1, 2. (a) Te a sina pɛ wana nɔ tɔɔ wo diolaŋ, koŋ chɔm ni maa a sina ndu kɛsɛ? Tɛɛsiaawɔ. (b) Laalaŋnda yɛɛ waŋnda nɔ yɛ a Chiisu okɔɔ?

WANAA fula tɔɔ wa cho a hɔbɛi o chieeŋndo choo. Kɛlɛŋgaa a sina diola wana fula tɔɔ wo opilɛ. Kɛ sinaa diola ndɔlaŋ chɔm naa maa a sina ndu kpeekpei le. Koŋ chɔm naa maa a sina sɔɔŋ kpou a ndu okɔɔ le, kɛlɛŋgaa niŋ te wana suu o cho wo.

² Kɛlɛŋgaa a tuei niŋ dɔɔ a Chiisu okɔɔ, mi che bɛɛ naa faŋaŋ ndɔɔ o chieeŋndo choo cho niŋ suɛi wɔsila 2,000. Kɛ wanaa bɔɔbɔɔ sina wana suu Chiisu wa wo le. Apum dimi maa wana kɛndɔɔ o wa ni. Waŋnda apum dimi maa wana suaa le Mɛlɛka wo o wa ni. Nduyɛ apum dimi maa Mɛlɛka Chiisu cho ni. Vɛɛ num yiyaŋ yɛ?—Tofa Diomnda Chɔɔlaalaŋ 12.

3. Le yɛɛ i cho yɛ suɛi sɔvɛ le Chɛhowa Mɛlɛka nda Chiisu Kiliti sinaa?

³ I cho suɛi sɔvɛ le ma sina tonyaa a Chiisu okɔɔ. Le yɛɛ? Baabuiyo dimul naa aa, “Yoomu kpeekpeiyo hoo ndu cho yɛ ni, waŋndo sinaa maa num pilɛ kpe cho Mɛlɛka ni, nduyɛ, mbo sina vɛlɛ Chiisu Kiliti, wana ŋ vem ndo.” (Chɔŋ 17:​3) A tonya, te a sina pɛ tonyaa a Chɛhowa nda Chiisu okɔɔ, a nɔla ma wa achal lefafɛɛŋ o kpele hɛnɛkiɔɔ niŋ o lɛŋndeŋ choo. (Chɔŋ 14:​6) Nduyɛ, sinaa a Chiisu okɔɔ mala num suŋ suŋ kanifuule, taamasi kɛndɔɔ pila o cho ni a mɛɛ naŋ nɔ miŋ wa yɛ, nduyɛ a mɛɛ naŋ nɔ miŋ bii acheleŋnda yɛ. (Chɔŋ 13:​34, 35) O Buŋgɛi 1 niŋ, miŋ pɛɛku tonyaa a Mɛlɛka okɔɔ. Mɛɛ ŋ cho niko pɛɛku nyɛ Baabuiyo dimi a Chiisu okɔɔ wo.

4. Yɛɛ diomndaŋ ndaŋ “Mɛsaya” a “Kiliti” sim yɛ?

⁴ Wɔsila bɔɔbɔɔ tuupa mi Chiisu vialuŋ, mi Chɛhowa mɛi lediom o Baabuiyo niŋ maa o cho yɔŋ Mɛsaya ɔɔ Kiliti. Diomndo hoo “Mɛsaya,” o Hibuluiye niŋ o fula ni. Nduyɛ diomndo hoo “Kiliti,” o Kilikiiye niŋ o fula ni. Diomnda tiɔɔŋ ndaŋ kpou la chɔm wana Mɛlɛka pɔya nduyɛ mbo ke ndu foofo teŋgeŋndo wo. Mɛsayanɔɔ hoo cho tosa ni mi mɛila Mɛlɛkalaŋ kpou la peeluŋ. Chiisu nɔla vɛlɛ mbo mala num suŋ suŋ. Kɛ tuupa mi Chiisu vialuŋ, mi kaamaa bii wanaa siaama ma nyuna aa, ‘Nɛɛnɛ cho yɛ wa Mɛsayanɔɔ hoo?’

