1-3. O biyɔɔ kuɛɛ bɛŋgu naa kpou cho yɛ, nduyɛ vɛɛ Chɛhowa cho yɛ naa soli leniŋ?

YIYAŊNDƆ maa a dɔu num o chiɛi manyumndo niŋ le sawa ŋ tɛɛmbuu le wo, nduyɛ a nɔ ma lo loŋ tei ma vi. A nɔ tiindaŋ kposoŋ te a cho num malɔɔ le, nduyɛ a tiuba nyɛ o nyɛ tosa a hei okɔɔ le. Kɛ mɛɛ ŋ wa a tiindaŋ lepɛŋ koŋ, ma saaluŋ maa waŋndo nɔ kpaayaa le num solioo o chiɛi manyum koŋ niŋ. Nduyɛ mi wana koŋ chua num bɔŋ le num malaa! Vɛɛ ŋ cho yɛ yiyaŋ?

² Naa kpou cho o biyɔɔ niŋ piɔmndo o ba bɛŋgu. Mɛɛ mɛɛ naŋ tosa, ŋ nɔla miŋ hɛluŋ ndu le. Kɛ Chɛhowa nɔ kpaayaa le naa solioo o piɔmndo niŋ. Nduyɛ o chua buŋgɛi maa ‘yaamɔɔnɔ o mɛɛlu niŋ tɛɛmbuu kpɔŋ ndo, ndu cho piɔmndo ni.’—Kɔliŋtiaŋ Tasoo 15:​26.

³ Yiyaŋndɔ a mɛɛ hei cho num hɛnɛkɛyɛi ke yɛ te buulaŋ ve lɛ num le piɔm te! Kɛ o cho ko piɔmndo le Chɛhowa cho faŋa le. O cho vɛlɛ wanaa vi wa miŋgi yoomu pila. Yiyaŋndɔ nyɛ keŋ sim le numndo. Chɛhowa chua buŋgɛi maa “wanaa num a vi wa kinɛi, a cho vɛlɛ miiŋgu yoomu.” (Aisaya 26:​19) Hoo Baabuiyo veelu ni aa fulasɛiniŋndo.

4. (a) Yɛɛ ke yɛ naa kɔl dɛɛniaa te wana naŋ fula yuŋgu pilɔɔ wo ɔɔ chaaŋ naa vi pɛ? (b) Nɛɛ yaa wa yɛ chaaŋaa Chiisuaa apum?

⁴ Te wana nya fula o yuŋgu pilɔɔ niŋndo ɔɔ chaaŋ num nya chii baltaŋ ndo vi pɛ, i wa ikala le nyɛ nɛiyaa a kɔl tambɛi koŋ biuwɔŋndo. Ŋ tiuba nyɛ o nyɛ tosa le wana koŋ miŋgioo yoomu le. Kɛ Baabuiyo ke naa  kɔl dɛɛniaa kpeekpeiyo. (Nuawɔ Kɔliŋtiaŋ Diiŋ Ndɔɔ 1:​3, 4.) Ŋ yaasiaŋndɔ taamaseliiyo opilɛ. O cho naa chɔm maa Chɛhowa nda Chiisu nɔ yeemɛi le wanaa naŋ kaala ma wu wa miŋgioo yoomu. Teleŋ Chiisu wa o chieeŋndo choo wo, mi ndoo kuɛ Lasalɔɔ yilɔɔ daandi daandi, vɛlɛ a yeemaa nduaa, Mata nda Meele. Nda yaa kpou chaaŋaa sɔviaa pila nda wa le Chiisu ni. Baabuiyo dimi aa, “Chiisu ndu oo kaala Mata nda Meele pɔmbɔ ndɔ a Lasalɔɔ yema nda tau.” Kɛ paale pilɛ, mi Lasalɔɔ wu.—Chɔŋ 11:​3-5.

5, 6. (a) Yɛɛ Chiisu ndoo tosa yɛ mɛɛ o che yuŋgu Lasalɔɔ wo a chaaŋaa nduaa chaŋndo? (b) Le yɛɛ i cho yɛ suɛi kɔl dɛɛniaa le sinaa mɛɛ Chiisu che piɔmndo yɛ?

