niŋ. Kɛsiŋ diomnda taasilaŋ ndaŋ o kɔl: “Wana o wana kindi pɛ ma sɔla kɔl kaloo, mɛɛ a kaala yoomu numndo. Wana o wana kɛsiŋ nyɛ o sina pɛŋgu wo o kɔl pɛ, dɛnɛ kɛndɔɔ wa le ndu ni.”—Pulɔwaa 19:​8.

²⁵ A laalaŋ pa kɛsɛ maa sawala Mɛlɛkalaŋ la bɛnda? A laalaŋ kɛsɛ maa te a diikuŋ ndaŋ pɛ a wa a nyaale? (Sam 19:​7-10; Aisaya 48:​17, 18) Te kiisaŋndo wa wɔ num pɛ, loonuŋ a sɔɔŋ kɛndɛŋ Chɛhowa tosal num niŋndoŋ kpou. ‘Huŋ naa Mɛlɛka Yaawɛɛ chua ma che mɛɛ o cho wana kɛndɛ yɛ.’ (Sam 34:​8) A cho chɔ maa mɛɛ ŋ hiau lachi a hei tosaa fau, lende koni ŋ hiau lachi a Mɛlɛka kaalaa ni. Kaala nyɛ o kaala wo, ma tul nyɛ o tul leyɛ wo leyɛ. Wa yiyaŋndo o sɔɔŋ sandaŋ, sɔɔŋ lebiɔɔŋ, sɔɔŋ cho sakpo woŋ, sɔɔŋ diandaŋ, sɔɔŋ kaalaŋ, a o sɔɔŋ bɛnda woŋ choo. (Filipiaŋnda 4:​8, 9) Mi Choosɛ sɔla tɔnɔɔ o taasi Chɛhowaa niŋ. Ŋ nɔla miŋ tol taamasi ndɔɔ kɔɔli.—Aisaya 64:​8.

26. Yɛɛ naŋ cho yɛ hunɔɔ yaasiaa?

²⁶ O yɔŋ bɛɛ aa a chua niŋ nɔɔ ɔɔ a chue wɔ nɔ le, Chɛhowa yeema num ma tuei yoomu numndo yeela nduyɛ ma wa a nyaale. Ŋ cho hunɔɔ yaasiaa buŋgaŋ ŋmuuŋ a nɔɔ okɔɔ. Buŋgaŋ muŋ cho naa mala miŋ sɔla batiuwaa o nɔɔ niŋ.