1-3. Nyunala kuɛɛ waŋnda nyuna yɛ a piɔmndo okɔɔ? Nduyɛ, vɛɛ piɛiye ipum muli yɛ nyunalaŋ ndaŋ?

BAABUIYO mel naa lediom maa paale wa niŋ “wana o wana vi lɛ le.” (Sɔɔŋ Chɔɔmaŋndoŋ 21:​4) O Buŋgɛi 5 niŋ, miŋ pɛɛku maa baŋaa tosa ni miŋ sɔla tiindaŋ yoomu fafɛɛŋndo. Kɛ waŋnda cho wɔ tuŋ wuoo. (Ikilisiaatii 9:​5) Lelaŋ, nyuna bɛndu naŋ nyunaŋndo cho ni, Yɛɛ yɔŋnuŋ yɛ naa te ŋ vi pɛ?

² Mulioo le nyuna koŋ cho nyɛ sɔvɛ o bii fau te wana naŋ kaala wo vi pɛ. Mi kaamaa bii naa dɔɔ miŋ nyuna aa, ‘Kuɛɛnɛ o kuɛ yɛ? O cho naa pa chɔɔ? O mala naa pa? Ŋ chiikaŋ lɛ niŋ pa?’

³ Piɛiye muli nyunalaŋ ndaŋ o nɛila yɛ yɛ laŋ choo. Ipum pɛɛku maa te a wa pɛ wana kɛndɛ, a kuɛ choo choo, nduyɛ te a wa pɛ wana yɔŋ wɔɔŋ, a cho ŋɔ o yiŋndeŋ niŋ. Ipum bɛɛ pɛɛku maa, te a vi pɛ, a simnuŋ nyinaa okoŋ a wa a wanaa numaa vi niŋ paandu wa latulu. Nduyɛ ipum pɛɛku maa te a vi pɛ ma kɔɔsa a num, a miiŋgu violɔŋ, ɔɔ a miiŋgu yoomu o dialuŋ cheleŋ niŋ, kɛlɛŋgaa ma simnuŋ wana cheleŋ ɔɔ visioo.

4. Laalaŋ kuɛɛ piɛiye kpou pɛɛku yɛ a piɔmndo okɔɔ?

⁴ Sɔɔŋ piɛiye pɛɛku woŋ cho bɔɔ teŋgeŋ. Kɛ piɛiye kpou, a nɔ nyɛ pilɛ nda laalaŋndo. A laalaŋ maa te wanachioo vi pɛ, nyɛ cho ndu niŋ ndu ndu vi le. Baa tonya pa keŋ cho ni?

5, 6. Yɛɛ yɔŋnuŋ yɛ naa te ŋ vi pɛ?

⁵ Chɛhowa sina nyɛ yɔŋnuŋ naa wo te ŋ vi pɛ. Nduyɛ  o dimul naa maa te waŋndo vi pɛ, yoomu ndɔɔ mɛɛlu. Te wana ve yoomu le, mɛɛ o vilɛiyo ŋ cho ni. Lelaŋ te waŋndo vi pɛ, nyina ndɔɔ kue naa cheleŋ mbo kɔ wa yoomu le. * Te ŋ vi pɛ, ŋ chi lɛ le, ŋ tuii lɛ le, nduyɛ ŋ yiyaŋ lɛ kposoŋ te.

⁶ Baabuiyo dimi maa “wanaa vi wa nda, a sina lɛ nyɛ kposoŋ te.” Wanaa vi wa kaala lɛ naa le kɛlɛŋgaa niŋ te ma tul naa leyɛ. Nduyɛ, “naa ŋ nɔ le kɔlaŋ nda [“o sɛiyo niŋ,” NW] kpeku soliaa cho loŋ te, yiyaŋndo a nyɛ o nyɛ okɔɔ cho loŋ te, sinaa a nyɛ o nyɛ okɔɔ cho loŋ te, nduyɛ kɔl kalu . . . cho loŋ te.” (Nuawɔ Ikilisiaatii 9:​5, 6, 10.) Nduyɛ o Sam 146:​4 niŋ, mi Baabuiyo dimul naa maa te waŋndo vi pɛ, “tuula ndɔlaŋ kpou” la vi.

