Diola Mɛlɛkalaŋ aa Chɛhowa, nduyɛ laŋ la sim ni, “O Simnuŋ Nyɛ O Yeema Mbo Simnuŋndo.” Mɛlɛka kpaaya kpou kpou wo Chɛhowa cho ni, nduyɛ ndu toosiaa nyɛ o nyɛ fee ni. O nɔ kpaayaa le tosaa nyɛ o nyɛ o kɛɛsiaa pɛ le tosaa.

O Hibuluiye niŋ, a chomultaŋ la hiɔɔlu nda poonyiaa diola Mɛlɛkalaŋ ni. O Iŋkilisiiye niŋ, chomulta laŋ la cho ni, YHWH ɔɔ JHVH. Yaula maHibuluila taselaŋ o Baabuiyo niŋ nɔ diola Mɛlɛkalaŋ le bɛmbɔɔ 7,000. Waŋnda chieeŋndo balɔɔ silɔ veelu Chɛhowa o nɛila yɛ yɛlaŋ niŋ. Mɛɛ suɛi maŋgalɛi ndɛi bii diolaŋ ndaŋ bila yɛ nda veelu laŋ ni.

▸ Buŋgɛi 1, pɛl 15

Yau Mɛlɛkaa Baabuiyo cho ni. Kɛ puaa o soliŋ kpeku ni le ndu poonyiaa. Hei cho ko mɛɛ waŋndo dimul naa wana cheleŋ le ndu yauwo poonyiallo yɛ. Mi Mɛlɛka soliŋ nyina ndɔ diandaa kpeku le wanaa poonyiaa Baabuiyo wa nɛi chɔmaa kioo, le ma poonyiaa yiyaŋnda ndɔlaŋ. Mi nyina Mɛlɛkaa ke nda nɛi chɔmaa o nɛila yɛ yɛlaŋ niŋ. Lepum, mi ndoo tosa nda ma che yilaŋndoŋ, ɔɔ mi ndaa sɔl luaŋ, okoŋ, ma poonyiaa sɔɔŋ muŋ.

▸ Buŋgɛi 2, pɛl 5

Sawala mandaalaŋ o Baabuiyo niŋ la tɛɛsiaa tonya kpeekpeiyo ni. Le taamaseliiyo, sawa mandaa hoo, “te you di maaloŋ te wo o kela youwaa dia maaloŋ nda kɔɔli pɛ, ndu bɛɛ o cho muŋ dio,” o pɛɛku naa maa chaŋyaŋ naŋ biiyoŋ chuu naa fulamakɔɔli kɛndɔɔ ɔɔ o wɔɔŋndo. (Kɔliŋtiaŋ Tasoo 15:​33) Nduyɛ sawa mandaa hoo, “yɛyii  wana saŋ o chiɛi numnde niŋ nde, ndi koni ŋ kuau ni,” pɛɛku naa maa ŋ nɔla miŋ kpakpala fulamakɔɔli kelala naalaŋ te.—Kaleesiaŋnda 6:​7.

▸ Buŋgɛi 2, pɛl 12

Yooŋgu chɛŋ o Mɛlɛka lo wo o cho ni. Lepum le sabu Mɛlɛkaa tɛɛsiaa, pɛɛku sɔviɔɔ, sawaa, ɔɔ yamɛi kiolɔɔ. O wa vɛlɛ yooŋgoo a nyɛ cho yɔŋnɔŋ o chilaŋ niŋndo okɔɔ. Sɔɔŋ Baabuiyo dimi niŋ miŋ peeluŋ ndoŋ cho tau.

▸ Buŋgɛi 2, pɛl 13

Chiisu peelu sɔɔŋ bɔɔbɔɔ dimiŋ o Baabuiyo niŋ a Mɛsaya okɔɔ woŋ ni. Tofa kɔfoo “ Sɔɔŋ Dimiŋ a Mɛsaya Okɔɔ Woŋ.”

▸ Buŋgɛi 2, pɛl 17, tɛɛsiaa amatou.

Chɛhowa toosiaa chieeŋndo le mbo wa kpele hɛnɛkiɔɔ le waŋchieeyaa kaala ndu wa. Sabu ndɔɔ siŋgaŋ ndɔ le. Mɛlɛka cho suŋ dɛnɛ wɔɔŋndo faŋa nduyɛ mbo ke wanaa nduaa yoomu fafɛɛŋndo.

▸ Buŋgɛi 3, pɛl 1

Setana cho maalikɛinɔ kandu Mɛlɛka nila kalulaŋ tosallo wo ni. Diolaŋ ndaŋ Setana sim ni, “Wana Nila Kaloo,” kanifuule, Chɛhowa o cho chɔulabaa ni. Ndu nɔ vɛlɛ diolaŋ ni aa Masa Nyinaa Wɔɔŋnda, koŋ sim ni, “Wana Lachoowaa.” Le mɛɛ o dimi choolaŋ a Mɛlɛka okɔɔ nduyɛ mbo hui waŋnda yɛ o sɔla diolaŋ ndaŋ ni.

