1. A piɛile suu kuɛɛ okɔɔ naŋ cho yɛ hunɔɔ yaasiaa?

WAŊNDA o miiliɔŋndaŋ niŋ sina piɛile Chiisu pɛɛku buɛiyaa nduaa leŋ. A veelu piɛileŋ ndeŋ aa, Piɛile Salamanɔɔ. Mi Chiisu soliŋ piɛileŋ ndeŋ kpeku le buɛiyaa nduaa pɛɛkoo a mɛɛ nda nɔ ma piɛi yɛ. Le yɛɛnɛ ndoo piɛi yɛ? Nduyɛ le yɛɛ piɛileŋ ndeŋ le cho yɛ nyɛ sɔvɛ le naa hau?

2. Le sɔɔŋ ŋgaa kuɛɛ Chiisu pɛɛku yɛ naa le miŋ piɛi?

² Mi Chiisu dimi aa, “Te la wa Mɛlɛka piɛiyo pɛ, la dimi naa aa, ‘Mɛlɛka Finya naa o choo choo niŋ, waŋnda kpou ke diola numndaŋ bɛɛleŋ. Masale numndeŋ le huŋ. Hɛnaŋ numndo tosaŋ o chieeŋndo choo mɛɛ o cho tosaŋndo o choo choo niŋ yɛ.’” (Nuawɔ Maatiu 6:​9-13, NW.) Le yɛɛ Chiisu pɛɛku yɛ naa le miŋ piɛi le sɔɔŋ ŋgaa woŋ muŋ?—Tofa Diomnda Chɔɔlaalaŋ 20.

3. Yɛɛ naŋ nɔ yɛ miŋ sina a Masale Mɛlɛkaleŋ okɔɔ?

³ Ŋ pɛɛku niŋ maa diola Mɛlɛkalaŋ la cho Chɛhowa ni. Nduyɛ ŋ yaasiaa niŋ nyɛ cho sabu Mɛlɛkaa le waŋchieeya a lɛŋndeŋ ndo. Kɛ yɛɛ Chiisu ndoo yiyaŋ yɛ mɛɛ o dimi aa, “Masale numndeŋ le huŋ”? Ŋ cho pɛɛku nyɛ Masale Mɛlɛkaleŋ le simndo, nyɛ le cho tosa wo, a mɛɛ le cho diola Mɛlɛkalaŋ dindi yɛ.

4. Yɛɛ cho yɛ Masale Mɛlɛkaleŋ, nduyɛ nɛɛnɛ cho yɛ Masaa le Masale leŋ?

⁴ Chɛhowa kila masaleŋ o choo choo niŋ nduyɛ mbo hɛli Chiisu le mbo wa masaa le masale leŋ. Baabuiyo veelu masaleŋ ndeŋ aa Masale Mɛlɛkaleŋ. Chiisu cho Masa hiou “masaa kpou” wo ni. O hiou “wanaa bɛnduaa kpou kpaaya.” (Timoti Tasoo 6:​15) Chiisu nɔla mbo tosa sɔɔŋ  kɛndɔŋ tau mbo hiou masa kɛ kɛ, nduyɛ o nɔ kpaayaa mbo hiau masɛi waŋchieeya kpou.

5. Kuɛɛnɛ Masale Mɛlɛkaleŋ le cho yɛ? Yɛɛ le wa yɛ niŋ choo masa?

⁵ Palɛi bele-hiɔɔlu hiouwɔɔ fula ndɔɔ o sɛiyo niŋ, mi Chiisu miiŋgu o choo choo niŋ. O teleŋ biŋgi bɛŋgu, mi Chɛhowa yulu ndu iso le waa Masaa le Masale Mɛlɛkaleŋ. (Walta Wanaa Chiisuaa 2:​33) O choo choo niŋ Masale Mɛlɛkaleŋ le cho wa ni, mi le tiu o lɛŋndeŋ choo kpou. (Sɔɔŋ Chɔɔmaŋndoŋ 11:​15) Le saboo hoo Baabuiyo veelu leŋ ni aa, Masaleŋ ‘o fondaŋ Mɛlɛkaa.’—Timoti Diiŋ Ndɔɔ 4:​18.

6, 7. Yɛɛ tosa yɛ Chiisu masa kɛndɛ mbo hiau masaa waŋchieeyaa kɛ kɛ?