5. Buɛiyaa Chiisuaa ndaa laalaŋ pa maa ndu wa Mɛsayanɔɔ ni?

⁵ Kiisaŋ ve buɛiyaa Chiisuaa le kanifuule, ma sina maa ndu wa Mɛsayanɔ nda dimi wo ni. (Chɔŋ 1:​41) Le taamaseliiyo, mi Saimɔŋ Pitɛ dimul Chiisu aa, “Num cho Kiliti ni.” (Maatiu 16:​16) Ŋ yaasiaŋndɔ niko mɛɛ naŋ laalaŋ maa Chiisu cho Mɛsayanɔɔ ni, maa buɛiyaa Chiisuaa.

6. Vɛɛ Chɛhowa mala yɛ wanaa laalaŋnda le Mɛsayanɔɔ sinaa?

⁶ Tuupa mi Chiisu vialuŋ, mi wanaa ndaa suaa le Mɛlɛka wa poonyiaa sɔɔŋ bɔɔbɔɔ cho waŋnda mala ma saaluŋ Mɛsayanɔɔ wo. Vɛɛ hei ndii mala yɛ? Ŋ dimi wɔ maa a vem num o lɔɔ niŋ le ma kɔ huŋ a miallo o bɛɛ. Miallo hoo yɛ, paale pilɛ bɛɛ la chiikaŋndɔ le. Kɛ, te a tɛɛsial num pɛ vɛ vɛ mɛɛ o cho yɛ, a nɔla ma saaluŋ ndu. Mɛɛ lende koni. Mi Chɛhowa soliŋ wanaa ndaa suaa le ndu wa kpeku le naa dimullo a Mɛsayanɔɔ okɔɔ, vɛlɛ a nyɛ cho ndu yɔŋnɔŋndo. Mɛɛ sɔɔŋ dimiŋ muŋ a ndu okɔɔ woŋ kpou sɔla peelɔŋndo, miŋ mala wanaa ndaa yeema kɛsɛ ma tosa hɛnaŋ Mɛlɛkaa wa le sinaa maa Chiisu cho Mɛsayanɔɔ ni.

7. Sɔɔŋ muuŋ kuɛɛ chɔm yɛ maa Chiisu cho Mɛsayanɔɔ ni?

⁷ Tofawɔ sɔɔŋ dimiŋ muŋ ndoŋ ŋmuuŋ. O tasoo,  wɔsilaŋ 700 tuupa mi Chiisu vialuŋ, mi Makal dimi maa Mɛsayanɔɔ cho violɔŋ o chiee pɔmbɔɔ niŋ diolaŋ aa Bɛtilɛhɛm. (Makal 5:​2) Nduyɛ loŋ kpeekpei nda velu ndu ni! (Maatiu 2:​1, 3-9) O diiŋ ndɔɔ, mi Daaniɛɛ dimi maa o wɔsi 29 C.E. niŋ Mɛsayanɔɔ cho chɔɔmɔŋ kpendekele ni. (Daaniɛɛ 9:​25) Mbo chɔm wɔsi Chiisu nɔ le simnɔŋndo Mɛsayanɔɔ wo. O sɔɔŋ bɔɔbɔɔ dimiŋ a Chiisu okɔɔ woŋ tɛɛŋ, ŋ muuŋ kinɛi cho muŋ ni, ŋ chɔm kpendekele maa ndu cho Mɛsayanɔɔ ni wo.—Tofa Diomnda Chɔɔlaalaŋ 13.

8, 9. Yɛɛ yɔŋnuŋ yɛ o yiŋɔɔ Chiisu wo mbo chɔm maa ndu cho Mɛsayanɔɔ ni?

⁸ Mi Chɛhowa chɔm ndi kpendekele maa Chiisu cho Mɛsayanɔɔ ni. Mi Mɛlɛka dimi maa o cho Chɔŋ wana yiŋaa taamasioo chɔm le sinaa maa Chiisu cho Mɛsayanɔɔ ni. Mɛɛ Chiisu kuɛ o Chɔŋ ndo le yiŋɔɔ o Pioo Chɔɔdaŋ niŋ o wɔsi 29 C.E. niŋ, mi Chɔŋ cha taamasi koŋ. Baabuiyo dimul naa nyɛ yɔŋnuŋndo. “Dimioo nuaa aa Chiisu fula o mɛŋndaŋ niŋ . . . , mi halaa kumbiŋ. Mi Chiisu cha mi Nyina Mɛlɛkaa tual o ikaŋgbo. Mi diomndo suaa o fondaŋ Mɛlɛkaa aa, ‘Po nuu cho hoo ni. I kaala ndu. Nduyɛ, I hini kɔl a ndu.’” (Maatiu 3:​16, 17) Mɛɛ Chɔŋ che nduyɛ mbo tuɛi taamasioo hoo, mbo sina maa Chiisu wa Mɛsayanɔ nda dimi wo ni. (Chɔŋ 1:​32-34) O paale leŋ choo, mɛɛ Chɛhowa tuisi Chiisu nyina ndɔ diandaa choo, mbo simnuŋ Mɛsayanɔɔ. Ndu Mɛlɛka hɛli ni le mbo wa Simlachinɔɔ a Masaa.—Aisaya 55:​4.