▸ Buŋgɛi 3, pɛl 4

Mɛlɛka toosiaa fɛŋ maalikɛiya lɔɔ levil malaŋ o toosiaa chieeŋndo. Le waa o choo choo niŋ o toosiaa nda ni. Maalikɛiya hiou le miiliɔŋndaŋ kɛmɛ. (Daaniɛɛ 7:​10) A nɔ diolaŋ a suliŋndaŋ yɛ yɛ. Nduyɛ, maalikɛiyaa chɔm lo lechoo wo wa chɛl mi waŋchieeya piɛi nda le. A nɔ foofola teŋgeŋ teŋgeŋndaŋ a waltaŋ yɛ yɛlaŋ le tosaa. Waltaŋ ndaŋ lapum la cho ni, wallo tosaa kpeŋgbei lemasa Chɛhowaa lachi, yooŋgu ndɔɔ pɛŋgɛlaa, buɛiyaa nduaa o chieeŋndo choo mandaa a nda nɛi chɔmaa kioo, nyɛ ndɔ palaa waŋnda tusioo choo, a wali dimiaa yooŋgu kɛndɔɔ tooloo. (Sam 34:​7; Sɔɔŋ Chɔɔmaŋndoŋ 14:​6; 22:​8, 9) O chilaŋ niŋ, a cho chɔulaba a Chiisu latulu o chɔu Amakɛdɔŋ ndo.—Sɔɔŋ Chɔɔmaŋndoŋ 16:​14, 16; 19:​14, 15.

▸ Buŋgɛi 3, pɛl. 5; Buŋgɛi 10, pɛl 1

Nyɛ o nyɛ naŋ yiyaŋ pɛ, ɔɔ miŋ tosa mbo ve o chɛlaŋ a hɛnaŋ Chɛhowaa le, hakioo o cho ni. Le mɛɛ hakioo tɛɛmbuu chaŋyɛi nɛi a Mɛlɛka yɛ, o ke naa sawalaŋ a sawala mandaalaŋ le naa malaa miŋ kpakpala haki kpɛsɛkɛɛ wo tosaa. O kandɔŋndo, mi Chɛhowa toosiaa nyɛ o nyɛ fee o kɛndɛ. Kɛ mɛɛ Adam nda Ifi hɛli le Chɛhowa nila kalulaŋ tosallo, ma luɛi o hakioo niŋ nduyɛ a ve lɛ wanaa walaŋ te. Ma yuwa, okoŋ ma wu. Nduyɛ le mɛɛ naŋ sɔla hakioo o Adam niŋ yɛ, naa bɛɛ yuwa ni miŋ vi.

▸ Buŋgɛi 3, pɛl 7; Buŋgɛi 5, pɛl 3

A chɔuwo hoo Mɛlɛka cho chieeŋ Setanaa tɛɛmbuu ni, nduyɛ mbo chii dɛnɛ wɔɔŋndo kpou.

▸ Buŋgɛi 3, pɛl 13; Buŋgɛi 8, pɛl 18

Chɛhowa Mɛlɛka kila Masale ndɔleŋ o choo choo niŋ. Nduyɛ, Chiisu Kiliti cho Masaa le Masaleŋ ndeŋ ni. O chilaŋ niŋ, Chɛhowa cho Masaleŋ ndeŋ soliŋ kpeku le dɛnɛ wɔɔŋndo kpou faŋaa. Kpaaya Masale Mɛlɛkaleŋ cho tiu o chieeŋndo choo kpede.

▸ Buŋgɛi 3, pɛl 14

Chiisu fɛlɛŋ Mɛlɛka toosiaa malaŋ o toosiaa nyɛ o nyɛ fee. Mi Chɛhowa viam Chiisu o lɛŋndeŋ choo le mbo vi le ŋwaŋchiee kpou. Mɛɛ nda dii Chiisu, mi Chɛhowa miŋgi ndu yoomu. Chiisu cho niŋ o Masale Mɛlɛkaleŋ choo, o choo choo niŋ.

▸ Buŋgɛi 4, pɛl 2

Mi Baabuiyo chɔm teleŋ Mɛsaya cho hunɔɔ wo. A boondii nda veelu aa lɔɔla 69 mɛɛlulaŋ ndo hei yɔŋnuŋ ni. Lɔɔlaŋ ndaŋ la kanduŋ a wɔsi 455 B.C.E., nduyɛ mi la mɛɛlu a wɔsi 29 C.E.

