NYUNA 7
Yɛɛ Ya Tosa yɛ te A Wa Ya pɛ Nyindɔɔ le Hiniei Tosaa?
YƐƐ Ŋ CHO YƐ TOSA?
Yiyaŋndɔ a taamaseliiyo hoo. Le paŋgoŋ ŋmuuŋ koni Hɛliŋ che Maki ni, kɛ mbo yiyaŋ maa o sina ndu niŋ le teleŋ vilɛi. Ma yɔŋnaŋ yooŋgulaŋ teleŋ o teleŋ, ma suukaŋ o foŋndo choo le havɛila bɔɔbɔɔ teleŋndaŋ lapum. Nduyɛ pɛɛŋ te hoo kandu suɛi ni, opilɔɔ chii ni! Kɛ suŋ suŋ niŋ, o cho ko suukaŋndo le Maki yeema le.
O paŋguŋ muuŋ hiou woŋ bɛŋgu, mi Maki nda Hɛliŋ saanaŋ balaŋ nduyɛ ma sɔsaŋ chɔchɔŋ nyɛɛmbɔ. Hɛliŋ yeema mbo hiou lachi a hei tosaa le. Kɛ o yeema kposoŋ mi Maki hɛluŋ ndu le. Wana o wana cho mbo lisa ndu maa o naŋ ɔɔ o cho teŋgeŋ te. O fulawɔ okoŋ kɔɔli, mbo dimuluŋ ndupila aa, ‘Naa Maki ŋ kaaliaŋ . . .’
Te a sul pɛ le nuaŋnaŋndo le nɔɔ nduyɛ maa num cho Hɛliŋ ni, yɛɛ ŋ wa yɛ tosa?
SIM KPƐ MA YIYAŊ!
Ke fula Mɛlɛka o ba wo hiniei cho ni, le wanaa cho o nɔlaŋ nda kinɛi. Te a tosa hiniei pɛ tuupa ma chal o nɔɔ niŋ, mɛɛ a chɔm lebɛɛ le ke koŋ kposoŋ te. Nduyɛ o wa ko maa a chua doma kɛndɛ waŋndo ke numndo, ma siiŋguu ndu yuulu wɔɔsaa
Te a fula pɛ o yɔmndo choo nduyɛ ma yeema le balɔɔ o hueiye niŋ maa you, a cho chɔ nyɛ ŋuɛŋ. Nyɛ pilɔɔ kpe i cho a sawala manda naalaŋ ni. Mɛɛ hoo cho naa yɛ, “Wana o wana a nɔ kposoŋ ma suunda nya wana nya cho o nɔ niŋ nya ndu le wo le.”—Tɛsaloniaŋ Tasoo 4:3.
Yɛɛ cho yɛ fulamakɔɔlioo le kiɔɔ sawa koŋ diikɔŋndo? Baabuiyo dimi aa, “Wana wou baa o niilu suundɛiyo niŋ ndo, ndu ndu, dialuŋ ndɔŋ muŋ o wa muŋ nɔɔliaa ni.” (Kɔliŋtiaŋ Tasoo 6:18) Vɛɛ keŋ cho yɛ tonya?
Wanaa yaasiaa ŋsɔɔ wa saaluŋ maa wanaa bɔɔbɔɔ tosa hiniei tuupa ma chal o nɔɔ niŋnda sɔla niŋ fulamakɔɔli laŋ ndaŋ.
-
KƆL TAMBƐIYO. Feleŋguaa bɔɔbɔɔ tosa hiniei tuupa ma chal o nɔɔ wa dimi maa ma tambu kɔl okoŋ kɔɔli.
-
KƐƐ LAALAŊNDO. Mi wanaa tosa hiniei ndapila tɛɛŋ kandu yiyaŋndo aa, ‘A nɛɛ cheleŋ o tosa yɛ vɛlɛ hiniei?’
-
BƐƐLE CHUUWAA LEŊ. Chuaambuaa laanduaa bɔɔbɔɔ, o kɔlta ndalaŋ niŋ di, ma yeema wana nɔla mbo manda nda wo, o cho wana chii nda labɛɛ wo le. Nduyɛ pɔmbuaa bɔɔbɔɔ saaluŋ maa chuaambuaa laanduaa chɛl nda ma tosa hiniei a nda wa nɔ lɛ iyeema le nda le.
-
Nyɛ ŋ nɔ ma kɛsiŋ o kɔllo: Te a chɛl pɛ le hiniei tosaa tuupa ma chua nɔɔ, mɛɛ a chii bɛɛla numndaŋ tɛɛmbuu. (Luomaŋnda 1:24) Dialuŋ numndoŋ cho bɔɔ nyɛ sɔvɛ le muŋ pisioo!
Chɔm maa a nɔ kpaayaa le kiɔɔ “suunda nya wana nya cho o nɔ niŋ nya ndu le wo le.” (Tɛsaloniaŋ Tasoo 4:3) Okoŋ, te a huŋ chal pɛ o nɔɔ niŋ paale pilɛ, a tiuba ma tosa hiniei. Nduyɛ a tiuba ma tuei ndi yeela nyɛkɛndɛi, buulaŋ ve num te, a kil iso le, nduyɛ kɔl tambɛi ve num le fulamakɔɔli wɔɔŋ ŋ sɔla le hiniei tosaa tuupa ma chal o nɔɔ wo le.—Pulɔwaa 7:22, 23; Kɔliŋtiaŋ Tasoo 7:3.
YƐƐ Ŋ YIYAŊ YƐ?
-
Baa wana kaala num kpeekpeiyo luei pa kɔl numndo a yiyaŋ numndo kpou o kpundɔɔ niŋ?
-
Baa wana buulaŋ a num kpeekpeiyo luei num pa o tɔɔndaŋndo niŋ le chaŋyɛi numnde tɛɛmbuuwo nya Mɛlɛka tɛɛŋ?—Hibuluiya 13:4.