⁹ Sɔɔŋ Baabuiyo dimi woŋ, nyɛ Chɛhowa pila soo  wo, a taamasi o yɔŋgu o yiŋɔɔ Chiisoo wo chɔm maa Chiisu cho Mɛsayanɔɔ ni. Kɛ kuɛɛnɛ Chiisu chɛŋ yɛ? Ŋ tofawɔ nyɛ Baabuiyo dimi wo?

10. Yɛɛ Baabuiyo pɛɛku yɛ a yoomu Chiisoo okɔɔ tuupa mbo huŋ o lɛŋndeŋ choo?

¹⁰ Baabuiyo pɛɛku maa Chiisu wa achal o choo choo niŋ tuupa mbo huŋ o lɛŋndeŋ choo. Mi Makal ndoo  dimi maa o “yuŋgu . . . masindɛ sindɔɔ choo” Mɛsayanɔɔ fula ni. (Makal 5:​2) Mi Chiisu pila bɛɛ dimi teleŋnda bɔɔbɔɔ maa o wa fɛŋ o choo niŋ malaŋ nda vialu ndu maa wana chiee. (Nuawɔ Chɔŋ 3:​13; 6:​38, 62; 17:​4, 5.) Tuupa mi Chiisu huŋ o lɛŋndeŋ choo, ndoo nɔ chaŋyɛi teŋgeŋnde a Chɛhowa.

11. Le yɛɛ Chiisu cho yɛ wana sɔvɛ bɛndu Chɛhowa o hɔl?

¹¹ Chɛhowa kaala bɔɔ Chiisu. Le yɛɛ? Kanifuule, ndu fɛŋ Mɛlɛka toosiaa lɔɔpa mbo toosiaa nyɛ o nyɛ vɛlɛ a wana o wana cheleŋ. Lelaŋ Chiisu sɔla veelɔŋndo ni aa “wolɔɔ tasoo le nyɛ o nyɛ Mɛlɛka toosiaa.” * (Kolosiaŋnda 1:​15, NW) Le sabu Chiisu cho vɛlɛ wana sɔvɛ Chɛhowa o hɔllo cho ni maa, Chɛhowa pila toosiaa ndu a ba ndɔ ni. Lelaŋ o sɔla veelɔŋndo ni aa “Po ndɔ pilɔɔ kpe.” (Chɔŋ 3:​16) Chiisu kinɛi Chɛhowa soliŋ vɛlɛ kpeku ni le nyɛ o nyɛ cheleŋ toosiaa. (Kolosiaŋnda 1:​16) Nduyɛ Chiisu ndupilɛ kpe sɔla veelɔŋndo ni aa “Diomndo,” kanifuule, ndu Chɛhowa soliŋ kpeku ni le yooŋgulaŋ hivioo o maalikɛiya a waŋchieeya lo vɛlɛ a nda nɛi chɔmaa kioo.—Chɔŋ 1:​14.

12. Vɛɛ naŋ looku yɛ sina maa Chiisu nda Mɛlɛka cho waŋndo opilɛ le?

¹² Waŋnda apum laalaŋ maa Chiisu nda Mɛlɛka waŋndo opilɛ nda cho ni. Kɛ o cho lende le Baabuiyo pɛɛku le. Baabuiyo dimi maa Chɛhowa toosiaa Chiisu ni. Hoo chɔm ni maa Chiisu nɔ kandɔŋndo. Kɛ Chɛhowa, o toosiaa nyɛ o nyɛ fee wo nɔ kandɔŋ te. (Sam 90:​2) Baabuiyo pɛɛku kpendekele maa Finyaa hiou a Poleŋ.  (Nuawɔ Chɔŋ 14:​28; Kɔliŋtiaŋ Tasoo 11:​3.) Chɛhowa ndupilɛ kpe cho Mɛlɛka “kpuluŋguma bɛndoo ni.” (Chɛnɛsee 17:​1) Ndu hiou kpou, nduyɛ ndu nɔ kpaaya bɛndu bɛndoo o choo choo niŋ a o chieeŋndo choo ni.—Tofa Diomnda Chɔɔlaalaŋ 14.

