Lubɛka ndoo kaala bɔɔ Chɛhowa. Diola pɔnɔ ndɔ laŋ la wa Aisaki ni. Vɛɛ Lubɛka looku yɛ chiikaŋ nda Aisaki? Vɛɛ o chɔm yɛ maa o yeema mbo nɛŋi Chɛhowa kɔl? Tuupa mi ŋ muli nyunalaŋ ndaŋ, ŋ pɛɛku wɔ fɛŋ a Aisaki pɔnɔ ndɔ okɔɔ.

Ebilaham nda Sela velu Aisaki ni. O lɛŋnde Kenaŋ ndeŋ niŋ nda wa ni. Wanaa wa Kenaŋ nda, ndaa piɛi Chɛhowa le. Kɛ, Ebilaham ndoo yeema mi Aisaki po ndɔ chua wana piɛi Chɛhowa wo o nɔɔ niŋ. Le hei, mbo yɔŋ buɛi ndɔɔ. Naapum, Eliyesa o vem ni le mbo kɔ nuuvial Aisaki po ndɔ lanɔɔ. Kuɛɛ ndoo vem yɛ ndu? Haluaŋ o vem ndu ni o wanayaŋ ndɔŋ ŋpum ndo.

Mi Eliyesa kua a buɛiyaa Ebilahamnda apum kɔɔli. Bandei pila tiŋndo ndoo bandu ni. Ma kua a nyɔɔmiaa tɔ. Nduyɛ, ma chua nyɛdiaa a nyɛm nda wa kɔlaŋ kioo yɔŋgoo woŋ, ma dovi muŋ nyɔɔmiaa haa o lakɔɔ. Vɛɛ Eliyesa cho yɛ looku sina wana lanɔ bɛnda le Aisaki wo? Mɛɛ Eliyesa a buɛiyaa o kuɛ kɔɔli wa fuuluu o sooŋ kolaa Haluaŋ, ma sim. Le yɛɛ? Kanifuule, Eliyesa sina maa waŋnda cho suŋ hunɔɔ loŋ le mɛŋndaŋ kɔndɔɔ. Mi Eliyesa piɛi o Chɛhowa lo aa, ‘Chua laandu ya cho mɛŋndaŋ piɛi aa, ‘Yandii tusul la kpɛɛnɛi num i mamɛŋnde mi kol lo, ‘te o dimi pɛ aa, ‘Kol, te a kol pɛ i kɔndu vɛlɛ nyɔmiaa numnda a kol’, lo, mɛɛ o va  ndu num Mɛlɛka hɛli le vaa lanɔɔ le buɛi numndo Aisaki ni.’

Okoŋ, mi chuaambɔ laandoo diolaŋ aa Lubɛka, huŋ o soondo. Baabuiyo dimi maa Lubɛka ndoo naŋ bɔɔ naŋɔɔ lahɔllo. Mi Eliyesa piɛi ndu mɛŋndaŋ le mbo kol. Mi Lubɛka chɛl. Mbo dimi aa, ‘Kol, te a kol pɛ, I kɔndu vɛlɛ nyɔmiaa numnda a kol.’ Num pila yiyaŋ niko. Mɛŋndaŋ pila nyɔmiaa kol ni. Lubɛka nɔ mbo vili mɛŋndaŋ le nda kpou. A cho pa ndu chɔɔ wallo tosaa kalaŋ o fotueiyo niŋ?— Mi kɔndɔfillo bii Eliyesa a mɛɛ Chɛhowa muli piɛile ndɔ leŋ yɛ.

Mi Eliyesa ke Lubɛka nyɛm kɛndɔŋ tau. Mi Lubɛka dimul Eliyesa nda chaaŋaa nduaa buɛiya le ma kuɛ nda ndaa o finya ndɔ lo bɛɛ. Mi Eliyesa duaunuŋ kona le sabu Ebilaham vem ndu loŋ ndo, nduyɛ, a mɛɛ Chɛhowa muli piɛile ndɔ leŋ yɛ. Mi wanaa velu Lubɛka wa duaŋ nyaale tau le mbo wa lanɔɔ Aisaki.

A yiyaŋ pa maa Lubɛka ndoo yeema Aisaki le mbo wa pɔnɔ ndɔ?— Mi Lubɛka sina maa Chɛhowa vem Eliyesa loŋ ni. Lelaŋ, dimioo naa wanaa velu Lubɛka wa nyuna ndu maa te o yeema pɛ kɔlaŋ Kenaŋ le mbo wa lanɔɔ Aisaki, mi Lubɛka chɛl. Mbo dimi aa, ‘I yeema mi kuɛ’. Okoŋ, ma mal le kɔlaŋ Kenaŋ. Mɛɛ nda fuuluu Kenaŋ, mbo simnuŋ lanɔɔ Aisaki.

Le mɛɛ Lubɛka tosa nyɛ Chɛhowa yeema wo yɛ, mi Chɛhowa duau ndu sala. O pulale Lubɛka leŋ niŋ Chiisu veluŋ ni. Wɔsila bɔɔ bɔɔ hiou fɛlɛŋ malaŋ hei yɔŋnuŋ. Te a tol pɛ tamasi Lubɛka wo kɔɔli, okoŋ ma tosa hɛnaŋ Chɛhowaa, num bɛɛ o cho num dɔuwɔɔ sala.