1. Kuɛɛ naŋ pɛɛku yɛ a chilaŋ okɔɔ?

KANI bɛɛ a nua niŋ tɛlivisiɔŋndo ɔɔ ma yaŋ alaadioo nilaŋ ma nyunaŋ aa, ‘Baa sɔɔŋ cho pa hiouwɔɔ lachi a wɔuleŋ?’ Kpundɛlaŋ a dɛnɛ wɔɔŋndo kui niŋ bɔɔ. Le hei, waŋnda laalaŋ maa ŋ cho niŋ dɔɔ kpɛɛluŋ o mɛɛlula chieeŋndo hoo. Keŋ cho pa tonya? Nɛi cho pa le sinaa nyɛ nɔ le yɔŋnɔŋndo o chilaŋ niŋndo? Ei. Mi che bɛɛ waŋchieeya nɔla ma che nyɛ nɔ le yɔŋnɔŋndo o chilaŋ niŋndo le, kɛ Chɛhowa ndu nɔla. O chɔm naa o Baabuiyo niŋ a chila naalaŋ okɔɔ vɛlɛ a chila chieeŋndo.—Aisaya 46:​10; Chemisi 4:​14.

2, 3. Yɛɛ buɛiyaa Chiisuaa ndaa yeema yɛ le sinaa, nduyɛ vɛɛ Chiisu muli yɛ?

² Te ŋ nua pɛ o Baabuiyo niŋ a mɛɛlula chieeŋndo okɔɔ, o cho mɛɛlula lɛŋnde naŋ cho leŋ choo leŋ te, kɛ mɛɛlula dɛnɛ wɔɔŋndo. Mi Chiisu pɛɛku waŋnda maa Masale Mɛlɛkaleŋ le cho wa o lɛŋndeŋ choo. (Luku 4:​43) Buɛiyaa nduaa ndaa yeema sinaa teleŋ Masale Mɛlɛkaleŋ le cho hunɔɔ wo. Le hei ma nyuna Chiisu aa, “Chɔm ndɔ naa boondii sɔɔŋ muŋ ŋ cho hunɔɔ yɔnɔŋ nde. Nduyɛ, taamasi yɛɛnɛ cho yɛ yɔnɔŋ le chɔmndo maa boondii num ŋ cho hunɔɔ ve cho niŋ fuuluuwo? Taamasi yɛɛnɛ yɔnuŋ yɛ niŋ le sinaa maa mɛɛlula chieeŋndo la fuuluu?” (Maatiu 24:​3) Chiisu chɔm nda paale kpeekpei le, kɛ mbo dimul nda sɔɔŋ cho wa yɔŋnɔŋndo woŋ lɔɔpa mi mɛɛlula chieeŋndo hoo la fuuluu. Sɔɔŋ Chiisu dimi maa ŋ cho yɔŋnɔŋ ndoŋ cho niŋ suŋ suŋ yɔŋnɔŋndo.

³ O buŋgɛi hei niŋ, ŋ cho yaasiaa sɔɔŋ chɔm maa ŋ cho o teleŋ mɛɛlula chieeŋndo hoo wo. Kɛ, ŋ cho fɛŋ pɛɛku a  chɔu yɔŋnuŋ o choo choo niŋndo okɔɔ, le miŋ sina sabu sɔɔŋ wɔɔŋ wɔɔŋndoŋ cho hau o chieeŋndo hoo choo wo.

4, 5. (a) Mɛɛ Chiisu simnuŋ dɔɔ Masaa o choo choo niŋ, yɛɛ ndoo yɔŋnuŋ yɛ? (b) A mɛɛ Sɔɔŋ Chɔɔmaŋndoŋ 12:​12 dimi yɛ, yɛɛ yɔŋnuŋ yɛ o chieeŋndo choo mɛɛ nda mal Setana lɛŋ naŋ?