13. Le yɛɛnɛ Baabuiyo dimi yɛ maa Chiisu cho ‘velaŋ Mɛlɛka wana chiee chi hoo a lehɔl te wo’ ni?

¹³ Mi Chɛhowa nda Po ndɔɔ, Chiisu, tosa wallo diompilɛ le wɔsilaŋ o biiliɔŋndaŋ niŋ, a wa maalikɛiya toosiaa, looŋ, paaleŋ, a nyɛm cheleŋndoŋ. Mi ndaa kaaliaŋ tau! (Chɔŋ 3:​35; 14:​31) Mi Chiisu tual suiliaŋnda finya ndɔlaŋ kɔɔli nyɛkɛndɛi. Lelaŋ Baabuiyo veelu ndu ni maa ‘velaŋ Mɛlɛka wana chiee chi hoo a lehɔl te wo.’—Kolosiaŋnda 1:​15.

14. Vɛɛ Po sɔvɛ Chɛhowaa ndoo nɔla yɛ mbo veluŋ maa wana chiee?

¹⁴ Mi Po sɔvɛ Chɛhowaa chɛl le faŋaŋndo choo choo mbo huŋ violuŋ lɛŋ naŋ maa wana chiee. Vɛɛ keŋ ndii yɔŋnuŋ yɛ? Mi Chɛhowa tosa kaamaa, mbo chua yoomu Po ndɔɔ o choo choo niŋ, okoŋ, mbo wou ndu chua laandu ndoo sina wɔ suɛi wana pɔnɔ le wo o dembe diolaŋ Meele. O nɛiyo hoo choo, Chiisu ndoo yeema finya wana chiee le. Okoŋ, mi Meele vialu po walaŋndo, mbo ke ndu diolaŋ aa Chiisu.—Luku 1:​30-35.

15. Vɛɛ ŋ looku yɛ ma sina Chɛhowa nyɛkɛndɛi?

¹⁵ A nɔla ma pɛɛku tau a Chiisu okɔɔ, yoomu ndɔɔ, a suiliŋnda ndɔlaŋ te a wa pɛ diomndaŋ veeloo o yaula Baabuilaŋ ndaŋ niŋ, Maatiu, Maki, Luku, a Chɔŋ. Le mɛɛ Chiisu cho maa Finya ndɔ yɛ, nyɛ ŋ cho pɛɛku o yaulaŋ ndaŋ niŋndo cho vɛlɛ num mala ma sina Chɛhowa nyɛkɛndɛi. Le sabu koŋ Chiisu dimi ni aa, “Wana o wana che ya pɛ, mɛɛ o chii Finya nuu chɔ.”—Chɔŋ 14:​9.

16. Yɛɛ Chiisu ndoo pɛɛku yɛ waŋnda? Kuɛɛnɛ nyɛ Chiisu ndoo pɛɛku wo chɛŋ yɛ?

 ¹⁶ Mi wanaa bɔɔbɔɔ veelu Chiisu aa “Ticha.” (Chɔŋ 1:​38; 13:​13) Sɔɔŋ sɔvɛ sɔvɛ tase o pɛɛku woŋ ipilɛ wa “yooŋgu kɛndɔɔ” a Masaleŋ okɔɔ ni. Yɛɛ cho yɛ Masaleŋ ndeŋ? Leŋ le cho masale Mɛlɛkaleŋ ni. O choo choo niŋ le cho ni. Kpaaya ndɔɔ cho tiu o lɛŋndeŋ choo kpou nduyɛ mi le hiŋ a tɔnɔlaŋ le wanaa diikuŋ Mɛlɛka wa. (Maatiu 4:​23) Nyɛ o nyɛ Chiisu ndoo pɛɛku o Chɛhowa lo ndoo fula ni. Mi Chiisu dimi aa, “Mɛlɛka o vem ya wo, o ndu lo pɛɛku ya I pɛɛku waŋnda wo o chɛŋ ni. O cho pɛɛku ni ya pila le.” (Chɔŋ 7:​16) Mi Chiisu sina maa Chɛhowa yeema mi waŋnda tuei yooŋgu kɛndɔɔ maa kpaaya Masale Mɛlɛkaleŋ cho wa o chieeŋndo choo kpou.