Vɛɛ naŋ looku yɛ sina maa a wɔsi 29 C.E. la mɛɛlu ni? Lɔɔla 455 B.C.E. laŋ la kanduŋ a teleŋ Nɛhimaya fuuluu Chulusɛlɛm mbo kandu chioo taŋgullo wo. (Daaniɛɛ 9:​25; Nɛhimaya 2:​1, 5-8) O lɔɔ bɛŋgu, ŋ nɔ palɛi i ŋɔmmɛu. Kɛ o suɛi Baabuiyo dimi hei ve niŋ, lɔɔlaŋ ndaŋ la cho lɔɔla nɔ palɛi i ŋɔmmɛu laŋ te. Kɛ, lɔɔla wɔsila ŋɔmmɛu laŋ, a mɛɛ i cho i dimiaŋ o Baabuiyo niŋ yɛ maa “lepaa o lepaa le sim le wɔsioo o pilɛ.” (Nɔmbaa 14:​34; Isikiaa 4:​6) Hoo sim ni maa lɔɔ kɛ kɛ sim le wɔsilaŋ la ŋɔmmɛu, nduyɛ maa lɔɔla 69 laŋ la peelu wɔsila 483 laŋ ni. Koŋ cho ni, 69 bɛmbɔɔ 7. Te ŋ chɔm pɛ wɔsilaŋ 483 chɔŋ a wɔsi 455 B.C.E., o cho naa yɔɔ o wɔsi 29 C.E. (wɔsi fondo cho le). O wɔsioo hoo niŋ kpeekpei Chiisu sɔla yiŋɔɔ ni nduyɛ mbo simnuŋ Mɛsayanɔɔ!—Luku 3:​1, 2, 21, 22.

 Mi nyɛ pilɛ kpe Baabuiyo dimi hoo wo suaa vɛlɛ a lɔɔ cheleŋ okɔɔ, ndu cho yɛ wɔsila ŋɔmmɛula cheleŋ ni. O boondei hei bɛŋgu o wɔsi 33 C.E. niŋ, ndaa nɔ le Mɛsayanɔɔ diyɔɔ ni. Nduyɛ kanduŋ a wɔsi 36 C.E., yooŋgu kɛndɔɔ a Masale Mɛlɛkaleŋ okɔɔ ndoo nɔ mbo dimiŋ o chieeŋndo choo kpou, o cho ko o Chuuwa lo le.—Daaniɛɛ 9:​24-27.

▸ Buŋgɛi 4, pɛl 7

Baabuiyo pɛɛku maa Chɛhowa Mɛlɛka cho Wana Toosiaa ni nduyɛ maa o toosiaa fɛŋ Chiisu malaŋ o toosiaa nyɛ o nyɛ fee. (Kolosiaŋnda 1:​15, 16) O cho Chiisu le cho Mɛlɛka Kpou Kpou Wo le. Paale pilɛ bɛɛ o tuu maa a sulaŋ nda Mɛlɛka le. Mbo dimi pɛŋ aa, “Finya nuu ndu hiou a ya.” (Chɔŋ 14:​28; Kɔliŋtiaŋ Tasoo 15:​28) Kɛ mi piɛiye ipum pɛɛku maa waŋnda a yaa cho o Mɛlɛka pilɔɔ niŋ ni, Finyaa, Poleŋ, a nyina diandaa. Pɛɛku lachoowaa cho koŋ ni.

Kpaaya Mɛlɛkaa cho nyina diandaa ni. Kpaaya ndɔ koŋ o soliŋ kpeku ni le hɛnaŋ ndɔɔ tosaa. O cho nyɛ wana che le. Le taamaseliiyo, Kilisiɔŋaa tasiaa, mi “Nyina [“diandaa,” NW] tual nda kɔɔli.” Nduyɛ mi Chɛhowa dimi aa, ‘I cho nyina nuu yɔŋ waŋnda kpede kɔɔli.’—Walta Wanaa Chiisuaa 2:​1-4, 17.

▸ Buŋgɛi 4, pɛl 12; Buŋgɛi 15, pɛl 17

Te Kilisiɔŋaa tonyaa wa pɛ Mɛlɛka piɛiyo, a soliŋ yɔm siŋgafilaa kpeku le. Le yɛɛ?

1. O sindɔɔ niŋ, mi ndaa soliŋ ndu kpeku le nyɛm cheleŋndoŋ sooluuwo, ɔɔ te waŋndo ndoo yeema pɛ wana lanɔɔ, ɔɔ wana pɔnɔɔ violɔɔ. O wɔsiŋ 300 tasoŋ niŋ o piɔm Chiisoo kɔɔli, Kilisiɔŋnda ndaa soliŋ yɔm siŋgafilaa kpeku o piɛile ndaleŋ niŋ te. Kɛ mɛɛ nyɔɔ viou tiŋ, mi Masa maLuomaŋ pum diolaŋ Kɔŋsaŋtaiŋ tosa mi yɔm siŋgafilaa simnuŋ pondaleŋ le Kilisiɔŋnda. Ma soliŋ yɔm siŋgafilaa kpeku le mi waŋnda sina Kilisiɔŋndeŋ tau. Kɛ yɔm siŋgafilaa nɔ nyɛ o nyɛ le tosa a Chiisu Kiliti le. Mi New Catholic Encyclopediaa dimi aa, “Yɔm siŋgafilaa wa niŋ tuupa mi Kilisiɔŋndeŋ le huŋ. Nduyɛ Kilisiɔŋnda a wanaa ve ŋKilisiɔŋ te wa, wa niŋ yɔm siŋgafilaa soliŋndo kpeku.”

