BUŊGƐI TASEI
“I Cho Nda Nuuviaa Mi Chuuŋgiaa Nda Kpou Naa Pilɛ”
Saa yɔŋnuŋ yoloma yoloma. Naapum billo o lo dioo ni, mbo faŋaŋ chaaŋaa nduaa ikɛi. O nɔla lɛ mbo che chaaŋaa nduaa, ɔɔ wana cho ndu mandaa wo le. Nyumndaŋ ma cho niŋ le tolɔɔ. Mi saa laasiaŋ o kpoloŋndo niŋ, naa visiaa biyaa cho wa. Nduyɛ, wana cho le mbo soli saa hoo o kpundɔɔ niŋ te. Kɛ o mɛɛlulaŋ kpɔŋ, mi saa hoo tuɛi diomnde wana cho ndu mandaa wo. Mi wana mandaa ŋsaa hoo nyaanuŋ o saa laasiaŋ hoo wo lo, mbo kɔ chua ndu, okoŋ, mbo simbul ndu o doma ndɔɔ niŋ, mbo kua a ndu chiee.
TELEŊNDA bɔɔbɔɔ mi Chɛhowa che ndupila maa wana mandaa ŋsaa. Mbo ke naa tiindaŋndo o Diom ndɔɔ niŋ aa, “Ya pila I cho saa niaa nuuviaa, mi chuuŋgiaa nda kpou naa pilɛ, nduyɛ mi ya pila I manda nda.”—Isikiaa 34:11, 12.
“Saa Ya Pila I Cho Mandaa Wa”
Nɛɛ yaa cho yɛ saa Chɛhowaa? Wanaa kaala ndu, nduyɛ ma wa ndu piɛiyo wa. Baabuiyo dimi aa, “Ŋ baŋnuŋ wulaŋ Mɛlɛka Yaawɛɛ lachi, o toosiaa naa wo. Kani fondole, ndu cho Mɛlɛka naa ni, nduyɛ naa ŋ cho wanaa o cho mandaa wa ni, saa nduaa o nɔ hɔlteŋ choo wa.” (Sam 95:6, 7) Mɛɛ saa kpeekpeiya tual wana cho nda mandaa wo kɔɔli yɛ, lende koni wanaa cho Chɛhowa piɛiyo wa nɔ dialuŋ fulaŋ ni, le Wana cho nda Mandaa wo tolɔɔ kɔɔli. Baa a nɔ sɔŋ te? Sako bɛɛ. Teleŋndaŋ lapum, mi buɛiyaa Mɛlɛkaa “sɛŋiŋ,” ɔɔ ma “laasiaŋ,” “mɛɛ saa o laasiaŋ nuaa yondoo niŋ yɛ.” (Isikiaa 34:12; Maatiu 15:24; Pitɛ Tasoo 2:25) O wa bɛɛ lende, te waŋndo laasiaŋ pɛ, Chɛhowa nɔ tiindaŋndo lɔɔlɔɔ maa wana koŋ cho miiŋgu. A yiyaŋ pa maa Chɛhowa cho wɔ num Mandaa ni? Vɛɛ Chɛhowa cho yɛ naa hau Mandaa? Tofawɔ nɛilaŋ la yaa.
O cho naa kioo nyɛm mala naa le pɛɛkoo a ndu okɔɔ woŋ. Mi Chɛhowa dimi aa, “I cho tosa ma wa bil puiyaa kɛndɛ kɛndɔɔ dioo, . . . nduyɛ ma hiniŋ pɛŋgioo o fondaŋ bil kɛndɛ kɛndɔɔ o cho wo. A wa niŋ bil kɛndɛ kɛndɔɔ dioo.” (Isikiaa 34:14) Chɛhowa saŋga a naa kioo nyɛm yɛ yɛ naŋ pɛɛku a ndu okɔɔ woŋ a teleŋndo le. A loonuŋ pa yau ŋ nua wo, suɛi ŋ yaŋ nilaŋnde, ɔɔ viduei ŋ nua mbo muli piɛile numndeŋ le malaa wo? Baa o nyindu num le sinaa maa Chɛhowa buulaŋ le num te?