⁵ Mi Chiisu kua le Mata nda Meele kɔllo dɛɛniaa. Mɛɛ Mata tuei maa Chiisu cho hunɔɔ, mbo diam Chiisu. Ndoo naŋ bɔɔ kɔl le Chiisu chɔɔ. Kɛ mbo dimul ndu aa, “Te num o wa nanuŋ pɛ, yema nuu o ve wu le.” Mi Mata yiyaŋ maa Chiisu keleŋa hunɔɔ le. Okoŋ kɔɔli, mi Chiisu cha Meele pɔmbɔ ndɔ chaŋndo. Mɛɛ o che mɔnɛi o wa biyɔɔ ve, mi Chiisu tambu kɔl, nduyɛ mbo tuisi mɛmiaŋ kpasu kpasu. (Chɔŋ 11:​21, 33, 35) Mbo sinaŋ nyɛ nɛiyaa wa naa choo wo, te wana naŋ kaala wo vi pɛ.

⁶ Sinaa maa mi Chiisu bɛɛ bii mɔnɛi le piɔmndo mɛɛ naŋ bii mɔnɛi yɛ, ke naa kɔl dɛɛniaa. Mɛɛ finya ndɔ cho yɛ koni Chiisu bɛɛ cho ni. (Chɔŋ 14:​9) Chɛhowa nɔ kpaayaa le piɔmndo faŋaa le fafɛɛŋ, nduyɛ, keŋ o cho tosa suŋ suŋ ni.

7, 8. Le yɛɛ Mata ndoo yeema ma faŋa pouwo o sɛi Lasalɔɔ wo le? Kɛ yɛɛ Chiisu ndoo tosa yɛ?

⁷ Mɛɛ Chiisu fuuluu o sɛiyo naa nda kumbu Lasalɔɔ wa, pou bɛndoo wa o handaa o sondoo. Mi Chiisu dimi aa, “La faŋa pouwo.” Kɛ Mata ndoo yeema ma faŋa  pouwo le. Dialuŋ Lasalɔɔ woŋ muŋ chii niŋ palɛi ihiɔɔlu o sɛiyo niŋ. (Chɔŋ 11:​39) Mata ndoo sina nyɛ Chiisu wa tosa le yema ndɔ malaa wo le.

⁸ Mi Chiisu dimul Lasalɔɔ aa, “Fula.” Nyɛ Mata nda Meele ndaa che wo wa suɛi kɔndɔfili bɛndu. “Mi po ndu oo vi wo fula. Balaŋ ni a peloŋ, la wa ndu la yiu yiuwaa a nyɛla nda chɔ ndu laŋ.” (Chɔŋ 11:​43, 44) Mi Lasalɔɔ miiŋgu yoomu pila! Mbo miiŋgu vɛlɛ diompilɛ nda yuŋgu ndɔɔ a chaaŋaa nduaa. Ndaa nɔla maa saa ndu, ma pilaŋ ndu, nduyɛ ma soo o ndu lo. Nuawɔ suɛi kaamaa bɛndu se! Mi Chiisu miŋgi Lasalɔɔ yoomu.

9, 10. (a) Nɛɛ ke yɛ Chiisu kpaayaa le waŋnda miŋgioo yoomu? (b) Le yɛɛ fulasɛiniŋdaŋ o Baabuiyo niŋ la cho yɛ suɛi sɔvɛ le naa?

