A yiiyaŋ pa maa o cho i kala le nyɛ bɛnda wo tosaa?— Lende wanaa bɔɔ bɔɔ yiyaŋ ni. Baabuiyo dimul naa maa o ve suɛi bɛɛŋ bɛɛŋ le mi Chosaya ndoo tosa o kɛndɔɔ le. Chosaya ndoo nɔ chaaŋyaŋ kɛndɔŋ. Muŋ mala ndu ni le o kɛndɔɔ tosaa. Ŋ pɛɛku wɔ a Chosaya okɔɔ vɛlɛ a chaaŋaa nduaa.

Finyaa Chosaya wa Emɔŋ ni. Ndu wa masaa le lɛŋnde Chudiaaleŋ ni. Wana kɔl vesɛiyo pila Emɔŋ wa ni. Piɔmnda ndoo sooluu ni. Mɛɛ finyaa Chosaya vi, mi Chosaya simnuŋ masaa le lɛŋnde Chudiaaleŋ. Kɛ wɔsilaŋ la ŋɔmaa kpe o wa ni! A yiiyaŋ pa maa Chosaya ndoo nɔ kɔl vesɛiyo maa finya ndɔ?— Ndoo nɔ kɔl vesɛi le!

Mi che bɛɛ naa Chosaya wa poombɔ pɔmbɔ, kɛ ndoo yeema hɛnaŋ Chɛhowaa tosaa. Le hei, mbo tosa chaŋyɛi a wanaa nɔ kaalaa le Chɛhowa piɛiyo wa. Nduyɛ, ma mala Chosaya le o kɛndɔɔ tosaa. Nɛɛ yaa wa yɛ chaaŋaa Chosaya wa?

 Chaaŋaa nduaa o pilɛ wa Sɛfanaya ni. Wana ndoo suaa le Mɛlɛka wo Sɛfanaya wa ni. Mi ndoo dimul wanaa wa o lɛŋnde Chudiaaleŋ niŋnda maa te a pɛŋgi piɔmnda sooluu wo le, nyɛpalaa cho nda tolɔɔ choo. Mi Chosaya yaŋ Sɛfanaya nilaŋ mbo piɛi Chɛhowa, o piɛi ŋpiɔm te.

Chaaŋ ndɔ wa vɛlɛ Chɛlimaya ni. Wɔsiŋ pilɔŋ kpe nda wa ni nda Chosaya. Nduyɛ, a venaŋ levil te tei ma sul ŋkaasoŋ. Ndaa naaŋaŋ bɔɔ. Le hei, mɛɛ Chosaya vi, mi Chɛlimaya poonyiaa chondei a Chosaya okɔɔ le mɛɛ o ve lɛ ndu chɔ le yɛ. Mi Chɛlimaya a Chosaya ndaa maaliaŋ le o kɛndɔɔ tosaa vɛlɛ a Chɛhowa diikɔŋndo.

Yɛɛ tamaselii Chosaya wo pɛɛku yɛ num?— Mi che bɛɛ naa Chosaya wa poombɔ pɔmbɔ, kɛ ndoo yeema o kɛndɔɔ tosaa. Mbo sina maa mɛɛ mbo tosa chaŋyɛi a wanaa nɔ kaalaa le Chɛhowa piɛiyo wa. Lelaŋ, tosa chaaŋyaŋ a wanaa kaala Chɛhowa wa. A tiuba ma mala num le o kɛndɔɔ tosaa.