2. Diomnda maKilikiila nda hivi le “yɔm siŋgafilaa” wo sim le “kpɔlɔŋndo” ɔɔ  “yɔm cho sakpo” wo. Mi Companion Bible tɛɛsiaa aa, “Diom o diom cho o yaula maKilikiilaŋ niŋ, mbo suaa a yɔm siŋgafilaa okɔɔ le.” O kpɔlɔŋndo choo Chiisu vi ni.

3.   

▸ Buŋgɛi 5, pɛl 12

Mi Chiisu dimul buɛiyaa nduaa le ma wa Loonuŋyaa biyɔɔ a piɔm ndɔɔ okɔɔ. Mi ndaa tosa hei iwɔsi o iwɔsi a Niisaŋ 14. O paale pilɛ leŋ ndeŋ choo kpe Isɔluɛiya ndaa tosa dunyɛi Hiouwɔɔ Choo Wo ni. O yau ŋpaŋgu naa hau niŋ, paaleŋ ndeŋ le bii a Fuoo ɔɔ Nyaakuɛiyo. O Loonuŋyaa choo, ma keela wana o wana fee beediiyo o hɔl vɛlɛ a muɛiyaŋ. Muɛiyaŋ a beedii koŋ sim le kooma Chiisu waŋ a dialuŋ ndɔŋ. Wanaa cho wa o masaleŋ choo a Chiisu latulu wa dia beedii koŋ ni nduyɛ ma kol muɛima maŋ. Wanaa nɔ tiindaŋndo le waa o chieeŋndo choo lefafɛɛŋ nda, challe koni nda chal o Loonuŋyaa choo ni ma tofa, kɛ a di beediiyo nduyɛ ma kol muɛima maŋ te.

▸ Buŋgɛi 5, pɛl 21

O Baabui New World Translation ndo niŋ, diomndo hoo “yoomoo” sim le (1) waŋndo, (2) visioo, ɔɔ (3) yoomu wana chioo ɔɔ visioo. Tofawɔ taamaseliilaŋ lapum:

• Wana chioo. Baabuiyo dimi aa, “Wana o wana cho o chieeŋndo choo, ya Mɛlɛka o ba yoomu ndɔɔ cho ni. Finya ni, po vialaa ni, ya nɔ yoomula ndalaŋ ni. Wana tosa yɔŋ wɔɔŋndo wo, ndu nɔ ni mbo sɔla piɔmndo.” (Isikiaa 18:​4) O bolle Baabuileŋ ndeŋ niŋ, diomndo hoo ‘yoomoo’ sim le wanachioo. Kanifuule, wanachioo koni tosa yɔŋ wɔɔŋndo ɔɔ hakioo ni.

•  Visioo. “Mi Mɛlɛka dimi aa, ‘Nyaa yoomaa yɛ yiaa a wa niko, ma pɛ o peelaŋ. Youwa bɛɛ a wa ma balu choo choo o halaa niŋ.’ Okoŋ kɔɔli, mi Mɛlɛka dimi aa, ‘Lɛŋndeŋ le tosa niko mi visiaa suula yɛ yiaa a fula lɛŋ a suulaŋ yɛ yɛ, visiaa chiee niŋnda ni, a visiaa yonduaa nɔ kɛkɛulaŋ nda.’ Mi i yɔŋnuŋ lende.” (Chɛnɛsee 1:​20, 24)

• Yoomu wana chioo ɔɔ yoomu visioo. Mi Chɛhowa dimul Muuse aa, “Wanaa nda aa yeema le num [“yoomu numndo,” NW] diyɔɔ wa kpou, a chuu paku.” (Ɛsɔdɔɔ 4:​19) Teleŋ Chiisu wa o lɛŋndeŋ choo wo, mbo dimi aa, “Ya cho wana mandaa lasaa o dɔu kɔllo kpou o saa nduaa lo wo ni. Wana mandaa lasaa o dɔu kɔllo kpou o saa nduaa lo wo, ndu cho o chɛlaa le wuoo le saa, hali kpeŋ a yɔŋnuŋ nyɛ le.”—Chɔŋ 10:​11.

  Le handɔɔ lechoo, te waŋndo tosa pɛ suɛi a yoomu ndɔɔ kpou, hoo sim maa mbo tosa ndi a kɔl ndɔɔ kpou ɔɔ a mɛɛ o tiuba yɛ. (Maatiu 22:​37; Ditɔnɔmii 6:​5) Diomndo hoo “yoomoo” sim vɛlɛ le tɛɛsiaa yeemɛi nyɛ yoomaa nɔ wo. A veelu wana vilɛiyo ɔɔ dialuŋ vilɛiyoŋ aa yoomu chuu wo. (Nɔmbaa 6:​6; Pulɔwaa 23:​2; Aisaya 56:​11; Hakai 2:​13) Diom Mɛlɛkaa chɔm kpendekele maa mi yoomoo vi, koŋ sim ni piɔmndo.—Isikiaa 18:​4, 20; Chemisi 5:​20.