⁶ Baabuiyo dimi maa Chiisu hiou poloŋ a masaa waŋchieeyaa kɛ kɛ kanifuule, “ndu pilɛ kpe vi le ni.” (Timoti Tasoo 6:​16) Masaa waŋchieeya kpou ma vi, kɛ Chiisu ndu fɛɛŋ bɛɛ o vi le. Nyɛ o nyɛ kɛndɛ Chiisu cho tosa le naa, o cho wa lefafɛɛŋ.

⁷ Mi Baabuiyo dimi a Chiisu okɔɔ maa Masa sakpoo o wa niŋ ni, nduyɛ o nɔ niŋ nyiɛɛye. “Nyina Mɛlɛka Yaawɛɛ wo o wa niŋ ndu kɔɔli, mi nyina koŋ tosa mbo nɔ sina pɛŋgoo, a dɛnɛ sinaa, a taasioo, a kpaayaa. Nyina Mɛlɛka koŋ cho tosa mbo sina a Mɛlɛka Yaawɛɛ okɔɔ, nduyɛ mbo nɔ siooŋii Mɛlɛkɛi. Nduyɛ le teleŋ o teleŋ o wa niŋ a kɔl kɛndɛ le nyɛ Mɛlɛka Yaawɛɛ dimul ndu wo tosaa. Masaa hoo, o kilul niŋ waŋnda iyama a nyɛ o che a hɔlta ndɔlaŋ ndo, kɛlɛŋgaa a nyɛ o tuei a nila ndɔlaŋ ndo le. O cho wanaa tambɛiya yamaŋ kilul o nɛi sakpo nduyɛ, wanaa bahavɛiyaa cho o lɛŋndeŋ ndeŋ niŋ nda, mbo tosa ma wa dila ndalaŋ sɔlaa o sɔɔŋ niŋ.” (Aisaya 11:​2-4) A yeema pa mi masa numndo wa lende?

8. Vɛɛ naŋ looku yɛ sina maa Chiisu ve niŋ o masaleŋ choo ndupilɛ le?

⁸ Mɛlɛka hɛli waŋchieeya apum le ma wa o masaleŋ choo o choo choo niŋ a Chiisu latulu. Le taamaseliiyo,  mi Pɔɔl, wana Chiisu vem hɔlte ndɔ wo dimul Timoti aa, “Te ŋ biuŋ nyɛ palaa pɛ, mɛɛ ŋ cho hunɔɔ wa masaa o masale ndɔleŋ niŋ naa naa ndaa.” (Timoti Diiŋ Ndɔɔ 2:​12) Vɛɛ kpɛ waŋnda cho yɛ wa o masaleŋ choo a Chiisu latulu?

9. Vɛɛ kpɛ waŋnda cho yɛ wa o masaleŋ choo a Chiisu latulu? Teleŋ kuɛɛ Mɛlɛka kandu yɛ nda hɛlioo?

⁹ A mɛɛ naŋ pɛɛku o Buŋgɛi 7 ve niŋ yɛ, mi Chɔŋ, wana Chiisu vem hɔlte ndɔ wo cha yilaŋnde. Mbo cha Chiisu maa Masa o choo choo niŋ nda masaa a piliaa waŋnda 144,000. Nɛɛ yaa cho yɛ ŋwaŋ 144,000 haa. Chɔŋ tɛɛsiaa maa Chiisu “diola ndɔlaŋ a diola Finya ndɔlaŋ la wa la poonyiaa nda o ŋtendu.” Mbo chɔɔlu dimi aa, “Nda wa Saa Fɔŋndɔɔ hoo kɔɔli ba o ba fee o kɔ ni. Ŋwaŋnda chiee tɛɛŋ kinɛi, nda sɔla baŋaa ni.” (Nuawɔ Sɔɔŋ Chɔɔmaŋndoŋ 14:​1, 4.) Ŋwaŋ 144,000 haa, Kilisiɔŋaa Chiisuaa laalaŋnda nda cho ni, nda Mɛlɛka hɛli ni le ma wa “masaa ŋwaŋnda chiee choo o chieeŋndo choo,” a Chiisu latulu. Te a vi pɛ, a sɔla fulasɛiniŋndo le waa o choo choo niŋ. (Sɔɔŋ Chɔɔmaŋndoŋ 5:​10) A boondii wanaa Chiisu vem hɔlte ndɔ wa, Chɛhowa kandu Kilisiɔŋaa laalaŋnda hɛlioo ni le waa masaa o kunda ŋwaŋ 144,000 haa tɛɛŋ.