7. Yɛɛ Chiisu ndoo dimi yɛ a piɔmndo okɔɔ?

⁷ Chiisu mɛɛ chaaŋ ndɔ kɛndɔɔ Lasalɔɔ vi, mbo dimul buɛiyaa ndaa aa, “Chaaŋ naa Lasalɔɔ cho o malɔ.” Kɛ Chiisu ndoo yiyaŋ naa maa lɔma yɔŋaŋ te Lasalɔɔ wa le. Mi Chiisu hiau lachi a dimioo aa, “Lasalɔɔ vi.” (Chɔŋ 11:​11-14) Mɛɛ tuuwo Chiisu wa piɔmndo a luaŋ ni. O dimi naa maa choo choo ɔɔ o wanaa nduaa vi niŋ paandu wa lo le Lasalɔɔ ndoo kuɛ le. Nduyɛ o dimi vɛlɛ maa Lasalɔɔ cho saŋgaa o yiŋndeŋ niŋ ɔɔ mbo miiŋgu violɔŋ maa wanachiee cheleŋ ɔɔ visi le. Sako. I wa maa o luaaŋ figbi Lasalɔɔ wa ni. A teleŋ cheleŋ, mi Chiisu tuu vɛlɛ piɔmndo a luaaŋ. Mɛɛ Chiisu miŋgi chua Chaaliɔɔ wo yoomu, mbo dimi aa, “O vi le. O luaaŋ o cho ni.”— Luku 8:​52, 53.

8. Vɛɛ naŋ looku yɛ sina maa Mɛlɛka ndoo toosiaa waŋchieeya le wu le?

 ⁸ Baa le mi Adam nda Ifi vi Mɛlɛka ndoo toosiaa nda ni? Sako! Le mi ndaa tuei yoomoo yeela lefafɛɛŋ Chɛhowa ndoo toosiaa nda ni, nduyɛ mi ndaa waŋnuŋ o kɛndiaa walaŋndo niŋ. Mɛɛ Chɛhowa toosiaa waŋchieeya, mbo duau nda yeemɛi o kɔl le waa achal lefafɛɛŋ. Kalaŋ chuauwa yeema mi chuauwaa ndaa yuwa nduyɛ ma vi le. Nduyɛ lende Chɛhowa bɛɛ yiyaŋ a naa ni. Kɛ te Mɛlɛka toosiaa naa pɛ le miŋ wa achal lefafɛɛŋ, le yɛɛ naŋ wu yɛ niko?

9. Le yɛɛ sawa Chɛhowa ndoo ke Adam nda Ifi wo ndoo kindu biyɔɔ le?

⁹ O kpeloo Idɛŋ niŋ, mi Chɛhowa dimul Adam aa, “Yɔm o yɔm cho o kpeloo hoo niŋ a dia. Kɛ yɔm komɔɔ ndɔɔ tosa mi wana sina suɛi wɔɔŋnde a i kɛndɛi yo, dia ndu le pa. O paaleŋ niŋ bɛɛ te a de ndu pɛ a vi.” (Chɛnɛsee 2:​9, 16, 17) Sawa walaŋndo hoo ndoo kindu biyɔɔ le, nduyɛ Chɛhowa ndoo nɔ dioo le Adam nda Ifi dimullo nyɛ cho o kɛndɔɔ a o wɔɔŋndo wo. Te ndaa diikuŋ Chɛhowa pɛ, a wa chɔm maa a nɔ bɛɛleŋ le ndu. A wa vɛlɛ chɔm balika melaa le nyɛ o nyɛ o tosa le nda.

10, 11. (a) Vɛɛ Setana hui yɛ Adam nda Ifi? (b) Le yɛɛ nɛi o nɛi kɔɔsaa ve le nyɛ Adam nda Ifi tosa wo le?

¹⁰ I cho suɛi imɔnɛ le sinaa maa mi Adam nda Ifi kɛɛ Chɛhowa diikɔŋndo. Mi Setana dimul Ifi aa, “Baa Mɛlɛka dimi madimiaa aa, ‘Yɔmnde o kpeloo hoo niŋ kinɛi la dia le?’ ” Mi Ifi mulul ndu aa, “Mɛlɛka dimi maa yɔmnde o kpeloo niŋ kinɛi ŋ dia. Kɛ aa, yɔm cho o kpeloo tɛɛŋ ndo ndu, aa naa, ŋ dia ndu le, aa pilaŋndo bɛɛ naa ŋ pilaŋ te. Aa, te ŋ de pɛ ŋ vi.”—Chɛnɛsee 3:​1-3.

