Yiyaŋndɔ a taamaseliiyo hoo. Kɔllo laasiaŋ Alɛsi. O nɔ laalaŋndo lɔɔlɔɔ o Mɛlɛka niŋ a o nyɛm toosiaŋ niŋ. Kɛ hau, wana ndɔ pɛɛkaa a nyɛm yoomaŋ okɔɔ baŋ kaŋgalaŋ maa nyɔɔŋ a ba ndɔ ŋ hiŋ ni. Mbo dimi maa o yaasiaa wanaa sinaa dɛɛniaa tosa wo choo o tɔlnuŋ ni. Alɛsi yeema mbo chɔm maa diɔmndo le o cho le. Mbo dimuluŋ numpila aa, ‘A koŋ kpou, te wanaa sinaa dɛɛniaa dimi pɛ maa nyɔɔŋ a ba ndɔ ŋ hiŋ ni, mɛɛ wana maavɛɛ ya I cho yɛ mi nyuuniaa nda?’

Te ndoo wa pɛ aa num cho Alɛsi ni, baa chɛlɔɔ ŋ wa ni maa nyɔɔŋ a ba ndɔ ŋ hiŋ ni, kanifuule yaula sukuulaŋ la chɔm maa tonya i cho ni?

Wanaa sɛɛŋgiaŋndaŋ ndaŋ la cho tɛɛŋ nda, haupa ma chɔm nyɛ nda laalaŋndo, mi che bɛɛ a sina le sabu kpeekpei nda laalaŋ ndu wo le.

• Waŋnda apum laalaŋ maa toosiaa nda toosiaa nyɔɔŋ ni kanifuule, lende nda pɛɛku o kaaŋndeŋ ni.

• Waŋnda apum laalaŋ maa nyɔɔŋ a ba ndɔ ŋ hiŋ ni kanifuule, lende nda sɔla pɛɛkoo o sukuu ni.

Baabuiyo dimi aa, “Chiɛi o chiɛi cho o taŋgulaa, wana taŋgul ndu ni. Kɛ nduyɛ, Mɛlɛka yɛ, ndu toosiaa nyɛ o nyɛ fee ni.” (Hibuluiya 3:​4) Baa hei cho tonya le laalaŋndo le?

LAALAŊNDO: Nyɛ o nyɛ fee o choo choo niŋ a o lɛŋndeŋ choo, piɔllo ŋ piɔl ni miŋ fula a ba ndɔ.

LAALAŊNDO: O visiaa niŋ waŋchieeya fula ni.

LAALAŊNDO: Laalaŋndo maa nyɔɔŋ a ba ndɔ ŋ hiŋ ni, dimullo o cho ni.

“Te o yɔŋ pɛ ma wa kelaa o yondo bɛndoo niŋ nduyɛ ma komal chiɛi kɛndɛ kɛndɔɔ loŋ, baa dimioo ŋ cho ni aa, ‘Aa ma che! Yɔmnde hei chaa bɔɔ koombiaa o fondaa hoo mi chiɛiyo hoo sim.’ Sako bɛɛ! Kɔl kalu bɛɛ cho o hei niŋ te. Mɛɛ le sabu yɛɛ miŋ laalaŋ maa nyɔɔŋ kpou o choo choo niŋ a o lɛŋndeŋ choo a ba ndɔ ŋ fula ni?”—Chuliaa.

“Yiyaŋndɔ maa waŋndo dimul num maa kaama nda toosiaa yaulaŋ ndaŋ ma buli bu o chiɛi toosiaa layauwo niŋ, okoŋ, mi ma fasaŋiaŋ o chiɛiyo a o yindɔɔ mi ma simnuŋ yau bɛndu tɛɛsiaa ladiomndo. Baa a laalaŋ pa ndi?”​—Kuwɛŋ.

Baabuiyo dɛɛniaa num le ma ‘yɔŋgu numpila o Mɛlɛka lo maa nyɛ salaa o cho yoomu wo.’ (Luomaŋnda 12:​1) Koŋ sim ni maa laalaŋ numndo o Mɛlɛka niŋ nɔ mbo tɔlnuŋ o sɔɔŋ ŋgaa woŋ muŋ choo le

• YIYAŊNDO (I yiyaŋ maa wana nɔ kpaayaa wo o cho)

• ACHELEŊNDA TOLƆƆ KƆƆLI (O tanda wanaa piɛi Mɛlɛka wa niŋ ya cho ni)

• BAŊƆƆ (Wanaa velu ya wa baŋ ya ni mi laalaŋ o Mɛlɛka niŋ, yaa nɔ mɛɛ ya kɛɛ le)

Kɛ, a nɔ ma chɔm sabula sɔvɛlaŋ le laalaŋ numndo.

“Te I wa pɛ nilaŋ yaŋɔɔ o toŋgo sukuuwo niŋ, mi wana pɛɛkaa wa tɛɛsiaa a mɛɛ dialuŋ naŋ tosa wallo yɛ, kiisaŋ ve ya o kɔl le laalaŋndo maa Mɛlɛka cho achal te. Falii kɛ kɛ o wanachioo niŋ nɔ wallo a ba ndɔ, o yɔŋ bɛɛ aa falii taaniŋnde, nduyɛ waltaŋ ndaŋ kpou la tosaŋ ŋ ve o sina choo le. A tonya kpeekpei dialuŋ wanachioo cho nyɛ kɔndɔfili bɛndu!”—Tɛlisa.

“Te I che pɛ chiɛi choo choo a dɛndɛ mapuulu kua o mɛŋndaŋ choo wo, ɔɔ mɔmbillo, mi nyunaŋ aa, ‘O nɛɛ toosiaa ndu?’ Wanaa kɔl kaluaa chua teleŋndo ni ma toosiaa mɔmbillo. Le taamaseliiyo, nyɛm pɔmpɔmbɔ nɔ le wallo tosaa nyɛkɛndɛi ni malaŋ o nɔla kɔlaŋ. Lelaŋ, te mɔmbiltaŋ la nɔ pɛ wanaa toosiaa, mɛɛ naa waŋchieeya bɛɛ nɔ wana toosiaa.”—Luichaa.

“Mɛɛ ya hiau lachi a pɛɛku bɛndoo fau, lende koni ya chɔɔlu laalaŋ ni maa nyɔɔŋ kpou a ba ndɔ ŋ hiŋ ni. . . . Le ya, mɛɛ ma nɔ ‘laalaŋndo’ tau maa nyɔɔŋ a ba ndɔ ŋ hiŋ ni, mbo hiau laalaŋndo maa Wana Toosiaa cho.”​—Aŋtoni.

Mi che bɛɛ wanaa sinaa dɛnɛ bɛnduaa tosa niŋ yaasiaa le wɔsioŋ o kɛmɛlaŋ niŋ, kɛ a hiŋ ndɔ a tɛɛsiaa chɔm maa nyɔɔŋ a ba ndɔ le ŋ hiŋ, mi nda kpou chɛlaŋ lechoo le. Te o yɔŋ pɛ maa wanaa sinaa dɛnɛ bɛnduaa chɛlaŋ ndɔ maa nyɔɔŋ a ba ndɔ le ŋ hiŋ te, nduyɛ maa nda cho wanaa sinaa dɛnɛ bɛnduaa ni, baa suɛi wɔɔŋ i cho ni le ma kiisaŋ a ndi?