▸ Buŋgɛi 6, pɛl 5; Buŋgɛi 15, pɛl 17

Diomnda maHibuluilaŋ a diomnda maKilikiila nda soliŋ kpeku o Baabui New World Translation ndo niŋndo la sim le sɔɔŋ yɛ yɛ. Kɛ lɔɔlɔɔ nda soliŋ diomndaŋ ndaŋ kpeku pɛ, la sim le nyɛ wana chioo chi a lehɔl te wo. Diomndaŋ la sim vɛlɛ le nyaa yoomaa cho o inyinaya wa vɛlɛ a nyina diandaa, ndu cho yɛ kpaaya Mɛlɛka soliŋ kpeku wo ni. Baabuiyo pɛɛku naa maa te waŋndo vi pɛ, nyɛ cho ndu niŋ mbo hiou lachi a waa yoomu le.—Sam 104:​29; Maatiu 12:​43; Luku 11:​13.

▸ Buŋgɛi 6, pɛl 5; Buŋgɛi 15, pɛl 17

Kpoloŋ wa Chulusɛlɛm ikɛiyo nɔ diolaŋ ni aa Kɛhɛna. Loŋ ndaa viau billo ni ma lom. Nyɛ o nyɛ chɔm maa o teleŋ Chiisoo niŋ, mi ndaa tusi visiaa ɔɔ waŋchieeya nyɛpalaa choo ɔɔ mi ndaa lom nda yoomu o kpoloŋ koŋ niŋ te. Lelaŋ, o cho fondaŋ nda tusi wanaa vi wa nyɛpalaa choo ɔɔ ma lom nda lefafɛɛŋ ndo le Kɛhɛna cho le. Mɛɛ Chiisu dimi maa a cho waŋnda wou Kɛhɛna, a tambii fafɛɛŋnde okɔɔ o wa suɛi ni.—Maatiu 5:​22; 10:​28, NW.

▸ Buŋgɛi 7, pɛl 20

Piɛileŋ ndeŋ Chiisu piɛi ni mɛɛ o wa buɛiyaa nduaa pɛɛkoo mɛɛ wana piɛi yɛ. A veelu vɛlɛ leŋ aa piɛile Chiisu pɛɛku buɛiyaa nduaa leŋ. Le taamaseliiyo, mi Chiisu pɛɛku naa le piɛiyo o nɛiyo hoo choo:

• “Waŋnda kpou ke diola numndaŋ bɛɛleŋ”

  Miŋ piɛi le mi Chɛhowa dindi diola ndɔlaŋ, ɔɔ le mbo wɔɔsuu choola kɛ kɛ nda handu ndu choo. Sabu o tosa heiyo cho ni, le mi wana o wana cho o choo choo niŋ a o chieeŋndo choo ke diola Mɛlɛkalaŋ bɛɛleŋ.

• “Masale numndeŋ le huŋ”

  Miŋ piɛi le mi masale Mɛlɛkaleŋ le tɛɛmbuu chieeŋ Setanaa, mi le tiu o chieeŋndo choo kpou, nduyɛ mi le tosa mi chieeŋndo simnuŋ kpele hɛnɛkiɔɔ.

• “Hɛnaŋ numndo yɔŋnuŋ o lɛŋndeŋ choo”

  Miŋ piɛi le mi sabu Mɛlɛkaa le chieeŋndo peeluŋ le mi wanaa diikaŋnda, ɔɔ wanaa walaŋnda wa o Kpele Hɛnɛkiɔɔ niŋ lefafɛɛŋ, mɛɛ Chɛhowa ndoo yeema mi waŋchieeya ndaa wa yɛ.

▸ Buŋgɛi 8, pɛl 2

Mi Chɛhowa yɔŋgu sala baŋaa le waŋchieeya solioo o hakioo niŋ a piɔmndo. Sala baŋaa ndoo yeemaŋ ni le yoomu  walaŋ ndoo hɛluŋ Adam ndo miŋgioo piondɔɔ. Nduyɛ, le mi chaŋyɛi tambu Chɛhowa nda waŋchieeya tɛɛŋnde miiŋgu toosiaŋ. Mi Mɛlɛka yɔŋ Chiisu o lɛŋndeŋ choo le mbo vi le wanaa lahakiaa kpou. Le piɔm Chiisu sɔla wo, waŋchieeya kpou sɔla dioo le waa achal lefafɛɛŋ nduyɛ ma simnuŋ wanaa walaŋnda.

▸ Buŋgɛi 8, pɛl 21; Buŋgɛi 9, pɛl 13

Nyɛ Baabuiyo dimi o Daaniɛɛ bolle 4 niŋndo pɛɛku naa maa o wɔsi 1914 niŋ Mɛlɛka kila Masale ndɔleŋ ni.