¹¹ Okoŋ, mi Setana dimi aa, “La dio bɛɛ la vi le. Mɛlɛka dimi lende fondole, o sina maa te la de ndu pɛ hɔlta nyalaŋ la cho kumbiŋ nduyɛ, mi la sina suɛi kɛndɛi a i wɔɔŋnde pɛŋgu maa Mɛlɛka pila.” (Chɛnɛsee 3:​4-6) Setana ndoo yeema mi Ifi yiyaŋ maa o nɔ mbo tosa kɛɛsiaa a ba ndɔ le sinaa o kɛndɔɔ a o wɔɔŋndo. Mi Setana dimi vɛlɛ choolaŋ a nyɛ wa Ifi yɔŋnɔŋndo te o kɛɛ pɛ le Mɛlɛka diikɔŋndo. Mbo dimi maa Ifi cho wu le. Le hei, mi Ifi dia komɔɔ koŋ o tiŋ, okoŋ mbo ke pɔnɔ ndɔ o tiŋ. Mi Adam nda Ifi sina maa mi Chɛhowa dimul nda maa  a nɔ ma de komɔɔ koŋ te. Dio koŋ ndu chɔm ni maa a kɛɛ sawa walaŋ ndoo kindu biyɔɔ le wo diikɔŋndo. Komɔɔ nda de koŋndo chɔm maa a ke Finya nda kaalaa o choo choo niŋ lebɛɛ le. Nɛi o nɛi kɔɔsaa ve le nyɛ nda tosa wo le!

12. Le yɛɛ i cho yɛ suɛi kɔl tambɛi bɛndu le kɛɛ Adam nda Ifi kɛɛ Chɛhowa diikɔŋndo wo?

¹² Nuawɔ suɛi kɔl tambɛi se le mɛɛ wanaa naa tasiaa haa kɛɛ Wana Toosiaa nda wo diikɔŋndo yɛ! Vɛɛ kɔllo wa yɛ num te o yɔŋ pɛ ma tosa wallo kalaŋ le hɔɔ mandaa, kɛ mbo kɛɛ le num diikɔŋndo, okoŋ mbo tosa nyɛ o hɛnaŋndo? Baa hei tɛɛmbuu num kɔllo le?

13. Yɛɛ Chɛhowa ndoo yiyaŋ yɛ mɛɛ o dimi maa “o puuloo niŋ ŋ cho vɛlɛ miiŋgu ni”?

¹³ Mɛɛ Adam nda Ifi kɛɛ le diikɔŋndo, mi di ndaa nɔ le waa achal lefafɛɛŋndo hialuŋ nda. Okoŋ mi Chɛhowa dimul Adam aa, “Puuloo ŋ cho ni, nduyɛ o puuloo niŋ ŋ cho vɛlɛ miiŋgu ni.” (Nuawɔ Chɛnɛsee 3:​19.) Koŋ sim ni maa Adam cho vɛlɛ simnɔŋ puuloo, wana che pɛ aa kani bɛɛ o ve achal te. (Chɛnɛsee 2:​7) Mɛɛ Adam tosa hakioo, mbo wu, o ve lɛ achal kposoŋ te.

14. Le yɛɛ naŋ wu yɛ?

¹⁴ Te Adam nda Ifi ndaa diikuŋ pɛ Mɛlɛka, maa a cho wɔ hau yoomu. Kɛ, mɛɛ nda kɛɛ diikɔŋndo, ma tosa hakioo, okoŋ ma wu.  Hakioo cho ko maa naa ŋkɔŋja Adam nda Ifi tɛɛŋguu naa wo. Naa kpou o hakioo niŋ naŋ veluŋ ni, le saboo hoo naŋ wu ni. (Luomaŋnda 5:​12) Kɛ o ve tuu Mɛlɛka le wa koŋ le waŋchieeya le. Kposoŋ bɛɛ Mɛlɛka ndoo yeema mi wanachioo ndoo vi le. Nduyɛ Baabuiyo veelu piɔmndo aa ‘yaamɔɔnɔɔ.’—Kɔliŋtiaŋ Tasoo 15:​26.

15. Vɛɛ tonya cho a piɔmndo okɔɔ wo baŋa yɛ naa?

¹⁵ Tonyaa a piɔmndo okɔɔ baŋa naa o yiyaŋnda wɔɔŋnda bɔɔbɔɔ. Baabuiyo pɛɛku naa maa waŋvilɛiya sinaŋ nyɛ nɛiyaa le, kɛlɛŋgaa niŋ te ma tambu kɔl. Ŋ suu o ndalo le, nda bɛɛ suu o naa lo le. Ŋ nɔla miŋ mala nda le, nda bɛɛ nɔla ma mala naa le. A yɔŋ naa nyɛ o nyɛ le. Lelaŋ, siooŋii nɔ mii bii naa le waŋvilɛiya le. Kɛ, piɛiyii bɔɔbɔɔ dimul naa maa waŋvilɛiya cho yoomu inɛ, nduyɛ maa ŋ nɔla miŋ mala nda, te ŋ ke pɛ mandiaa kaniei. Kɛ te ŋ sina pɛ tonya cho a piɔmndo okɔɔ wo, wana o wana nɔla mbo huii naa a choola waa naa le.