10. Le yɛɛ i cho yɛ suɛi kaalaa le mi Chɛhowaa kɛɛsiaa mi Chiisu nda ŋwaŋ 144,000 wa waŋchieeya choo masa?

¹⁰ Chɛhowa buulaŋ bɔɔ le naa. Le sabu koŋ o kɛɛsiaa ni le mi waŋchieeya wa o masaleŋ choo a Chiisu latulu. Chiisu cho wa masa kɛndɛ kanifuule, o bii naa bila. O sina nyɛ i sim le waa wanachioo wo nduyɛ o sina saŋgaa. Mi Pɔɔl dimi maa mi Chiisu sinaŋ nyɛ nɛiyaa le naa, o nɔ “nyiɛɛyii nɛi,” nduyɛ ndu bɛɛ “mi Masa Nyinaa Wɔɔŋnda tɔɔndaŋ ndu o nɛi o nɛi niŋ.” (Hibuluiya 4:​15; 5:​8) Wanaa 144,000 bɛɛ sina nyɛ i sim le waa wanachioo wo. Nduyɛ a cho saŋgaa a hakioo vɛlɛ a naalaŋ. Lelaŋ,  ŋ nɔ laalaŋndo maa Chiisu nda ŋwaŋ 144,000 haa, o cho ko nyɛkindilaa cho naa choo wo le nda bii bila le, kɛ bahawɛila naŋ nɔ le biuwɔŋndo laŋ bɛɛ.

11. Le yɛɛ Chiisu pɛɛku yɛ buɛiyaa nduaa le ma piɛi mi hɛnaŋ Mɛlɛkaa tosaŋ o choo choo niŋ?

¹¹ Mi Chiisu pɛɛku buɛiyaa nduaa le ma piɛi le mi hɛnaŋ Mɛlɛkaa tosaŋ o choo choo niŋ. Le yɛɛ? Miŋ pɛɛku o Buŋgɛi 3 niŋ maa, mi Setana Nyina Wɔɔŋndo simul Chɛhowa. Mɛɛ Setana simul Chɛhowa, mbo chɛl ndu a maalikɛiyaa nila kaluaa simul ndu wa, ɔɔ nyinaa wɔɔŋnda, le ma wa o choo choo niŋ le teleŋ biŋgi. Lelaŋ, o cho wana o wana o choo choo niŋ te wa hɛnaŋ Mɛlɛkaa tosaa le. O Buŋgɛi 10 niŋ, ŋ cho chɔɔlu pɛɛku tau a Setana vɛlɛ a nyinaa nduaa wɔɔŋnda okɔɔ.

12. Sɔɔŋ sɔvɛŋ sala tiɔɔŋ kuɛɛ cho yɛ ŋ tɛɛsiaa o Sɔɔŋ Chɔɔmaŋndoŋ 12:​10 niŋ?

¹² Baabuiyo tɛɛsiaa maa mɛɛ nda siiŋguu dɔɔ Chiisu Masaa le Masale Mɛlɛkaleŋ, mbo chɔulaba a Setana. (Nuawɔ Sɔɔŋ Chɔɔmaŋndoŋ 12:​7-10.) Nɛila 10 laŋ la tɛɛsiaa sɔɔŋ sɔviɔŋ ŋmuuŋ. Teleŋ Chiisu Kiliti simnuŋ Masaa wo Masale Mɛlɛkaleŋ le kanduŋ ni, nduyɛ ma tuau Setana choo choo ma viau ndu o lɛŋndeŋ choo. A mɛɛ naŋ cho pɛɛku yɛ, sɔɔŋ muŋ chuu niŋ yɔŋnɔŋ.