Nyɛ dimiŋ ndo: Mi Chɛhowa chɔm Nɛbukanɛɛsa lɔmasɔlaŋ a nyɛ nɔ le yɔŋnɔŋndo wo okɔɔ. Mbo sɔl luaŋ a yɔm tɔɔma bɛndoo okɔɔ nduyɛ ma kiaŋ yɔm koŋ. O lɔma sɔlaa mamaŋ niŋ, ma balu chiyii yɔmndo hoo yiiyo silɔ a chiliŋii bulɔŋsiiye yɔŋi i pui. I lo iyiyaa lende tei “wɔsilaŋ la ŋɔmmɛu.” Te boondii keŋ i hiou pɛ, yɔmndo hoo cho vɛlɛ miiŋgu mbo pui.—Daaniɛɛ 4:​1, 10-16.

Nyɛ suɛi dimiŋ nde sim le naa wo: Yɔmndo hoo sim le Masale Mɛlɛkaleŋ. Kɛlɛŋgaa le wɔsilaŋ 500, mi Chɛhowa soliŋ masaa o Chulusɛlɛm niŋ kpeku le ma wa masaa Isɔluɛi choo. (Koloniko Tasoo 29:​23) Kɛ masaa kaŋ lo o tiindaŋ ndaa choo le, lelaŋ, mi masale ndaleŋ le mɛɛlu. Mi Chulusɛlɛm sɔla tambei o wɔsi 607 B.C.E. niŋ. A boondii keŋ “wɔsilaŋ la ŋɔmmɛu” la kanduŋ ni. (Masaa Bɛnduaa Diiŋ Nduaa 25:​1, 8-10; Isikiaa 21:​25-27) Mɛɛ Chiisu dimi maa “waŋnda Chulusɛlɛm a cho wa wanaa cho a Chuu le wa o ba bɛŋgu, nduyɛ ma lo nda nyɛ palaa tusioo choo, haa mbo lo o koŋ mi boondii Mɛlɛka yulu le mi wanaa cho a Chuu le wa, a wa waŋnda Chulusɛlɛm choo ve i fuuluu o mɛɛlulaŋ,” a “wɔsilaŋ la ŋɔmmɛu” okɔɔ o wa suɛi ni. (Luku 21:​24) Lelaŋ, “wɔsilaŋ la ŋɔmmɛu” la chuu a teleŋ Chiisu wa o chieeŋndo choo wo le. Mi Chɛhowa mɛi lediom maa o cho Masaa yulɔɔ iso o “wɔsilaŋ la ŋɔmmɛu” mɛɛlulaŋ. Masa sɛnɛiyo hoo  cho yɛ Chiisu ni. Masale ndɔleŋ le cho hunɔɔ a tɔnɔlaŋ tau tau le wanaa Mɛlɛkaa o chieeŋndo choo kpou lefafɛɛŋ.—Luku 1:​30-33.

Mɛɛ kpɛ “wɔsilaŋ la ŋɔmmɛu” la viou yɛ: “Wɔsilaŋ la ŋɔmmɛu” la viou le wɔsilaŋ 2,520. Te ŋ chɔm pɛ wɔsila 2,520 kanduŋ a wɔsi 607 B.C.E., o cho naa yɔɔ o wɔsi 1914 (wɔsi fondo cho le). A boondii keŋ Chɛhowa siiŋguu Chiisu Kiliti Masaa le Masale Mɛlɛkaleŋ o choo choo niŋ ni.

Vɛɛ naŋ looku yɛ wɔsila 2,520 sɔla? Baabuiyo dimi maa wɔsilaŋ la yaa a paŋgoŋ ŋ ŋɔmpum ke num palɛi 1,260. (Sɔɔŋ Chɔɔmaŋndoŋ 12:​6, 14) Lelaŋ, “wɔsilaŋ la ŋɔmmɛu” wa o nimbolo koŋ niŋ lediiŋ, ɔɔ palɛi 2,520 (1260 x 2). Palɛi 2,520 ke num wɔsilaŋ 2,520 a mɛɛ Baabuiyo dimi yɛ maa “lepaa o lepaa sim le wɔsioo o pilɛ.”—Nɔmbaa 14:​34; Isikiaa 4:​6.

▸ Buŋgɛi 8, pɛl 23

Wana cho maalikɛiya kpou bolleŋndo opilɛ kpe Baabuiyo soo a ndu okɔɔ ni. Nduyɛ diola ndɔlaŋ la cho Maikɛl ni.—Daaniɛɛ 12:​1; Chudi 9.

Maikɛl cho Simlachinɔɔ le puaa chɔuwaa Mɛlɛkaa kpou ni, maalikɛiyaa laalaŋnda. Sɔɔŋ Chɔɔmaŋndoŋ 12:​7 dimi aa, “Mi . . . Maikɛl, nda kiilaa Mɛlɛkaa . . . del tambalakaa hoo a kiilaa cho tambalakaa hoo o ba bɛŋgu wa choo a chɔuwo.” Yau Sɔɔŋ Chɔɔmaŋndoŋ dimi maa Chiisu cho Simlachinɔɔ le puaa chɔuwaa Mɛlɛkaa ni. Lelaŋ, diola cheleŋ le Maikɛl cho Chiisu ni.—Sɔɔŋ Chɔɔmaŋndoŋ 19:​14-16.