17. Kuɛɛnɛ Chiisu ndoo pɛɛku yɛ waŋnda? Le yɛɛ o tosa yɛ wallo o kala kala le acheleŋnda pɛɛkoo?

¹⁷ Kuɛɛnɛ Chiisu ndoo pɛɛku yɛ waŋnda? Ba o ba fee ndoo saaluŋ pɛ waŋnda. Mbo pɛɛku waŋnda o lɛŋnde mɛɛlulaŋ, o chieeŋ bɛndoŋ niŋ, o sɔndɔkɔltaŋ, o lɔɔlaŋ niŋ, o toŋgola maaŋndaŋ niŋ, a o chiɛila ndalaŋ. Ndoo chum mi waŋnda hiŋ o ndu lo le. Ndu oo kua o ndalo ni. (Maki 6:​56; Luku 19:​5, 6) Mi Chiisu tosa wallo o kala kala nduyɛ mbo soliŋ teleŋ ndɔɔ a yoomuma nduaŋ kpeku le waŋnda pɛɛkoo. Le yɛɛ? Kanifuule, Mɛlɛka ndoo yeema ndu mbo tosa keŋ, nduyɛ lɔɔlɔɔ mi ndoo diikuŋ Finya ndɔ. (Chɔŋ 8:​28, 29) Le mɛɛ Chiisu ndoo nɔ nyiɛɛye le waŋnda yɛ ndoo dimul nda vɛlɛ yooŋgu kɛndɔɔ ni. (Nuawɔ Maatiu 9:​35, 36.) Mbo cha maa simlachiaa o piɛiye niŋ ve tonyaa pɛɛku a Masale Mɛlɛkaleŋ okɔɔ le. Lelaŋ, ndoo yeema mbo mala waŋnda tau le ma tuei yooŋgu kɛndɔɔ.

18. Suiliŋnda Chiisu kuɛɛ ŋ hɛnaŋ yɛ tau?

¹⁸ Wana ndoo kaala waŋchieeya nduyɛ mbo buulaŋ le  nda wo Chiisu wa ni. Wana kɛndɔɔ o wa ni nduyɛ i ve ikala le suɛi o ndulo le. Chuaambuaa bɛɛ ndaa hɛnaŋ waa ndu ikɛi. (Maki 10:​13-16) O teleŋ ndɔɔ niŋ, waŋlaanduaa ndaa sɔla dila bɔɔ le nduyɛ ndaa ke nda lebɛɛ le. (Maatiu 21:​12, 13) Kɛ Chiisu ndu lɔɔlɔɔ mi ndoo ke nda bɛɛleŋ. (Chɔŋ 4:​9, 27) Wana tuisiaŋndo pila Chiisu wa vɛlɛ ni. Le taamaseliiyo, ichɔl pilɛ, mbo pulu buɛiyaa nduaa peloŋ, wali buɛiyo nɔ kuee mbo tosa wo.—Chɔŋ 13:​2-5, 12-17.

19. Taamasi kuɛɛ chɔm yɛ maa Chiisu ndoo sina kɛsɛ bahawɛila waŋnda, nduyɛ mbo yeema le nda malaa?

¹⁹ Chiisu ndoo sina nyɛ kpeekpei waŋnda ndaa hau ba wo, nduyɛ mbo yeema le nda malaa. Hei wa kpendekele mɛɛ o soliŋ kpaaya Mɛlɛkaa kpeku le waŋnda siŋgioo o kaamaa niŋ. (Maatiu 14:​14) Le taamaseliiyo, mi po ndoo nɔ lɛlɔŋ ndo huŋ naa Chiisu cha, mbo dimul ndu aa, “A nɔla ma siŋgi ya, te o wa pɛ ma chɛl.” Mi nyiɛɛye bii Chiisu le nyɛ nɛiyaa poo hoo wa niŋndo, nduyɛ mbo yeema le ndu malaa. Le hei, mbo siɛndi ba ndɔɔ mbo pilaŋ poo hoo, mbo dimul ndu aa, “I chɛl mi siŋgi num. Lelaŋ, sioŋgu ma simnuŋ vɛlɛ o diandaa.” Nduyɛ mi poo hoo sɔla sioŋgɔɔ! (Maki 1:​40-42) Yiyaŋndɔ niko mɛɛ po koŋ wa a nyaale yɛ!

