Mi po chua piaandu pum kiindiaa yoomu bomndɔɔ. Ŋ pɛɛkuŋ ndɔ a ndu okɔɔ. Poo hoo, bomndɔ wa Pɔɔl ni. Baabuiyo chɔm diola ndɔ laŋ te. Kɛ ŋ sina maa mbo tosa isɔɔ i chɔm maa ndoo nɔ isiooŋ te wo. A yeema pa ma sina nyɛ o tosa wo?—

Ma duau Pɔɔl o chiɛi manyumndo niŋ Chulusalɛm. Le mɛɛ o wa yooŋgu kɛndɔɔ dimioo a Chiisu okɔɔ yɛ nda bii ndu ni. Mi puaa dɛnɛ wɔɔŋnda apum tul Pɔɔl leyɛ, ma tosa kɛɛsiaa wɔɔŋndo le ndu. Ma dimi aa, ‘Ŋ dimulluŋ masa cho sovɛiya bolleŋndo mbo dimul sovɛiyaa nduaa le ma kuɛ a Pɔɔl o lemasa. Ŋ cho vioŋnɔŋ o nɛi tɛɛŋ. Te Pɔɔl wa pɛ hiouwɔɔ, ŋ dii ndu!’

Mi tooŋgoo Pɔɔl tuɛi a kɛɛsiaa hoo okɔɔ. Mɛɛ o tuei, yɛɛ ndoo tosa yɛ? Mbo kua o chiɛi manyumndo niŋ mbo dimul Pɔɔl a suɛi hei okɔɔ. Mi Pɔɔl dimul ndu chɔ chɔ maa o kɔ dimul wana cho sovɛiya bolleŋndo a nyɛ puaa haa tuu le tosaa wo okɔɔ. A yiyaŋ pa maa i wa bɛɛŋ bɛɛŋ le mi tooŋgoo Pɔɔl soo naa masa sovɛiya cha?— Sako bɛɛ. Kanifuule, wana bɛndoo pila o wa ni. Kɛ tooŋgoo Pɔɔl ndoo nɔ isiooŋ te, mbo kɔ soo o wana bɛndoo hoo lo.

Mi wana wa sovɛiya bolleŋndo sina nyɛ o nɔ le tosaa wo. Mbo chua sovɛiya le 500 le Pɔɔl mandaa! Mbo dimul nda le ma liila Pɔɔl Sisaliaa a nyumma maŋ. Baa Pɔɔl ndoo fuuluu pa yoomu?— Ei, mbo fuuluu yoomu. Puaa dɛnɛ wɔɔŋaa kaŋ del lɛ ndu choo o nɛi tɛɛŋ te! Mi tuu nda wɔɔŋ koŋ o tambu.

Yɛɛ bundɛi hei pɛɛku yɛ num?— Num bɛɛ a tiuba ma tosa maa tooŋgoo Pɔɔl. A nɔ ma wa a isiooŋ te. Naa bɛɛ, mɛɛ mi ŋ soliŋ sioonde o kɔl le suɛi a Chɛhowa okɔɔ. A soliŋ niŋ pa sioonde o kɔl le suɛi a Chɛhowa okɔɔ?— Te a tosa lende pɛ, a cho yoomula waŋnda apum kiindiaa.