▸ Buŋgɛi 9, pɛl 4

Diomndaŋ ndaŋ la sim le boondii sɔɔŋ kpoku kpoku woŋ wa niŋ yɔŋnɔŋndo o chieeŋndo choo wo tuupa mi Masale Mɛlɛkaleŋ le tɛɛmbuu chieeŋ Setanaa. Sɔɔŋ Baabuiyo dimi le  yɔŋnɔŋndo woŋ soliŋ vɛlɛ diomndaŋ ndaŋ kpeku, “mɛɛlula chieeŋndo,” a “hunɔɔ wana nda veelu aa Po Wana Pɔnɔɔ” wo, le boondii pilɛi hei kpe. (Maatiu 24:​3, 27, 37) “Palɛi mɛɛlɛi” kanduŋ a teleŋ Masale Mɛlɛkaleŋ le kanduŋ o choo choo niŋ o wɔsi 1914 niŋndo. Nduyɛ i cho mɛɛlu o chɔu Amakɛdɔŋndo, teleŋ chieeŋ Setanaa cho tambei sɔla wo.—Timoti Diiŋ Ndɔɔ 3:​1; Pitɛ Diiŋ Ndɔɔ 3:​3.

▸ Buŋgɛi 9, pɛl 5

Te Mɛlɛka miŋgi pɛ wana vi wo yoomu, ndu nda veelu ni aa fulasɛiniŋndo. A fulasɛiniŋ ndaŋ la ŋɔma hiɔɔlu okɔɔ Baabuiyo soo ni. Mi Ilaacha, Ilaisia, Chiisu, Pitɛ, a Pɔɔl kpou miŋgi waŋnda yoomu. Kpaaya Mɛlɛkaa kinɛi tosa ni mi kaamaalaŋ ndaŋ la yɔŋnuŋ. Chɛhowa mɛi lediom maa “wana kɛndɛ ni, wana wɔɔŋ ni,” a cho miiŋgu yoomu ma wa o lɛŋndeŋ choo. (Walta Wanaa Chiisuaa 24:​15) Mi Baabuiyo suaa vɛlɛ a fulasɛiniŋndo le kɔlaŋ o choo choo niŋ okɔɔ. Wanaa Mɛlɛka hɛli ɔɔ pɔya wa, teleŋ nda sɔla fulasɛiniŋndo le waa o choo choo niŋ a Chiisu latulu wo hei yɔŋnuŋ ni.—Chɔŋ 5:​28, 29; 11:​25; Filipiaŋnda 3:​11; Sɔɔŋ Chɔɔmaŋndoŋ 20:​5, 6.

▸ Buŋgɛi 9, pɛl 13

Walta nyinaa wɔɔŋnda cho ni, walta wɔɔŋnda waŋnda kindiŋ le tosaa halikpeŋ ma tiuba le suukaŋndo a nyinaa wɔɔŋnda wo. A tosa hei kpendekele ɔɔ ma kei o wana cheleŋndo niŋ, mɛɛ kueenɔɔ cho naa yɛ, choomanɔɔ, wana viamaa layawaa, ɔɔ wana piandaŋndo. Wanaa tosa walta nyinaa wɔɔŋnda wa tosa hei kanifuule, a laalaŋ pɛɛkula lachoowalaŋ maa nyinaa waŋchieeya nɔla ma wa achal te a vi pɛ. Nduyɛ ma simnuŋ nyinaa kpaaya bɛndu bɛndu. Nyinaa wɔɔŋnda cho vɛlɛ kindiŋndo le mi waŋchieeya simul Mɛlɛka. Pɛɛkoo a looŋ okɔɔ, maŋgalaa, yawaa viamaa, kueeleŋ, piondɔŋndaŋ, sambeeleŋ, a nuaa o tofaŋndo niŋ, muŋ kpou walta nyinaa  wɔɔŋnda ŋ cho ni. Yaula bɔɔbɔɔ, vidueilaŋ, nyɛchaa, vɛlɛ a chondoŋ pum tosa miŋ laalaŋ maa nyinaa wɔɔŋnda a maŋgalaa ŋ yɔŋul naa le ɔɔ ŋ cho suɛi wɔɔŋ te. Naamula bɔɔbɔɔ cho a biisioo okɔɔ laŋ, mɛɛ salalaŋ a chaŋndaŋ solioo cho naa yɛ, loonɔŋndo a wana vi wo okɔɔ, naamu wana vii pɔnɔɔ wo, vɛlɛ a peela tɛɛŋgaalaŋ, muŋ kpou chiɛɛliaŋ vɛlɛ a walta nyinaa wɔɔŋnda. Te waŋnda yeema pɛ kpaaya nyinaa wɔɔŋnda soliŋndo kpeku, a chua taaŋ bɛndoo.—Kaleesiaŋnda 5:​20, 21; Sɔɔŋ Chɔɔmaŋndoŋ 21:​8.