20. Vɛɛ Chiisu cho yɛ taamasi kɛndɛ kɛndɔɔ le Mɛlɛka diikɔŋndo?

²⁰ Chiisu cho taamasi kɛndɛ kɛndɔɔ ni le Mɛlɛka diikɔŋndo. A nyɛ ndoo yɔŋnuŋ ndu wo ɔɔ nyɛ yaamɔɔwaa nduaa tosal ndu wo kpou, mbo lo o tiindaŋ ndɔɔ choo o Finya ndɔ lo. Le taamaseliiyo, mɛɛ Setana kindiŋ le ndu tɔɔndaŋndo, o tosa haki le. (Maatiu 4:​1-11) Mi wanayaŋ ndɔŋ ŋpum kɛɛ laalaŋndo dɔuwɔɔ o ndu niŋ. Ma dimul ndu pɛŋ maa “o cho ko sɔɔŋ tosaa maa wana seemɛi.” Kɛ mi Chiisu hiau lachi a wali Mɛlɛkaa tosaa. (Maki 3:​21)  Mɛɛ yaamɔɔwaa nduaa tosal ndu dɛnɛ wɔɔŋndo, mbo lo o tiindaŋ ndɔɔ choo o Mɛlɛka lo nduyɛ o kindiŋ mbo miŋgul nda maa le.—Pitɛ Tasoo 2:​21-23.

21. Vɛɛ Chiisu lo yɛ o tiindaŋndo choo o Chɛhowa lo tei mbo wu?

²¹ Teleŋ Chiisu sɔla bɛɛ piɔm imɔnɔɔ wo, mbo lo o tiindaŋ ndɔɔ choo o Chɛhowa lo. (Nuawɔ Filipiaŋnda 2:​8, NW.) Yiyaŋndɔ a mɛɛ kpɛ ndoo biunuŋ o paale ndoo sɔla piɔmndo leŋ choo yɛ. Mɛɛ nda bii ndu, mi seiyaa lachoowaa tɛndal ndu seile lakafaleŋ maa o tɛɛmbuu diola Mɛlɛkalaŋ, mi wanaa kialaa ŋyamaa kilul ndu yamɛi lakafɛi, mi faŋgaa mam ndu, nduyɛ mi puaa chɔuwa luei ndu mɔnɛi, okoŋ, ma baŋ ndu o yɔmndo choo. Mɛɛ o wa wuoo, mbo chaŋ choo choo kpeleŋ aa, “Nyɛ o nyɛ chuu  yɔnɔŋ.” (Chɔŋ 19:​30) Mɛɛ palɛi hiou iyaa o piɔm Chiisoo kɔɔli, mi Chɛhowa soli ndu o sɛiyo niŋ, mbo ke ndu dialuŋ inyinayaŋ. (Pitɛ Tasoo 3:​18) Mɛɛ palɛi 40 hiou, mi Chiisu miiŋguŋ o choo choo niŋ, “mbo kɔ chal . . . o ba kɛndɛ Mɛlɛkaa choo,” nduyɛ mbo chum le mi Mɛlɛka siiŋguu ndu Masaa.—Hibuluiya 10:​12, 13.

22. Di yɛɛ naŋ sɔla yɛ suŋ suŋ le mɛɛ Chiisu lo o tiindaŋ ndɔɔ choo o Finya ndɔ lo yɛ?

²² Le mɛɛ Chiisu chɔm lo lechoo wo o Finya ndɔ lo yɛ, ŋ sɔla dioo le waa achal lefafɛɛŋ o kpele hɛnɛkiɔɔ niŋ o lɛŋndeŋ choo, a mɛɛ Chɛhowa mɛi lediom yɛ. O buŋgɛi cho lachi ve niŋ, ŋ cho yaasiaa mɛɛ piɔm Chiisoo tosa miŋ sɔla dioo le waa achal lefafɛɛŋ yɛ.