Isɛ chaaŋ naa laalaŋndo,

A mɛɛ ŋ sina yɛ, Baabuiyo soo a waŋchieeya okɔɔ tau. Wanaa bɔɔbɔɔ wa Chɛhowa piɛiyo o laalaŋndo choo o sindɔɔ niŋnda, mi simultaŋ la komal nda mɛɛ la cho naa hau komallo yɛ. Nduyɛ nda bɛɛ ‘waŋchieeya koni nda wa ni mɛɛ naa ŋ cho nuaa yɛ.’ (Chemisi 5:17) Mi kpundɛlaŋ a buulaŋndaŋ la paaliaŋ apum tau. Apum yɛ, mi yuŋgula ndalaŋ ɔɔ chaaŋaa ndaa laalaŋnda tɛɛmbuu nda kɔllo tau. Nduyɛ, a bɔɔbɔɔ wa a kɔl tambɛiyo le hakila nda tosalaŋ.

Baa waŋnda haa ndaa mal pa Chɛhowa waŋ waŋ? Sako bɛɛ. A bɔɔbɔɔ wa maa wana ŋchondu pilɛ, o ndoo piɛi aa, “I mal nɛi numndo mi laasiaŋ mɛɛ saa o laasiaŋ nuaa yɛ. lelaŋ huŋ ma huŋ nuuviaa ya buɛi numndo, kani fondole, I puɛɛnuŋ a sawala numndaŋ okɔɔ le.” (Sam 119:176) Num bɛɛ hei yɔŋnuŋ num niŋ?

Chɛhowa puɛɛnuŋ a saa laasiaŋ o saa kundaa nduaa tɛɛŋndo le. O baa pilɔɔ choo, mbo soliŋ chaaŋaa nduaa laalaŋnda kpeku le nda nuuviaa. Tofawɔ tamaseliiyo a mɛɛ Chɛhowa ndoo mala buɛi ndɔɔ Choobu yɛ, teleŋ nyɛpalaa bɛndoo komal ndu wo. Mbo luɛi o bahawɛi nyɛsɔlaa niŋ, mi chuauwaa nduaa sɔla piɔmndo, nduyɛ mi naa wɔɔŋ wɔɔŋndo bii ndu. Mi Choobu biunuŋ vɛlɛ diomnda nɛiyaala chaaŋaa nduaa o wa kɔl maa a cho ndu mala wa. Mi che bɛɛ naa mbo laasiaŋ o yiyaŋ ndɔɔ niŋ le teleŋndo opum, kɛ o mulul Chɛhowa kɔɔ le. (Choobu 1:22; 2:10) Vɛɛ Chɛhowa ndoo mala yɛ ndu le yiyaŋ kɛndɔɔ sɔlaa?

Nɛiyo opilɛ o Chɛhowa soliŋ kpeku le Choobu malaa wo wa chaaŋndɔ laalaŋndo Ilaihu ni. Mɛɛ Choobu chɔm nyɛ wa buulaŋ ndɔɔ wo, mi Ilaihu yaŋ nilaŋ, nduyɛ mi kɔllo yusa Ilaihu le suɛi. Yɛɛ o cho yɛ dimi? Baa o cho pa Choobu pɛɛsa, mbo dimul ndu suɛi tɛɛmbu ndu kɔllo ve ɔɔ mbo tuisi ndu siɔmbulaŋ? Sako bɛɛ! Mi nyina Mɛlɛka nyindu Ilaihu mbo dimul ndu aa, “Choobu, tofa wɔ naa num nyɔɔ ndu pilɛ kpe naa ŋ cho Mɛlɛka o hɔl ni. Mɛɛ Mɛlɛka toosiaa num a puuloo yɛ koni o toosiaa ya a puuloo ni.” Mbo dɛɛniaa ndu kɔllo aa, “Lelaŋ yɔŋ isiooŋ a ya le. Yiyaŋ maa nyɛ palaa le ya cho num handɔɔ choo le.” (Choobu 33:6, 7) Ilaihu hendu Choobu nyɛpalaa choo le, kɛ mbo ke ndu sila kaalaa, vɛlɛ a kɔl dɛɛniaa Choobu ndoo yeema wo.

A yandii, sinapɛŋgu maa a yeemɛi pilɛi keŋ kpe naŋ toosiaa yauwo hoo ni. I tasei peŋ, ŋ yaŋ fɛŋ nilaŋ nyɛkɛndɛi o wanaa ndaa mal tonyaa ma laasiaŋnda lo, nduyɛ a bahawɛila tosa nda ma laasiaŋndo. (Pulɔwaa 18:13) Okoŋ, miŋ muli hɔlla o Baabuiyo choo, miŋ piɛi o Chɛhowa lo. Miŋ soliŋ vɛlɛ bolii Baabui chɔm mɛɛ Chɛhowa ndoo mala buɛiyaa nduaa o sindɔɔ niŋ yɛ teleŋ simulta wanaa la komal nda wo. O mɛɛlulaŋ kpɔŋ, miŋ duau tamaseliilaŋ ndaŋ o Baabuiyo niŋ, a laŋ o teleŋ naa hoo niŋ diompilɛ le yauwo hoo toosiaa. Ŋ cho num dɛɛniaa le yauwo hoo pɛɛkoo. Yaandii, kɛsiŋ o kɔl maa ŋ kaala num bɔɔ.

Dialii Kuumbaŋ Choo Seiyaa Chɛhowaa