⁹ Baa Chiisu a kpaaya ndɔ ndu pilaa ndoo miŋgi waŋnda yoomu ni? Sako. Tuupa mi Chiisu miŋgi Lasalɔɔ yoomu, mbo piɛi o Chɛhowa lo, nduyɛ mi Chɛhowa ke ndu kpaayaa le mbo miŋgi Lasalɔɔ yoomu. (Nuawɔ Chɔŋ 11:​41, 42.) O ve Lasalɔɔ ndupilɛ koni le o miŋgi yoomu le. Baabuiyo dimul naa a chuaambɔ wɔsila tɔ a la tiɔɔŋ wa a naa tau wo okɔɔ. Mi Chaaliɔɔ finya ndɔ tambu kɔl tau nduyɛ mbo nyɔɔlu Chiisu le mbo siŋgi ndu. Chualeŋ lepilɛ kpe ndoo nɔ ni. Mɛɛ o wa suɛi o Chiisu lo, mi puaa pum huŋ ma dimi aa, “Chua numndo vi. Pala yɛɛnɛ ŋ cho yɛ vɛlɛ Ticha?” Kɛ mi Chiisu dimul Chaaliɔɔ aa, “Yɔŋ isiooŋ te. Num nɔ laalaŋndo suee. Yoomoo cho ndu miiŋgu o miliŋ.” Mbo kua o chiɛi Chaliɔɔ wo. Mɛɛ nda sɔɔŋguu o chiɛiyo ikɛi, mi Chiisu cha nduyɛ mbo tuɛi waŋnda chaŋndaŋ. Mi Chiisu dimul nda aa, “La chaŋ te. O vi le. O luaaŋ o cho ni.” Kɛlɛŋgaa mi kɔndɔfillo bii dɔɔ finya ndɔ a kala ndɔ a nyɛ Chiisu ndoo yiyaŋndo. Mi Chiisu dimul wana o wana  le ma fula o bɛɛ. Okoŋ, mbo kua a finya ndɔ a kala ndɔ chiɛiniŋ naa chuaambɔɔ wa ihini wa. Mi Chiisu saa ndu baa dɛɛ nduyɛ mbo dimul ndu aa. “Chuaambɔɔ, mi dimul num, Chɔŋ.” Yiyaŋndɔ a nyaale bɛndu wa wanaa nduaa wo mɛɛ nda che mbo chaŋ nduyɛ mbo kandu kɔlaŋ! Chiisu tosa mi chua ndaa miiŋgu yoomu. (Maki 5:​22-24, 35-42; Luku 8:​49-56) Chɔŋ a paale leŋ, te ndaa che pɛ chuaambɔ nda pɔmbɔɔ, mi ndaa loonuŋ nyɛ Chɛhowa tosal nda o Chiisu niŋ sanaa wo. *

¹⁰ Mi wanaa Chiisu miŋgi haa yoomu wa wu vɛlɛ okoŋ kɔɔli. Kɛ baa hei chɔm ni maa fondo fuu o miŋgi nda yoomu ni? Sako. Konalaŋ ndaŋ la ke naa tiindaŋ kpeekpeiyo maa Chɛhowa yeema le waŋnda miŋgioo yoomu, nduyɛ o cho keŋ tosa.

11. Yɛɛ Ikilisiaatii 9:​5 pɛɛku yɛ naa a Lasalɔɔ okɔɔ?

¹¹ Baabuiyo dimul naa kpendekele maa, “wanaa vi niŋ nda, nda nɔ yiyaŋ” te. Hei wa suɛi tonya a Lasalɔɔ. (Ikilisiaatii 9:​5) A mɛɛ Chiisu dimi yɛ, i wa ko maa o luaaŋ Lasalɔɔ wa ni. (Chɔŋ 11:​11) Teleŋ Lasalɔɔ wa o sɛiyo niŋndo, ndoo sina “nyɛ o nyɛ le.”

12. Vɛɛ naŋ looku yɛ sina maa mi fulasɛiniŋ Lasalɔɔ wo yɔŋnuŋ lekɛndɛi?

¹² Mɛɛ Chiisu miŋgi Lasalɔɔ yoomu, mi wanaa siaama cha nyɛ yɔŋnuŋndo a lehɔl pɛɛŋ. Mi yaamɔɔwaa Chiisuaa bɛɛ sina maa mi Chiisu tosa kaamaa  hoo. Lasalɔɔ wa yoomu, nduyɛ hei chɔm ni maa mi fulasɛiniŋndo hoo yɔŋnuŋ lekɛndɛi. (Chɔŋ 11:​47) Nduyɛ, mi wanaa bɔɔbɔɔ kua Lasalɔɔ yilɔɔ. Fulamakɔɔlioo wa ni, mi a bɔɔbɔɔ kandu laalaŋndo maa Mɛlɛka vem Chiisu ni. Okoŋ, mi yaamɔɔwa Chiisuaa kɛɛsiaa le ma dii Chiisu nda Lasalɔɔ.—Chɔŋ 11:​53; 12:​9-11.