⁴ O Buŋgɛi 8 niŋ, miŋ pɛɛku maa o 1914 niŋ Chiisu simnuŋ Masaa o choo choo niŋ ni. (Daaniɛɛ 7:​13, 14) Yau Sɔɔŋ Chɔɔmaŋndoŋ dimul naa nyɛ ndoo yɔŋnuŋndo aa, “O lepilɛ niŋ kpe, mi chɔuwo kiolu ɛchɛnɛ. Mi Mɛlɛka kiilanɔ ndɔ bɛndoo Maikɛl, nda kiilaa Mɛlɛkaa a cho ndu o ba bɛŋgu wa, ma del tambalakaa hoo a kiilaa cho tambalakaa hoo o ba bɛŋgu wa choo a chɔuwo.” * Kɛ mi Setana a nyinaa nduaa wɔɔŋnda bumba chɔu koŋ nduyɛ ma mal nda o chieeŋndo choo. Yiyaŋndɔ mɛɛ maalikɛiya wa a kɔl kɛndɛ yɛ! Kɛ wanaa cho o lɛŋndeŋ choo wa yɛ? Baabuiyo dimi maa kpundɔɔ wa niŋ bɔɔ le nda. Le yɛɛ? Kanifuule, Masa Nyinaa Wɔɔŋnda cho a tumboo tau tau. “O sina maa teleŋ ndɔɔ cho niŋ o biŋgii naa.”​—Sɔɔŋ Chɔɔmaŋndoŋ 12:​7, 9, 12.

⁵ Masa Nyinaa Wɔɔŋnda cho kpundɛlaŋ mɛlioo o chieeŋndo choo mɛɛ o yeema yɛ. O cho a tumboo ŋama ŋama kanifuule, teleŋ biŋgi koni lo niŋ ni mi Mɛlɛka faŋa walta ndɔlaŋ. Ŋ yaasiaŋndɔ nyɛ Chiisu dimi maa o cho yɔŋnɔŋ o palɛi mɛɛlɛi niŋndo.—Tofa Diomnda Chɔɔlaalaŋ 24.

6. Yɛɛ naŋ dimi yɛ hau a chɔulaŋ okɔɔ?

⁶ Chɔuwo. Mi Chiisu dimi aa, “Masaa a masaa a sɔŋga niŋ, mi lɛŋndeŋ a lɛŋndeŋ ma sɔŋga.” (Maatiu 24:​7)  Wanaa vi niŋ o chɔulaŋ niŋ o teleŋ naa hoo niŋnda hiou teleŋ o teleŋ cheleŋ. Mi kɔɔna chɔm sɔɔŋ yɔŋnuŋ o chieeŋndo niŋndoŋ dimi maa, chɔŋ a wɔsiŋ kɛmɛ tasoŋ mbo huŋ bii a wɔsi 1914, waŋnda le miiliɔŋndaŋ 30 chɔulaŋ la dii niŋ ni. Kɛ chɔŋ a wɔsi 1914 mbo huŋ bii a wɔsi 2000, waŋnda hiouwɔɔ miiliɔŋndaŋ 100 vi niŋ o chɔulaŋ niŋ ni. Yiyaŋndɔ a mɛɛ chɔuwo tusi niŋ waŋnda o miiliɔŋndaŋ niŋ nyɛpalaa vɛlɛ a nyɛ nɛiyaa choo yɛ!

7. Vɛɛ nyɛ Chiisu dimi a yiaaŋ okɔɔ wo cho yɛ hau peelɔŋndo?

⁷ Yiaaŋ. Mi Chiisu dimi aa, ‘Yiaaŋ ma del niŋ ba o ba fee.’ (Maatiu 24:​7) Mi che bɛɛ nyɛdiaa cho niŋ toosiaŋndo tau mbo hiau maa paandu, kɛ a koŋ kpou, wanaa bɔɔbɔɔ sɔla nyɛdiaa bɔɔ le. Le yɛɛ? Kanifuule, a nɔ nyɛsɔlaa le nyɛdiaa piondɔɔ le, ɔɔ yondola bɔɔ cho le wali tosa le. Le mi waŋnda hiouwɔɔ miiliɔŋndo opilɛ sɔla o nda dia o paaleŋ niŋndo, o cho suɛi kpɛdɛ le. Mi “World Health Organization” dimi maa iwɔsi o iwɔsi, chuaambuaa o miiliɔŋndaŋ niŋ wu ni kanifuule, a sɔla nyɛdiaa sɔvɛ ke nda kɛndiaa wo le.