16. Choola kuɛɛ piɛiyii bɔɔbɔɔ pɛɛku yɛ a waŋvilɛiya okɔɔ?

¹⁶ Setana cho hau piɛiyii lachoowɛi soliŋndo kpeku le naa choolaŋ dimullo, nduyɛ mii tosa miŋ yiyaŋ maa waŋvilɛiya cho wɔ yoomu. Le tamaaseliiyo, piɛiye ipum pɛɛku maa te ŋ vi pɛ, nyɛ cho naa niŋ o fulaŋ mbo kɔ wa yoomu naa cheleŋndo. Baa keŋ piɛile numndeŋ le cho num pɛɛkoo ni? Le pɛɛku num pa nyɛ Baabuiyo dimi a piɔmndo okɔɔ wo? Setana cho choolaŋ soliŋndo kpeku le mi waŋnda mulul Chɛhowa kɔɔ.

17. Le yɛɛ yiyaŋndo maa mi waŋnda ŋuɛ o yiŋndeŋ niŋ cho yɛ bɛɛla tambɛi le Chɛhowa?

¹⁷ Nyɛ piɛiyii bɔɔbɔɔ pɛɛku wo cho suɛi kɔndɔfili. Le tamaaseliiyo, ipum pɛɛku maa wanaa wɔɔŋnda cho  ŋɔ o yiŋndeŋ niŋ lefafɛɛŋ. Choolaŋ ndaŋ la tɛɛmbuu Chɛhowa bɛɛlaŋ. Kposoŋ bɛɛ o chɛl mi waŋnda saŋga a nyɛpalaa suu waa naa le! (Nuawɔ Chɔŋ Tasoo 4:​8.) Vɛɛ ŋ cha yɛ wana bii hoo chua ndɔɔ balaŋ mbo wou laŋ o yiŋ le suɛi wɔɔŋ o tosa ve? Ma yiyaŋ maa wana dɛnɛ wɔɔŋndo pila o cho ni. A yeema pɛŋ mbo wa chaaŋ num te? Lende kpeekpei Setana yeema naa ni miŋ yiyaŋ a Chɛhowa!

18. Le yɛɛ ŋ nɔ miŋ yɔŋ isiooŋ le waŋvilɛiya le?

¹⁸ Piɛiye ipum dimul naa maa te waŋnda vi pɛ, ma simnuŋ nyinaa. Piɛiyii waa naa pɛɛku maa ŋ nɔ miŋ ke waŋvilɛiya bɛɛleŋ, nduyɛ miŋ yɔŋ siooŋnde le nyinaa ndaa kanifuule, ma simnuŋ chaŋyaŋ nɔ kpaayaa woŋ ɔɔ yaamɔɔwaa wɔɔŋ wɔɔŋnda. Wanaa bɔɔbɔɔ laalaŋ choolaŋ ndaŋ. A nɔ siooŋnde le waŋvilɛiya. Lelaŋ yɔŋi nda piɛi Chɛhowa yɛ, ma piɛi waŋvilɛiya. Loonuŋ maa waŋvilɛiya sina nyɛ o nyɛ le. Lelaŋ, ŋ nɔ miŋ yɔŋ isiooŋ le nda le. Chɛhowa cho Wana Toosiaa naa wo ni. Ndu cho Mɛlɛka tonyaa ni, nduyɛ ndupilɛ kpe naŋ nɔ ni miŋ piɛi.—Sɔɔŋ Chɔɔmaŋndoŋ 4:​11.

19. Vɛɛ tonyaa sinaa a piɔmndo okɔɔ mala yɛ naa?

¹⁹ Te ŋ sina pɛ tonyaa a piɔmndo okɔɔ, ŋ sɔla baŋaa o choola cho o piɛiye niŋndaŋ. Nduyɛ tonyaa hoo mala naa le miŋ bii bila mɛila kɛndɛ kɛndɛla Chɛhowalaŋ, mɛɛ waŋvilɛiya miŋgioo yoomu cho naa yɛ.

20. Yɛɛ naŋ cho yɛ pɛɛku o buŋgɛi cho lachi ve niŋ?

²⁰ O sindɔɔ niŋ pa, mi buɛi Mɛlɛkaa diolaŋ Choobu nyuna aa, “Te wana chioo vi niŋ pɛ, baa o miiŋgu lɛ pa yoomu?” (Choobu 14:​14) Tonya pa i cho ni maa te waŋndo vi pɛ mbo miiŋgu vɛlɛ yoomu? Muli Mɛlɛka yɔŋgu naa o Baabuiyo niŋndo cho muli kɔl dɛɛniaa. Ŋ cho mulioo hoo chɔ o buŋgɛi cho lachi ve niŋ.