▸ Buŋgɛi 10, pɛl 10; Buŋgɛi 16, pɛl 4

Mɛlɛka Kpaaya kpou kpou wo Chɛhowa cho ni. Nduyɛ ndu toosiaa choo choo a lɛŋndeŋ ni. (Sɔɔŋ Chɔɔmaŋndoŋ 15:​3) Le hei ndu nɔ nyɔɔŋ kpou ni, ndu nɔ kpaayaa kpou ni, nduyɛ ndu cho masaa nyɛm o toosiaa woŋ kpou choo ni. (Sam 24:​1; Aisaya 40:​21-23; Sɔɔŋ Chɔɔmaŋndoŋ 4:​11) O kɛsi sawalaŋ le nyɛ o nyɛ fee o toosiaa. Chɛhowa nɔ vɛlɛ kpaaya le mbo yulu acheleŋnda iso le ma wa masaa. Ŋ toolu kpuluŋgumayɛi Mɛlɛkɛi te ŋ kaala ndu pɛ nduyɛ miŋ diikuŋ ndu.—Koloniko Tasoo 29:​11.

▸ Buŋgɛi 11, pɛl 10

Foli tɛɛmbaa cho ni, nyɛ waŋndo tosa kpɛsɛkɛɛ le mi chɛlɛkpɛ cho ndu o demboo niŋndo vi wo. O cho sulɛi kposoŋ ɔɔ viikuu le. Chɔŋ a teleŋ chɛlɛkpɔɔ kilaŋ o demboo niŋndo, ndu cho yɛ, kala ndɔ cho yɛ.

▸ Buŋgɛi 13, pɛl 5

Danda nda soli waŋndo kooma sala hiɔɔluaŋ o ŋdiallo, ɔɔ kooma yɛ yɛ nda soli o kooma sala hiɔɔluaŋ niŋ le wana cheleŋ hivioo o ŋdiallo. Kooma sala hiɔɔluaŋ ma cho yɛ  ni, ma yɔŋgu hueiyii yoomɛi yaŋ, ma chɔulaba naalaŋ ndaŋ, ma pɛŋgi koowaŋ fulaa waŋ, a ma mala mi dialloŋ tosa wallo waŋ.

▸ Buŋgɛi 13, pɛl 13

Ŋ nɔ miŋ pɛɛku chuauwaa naa nduyɛ miŋ sila nda. Nduyɛ te a tosa pɛ biondɔŋndaŋ, ŋ nɔ miŋ tosa ndi o nɛi kaalaa niŋ. Lende koni Chɛhowa bii chuauwaa nduaa ni. O ke nda le diom te nduyɛ o tosal nda dɛnɛwɔɔŋ te. (Pulɔwaa 4:​1, 2) Chɛhowa kɛsul kalaŋ chuauwa taamasi kɛndɛ kɛndɔɔ. Te o yeema pɛ le waŋndo silaa, mbo sila ndu o nɛi waŋndo chɛl sila koŋ a kɔllo kpou wo. (Pulɔwaa 12:​1) Chɛhowa kaala wanaa nduaa, nduyɛ mbo pɛɛku nda. Mbo ke nda nɛi chɔmaa miŋgi nda o nɛi le yiyaŋnda wɔɔŋndaŋ faŋaŋndo kɔɔli wo, okoŋ mbo mala nda ma pɛɛku le yiyaŋndo o nɛi kɛndɔɔ choo. Le kalaŋ chuauwa, te chuauwaa ndaa tosa pɛ biondɔŋndaŋ, a nɔ ma mala nda ma sina le sabu nda nɔ ma diikuŋndo. Ndu sim vɛlɛ ni, pɛɛkoo nda le Chɛhowa kaalaa, Diom ndɔɔ Baabuiyo, nduyɛ ma bii sawala ndɔla mandaalaŋ bila.

▸ Buŋgɛi 14, pɛl 13

Nyaa yoomaa wana chi le wa nyinaa wɔɔŋnda cho ni. Kpaaya nyinaa wɔɔŋnda nɔ wo, wanachiee nɔ ndu le. Maalikɛiyaa dɛnɛ wɔɔŋnda nyinaa wɔɔŋnda cho ni. Teleŋ nda simnuŋ yaamɔɔwaa Mɛlɛkaa, ma kɛɛ le ndu diikɔŋndo wo nda simnuŋ nyinaa wɔɔŋnda ni. (Chɛnɛsee 6:​2; Chudi 6) Ma tualnuŋ Setana kɔɔli le Chɛhowa nilakalulaŋ tosallo.—Ditɔnɔmii 32:​17; Luku 8:​30; Walta Wanaa Chiisuaa 16:​16-18; Chemisi 2:​19.

▸ Buŋgɛi 16, pɛl 4