8. Yɛɛ chɔm yɛ maa nyɛ Chiisu dimi a lɛŋnde nyiiyaaleŋ okɔɔ wo peeluŋ?

 ⁸ Lɛŋnde nyiiyaaleŋ. Mi Chiisu dimi aa, “Lɛŋndeŋ le nyiiya niŋ tau.” (Luku 21:​11) Wɔsi o wɔsi, ŋ nɔ miŋ wa lɛŋii nyiiyɛi wɔɔŋ wɔɔŋnde kɔl. Chɔŋ a wɔsi 1900, lɛŋii nyiiyɛi dii niŋ waŋnda hiouwɔɔ miiliɔŋndaŋ la tiɔɔŋ. Nduyɛ mi che bɛɛ nyɛm mapuuloŋ cho niŋ tau ŋ mala le keleŋaa sinaa te lɛŋndeŋ le cho nyiiyaa pɛ, kɛ a koŋ kpou, mi waŋnda vi tau.

9. Yɛɛ chɔm yɛ maa nyɛ Chiisu dimi a naalaŋ okɔɔ wo peeluŋ?

⁹ Naalaŋ. Mi Chiisu dimi maa ‘naala taŋ waŋnda laŋ la kuii niŋ.’ Mi naala wɔɔŋ wɔɔŋndaŋ la keleŋa pɛŋgɛlaŋ, nduyɛ mi la diu wanaa bɔɔbɔɔ. (Luku 21:​11) Mi che bɛɛ naa wanaa chiɔuwaa cho hiouwɔɔ lachi a naala bɔɔbɔɔ chiɔuwo, kɛ naala chiɔunuŋ te laŋ la cho wɔ kɛ. Nduyɛ pɛŋ, mi kona pum dimi maa iwɔsi o iwɔsi, mi waŋnda o miiliɔŋndaŋ niŋ vi a naalaŋ, mɛɛ soliŋii vesɛiye, naa buulaa ŋpuloo, a solɔɔ a kusioo cho naa yɛ. O fulawɔ o koŋ kɔɔli, o wɔsila 40 laŋga hiou laŋ niŋ, wanaa chiɔuwaa bɛnduaa saaluŋ naala sɛnɛilaŋ 30, nduyɛ lapum nɔ pɛŋ chiɔu le.

10. Vɛɛ Timoti Diiŋ Ndɔɔ 3:​1-5 cho yɛ hau peelɔŋndo?

¹⁰ Baabuiyo dimi o Timoti Diiŋ Ndɔɔ 3:​1-5 niŋ aa, “Kɛsiŋ o kɔl . . . maa te palɛi mɛɛlɛi le chieeŋndo hoo i wa fuuluuwo pɛ, nyɛ palaa o wa niŋ bɔɔ.” Mi Pɔɔl, wana Chiisu vem hɔlte ndɔ wo tɛɛsiaa mɛɛ wanaa bɔɔbɔɔ nɔ niŋ kaalaŋ o palɛi mɛɛlɛi niŋ yɛ. Mbo dimi maa waŋnda