13. Le yɛɛ naŋ laalaŋ yɛ maa Chɛhowa cho waŋvilɛiya miŋgi yoomu?

¹³ Mi Chiisu dimi maa, “wanaa cho o sɛila loonaŋndaŋ niŋnda” cho fulasɛiniŋndo sɔla. (Chɔŋ 5:​28, NW) Hei sim ni maa Chɛhowa cho wanaa vi wa apum miŋgi yoomu. Kɛ, le mi Chɛhowa miŋgi waŋndo yoomu, o nɔ mbo loonuŋ nyɛ o nyɛ a wana koŋ okɔɔ. Baa o tiuba pa mbo tosa keŋ? Looŋ cho o halaa niŋ o kɛmɛ chuu chɔm te laŋ niŋ. Kɛ Baabuiyo dimi maa muŋ kpou Chɛhowa sina muŋ diolaŋ. (Nuawɔ Aisaya 40:​26.) Te o nɔla pɛ mbo loonuŋ looŋ muŋ kpou diolaŋ, mɛɛ hei chɔm ni maa, i cho wa tɛtɛlɛ le mi Chɛhowa loonuŋ nyɛ o nyɛ a wanaa o cho miŋgi yoomu wa okɔɔ. I hiou kpou ve cho ni, Chɛhowa toosiaa nyɛ o nyɛ ni. Lelaŋ, ŋ laalaŋ maa o nɔ kpaayaa le waŋnda miŋgioo yoomu.

14, 15. Yɛɛ nyɛ Choobu dimi wo pɛɛku yɛ naa a fulasɛiniŋndo okɔɔ?

¹⁴ Choobu ndoo nɔ tiindaŋndo o fulasɛiniŋndo niŋ. Mbo nyuna aa, “Te wana chioo vi niŋ pɛ baa o miiŋgu lɛ pa yoomu?” Okoŋ mbo dimul Chɛhowa aa, “I sina maa o wa niŋ o lepala niŋ mi kɔllo del num o ya lo. O koŋ, ma veelu ya mi muli num diom.” A tonya, Choobu ndoo sina maa teleŋ cho fuuluu mi Chɛhowa miŋgi waŋvilɛiya yoomu.—Choobu 14:​14,15.

¹⁵ Vɛɛ tiindaŋ fulasɛiniŋndo tosa yɛ ma yiyaŋ? Kɛlɛŋgaa mi kɔndɔfillo bii num ma dimi aa, ‘Ɔɔ niŋ yuŋgu nuu vɛlɛ a chaaŋaa niaa vi niŋnda, baa nda bɛɛ sɔla niŋ  pa fulasɛiniŋndo?’ Hei dɛɛniaa naa le sinaa maa Chɛhowa yeema kɛsɛ mbo miŋgi wanaa vi wa vɛlɛ yoomu. Ŋ yaasiaŋndɔ nyɛ Baabuiyo dimi a wanaa cho miiŋgu yoomu wa, vɛlɛ a naa nda cho wa wa.

16. Yoomu suu kuɛɛ wanaa cho miiŋgu yoomu o lɛŋndeŋ choo wa tuɛi yɛ niŋ yeela?

¹⁶ O paandoo niŋ, mi wanaa ndaa miiŋgu vɛlɛ yoomu wa miiŋgu diompilɛ a wanaa ndaa vɛlɛ a chaaŋaa ndaa o lɛŋndeŋ choo. Hei cho vɛlɛ yɔŋnɔŋ o chilaŋ niŋ. Kɛ ndi hiau niŋ bɛnda a o yɔŋnɔŋ paandu wo. Le yɛɛ? Kanifuule, wanaa cho miiŋgu yoomu o lɛŋndeŋ choo wa cho dioo sɔla le waa yoomu le fafɛɛŋ, nduyɛ a vi lɛ niŋ kposoŋ te. Chieeŋ nda cho wa niŋndo o cho wa teŋgeŋ a o naŋ cho hau niŋndo. Chɔu ve niŋ te, dɛnɛ wɔɔŋ ve niŋ te, nduyɛ naa ve niŋ te.

