BUŊGƐI HIƆƆLU VE
Kɔl Tambɛi Hakioo “Dɛnɛ o Dɛnɛ Wɔɔŋ Ya I Tosa, Mal La le Ndu Ma Dindi Ya”
“Mi wali sɛnɛi ya sɔla wo siŋga yoomu yuŋgu naa. Kɛ mi wallo hoo luei ya balaŋ o sɔɔŋ wɔɔŋndoŋ niŋ. Mi kandu palɛi bɛnduei biiloo, mi wou balaŋ o sɔɔŋ masale chieeŋndeŋ niŋ, nduyɛ mi kandu kɔlaŋ o kaŋnde cheleŋ. Mi wu dialloŋ o Chɛhowa piɛiyo niŋ le wɔsilaŋ 40. Mɛɛ teleŋndo wa hiouwɔɔ fau, lende koni ya wa chɔɔ ni maa Chɛhowa mellɛ ya haki le. Mi bii yapila tɔɔyaŋ, kanifuule, I sina fɛŋ tonyaa tuupa mi seinuŋ ikɛi.”—Mata.
KƆL TAMBƐI HAKIOO, wolɔɔla lusulɛilaŋ pila o cho ni. Mi Masaa Deeve poonyiaa aa, “Yɔŋnda wɔɔŋnda ya tosa laŋ la mel la a bolleŋ chɔŋgɔmu. Lusul ndɔɔ fuuluu ya mɛɛ, nuaa ŋ cha aa bɔndii bɛndoo cho ya o lebol ni.” (Sam 38:4) Kɔl tambɛi hakioo hiou Kilisiɔŋnda apum mayoomu. Nduyɛ, ma laalaŋ maa Chɛhowa mellɛ nda haki kposoŋ te. (Kɔliŋtiaŋ Diiŋ Ndɔɔ 2:7) Baa tonya keŋ cho ni? O yɔŋ bɛɛ maa haki wɔɔŋ wɔɔŋndo ŋ tosa ni, baa a cho pa landaŋ a Chɛhowa maa o nɔla lɛ mbo mal num haki kposoŋ te? Sako bɛɛ, a cho landaŋ te!
“La Huŋ, Mi Ŋ Huŋ Dimiŋ Diom Pilɔɔ”
Chɛhowa mel wanaa mulul yɔŋnda wɔɔŋndo kɔɔ wa le. Mbo nuuviaa nda pɛɛŋ le nda malaa! O tale poombɔ nilakaloo niŋ, mi Chiisu tuu Chɛhowa a finya kaalaa o po ndɔɔ mal yuŋgu ndɔɔ le kaa nɔɔlɛiyo tolɔɔ kɔɔli wo. O teleŋ pum niŋ, mi poombɔɔ kɛɛsiaa le mbo miiŋgu o finya ndɔ lo. Poombɔɔ hoo “lo landaŋ mi finya ndɔ cha ndu. Mi nyiɛɛyii nduɛi bii finya ndɔ tau. Mi finya ndɔ chaŋ mbo kua ndu lachi a kiltaŋ, mbo kɔ kɔmaŋ ndu, mbo sɔsa ndu kuuwo.” (Luku 15:11-20) A yeema pa ma naŋnuŋ Chɛhowa ikɛi kpɛɛluŋ? Kɛ, a yiyaŋ pa maa o cho “landaŋ” a num? Maa finya kaalaa o tale Chiisoo niŋ, Chɛhowa nɔ nyɛiye le num. O cho a yeemɛi le ma miigu ndu o ibuŋ.
Kɛ, te o wa yɛ niŋ ma yiyaŋ maa hakila numndaŋ la wɔu bɔɔ ɔɔ la cho bɔɔ le mi Chɛhowa mal num haki? A yandii, nuawɔ nyɛ Chɛhowa cho num dimullo o Aisaya 1:18 niŋndo. “La huŋ, mi ŋ dimiŋ diom pilɔɔ. Mi che bɛɛ mi yɔŋnda nyala wɔɔŋndaŋ la diu maa muufu, kɛ I cho laŋ tɔɔ, mi la dendu maa feŋgbɛ.” A tonya, yɔŋnda wɔɔŋnda cho maa nyɛ siaŋa yɔɔ holnuŋ o doma feŋgbɔɔ wo bɛɛ, Chɛhowa nɔla mbo mal num haki le laŋ.
Chɛhowa yeema num ma wa saŋgaa a kɔl iyama nɔɔlɛiyo le. Kɛ, vɛɛ Mɛlɛka looku yɛ num haki malɔɔ, nduyɛ ma sɔla kɔl iyama walaŋndo? Nuawɔ sɔɔŋ sala tiɔɔŋ Masaa Deeve tosa woŋ. I tasei, mbo dimi aa, “I cho yɔŋnda nila wɔɔŋndaŋ chɔɔmuu naa Mɛlɛka Yaawɛɛ chua.” (Sam 32:5) Loonuŋ maa, Chɛhowa veelu num ni le ma piɛi naa ndu cha, nduyɛ le mi la huŋ ‘dimi diom pilɔɔ.’ Chɛl veelu koŋ. Chɔɔmuu yɔŋnda numnda wɔɔŋndaŋ o Chɛhowa lo, nduyɛ ma dimul ndu nyɛ cho num o kɔllo. Nyɛ ndoo yɔŋnuŋ Deeve paandu wo tosa ni mbo piɛi a kɔl ndɔɔ kpou aa, “Melnuŋ ya le yɔŋ ni wɔɔŋndo ma tosa mi simnuŋ o diandaa. . . . Wana nyiɛɛye i bii hoo le yɔŋ ndɔ wɔɔŋndo, nduyɛ mbo mulul yɔŋ wɔɔŋ koŋ kɔɔ mbo pɛŋgi tosaa wo, a kɛɛ wana waa lende le Mɛlɛka.”—Sam 51:2, 17.
