BUULAŊNDO piiliaŋ wana o wana, nduyɛ wanaa Mɛlɛkaa bɛɛ. Mi wana ŋchondoo poonyiaa aa, “Buulaŋ bɛndoo o luɛi o kɔl nuu niŋ.” (Sam 94:19) Nduyɛ, mi Chiisu dimi maa a teleŋ palɛi mɛɛlɛi, “kɔl landaŋ nyɛ nuuviaa chieeŋndo” nɔla mbo tosa mii wa ikala le Chɛhowa piɛiyo. (Luku 21:34) Num yɛ? Baa bahawɛi nyɛsɔlaa, o yuŋgoo, ɔɔ o kɛndiaa hiou num mayoomu? Vɛɛ Chɛhowa mala yɛ num ma biuŋ?

Ŋ nɔla bahawɛi buulaŋndo soli a ba naa le. Mi kiilanɔɔ Pɔɔl poonyiaa aa, “Le lɔɔ lɔɔ, a cho naa nyɛ kindilaa handɔɔ choo . . . Mi sɔɔŋ pala naa. . . . Teleŋndaŋ la pum ma chuu naa.” Kɛ mi Pɔɔl dimi vɛlɛ maa, “muŋ kpou ŋ nɔla mi ŋ bɛɛviaa naa le.” “Ŋ tembu kɔl te.” Nduyɛ, ŋ “nɔla naa tɛɛmbuu le.” Kɛ yɛɛ mala yɛ naa miŋ biunuŋ? “Kpaaya bɛndu” Chɛhowa, Mɛlɛka kpaaya kpou kpou wo yɔŋgu wo tosa hei ni.—Kɔliŋtiaŋ Diiŋ Ndɔɔ 4:7-9.

Yiyaŋndɔ a mɛɛ ŋ sɔla “kpaaya bɛndu” koŋ o paandoo niŋ yɛ. A loonuŋ pa a suɛi kɔl dɛɛniaa ŋ yaŋ nilaŋnde, i chɔɔlu balika melaa numndo le kaala Chɛhowaa, o nɔ la mɛɛlu le wo? Baa tiindaŋ numndo o mɛila Chɛhowa laŋ niŋ ndoo chɔɔlu pa kalu teleŋ ŋ wa acheleŋnda pɛɛkoo a tiindaŋ Kpele Hɛnɛkiɔɔ okɔɔ wo? Te ŋ kuɛ pɛ o bɔŋaŋnda naala leKilisiɔŋndaŋ, nduyɛ miŋ dimul acheleŋnda a tiindaŋ naa okɔɔ, ŋ nɔla miŋ sɔla kpaayaa le buulaŋndaŋ biuwɔŋndo o yoomu naa niŋ, nduyɛ miŋ sɔla kɔlnyuloo le Chɛhowa piɛiyo a nyaaloo.

O kpeekpei niŋ, lepum mi sɔɔŋ yɛ yiɔɔŋ wa num nanɔɔ a teleŋ pilɔɔ kpe. Le tamaseliiyo, Chɛhowa dimul naa le miŋ landuŋ ndɔ fɛŋ kɔl le Masale ndɔleŋ, nduyɛ miŋ wa sɔɔŋ iMɛlɛkayaŋ tosaa. (Maatiu 6:33; Luku 13:24) Kɛ te o wa yɛ niŋ mi simultaŋ, kɛndiaa lepɛŋndo, ɔɔ bahawɛila yuŋgoo tosa ma vi ŋdial? Ɔɔ, te o wa yɛ niŋ mi wali ŋ cho tosaa wo chua teleŋ numndo, a yoomuma numndaŋ le nyɛ ŋ nɔ le tosaa o kunda leKilisiɔŋndo niŋndo? Te a nɔ pɛ nyɔɔŋ tau le tosaa kɛ ma nɔ teleŋ bɔɔ le, mi yoomuaŋ ma fula num po. Kɛlɛŋgaa ma yiyaŋ pɛɛŋ lepum maa Chɛhowa yeema num ma tosa nyɛ ŋ tiuba le wo.

Chɛhowa nɔ sinapɛŋgoo. O nyuna naa le tosaa nyɛ naŋ tiuba le wo le. Nduyɛ o sina maa o chua teleŋndo le fulaa o nyɛkindilaa naŋ wa lebɛŋgu wo.—Sam 103:13, 14.

