SUƐI LEBOLII 01

Vɛɛ Baabuiyo Nɔla yɛ Mbo Mala Num?

PILEI

Naa kpou nɔ nyunalaŋ a yoomoo, nyɛpalaa, piɔmndo, vɛlɛ a siɔdii lachioo okɔɔ. Ŋ yeema vɛlɛ malaa le nyɛm naŋ hau ba woŋ sɔlaa, le mi yuŋgu naa wa a nyaale, a sɔɔŋ cheleŋ. Wanaa bɔɔbɔɔ saaluŋ maa o cho ko nyunala sɔvɛlaŋ o yoomoo niŋ te Baabuiyo muli le. Kɛ, mbo ke nda vɛlɛ silaa a mɛɛ nda nɔ ma bii yoomu ndaa yɛ okɔɔ. A yiyaŋ pa maa Baabuiyo nɔla mbo mala wana o wana?

1. Ɔɔ nyunala Baabuiyo nɔla mbo muli laŋ lapum?

Baabuiyo nɔ mulioo le nyunala sɔvɛlaŋ ndaŋ: Vɛɛ yoomoo kanduŋ yɛ? Le yɛɛ naŋ cho yɛ naŋ? Le yɛɛ nyɛpalaa cho yɛ? Yɛɛ yɔŋnuŋ yɛ waŋndo te o vi pɛ? Wana o wana yeema kɔl nyuloo, kɛ le yɛɛ mi chɔulaŋ la wa tau? Yɛɛ cho yɛ hunɔɔ yɔŋnɔŋ a chieeŋndo? Baabuiyo cho naa dɛɛniaa le miŋ nuuviaa mulilaŋ le nyunalaŋ ndaŋ. Nduyɛ waŋnda o miiliɔŋndaŋ niŋ saaluŋ niŋ mulila nɛŋi nda kɔllo laŋ leniŋ.

2. Vɛɛ Baabuiyo mala yɛ naa miŋ tuei yoomoo yeela suŋ suŋ?

Mi Baabuiyo ke naa sila kɛndɔɔ. Le taamaseliiyo, mbo pɛɛku yuŋgulaŋ mɛɛ nda looku ma sɔla nyaale kpeekpeiyo yɛ. Mbo chɔm naa nyɛ naŋ nɔ miŋ tosa wo te ŋ tambu pɛ kɔl, a nyɛ mala naa miŋ kaala wali naa wo. Te ŋ wa pɛ sɔɔŋ muŋ pɛɛkoo, a cho sina nyɛ Baabuiyo pɛɛku naa a muŋ okɔɔ wo. Ŋ cho vɛlɛ sina a sɔɔŋ cheleŋ okɔɔ. A cho chɛlɔɔ maa “diom o diom cho o Yau Mɛlɛkaa niŋ, [nyɛ o nyɛ cho o Baabuiyo niŋ] . . . nɔ malaa leniŋ.”—2 Timoti 3:16.

Yauwo hoo miiŋgu o foofo Baabuiyo le. O cho num pɛŋ dɛɛniaa le ma pɛɛku Baabuiyo. Lelaŋ, ŋ cho num dɛɛniaa le ma veelu diomndaŋ o bolii Baabui cho o sɔɔŋ lebolloŋ muŋ bɛŋgu woŋ, okoŋ ma tuu ndi a nyɛ ŋ cho pɛɛkoo wo.

CHƆƆLU YAASIAA

Yaasiaa ma sina mɛɛ Baabuiyo mala niŋ waŋnda yɛ, nyɛ ŋ nɔ ma tosa le ma tuei diomndaŋ veeloo leniŋ yeela wo, a sabu o bɛnda mi waŋndo mala num le ndu biyɔɔ bila wo.

3.. Baabuiyo nɔla mbo chɔm naa nɛiyo

Baabuiyo cho ko maa tɔɔsu. Ŋ soliŋ ndu kpeku le naa chɔmndo mɛɛ naŋ tosa kɛɛsiaala kɛndɛlaŋ yɛ. Nduyɛ mbo mala naa le sinaa nyɛ cho yɔŋnɔŋ o siɔdii lachioo niŋndo.

Nuawɔ Sam 119:105, okoŋ mi la suukaŋ o nyunalaŋ ndaŋ choo:

Vɛɛ wana poonyiaa ŋchondoo hoo yiyaŋ yɛ a Baabuiyo okɔɔ?
Yɛɛ ŋ yiyaŋ yɛ a Baabuiyo?

4. Baabuiyo nɔla mbo muli nyunala naalaŋ

Mi wɛɛŋ pum saaluŋ mulilaŋ o Baabuiyo niŋ le nyunala wa ndu o kɔl le wɔsiŋ bɔɔbɔɔ wo. Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Fɛɛŋ Bɛɛ Mal Tiindaŋ Numndo Le! (1:48)

O vidueiyo hoo niŋ, nyunala kuɛɛ wɛɛŋndo hoo ndoo nɔ yɛ?
Tɔnɔ yɛɛ o sɔla yɛ o Baabuiyo pɛɛkoo niŋ?

Baabuiyo dɛɛniaa naa le miŋ wa nyunaa. Nuawɔ Maatiu 7:7, okoŋ mi la suukaŋ o nyunaa hoo choo:

Nyunala kuɛɛ cho yɛ num o kɔl la ŋ yeema mi Baabuiyo muli laŋ?

5. A tiuba ma tuei diomndaŋ veeloo o Baabuiyo niŋ yeela

Mi wanaa bɔɔbɔɔ tuei diomndaŋ veeloo o Baabuiyo niŋ yeela nduyɛ a cho tɔnɔɔ sɔlaa leniŋ. Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Diomndaŋ Veeloo o Baabuiyo Niŋ (2:05)

Baa feleŋguaa cho o vidueiyo hoo niŋnda ndaa hɛnaŋ pa a diomndaŋ veeloo o yaulaŋ niŋ?
Le yɛɛ nda hɛnaŋ yɛ niŋ a diomndaŋ veeloo o Baabuiyo niŋ?

Baabuiyo dimi maa o tiuba mbo pɛɛku naa nduyɛ mbo ke naa kɔl dɛɛniaa a tiindaŋndo. Nuawɔ Luomaŋnda 15:4, okoŋ mi la suukaŋ o nyunaa hoo choo:

Baa a hɛnaŋ pa a kɔl dɛɛniaa vɛlɛ a tiindaŋ Baabuiyo dimi le naa kioo wo?

6. Wanaa cheleŋ nɔla ma mala naa miŋ bii Baabuiyo bila

Mi wanaa bɔɔbɔɔ veelu diomndaŋ o Baabuiyo niŋ. Kɛ ma sɔla tɔnɔɔ tau te waŋndo mala nda pɛ ma bii ndu bila. Nuawɔ Walta Kiilaa 8:26-31, okoŋ mi la suukaŋ o nyunaa hoo choo:

Vɛɛ naŋ nɔla yɛ miŋ bii Baabuiyo bila?—Tofa sɔɔŋ 30 a 31.

Po Itoopiaanɔɔ ndoo yeema waŋndo mbo mala ndu le mbo bii Diom Mɛlɛkaa bila. Mi wanaa bɔɔbɔɔ sɔla hau tɔnɔɔ tau te waŋndo mala nda pɛ ma bii Baabuiyo bila

TE WAŊNDO DIMI PƐ AA: “Teleŋndo wana tɛɛmbuu ni le Baabuiyo pɛɛkoo.”