• nɔ niŋ kaayei

• kaala niŋ kaniei

• tui niŋ wanaa velu nda wa diom te

• lo niŋ o lediom te

• kaala niŋ yuŋgu ndaa le

• tiu niŋ kɔl ndaa ba le

• nɔ niŋ tandalaŋ a yolɛi

• kaala niŋ yelelaŋndo mbo hiou Mɛlɛka

• chɔm niŋ maa a kaala Mɛlɛka kɛ ma kɛɛ le ndu diikɔŋndo

11. A mɛɛ Sam 92:​7 dimi yɛ, yɛɛ yɔŋnuŋ yɛ niŋ a wanaa dɛnɛ wɔɔŋnda?

¹¹ Mi waŋnda chɔm pa kaala waa naa o fonda ŋ cho wo? Wanaa bɔɔbɔɔ nɔ kaalaŋ ndaŋ chieeŋndo balɔɔ silɔ. Kɛ Mɛlɛka cho hunɔɔ suŋ isɔɔ tosa a hei okɔɔ. O mɛi lediom aa, “O sina nuaa maa  wanaa dɛnɛ wɔɔŋnda, mɛɛ billo o cho nuaa, mɛɛ mɛɛ o wa puiyo tɛɛ tɛɛ o nɛi a itambu le yɛ le, maa wanaa tosa sɔɔŋ wɔɔŋndoŋ nda, mi nyɛ o nyɛ wa o kɛndɛ a nda, kɛ ma wa a tɛɛmbaa le fɛɛŋ a fɛɛŋ.”—Sam 92:​7.

12, 13. Yɛɛ Chɛhowa pɛɛku yɛ naa niŋ o palɛi mɛɛlɛi niŋ?

¹² Mi Baabuiyo dimi maa o palɛi mɛɛlɛi niŋ, chieeŋndo cho wa o piaa cha a nyɛ nɛiyaa vɛlɛ a nyɛpalaa. Kɛ Baabuiyo dimi vɛlɛ maa sɔɔŋ kɛndɔŋ nɔ le yɔŋnɔŋndo.

¹³ Baabuiyo biyɔɔ bila. Mi wana ndoo suaa le Mɛlɛka wo Daaniɛɛ poonyiaa a palɛi mɛɛlɛi okɔɔ. Mbo dimi aa, “Waŋnda a sɔla niŋ kɔl kaloo tau tau.” (Daaniɛɛ 12:​4) Mɛlɛka cho wanaa nduaa taasioo ke ma bii Baabuiyo bila nyɛkɛndɛ walaŋ mbo hiou maa paandu. Mi Chɛhowa tosa hei taama taama chɔŋ a wɔsi 1914. Le taamaseliiyo, o pɛɛku naa mɛɛ diola ndɔlaŋ la cho nyɛ sɔvɛ yɛ, sabu ndɔɔ le chieeŋndo, tonyaa a baŋaa okɔɔ, nyɛ yɔŋnuŋ naa wo te ŋ vi pɛ, vɛlɛ a fulasɛiniŋndo okɔɔ. Ŋ pɛɛku maa Masale Mɛlɛkaleŋ kinɛi le cho bahawɛila naalaŋ kpou chii ni. Ŋ pɛɛku vɛlɛ mɛɛ naŋ wa a nyaale yɛ, a tosaa nyɛ nɛŋi Mɛlɛka kɔllo. Kɛ yɛɛ wanaa Mɛlɛkaa nɔ yɛ ma tosa a sɔɔŋ nda pɛɛku muŋ ndoŋ? Suɛi cheleŋ Baabuiyo ndoo dimi ve ke naa mulioo le nyunaa hoo.—Tofa Diomnda Chɔɔlaalaŋ 21 a 25.

