Icho pa bɛɛŋ bɛɛŋ le wanaa velu numnda bɛɛleŋ kioo?— Le pum, mi i wa i kala kpoke. A sina pa maa mi Chiisu ndoo diikuŋ Chɛhowa vɛlɛ a wanaa velu ndu wa?— O yɔŋ bɛɛ aa icho i kala le wanaa velu numnda diikɔŋndo, tamasi Chiisu wo mala num. Ŋ chɔɔluwɔ pɛɛku a ndu okɔɔ?

Choo choo fɛŋ Chiisu wa a Chɛhowa latulu tuupa ma vialu ndu o lɛŋndeŋ choo. Chiisu ndoo nɔ vɛlɛ finyaa a kalaa o lɛŋndeŋ ndeŋ choo. Diola finya ndɔlaŋ la wa Choosɛ ni. Kala ndɔ wa Meele ni. A sina pa mɛɛ nda looku simnɔŋ wanaa velu ndu wa yɛ?—

Mi Chɛhowa chua yoomu Chiisu wo o choo choo niŋ mbo wou ndu Meele o dembe le mbo velu ndu o lɛŋndeŋ choo. Kaamaa wa hoo ni! Mɛɛ chɛlikpiaa cheleŋnda hindu kalaa ndaa o la dembe yɛ, lende koni Chiisu hindu ni. Mbo chua le suɛi paŋguŋ ŋɔmahiɔɔlu malaŋ nda vialu ndu. Naa Meele nda Choosɛ simnuŋ wanaa velu Chiisu wa o lɛŋndeŋ choo ni.

Mɛɛ Chiisu fuuluu wɔsilaŋ 12, mbo tosa isɔɔ. Mi suɛi o tosa hei ve chɔm fulii maa o kaala bɔɔ Finya ndɔ, Chɛhowa. Hei yɔŋnuŋ teleŋ Chiisu nda wanaa velu ndu wa kuɛ Chulusalɛm le bɔŋaŋ loonaŋndo a hiouwɔɔ choo okɔɔ biyɔɔ wo. Mɛɛ nda wa miiŋgoo o nda lo, ma kua haaa o nɛi tɛŋ, Meele a Choosɛ seeluŋ Chiisu le. A sina pa fondaŋ Chiisu wa wo?—

Mi Choosɛ nda Meele miiŋgu Chulusalɛm chɔ chɔ le Chiisu nuuviaa. Ma buulaŋ tau kanifuule ndaa chi wɔ ndu le. Mɛɛ palɛi hiou i yaa, ma kɔ saaluŋ ndu o chiɛi Mɛlɛkaa niŋ. A sina pa le sabu Chiisu wa o chiɛi Mɛlɛkaa niŋndo?— Sabu o wa loŋ ndo cho ni, loŋ ndoo pɛɛku a Chɛhowa Finya ndɔ okɔɔ ni. Ndoo kaala bɔɔ Chɛhowa nduyɛ mbo yeema pɛɛkoo a ndu okɔɔ le tosaa nyɛ o hɛnaŋndo. Teleŋ Chiisu sul kaasoŋnɔ wo bɛɛ, mi ndoo tuei Chɛhowa diom. Chiisu ndoo sina bɛɛ maa o cho saŋgaa sɔla, kɛ mi ndoo diikuŋ. Chiisu ndoo tuei pa Choosɛ a Meele diom?— Baabuiyo dimi maa mi Chiisu tuɛi nda diom.

Yɛɛ tamasi Chiisu wo pɛɛku yɛ num?— Chɔ bɛɛ maa icho i kala lendi tosaa, a nɔ ma ke wanaa velu numnda bɛɛleŋ. A tosa niŋ pa lende?—