13. Yɛɛ yɔŋnuŋ yɛ o choo choo niŋ mɛɛ Setana sɔla touwɔɔ?

¹³ Mi Baabuiyo suaa a nyaale maalikɛiyaa lo o laalaŋndo choo wa okɔɔ, mɛɛ Setana a nyinaa nduaa wɔɔŋnda sɔla touwɔɔ o choo choo niŋ ma viau nda o lɛŋndeŋ choo. Mi Baabuiyo dimi aa, “Lelaŋ, nya cho ɛchɛnɛ wa, la naŋ kɔl.” (Sɔɔŋ Chɔɔmaŋndoŋ 12:​12) Suŋ suŋ niŋ kɔl nyulu kpeekpeiyo a diompilɔɔ cho o choo choo niŋ kanifuule, wana o wana cho loŋ cho niŋ hɛnaŋ Mɛlɛkaa tosaa.

14. Yɛɛ cho yɛ yɔŋnuŋndo o lɛŋndeŋ choo le mɛɛ Setana sɔla touwɔɔ choo choo yɛ?

 ¹⁴ Kɛ yoomoo o lɛŋndeŋ choo cho bɔɔ teŋgeŋ. Mi sɔɔŋ wɔɔŋndoŋ yɔŋnuŋ waŋchieeya ‘kanifuule, Masa Nyinaa Wɔɔŋnda hiŋ naa tɛɛŋ.’ Nduyɛ “o cho a tumboo tau tau, kani fuule o sina maa teleŋ ndɔɔ cho niŋ o biŋgii naa.” (Sɔɔŋ Chɔɔmaŋndoŋ 12:​12) Setana cho a kɔl touwo tau tau. O sɔla touwɔɔ o choo choo niŋ, nduyɛ o sina maa o cho suŋ tambei sɔla. O cho keiyo o nɛi o nɛi niŋ le hunɔɔ a kpundɔɔ, nyɛ nɛiyaa, a saŋga suu o suu o lɛŋndeŋ choo.

15. Yɛɛ cho yɛ hɛnaŋ Mɛlɛkaa le lɛŋndeŋ?

¹⁵ Kɛ hɛnaŋ Mɛlɛkaa le lɛŋndeŋ siŋgaŋ te. O yeema wɔ kɛ mi waŋchieeya walaŋnda wa achal o kpele hɛnɛkiɔɔ niŋ lefafɛɛŋ. (Sam 37:​29) Kɛ vɛɛ Masale Mɛlɛkaleŋ le tosa yɛ niŋ hei?

16, 17. Yɛɛ Daaniɛɛ 2:​44 dimul lɛ naa a Masale Mɛlɛkaleŋ okɔɔ?

¹⁶ Daaniɛɛ 2:​44 dimi aa, ‘Nduyɛ a teleŋ masaa yɛ yiaa haa cho wa wo, Mɛlɛka cho choo choo wo cho hunɔɔ masale cheleŋ hɛli. Masale tembu le fɛɛŋ a fɛɛŋ te leŋ. Nduyɛ, fɛɛŋ a fɛɛŋ, wana nɔla leŋ hiɔlɔɔ le. Masɛi paanduei kinɛi, masaleŋ ndeŋ le cho ndi hunɔɔ pesi pesi, i ve lɛ le. Mi masale sɛnɛileŋ ndeŋ le lo le fɛɛŋ a fɛɛŋ.’ Yɛɛ suɛi dimiŋ hei ve pɛɛku yɛ naa a Masale Mɛlɛkaleŋ okɔɔ?

¹⁷ O tasoo, o dimul naa maa Masale Mɛlɛkaleŋ le cho kandɔŋ a “teleŋ masaa yɛ yiaa haa cho wa wo.” Hei chɔm ni maa masɛi cheleŋnde cho wa o lɛŋndeŋ choo teleŋ Masale Mɛlɛkaleŋ le cho kandɔŋ ndo. O diiŋ ndɔɔ, o dimul naa maa Masale Mɛlɛkaleŋ le cho wa le fɛɛŋ a fɛɛŋ nduyɛ maa masale kɛ kɛ siŋga niŋ leŋ te. O yaa ndɔɔ, maa chɔuwo cho wa Masale Mɛlɛkaleŋ tɛɛŋ a masɛi chieeŋnde. Nduyɛ Masale Mɛlɛkaleŋ le cho yomɔɔ ni, mi le simnuŋ masale cho wa le chieeŋndo kpou leŋ. Okoŋ, mi waŋchieeya sɔla masale sɔvɛ leŋ. Nduyɛ kani bɛɛ a sɔla wɔ Masale waa naa le.