17. Nɛɛ yaa cho yɛ miiŋgu yoomu?

¹⁷ Nɛɛ miiŋgu yɛ niŋ yoomu? Chiisu dimi aa, “Wanaa vilɛiya kpou [“o sɛila loonaŋndaŋ niŋ cho tueiyɔɔ,” NW] diom ndɔɔ o koŋ, ma fula o sɛilaŋ niŋ.” (Chɔŋ 5:​28, 29) Nduyɛ Sɔɔŋ Chɔɔmaŋndoŋ 20:​13 dimul naa aa, ‘Mi wanaa vi o pee mɛŋma ihɛllo niŋ nda a chaŋ ma fula. . . . Mi wanaa wa . . . piɔmndo o ba wa, a wanaa wa [“o sɛilaŋ niŋnda,” NW] nda kpou ma chaŋ ma fula.’ A tonya, waŋnda o kɛmɛ chuu chɔm te laŋ niŋ cho vɛlɛ miiŋgu yoomu. Mi kiilanɔɔ Pɔɔl dimi vɛlɛ maa “wana kɛndɛ ni, wana wɔɔŋ ni” kpou cho miiŋgu yoomu. (Nuawɔ Walta Wanaa Chiisuaa 24:​15.) Yɛɛ keŋ sim yɛ?

18. Nɛɛ yaa cho yɛ ‘wanaa kɛndiaa’ miiŋgu niŋ yoomu wa?

¹⁸ ‘Wanaa kɛndiaa’ cho buɛiyaa laalaŋaa Chɛhowaa wa achal tuupa mi Chiisu huŋ o lɛŋndeŋ choo wa ni.  Waŋnda mɛɛ Nuuwaa, Ebilaham, Sela, Muuse, Lufu, a Ɛsita cho naa yɛ, cho miiŋgu yoomu le waa o lɛŋndeŋ choo naŋ. A nɔla ma veelu diomndaŋ o Hibuluiya bolle 11 niŋ a puaa vɛlɛ a waŋlaanduaa apum okɔɔ. Ɔɔ niŋ buɛiyaa Chɛhowaa cho wuoo o teleŋ naa hoo niŋnda? Nda bɛɛ ‘wanaa kɛndiaa’ cho miiŋgu yoomu wa nda cho ni.

19. Nɛɛ yaa cho yɛ ‘wanaa wɔɔŋnda’? Dikeŋnaŋ yɛɛ Chɛhowa cho yɛ nda ke?

 ¹⁹ ‘Wanaa wɔɔŋnda’ cho ni, wanaa vi o kɛmɛ chuu chɔm te laŋ niŋ nduyɛ a sina a Chɛhowa okɔɔ le wa. Mi che bɛɛ a vi, kɛ Chɛhowa puɛɛnuŋ a nda le. O cho nda miŋgi yoomu pila, nduyɛ a cho dikeŋnaŋndo sɔla le ma pɛɛku a ndu okɔɔ nduyɛ ma piɛi ndu.

20. Le yɛɛ o cho waŋnda kpou le cho miiŋgu yoomu le?

²⁰ Baa hei sim ni maa wana o wana vi cho miiŋgu yoomu ni? Sako. Chiisu dimi maa waŋnda apum a sɔla niŋ fulasɛiniŋ kposoŋ te. (Luku 12:​5, NW) Nɛɛ cho yɛ kɛɛsiaa te waŋndo miiŋgu niŋ yoomu ɔɔ o cho miiŋgu yoomu le? Chɛhowa cho Yamanɔ mɛɛlaa ni. Kɛ o ke vɛlɛ Chiisu kpaayaa. Ndu cho wana “kɔɔsa a waŋnda kpou wo ni, wanaa cho yoomu wa, a wanaa vi niŋ nda.” (Walta Wanaa Chiisuaa 10:​42) Wana o wana nda kɔɔsa pɛ maa wana wɔɔŋ nduyɛ mbo kɛɛ le siŋgaŋndo, o miiŋgu lɛ niŋ yoomu le.—Tofa Diomnda Chɔɔlaalaŋ 19.

21, 22. (a) Dialuŋ suu kuɛɛ wanaa cho miiŋgu yoomu le waa o choo choo niŋ nda cho yɛ nɔ? (b) Nɛɛ wa yɛ wana tasoo le miiŋgoo yoomu le waa o choo choo niŋ?