14. Kuɛɛnɛ yooŋgu kɛndɛ leMasaa cho yɛ dimiŋndo, nduyɛ nɛɛ yaa cho yɛ ndu dimioo?

¹⁴ Wali dimiaa yooŋgu kɛndɔɔ chieeŋndo balɔɔ silɔ. Mɛɛ Chiisu wa suɛi a palɛi mɛɛlɛi okɔɔ mbo dimi aa, “Waŋnda cho yooŋgu kɛndɔɔ hoo dimi a masale Mɛlɛkaleŋ okɔɔ ba o ba fee o chieeŋndo choo.” (Maatiu 24:​3, 14) Yooŋgu kɛndɔɔ a Masale Mɛlɛkaleŋ okɔɔ cho dimiŋndo o lɛŋnde niŋ hiouwɔɔ 230, a o sɔɔŋ maŋgalaŋ niŋ hiouwɔɔ 800.  A tonya, Seiyaa Chɛhowaa fulaa o “lelɛŋ o lelɛŋ, a lekaa o lekaa” niŋ cho waŋnda malaa le ma sina nyɛ cho Masale Mɛlɛkaleŋ ndo nduyɛ a nyɛ le cho tosa le waŋchieeya wo. (Sɔɔŋ Chɔɔmaŋndoŋ 7:​9) Nduyɛ a bii wana o wana nyɛ o ba le. Mi che bɛɛ mi waŋnda tul nda leyɛ nduyɛ ma tusi nda kotaa choo, kɛ nyɛ o nyɛ nɔla mbo kuuna wali dimiaa yooŋgu kɛndɔɔ hoo le, a mɛɛ Chiisu dimi yɛ.—Luku 21:​17.

15. (a) A laalaŋ pa maa o palɛi mɛɛlɛi niŋ naŋ cho ni, nduyɛ le yɛɛ ŋ laalaŋ yɛ? (b) Yɛɛ cho yɛ yɔŋnɔŋ a wanaa diikuŋ nda vɛlɛ a wanaa kɛɛ le diikɔŋndo wa?

¹⁵ A laalaŋ pa maa o palɛi mɛɛlɛi niŋ naŋ cho ni? Sɔɔŋ bɔɔbɔɔ dimiŋ a palɛi mɛɛlɛi okɔɔ woŋ cho peelɔŋndo. Chɛhowa cho suŋ kɛɛsiaa le mi yooŋgu kɛndɔɔ pɛŋgi dimiŋndo, okoŋ, mi “mɛɛlula” chieeŋndo la fuuluu. (Maatiu 24:​14) Yɛɛnɛ cho yɛ mɛɛlulaŋ? Laŋ la cho Amakɛdɔŋ ni. Teleŋ Mɛlɛka cho dɛnɛ wɔɔŋndo kpou faŋa wo. Chɛhowa cho Chiisu a maalikɛiyaa nduaa kpaayaa soliŋ kpeku le wanaa kɛɛ ndu a Po ndɔɔ diikɔŋndo wa tɛɛmbuu wo. (Tɛsaloniaŋ Diiŋ Ndɔɔ 1:​6-9) Te hei yɔŋnuŋ pɛ, fɛɛŋ fɛɛŋ bɛɛ Setana a nyinaa nduaa wɔɔŋnda hui lɛ niŋ waŋchieeya le. Wanaa yeema le Mɛlɛka diikɔŋndo, nduyɛ ma chɛl Masale ndɔleŋ nda kpou, cho chɔ mɛila Mɛlɛkalaŋ kpou o peelɔŋndo.—Sɔɔŋ Chɔɔmaŋndoŋ 20:​1-3; 21:​3-5.

16. Mɛɛ mɛɛlulaŋ la cho niŋ naa kpɛɛluŋ yɛ, yɛɛ ŋ nɔ yɛ ma tosa?

¹⁶ Chieeŋ cho hoo o ba Setanaa bɛŋgu wo cho suŋ fuuluu o mɛɛlulaŋ. Lelaŋ, i cho bɔɔ suɛi sɔvɛ le ma nyunaŋ aa, ‘Yɛɛ ya nɔ yɛ mi tosa?’ Chɛhowa yeema num ma pɛɛku Baabuiyo mɛɛ ŋ tiuba yɛ. Chua pɛɛku numndo nyɛ lamamɔɔ le. (Chɔŋ 17:​3) Seiyaa Chɛhowaa nɔ bɔŋaŋndaŋ o lɔɔ o lɔɔ bɛŋgu le waŋnda malaa ma bii Baabuiyo bila. Kindiŋ ma wa kɔlaŋ o bɔŋaŋnda laŋ lɔɔlɔɔ. (Nuawɔ Hibuluiya 10:​24, 25.) Te a sina pɛ maa a nɔ ma tosa siŋgaŋndaŋ,  yɔŋ isiooŋ le laŋ tosa le. Te a tosa lende pɛ, chaŋyɛi numnde a Chɛhowa cho chɔɔlu kalu poŋ.—Chemisi 4:​8.