18. Vɛɛ chɔu mɛɛlaa wa niŋ Masale Mɛlɛkaleŋ tɛɛŋ a masɛi chieeŋnde hei yo nɔ yɛ diolaŋ?

 ¹⁸ Vɛɛ Masale Mɛlɛkaleŋ le faŋa yɛ niŋ masɛi kpou o lɛŋndeŋ choo? Tuupa mi chɔu mɛɛlaa nda veelu aa Amakɛdɔŋndo fuuluu, nyinaa wɔɔŋnda cho balɔɔ ma hui “masaa cho o lɛŋnde bolle wa . . . kpou . . . , le nda chuuŋgiaa naa pilɛ le chɔuwo o paale bɛndule leŋ choo. Leŋ le yɔnuŋ ni maa, Mɛlɛka nɔ kpaayaa kpou wo, paale ndɔleŋ.” A tonya, masɛi waŋchieeya cho sɔŋga a Masale Mɛlɛkaleŋ.—Sɔɔŋ Chɔɔmaŋndoŋ 16:​14, 16, tofa Diomnda Chɔɔlaalaŋ 10.

19, 20. Le yɛɛ naŋ yeema yɛ mi Masale Mɛlɛkaleŋ le hiŋ o chieeŋndo choo?

¹⁹ Le yɛɛ naŋ yeema yɛ Masale Mɛlɛkaleŋ? Sabulaŋ la cho la yaa. O tasoo, wanaa lahakiaa naŋ cho ni. Lelaŋ miŋ naa nduyɛ miŋ vi. Kɛ Baabuiyo dimi maa o Masale Mɛlɛkaleŋ bɛŋgu, ŋ cho wa achal lefafɛɛŋ. Nduyɛ pɛŋ Chɔŋ 3:​16 dimi aa, “Mɛlɛka kaala waŋnda chieeya. O koŋ, mbo yɔŋgu Po ndɔ pilɔɔ kpe le nda, maa wana o wana dɔu tiindaŋ ndɔɔ o Po ndɔ pilɔɔ hoo niŋ pɛ, wana koŋ o vi lɛ le. Yoomu kpeekpeiyo o nɔ lamɛɛlu le wo, ndu o sɔla ni.”

²⁰ Sabu diiŋ ndɔɔ le nyɛ naŋ yeema Masale Mɛlɛkaleŋ ndo cho ni maa, wanaa dɛnɛ wɔɔŋnda cho naa a bala silɔ. A bɔɔbɔɔ ma dimi choolaŋ nduyɛ ma tosa kafalaŋ a kaa nɔɔlɛiyo. Ŋ nɔla nyɛ o nyɛ tosa le nda faŋaa le, kɛ Mɛlɛka ndu nɔla. Wanaa cho hiouwɔɔ lachi a dɛnɛ wɔɔŋndo tosaa wa cho hunɔɔ tambei sɔla o chɔu Amakɛdɔŋ ndo. (Nuawɔ Sam 37:​10.) Sabu yaa ndɔ naŋ yeema Masaleŋ Mɛlɛkaleŋ ndo cho ni maa, masɛi waŋchieeya nɔ hau kpaaya le o kɛndɔɔ tosa le, mɛɛ le kafalaŋ, a waŋnda biyɔɔ ŋuasu ŋuasu. Yeemɛi cho nda le waŋnda malaa le Mɛlɛka diikɔŋndo le. Baabuiyo dimi maa, “waŋnda a  pum a nɔ kpaayalaŋ, mi waŋnda a wa nda saŋgaa o ba bɛŋgu.”—Ikilisiaatii 8:​9.