²¹ Baabuiyo dimul naa vɛlɛ maa waŋnda apum cho wa o choo choo niŋ. Te waŋndo miiŋgu pɛ yoomu le waa o choo choo niŋ, o miiŋgu lɛ yoomu o dialuŋ iwana chieeya niŋ te. O miiŋgu yoomu le waa o choo choo o inyinaya.

²² Chiisu wa wana tasoo le miiŋgoo yoomu ni. (Chɔŋ 3:​13) Mɛɛ nda dii Chiisu mi palɛi iyaa i hiau, mi Chɛhowa miŋgi ndu yoomu pila. (Sam 16:​10; Walta Wanaa Chiisuaa 13:​34, 35) Chiisu ndoo miiŋgu yoomu a dialuŋ wanachiee le. Mi Pɔɔl, wana Chiisu vem hɔlte ndɔ wo tɛɛsiaa maa, “dialluŋ yɔŋaŋ muŋ ŋ luei o masale  Mɛlɛkaleŋ niŋ te.” (Kɔliŋtiaŋ Tasoo 15:​50) Mi Chiisu miiŋgu yoomu o kpaaya inyinayaa niŋ. (Kɔliŋtiaŋ Tasoo 15:​3-6) Kɛ Baabuiyo dimi maa o cho ko ndu le.

23, 24. Nɛɛ yaa cho yɛ ‘kunda pɔmbɔ’ Chiisu soo a ndu okɔɔ wo, nduyɛ vɛɛ kpɛ nda wa yɛ niŋ?

²³ Tuupa mi Chiisu wu, mbo dimul wanaa o vem hɔlte ndɔ wa aa, “I cho lakɔ yiyalaŋ bɛɛndiaa le nya.” (Chɔŋ 14:​2) Hei sim ni maa kiilaa nduaa cho miiŋgu yoomu le waa nda ndaa o choo choo niŋ. Vɛɛ kpɛ nda cho yɛ? Mi Chiisu veelu nda aa, “Kunda ni pɔmbɔɔ.” (Luku 12:​32) Mi Chɔŋ, wana Chiisu vem hɔlte ndɔ wo chɔm kunda pɔmbɔɔ teleŋ o che Chiisu “isisi o Pembii Saayɔŋnde choo” wo. Mbo “cha waŋnda faŋga bɛndu bɛndoo ndu kɔɔli. A wa waalaŋ kɛmɛ a bele-hiɔɔlu a la hiɔɔlu.”—Sɔɔŋ Chɔɔmaŋndoŋ 14:​1.

²⁴ Teleŋ kuɛɛ Kilisiɔŋaa 144,000 cho yɛ miiŋgu yoomu? Baabuiyo dimul naa maa hei cho yɔŋnuŋ teleŋ Chiisu cho kandɔɔ masaleŋ o choo choo niŋndo. (Kɔliŋtiaŋ Tasoo 15:​23) Ŋ cho niŋ o teleŋ koŋ niŋ, nduyɛ wanaa 144,00 haa a bɔɔbɔɔ miiŋgu niŋ yoomu le waa o choo choo niŋ. A cho wɔ o lɛŋndeŋ choo naŋ nduyɛ ma wa wuoo o teleŋ naa hoo niŋndo, cho miiŋgu yoomu le waa o choo choo niŋ. Kɛ, wanaa bɔɔbɔɔ cho miiŋgu yoomu le waa o kpele hɛnɛkiɔɔ niŋ o lɛŋndeŋ choo naŋ.

25. Yɛɛ naŋ cho yɛ pɛɛku o buŋgɛi cho lachi ve niŋ?

²⁵ O viu lɛ niŋ te, Chɛhowa cho waŋchieeya kpou baŋa o piɔmndo niŋ. Nduyɛ piɔm cho lɛ wa le fɛɛŋ a fɛɛŋ te. (Nuawɔ Aisaya 25:​8.) Kɛ yɛɛ wanaa cho kɔlaŋ o choo choo niŋnda cho yɛ tosa loŋ? Baabuiyo tɛɛsiaa maa a cho wa masaa nda Chiisu waa latulu o masaleŋ choo o choo choo niŋ. Ŋ cho chɔɔlu pɛɛku a masaleŋ ndeŋ okɔɔ o buŋgɛi cho lachi ve niŋ.