Nuawɔ tamaseliiyo a mɛɛ Chɛhowa ndoo mala Ilaicha yɛ, wana ndoo suaa le ndu wo. Teleŋ Ilaicha ndoo tambu kɔl nduyɛ mi sioonde bii ndu mbo nyaanuŋ o yondo pollo niŋndo, baa mi Chɛhowa ndoo suaa ndu le mbo miiŋgu naa o ke ndu wallo le tosaa wa? Sako bɛɛ. Mi Chɛhowa viam maalikɛinɔɔ bɛmbɔɔ lediiŋ le mbo tindi Ilaicha mbo ke ndu nyɛdiaa mbo de. Nduyɛ, mɛɛ palɛi 40 hiou o koŋ kɔɔli, buulaŋndo a sioonde wa wɔ Ilaicha. Yɛɛ cheleŋ Chɛhowa ndoo tosa yɛ le Ilaicha malaa? O tasoo, mi Chɛhowa chɔm maa o cho ndu  mala. O diiŋ ndɔɔ, mi Chɛhowa dɛɛniaa ndu “toolo pɔ pɔ.” O mɛɛlaa kpɔŋ, mi Chɛhowa chɔm ndu maa wanaa cheleŋnda wa ndu piɛiyo a tiindaŋndo o waalaŋ niŋ. O viu bɛɛ le mi Ilaicha kandu vɛlɛ suɛi le Mɛlɛka a dialuŋ fulaa. (Masaa Bɛnduaa Tasiaa 19:1-19) Yɛɛ hei pɛɛku yɛ naa? Mɛɛ buulaŋndo hiou Ilaicha mayoomu, mi Chɛhowa biunuŋ ndu, nduyɛ mbo chɔm ndu nyɛiye. Chɛhowa siŋgaŋ te. O mala naa o nɛi pilɔɔ hoo cho kpe.

Yiyaŋ nyɛkɛndɛi a nyɛ ŋ tiuba ma tosa le ­Chɛhowa wo. Tuu nyɛ ŋ tiuba le tosaa hau wo a o num oo tosa paandu wo le. Le tamaseliiyo, te wana ndoo nyaanuŋ paandu wo pɛŋgi pɛ pɛɛkoo le paŋgoŋ ɔɔ wɔsioŋ, o nɔla mbo kandu ndɔɔ vɛlɛ nyaanɔŋndo ma paandu le. Kɛ, mɛɛ mbo kandu fɛŋ nyaanɔŋndo nyɛɛmbɔ nyɛɛmbɔ malaŋ o sɔla vɛlɛ yoomuaŋ le biuwɔŋndo maa paandu. Kilisiɔŋnda cho ko maa wanaa nyaanaŋ. A cho pɛɛkoo a kpeleŋndo o kɔl. (Kɔliŋtiaŋ Tasoo 9:24-27) Le yɛɛ a kɛsi kpeleŋndo suŋsuŋ o Mɛlɛka piɛiyo niŋ, o ŋ tiuba ma komallo le? Le tamaseliiyo, a kɛsi kpeleŋndo le kɔlaŋ o bɔŋaŋ leKilisiɔŋndo. Nyuna Chɛhowa le mbo mala num ma komal kpeleŋndo hoo. Te a sɔla vɛlɛ pɛ yoomuaŋ o Mɛlɛka piɛiyo niŋ, a cho chɔ mɛɛ Chɛhowa cho wana kɛndɛ yɛ. (Sam 34:8) Loonuŋ maa nyɛ o nyɛ ŋ tosa pɛ le kaala numndo chɔmndo le Chɛhowa, nduyɛ o wa bɛɛ o pɔmbuiinii, o cho nyɛ sɔvɛ bɛndu le ndu.—Luku 21:1-4.

Vɛɛ Chɛhowa ndoo mala yɛ Chuŋ le ndu miiŋgoo o ibuŋ? Mbo dimul naa aa, “I wa Chɛhowa nyunaa o piɛileŋ niŋ le mbo mala ya. Mi lanɔɔ po nuu dimulla a bɔŋaŋ ibuŋga nda wa biyɔɔ o chiee ya wa niŋndo okɔɔ. Mi kɛɛsiaa le bɔŋaŋ koŋ biyɔɔ paaleŋ lepilɛ. Nduyɛ, I wa bɔɔ a nyaaloo le miiŋgoo wanaa Chɛhowaa tɛɛŋ! O bɔŋaŋ koŋ ya sɔla mala ya wa chumndo wo ni. Suŋsuŋ, I cho vɛlɛ Chɛhowa piɛiyo a nyaaloo. Yoomu nuu nɔ vɛlɛ saboo tau. I hiou kpou ve cho ni, I sina maa I yeema puaapiliaa a ndepiliaa niaa, nduyɛ I nɔ mi chɛl mala ndaa.”