17. Le yɛɛ wanaa bɔɔbɔɔ cho yɛ woolu wa wa te mɛɛlulaŋ la fuuluu pɛ?

¹⁷ Mi Pɔɔl, wana Chiisu vem hɔlte ndɔ wo tɛɛsiaa maa wanaa dɛnɛ wɔɔŋnda cho tambei sɔla. Nduyɛ paale leŋ le cho wanaa bɔɔbɔɔ woolu wa wa, “mɛɛ viinɔɔ huŋ nuaa a nyumndaŋ wana ve ndu kɔl te yɛ.” (Tɛsaloniaŋ Tasoo 5:​2) Mi Chiisu dimi maa wanaa bɔɔbɔɔ cho data maa ŋ cho o palɛi mɛɛlaa niŋ te. Mbo dimi aa, “Boondii Nuuwa wa o chieeŋndo choo ve, mɛɛ waŋnda a wa sɔɔŋ tosaa yɛ, lende koni waŋnda lo niŋ sɔɔŋ tosaa ni mbo lo o koŋ mi boondii Po Wana Pɔnɔɔ o huŋ niŋ nde i fuuluu. Nduyɛ, lende koni i wa o palɛi keŋ niŋ ni lɔɔ pa piɔɔ bɛndu koŋ o sia, waŋnda wa diola nda. Waŋ laanduaa a wa piaanduaa chuaa, mi puaa bɛɛ a wa hiouwɔɔ lachi a laanduaa puwɔɔ. A lo muŋ tosaa haaa mbo fuuluu a boondii Nuuwa luɛi o dɛndɛ bɛndoo niŋ nde.”​—Maatiu 24:​37-39.

18. Sila yɛɛ Chiisu ke yɛ naa?

¹⁸ Mi Chiisu sila naa maa naŋ yiŋnuŋ “o kuuliaala nyɛ diaa laŋ choo, a o kolɔɔ kala kalaa niŋ te,” yɔŋi mɛɛlula chieeŋndo la woolu naa “mɛɛ yaŋɔɔleŋ le saa visioo nuaa yɛ.” Mbo dimi vɛlɛ maa le cho hunɔɔ le “waŋnda kpou o chieeŋndo choo.” Mbo chɔɔlu dimi aa, “La mandaŋ. Nduyɛ mi la piɛi Mɛlɛka le teleŋ o teleŋ. La piɛi Mɛlɛka le mi la sɔla kpaayaa le hiɔlɔŋndo o sɔɔŋ cho muŋ hunɔɔ yɔŋnɔŋndo woŋ niŋ, nduyɛ mbo lo o koŋ, mi la sim fɛlɛŋ wana nda veelu aa, Po Wana Pɔnɔɔ wo o hɔl.” (Luku 21:​34-36) Le yɛɛ o bɛnda yɛ miŋ yaŋ nilaŋ o sila Chiisoo? Kanifuule, chieeŋ dɛnɛ wɔɔŋ Setanaa cho suŋ tambei sɔla. Wanaa Chɛhowa a Chiisu hini kɔl la kinɛi cho kindaa sɔla o mɛɛlulaŋ ni, nduyɛ ma wa o chieeŋ sɛnɛiyo niŋ le fɛɛŋ a fɛɛŋ.—Chɔŋ 3:​16; Pitɛ Diiŋ Ndɔɔ 3:​13.