21. Vɛɛ Masale Mɛlɛkaleŋ le cho yɛ tosa a sabu mi hɛnaŋ Mɛlɛkaa tosaŋ o chieeŋndo choo?

²¹ Te Amakɛdɔŋ hiou pɛ, Masale Mɛlɛkaleŋ le cho tosa a sabu mi hɛnaŋ Mɛlɛkaa tosaŋ o chieeŋndo choo. Le taamaseliiyo, Masale Mɛlɛkaleŋ le cho Setana a nyina nduaa wɔɔŋnda faŋa. (Sɔɔŋ Chɔɔmaŋndoŋ 20:​1-3) Okoŋ kɔɔli, wana o wana nee lɛ niŋ te kɛlɛŋgaa mi wana vi. O sabu sala baŋaa niŋ, wanaa lo o tiindaŋndo choo wa kpou cho wa o Kpele Hɛnɛkiɔɔ niŋ le fɛɛŋ a fɛɛŋ. (Sɔɔŋ Chɔɔmaŋndoŋ 22:​1-3) Masaleŋ ndeŋ le cho diola Mɛlɛkalaŋ dindi. Yɛɛ hei sim yɛ? I sim maa te Masaleŋ Mɛlɛkaleŋ le huŋ wa pɛ o chieeŋndo choo, waŋchieeya kpou cho diola Chɛhowalaŋ bɛɛleŋ ke.—Tofa Diomnda Chɔɔlaalaŋ 21.

22. Vɛɛ naŋ looku yɛ sina maa Chiisu ve Masa teleŋ o wa o chieeŋndo choo wo ɔɔ mɛɛ o sɔla dɔɔ fulasɛiniŋndo le?

²² Mi Chiisu pɛɛku buɛiyaa nduaa le ma piɛi aa, “Masale numndeŋ le huŋ.” Mɛɛ, i wa kpendekele maa Masale Mɛlɛkaleŋ le cho hunɔɔ o chilaŋ niŋ. Chɛhowa ndoo nɔ fɛŋ mbo kila masale ndɔleŋ nduyɛ mbo siiŋguu Chiisu Masa. Baa mɛɛ Chiisu miiŋgu dɔɔ o choo choo niŋ nda  siiŋguu ndu Masaa ni? Sako. Ndoo nɔ fɛŋ mbo chum. Mɛɛ teleŋndo hiou tiŋ o fulasɛiniŋ ndɔɔ kɔɔli, mi Pitɛ nda Pɔɔl chɔm hei kpendekele mɛɛ nda miŋgi sondoo o nyɛ dimiŋ o Sam 110:​1 niŋ a Chiisu okɔɔ wo. Loŋ Chɛhowa dimi ni aa, “Chal . . . o ba ni kɛndɔɔ choo, mbo lo o koŋ mi tosa ma nɛi yaamɔɔwaa numnda a bɛŋgu.” (Walta Wanaa Chiisuaa 2:​32-35; Hibuluiya 10:​12, 13) Le vɛɛ kpɛ Chiisu ndoo nɔ yɛ mbo chum tuupa mi Chɛhowa siiŋguu ndu Masaa?

23. (a) Teleŋ kuɛɛ Chiisu kandu yɛ Masaleŋ o Masale Mɛlɛkaleŋ choo? (b) Yɛɛ naŋ cho yɛ pɛɛku o buŋgɛi cho lachi ve niŋ?

²³ Le wɔsila bɔɔbɔɔ tuupa mi wɔsi 1914 fuuluu, mi Kilisiɔŋaa tonyaa kunda pɔmbɔɔ sɔla sinapɛŋgoo maa wɔsi sɔviɔɔ o wa niŋ o sɔɔŋ Baabuiyo dimi woŋ niŋ ni. Sɔɔŋ cho yɔŋnɔŋndo o chieeŋndo choo chɔŋ a wɔsi 1914 wo chɔm maa tonyaa ndaa dimi ni. O wɔsi koŋ niŋ Chiisu kandu Masaleŋ ni. (Sam 110:​2) Mɛɛ Chiisu kandu dɔɔ Masaleŋ, mbo soli Setana choo choo ma mal ndu o lɛŋndeŋ choo. Nduyɛ suŋ suŋ niŋ, “teleŋ ndɔɔ cho niŋ o biŋgii naa.” (Sɔɔŋ Chɔɔmaŋndoŋ 12:​12) O buŋgɛi cho lachi ve niŋ, ŋ cho chɔɔlu sɔɔŋ chɔ ŋ chɔm maa o boondii keŋ niŋ naŋ cho ni wo. Baabuiyo kpeekpei dimi sɔɔŋ muŋ ni. Ŋ cho vɛlɛ pɛɛku maa Masale Mɛlɛkaleŋ le cho suŋ suŋ tosa a sabu mi hɛnaŋ Mɛlɛkaa tosaŋ o chieeŋndo choo.—Tofa Diomnda Chɔɔlaalaŋ 22.