Teleŋndaŋ lapum, te ŋ wa pɛ suɛi o waŋnda lo a Chɛhowa okɔɔ, ma wa naa mamɔɔ te koŋ te, ma dɔunuŋ tumbe. Mi hei tosa naa mi ŋ yeema le kiɔɔ suɛi a Chɛhowa okɔɔ. A yiyaŋ niŋ pa lende?— Baabuiyo dimul naa a po chua piaandu pum okɔɔ, o ndoo kaala Chɛhowa wo kɛ mbo yeema kiɔɔ suɛi a ndu okɔɔ. Diola ndɔ laŋ la wa Chɛlimaya ni. Ŋ pɛɛku wɔ a ndu okɔɔ.

Teleŋ Chɛlimaya wa chua piaandu wo, mi Chɛhowa dimul ndu le mbo dimul waŋnda le ma pɛŋgi sɔɔŋ wɔɔŋndoŋ tosaa. Kɛ hei ndii kendu bɔɔ le Chɛlimaya kanifuule, sioonde wa ndu. Mbo dimul Chɛhowa aa, ‘I sina nyɛ ya nɔ le dimioo wo le. Poombɔɔ ya cho ni.’ Kɛ mi Chɛhowa dimul ndu aa, ‘Siooŋii bii num te. I cho num mala.’

 Okoŋ, mi Chɛlimaya kandu waŋnda dimullo maa te a mel yɔŋ wɔɔŋndo tosaa le, Chɛhowa cho nda nyɛpalaa tuisi choo. A yiyaŋ pa maa mi waŋnda tosa nyɛ Chɛlimaya ndoo dimul nda wo?— A tosa le. Mamɔɔ nda wa ndu ni, ma duaunuŋ tumbe a ndu. Apum ndaa yeema le ndu diyɔɔ! Vɛɛ Chɛlimaya ndoo yiyaŋ yɛ?— Mi sioonde bii ndu mbo dimi aa, ‘I cho lɛ isɔɔ a Chɛhowa okɔɔ le.’ Kɛ ndoo pɛŋgi pa suɛi a Chɛhowa okɔɔ?— O pɛŋgi le. Kanifuule, ndoo kaala bɔɔ Chɛhowa. Le mɛɛ Chɛlimaya pɛŋgi suɛi a Chɛhowa okɔɔ le yɛ, mi Chɛhowa kiindiaa yoomu ndɔɔ.

Paale pilɛ, mi puaa wɔɔŋnda apum duau Chɛlimaya o sooŋ yiŋgilɛi wa a loolioo o piaa leniŋndo cha. Ndoo nɔ nyɛdiaa a mamɛŋ te. Puaa haa ndaa yeema mi Chɛlimaya ndoo lo loŋ mbo vi. Kɛ mi Chɛhowa mala ndu o vi le!

Yɛɛ tamasi Chɛlimaya wo pɛɛku yɛ num?— Mi che bɛɛ naa sioonde wa ndu teleŋndaŋ lapum, kɛ o pɛŋgi suɛi a Chɛhowa okɔɔ le. Te o yɔŋ pɛ ma wa suɛi a Chɛhowa okɔɔ, waŋnda cho num wa mamɔɔ ma dɔunuŋ tumbe a num. Le pum, mi sioonde a siɔmbulaŋ la bii num. Kɛ pɛŋgi suɛi a Chɛhowa okɔɔ le. O cho num mala mɛɛ o mala Chɛlimaya yɛ.