Mbo manda naa nduyɛ mbo mala naa. Mi Chɛhowa dimi aa, “Saa lo wa, I cho nda nuuviaa, a laasiaŋnda mi miŋgi nda, a cho a yɔŋulɛiya, mi yiu yiu nda pauve, nduyɛ a nɔ dialuŋ kala le wa, mi mala nda.” (Isikiaa 34:16) Wanaa vi ŋdial ɔɔ mi kɔl laŋndɛiyo hiau nda mayoomu wa, Chɛhowa ke nda yoomuaŋ. Te saa nduaa yɔŋuluŋ pɛ, mbo yiu yiu nda le ma seŋgu. Kɛlɛŋgaa mbo soliŋ chaaŋaa numaa laalaŋnda kpeku le hei tosaa. Nduyɛ mbo nuuviaa wanaa laasiaŋnda, a wanaa yiyaŋnda wɔɔŋndaŋ la cho paaliaŋndo wa.
Chɛhowa buulaŋ le naa. Chɛhowa dimi aa, “Ba o ba nda sɛŋiŋ, . . . i cho nda nuuviaa mi chuuŋgiaa nda kpou naa pilɛ. Saa lo wa, I cho nda nuuwa.” (Isikiaa 34:12, 16) Le Chɛhowa ndu, te saa laasiaŋ pɛ, koŋ chɔm naa maa o lo le. O sina teleŋ saa laasiaŋndo. Mbo nuuviaa ndu. Nduyɛ, mbo naŋ kɔl tau te o saaluŋ ndu pɛ. (Maatiu 18:12-14) O fulawɔ bɛɛ o koŋ kɔɔli, o veelu wanaa cho ndu piɛiyo o tonyaa choo wa aa, “saa niaa . . . , saa niaa cho o fonda ni mandaa lasaa wa.” (Isikiaa 34:31) A cho waŋndo opilɛ o saa kaŋ tɛɛŋ.
Le Chɛhowa ndu, te saa laasiaŋ pɛ, koŋ chɔm naa maa o lo le. Mbo naŋ kɔl tau te o saaluŋ ndu pɛ
“Miŋgi Naa Bɛɛle Naale Paanduleŋ o Ba”
Le yɛɛ Chɛhowa cho yɛ num nuuviaa nduyɛ mbo wa num veeloo le ma miiŋgu ndu o ibuŋ? Kanifuule, o yeema num ma wa a nyaale. O mɛi lediom maa o cho saa nduaa salaa dɔuwɔɔ mɛɛ mɛɛ piɔɔ sia naa yɛ. (Isikiaa 34:26) O cho diomnde mɛiyaale fuule le cho leŋ te. Numpila che niŋ ndi pɛɛŋ.
Yiyaŋndɔ sɔɔŋ yɔŋnuŋ numndoŋ mɛɛ ŋ sina Chɛhowa. Le tamaseliiyo, vɛɛ kɔllo wa yɛ num teleŋ tase ŋ sina tonyaa kɛndɛ kɛndɔɔ a diola Mɛlɛkalaŋ okɔɔ vɛlɛ a sabu ndɔɔ le waŋchieeya wo? A loonuŋ mɛɛ i wa suɛi kɔl kɛndɛ bɛndu le waa diompilɛ a chaaŋaa numaa Kilisiɔŋnda o bɔŋaŋnda bɛndaŋ choo yɛ? A loonuŋ mɛɛ ŋ kindiŋ ma dimul wana chɔm yeemɛiyo yooŋgu kɛndɔɔ yɛ, nduyɛ teleŋ ŋ wa miiŋgoo o bɛɛ wo, kɔllo ve num o hiniaa fɛɛ le?
A nɔla vɛlɛ ma sɔla nyaale paandu koŋ. Mi buɛiyaa Mɛlɛkaa o sindɔɔ niŋ piɛi aa, “Yandii Mɛlɛka Yaawɛɛ, miŋgiŋ naa num o ibuŋ. Miŋgi naa bɛɛle naale paanduleŋ o ba.” (Chaŋ Imɔnɔ Chɛluimaya Wo 5:21) Mi Chɛhowa muli piɛile leŋ, nduyɛ mi wanaa nduaa miiŋgu ndu piɛiyo a nyaaloo. (Nɛhimaya 8:17) Lende koni Chɛhowa cho num tosal ni.
Kɛ a koŋ kpou, Chɛhowa miiŋgoo o ibuŋ, dimioo kindu le, kɛ le tosaa. Tofawɔ simultaŋ lapum la tosa mi miiŋgoo Chɛhowa o ibuŋ kendu wo, nduyɛ mɛɛ ŋ chɔulabalaŋ yɛ.
