Kani bɛɛ waŋndo dimul num niŋ pa suɛi sɔɔ sɔɔ ve?— * Baabuiyo soo a suɛi sɔɔ sɔɔ ve i pum okɔɔ. O veelu ndi aa, “suɛi viaŋnaŋnde.” O Mɛlɛka lo suɛi viaŋnaŋnde hei chɛŋ ni. Suɛi viaŋnaŋnde icho ni, kanifuule, waŋnda chieeya ndaa sina wɔ a ndi okɔɔ le. Maalikɛiya bɛɛ ndaa yeema sinaa a ndi okɔɔ. A yeema pa ma sina suɛi sɔɔ sɔɔ ve hei?—

O kandɔŋndo, mi Mɛlɛka toosiaa wana pɔnɔɔ a wana lanɔ tasoo. Diola ndalaŋ la wa Adama nda Ifi ni. Mi Mɛlɛka ke nda naa chalaa kɛndɛ kɛndɛ. Naa chalaa kaŋ ndaa veelu ni aa kpeloo Idɛŋ. Te Adama nda Ifi ndaa tuei Mɛlɛka diom pɛ, nda ni, chuauwaa ndaa ni, a wa chieeŋndo kpou siiŋguu kpele hɛnɛkiɔɔ maa kpeloo Idɛŋ. Nduyɛ, a wa lo yoomu o kpele hɛnɛkiɔɔ niŋ lefafɛɛŋ. A loonuŋ pa nyɛ Adama nda Ifi tosa wo?—

Adama nda Ifi tuii Mɛlɛka diom te. Nyɛ koŋ tosa ni ŋ cho hau o kpele hɛnɛkiɔɔ niŋ te. Kɛ Mɛlɛka dimi maa o cho hunɔɔ chieeŋndo kpou miŋgi toosiaa nyɛkɛndɛi. Wana o wana cho wa a nyaale, mbo wa achal lefafɛɛŋ. Vɛɛ o cho yɛ hei looku tosa? O cho niŋ suɛi teleŋ vilɛi, waŋnda ndaa sina a ndi okɔɔ le. Kanifuule, i wa i viaŋnaŋ.

Mɛɛ Chiisu hiŋ o chieeŋndo choo, mbo pɛɛku waŋnda tau a suɛi sɔɔ sɔɔ ve hei okɔɔ. Mi Chiisu dimi maa Masale Mɛlɛkaleŋ le cho suɛi viaŋnaŋnde hei ni. Mi Chiisu dimul waŋnda maa a piɛi le mi Masaleŋ ndeŋ le hiŋ. Masaleŋ ndeŋ le cho chieeŋndo kpou siiŋguu kpele hɛnɛkiɔɔ ni.

A cho pa a nyaale le suɛi sɔɔ sɔɔ ve hei sinaa?— Kɛsiŋ o kɔl maa wanaa tuei Chɛhowa diomnda kinɛi cho wa o kpele hɛnɛkiɔɔ niŋ ni. Baabuiyo soo tau a wanaa tuei Chɛhowa diomnda okɔɔ. A yeema pa ma pɛɛku a nda okɔɔ?— Mɛɛ ŋ pɛɛku wɔ a apum okɔɔ mi ŋ che mɛɛ naa ŋ tuula tamaselii ndaa yɛ.