O diiŋ ndɔɔ, mi Deeve sɔla malaa Netaŋ o ba, wana Mɛlɛka ndoo yulu iso le mbo soo le ndu wo. (Saamiɛɛ Diiŋ Ndɔɔ 12:13) Hau, Chɛhowa yɔŋgu bɛnduaa o kundaa niŋ, a sɔla pɛɛkoo le ma mala wanaa mulul yɔŋnda ndala wɔɔŋndaŋ kɔɔ wa le ma miiŋgu o chaŋyɛi ndɛi niŋ a Chɛhowa. Te a komal pɛ bɛnduaa kundaa, a cho Baabuiyo soliŋ kpeku, nduyɛ ma piɛi le num kɔllo dɛɛniaa. Keŋ nɔla mii dɔɔniaa ɔɔ faŋa yiyaŋnda wɔɔŋnda ŋ nɔlaŋ, nduyɛ ma sɔla kɛndiaa o Mɛlɛka piɛiyo niŋ.—Chemisi 5:14-16.
Chɛhowa yeema num ma nɔ kɔl iyama walaŋndo
“Wana Mɛlɛka Yaawɛɛ Faŋa Hoo Yɔŋ Ndɔ Wɔɔŋndo, Nduyɛ Nyɛ o Nyɛ Wɔɔŋ O Tosa Mbo Mal Ndu le Ndu wo, Wana Koŋ O Pɛl Tɔnɔɔ”
A tonya, ma yiyaŋ lepum maa, hakila numndaŋ chɔɔmuu wo o Chɛhowa Mɛlɛka lo, a bɛnduaa kundaa wa o kala kpoke le tosaa. Deeve bɛɛ ndoo nɔ yiyaŋ pilɛ koŋ kpe. Nduyɛ, mbo kɛɛ le yɔŋnda ndɔla wɔɔŋndaŋ chɔɔmuu wo le teleŋndo o pum. (Sam 32:3) Kɛ o koŋ kɔɔli, mi kɔllo hini ndu a tɔnɔla o sɔla le yɔŋnda ndɔla wɔɔŋnda o chɔɔmuu laŋ a yiyaŋ ndɔ o siŋga wo.
Tɔnɔ hiou kpou wo wa ni, mi Deeve sɔla vɛlɛ nyaaloo o yoomu ndɔɔ niŋ. Mbo poonyiaa aa, “Wana Mɛlɛka Yaawɛɛ faŋa hoo yɔŋ ndɔ wɔɔŋndo, nduyɛ nyɛ o nyɛ wɔɔŋ o tosa mbo mal ndu le ndu wo, wana koŋ o pɛl tɔnɔɔ.” (Sam 32:1) Mbo piɛi vɛlɛ aa, “Masanɔɔ Mɛlɛka, faŋa ya siɔmbulaŋ mi nɔla mi soo, nduyɛ, mi saŋgala diola numndaŋ.” (Sam 51:15) Mɛɛ Mɛlɛka mal Deeve haki, mbo naŋ kɔl tau. Nduyɛ, mi hei nyindu Deeve le wanaa cheleŋ dimullo a Chɛhowa okɔɔ.
Chɛhowa yeema num ma nɔ kɔl iyama walaŋndo. Nduyɛ, o yeema num ma dimul wanaa cheleŋ a ndu okɔɔ, vɛlɛ a sabula ndɔlaŋ. O yeema num ma wa hei tosaa a kɔl sakpoo, nduyɛ a nyaaloo, kɛ o cho o hakioo niŋ te. (Sam 65:1-4) Loonuŋ a veelu ndɔɔ hoo maa o cho “faŋa yɔŋnda nyala wɔɔŋdaŋ nya kɔɔli, o koŋ kɔɔli, mbo ke nya boonduŋ pɛŋgiaŋ.”—Walta Wanaa Chiisuaa 3:19, 20.
Keŋ ndii yɔnuŋ a Mata ni. Mbo dimi aa, “Po nuu wa ya yaula Bandu Mɛŋgɛlaa a “Tiondoo!” yɔŋndo. Nduyɛ, mi kandu vɛlɛ Chɛhowa sinaa nyɛɛmbɔ nyɛɛmbɔ. Naa yaa che ndi ikala le Chɛhowa miiŋgoo o ibuŋ nda wa le ndu nyunaa le malɔɔ hakioo le hakila ya tosalaŋ ni. Kɛ o mɛɛlulaŋ kpɔŋ, mi nyuna Mɛlɛka o piɛileŋ niŋ le mbo malla haki. O kendu ma laalaŋ maa wɔsilaŋ 40 ya chua ni malaŋ ya miiŋgu Chɛhowa o ibuŋ. Nyɛ yɔŋnuŋ ya wo chɔm maa o yɔŋ bɛɛ mi waŋndo vi ŋdial o Chɛhowa piɛiyo niŋ le wɔsila bɔɔbɔɔ, wana koŋ nɔla vɛlɛ mbo piɛi Chɛhowa, nduyɛ mbo miiŋgu o kaala ndɔɔ bɛŋgu.”
