SUƐI LEBOLII 03

Baa A Nɔla Pa Ma Laalaŋ Sɔɔŋ Baabuiyo Dimi Woŋ?

PILEI

Baabuiyo nɔ sɔɔŋ kɛndɛŋ nɔ le hunɔɔ yɔŋnɔŋndo woŋ a silala kɛndɛlaŋ tau. Naapum yeemɛi cho num le sinaa nyɛ cho leniŋ ndo. Kɛ, mi kiisaŋndo wa num dɔɔ te sɔɔŋ cho leniŋndoŋ cho tonya. Mi che bɛɛ yau paandu paandoo Baabuiyo cho ni, kɛ a nɔla pa ma laalaŋ sɔɔŋ o dimi le yɔŋnɔŋndo woŋ a silala cho leniŋ ndaŋ? Baa a laalaŋ pa maa sɔɔŋ o dimi woŋ mala num ma tuei yoomoo yeela suŋ suŋ a o siɔdii lachioo niŋ? Waŋnda o miiliɔŋndaŋ niŋ laalaŋ hau o Baabuiyo niŋ ni. Ŋ yaasiaa wɔ miŋ che nyɛ mala num mi num bɛɛ tosa heiyo.

1. Baa sɔɔŋ tonyaŋ cho o Baabuiyo niŋ ni ɔɔ bundɔŋ yɔŋaŋ koni?

Baabuiyo dimi maa diom o diom cho leniŋ, “diom cho sakpo, nduyɛ mbo wa diom tonyaa wo o cho ni.” (Ikilisiaatii 12:10) O chɔm naa sɔɔŋ kpeekpei yɔŋnuŋ paandu a waŋnda apum okɔɔ woŋ. (Nuawɔ Luku 1:3; 3:1, 2.) Wanaa yaasiaa sɔɔŋ masindɔŋ nda a wanaa tuau nyɔɔŋ lɛŋ nda, a bɔɔbɔɔ saaluŋ maa wɔsila Baabuiyo soo okɔɔ laŋ, waŋnda, fondaŋndaŋ, a konala cho leniŋ ndaŋ kpou cho tonya.

2. Mi che bɛɛ yau paandoo Baabuiyo cho ni, kɛ le yɛɛ sɔɔŋ cho leniŋ ndoŋ cho yɛ ŋ sɔvɛ?

Baabuiyo soo a sɔɔŋ bɔɔbɔɔ okɔɔ. Waŋnda ndaa sina wɔ a muŋ okɔɔ o teleŋ nda poonyiaa ndu wo niŋ te. Le tamaseliiyo, mbo suaa a mɛɛ chieeŋndo cho yɛ okɔɔ. O tasela ndɔ, wanaa bɔɔbɔɔ ndaa laalaŋ a nyɛ o dimi a chieeŋndo okɔɔ wo le. Kɛ, wanaa cho pɛɛkoo waalioo a chieeŋndo okɔɔ wa che maa nyɛ Baabuiyo dimi wo cho tonya. Hei chɔm maa nyɛ o nyɛ Baabuiyo dimi pɛ, “le fɛɛŋ a fɛɛŋ . . . o nɛi tonyaa choo o dimi ndu ni.”—Sam 111:8.

3. Le yɛɛ naŋ nɔ yɛ miŋ laalaŋ nyɛ Baabuiyo dimi a siɔdii lachioo okɔɔ wo?

Mi Baabuiyo dimi huuloŋ * sindɛ pa a “sɔɔŋ nɔ le hunɔɔ yɔŋnɔŋndo woŋ” okɔɔ. (Aisaya 46:10) Sɔɔŋ muŋ cho kɔlaŋ a yɔŋnɔŋndo mɛɛ Baabuiyo dimi yɛ. Ŋ cho hau yɔŋnɔŋndo woŋ bɛɛ, mbo suaa a muŋ okɔɔ kpou. O suɛi lebolle hei bɛŋgu, ŋ cho yaasiaa huuluŋ Baabuiyoŋ ŋpum. Kɔndɔfillo cho num biyɔɔ a mɛɛ ŋ cho peelɔŋndo yɛ.

CHƆƆLU YAASIAA

Yaasiaa wɔ ma che mɛɛ sɔɔŋ wanaa pɛɛku waalioo a chieeŋndo okɔɔ wa chɛlaŋ a nyɛ Baabuiyo dimi wo yɛ. Okoŋ, ma pɛɛku vɛlɛ a huuluŋ Baabuiyoŋ ŋpum okɔɔ.

4. Sɔɔŋ wanaa pɛɛku a chieeŋndo okɔɔ wa chɛlaŋ a nyɛ Baabuiyo dimi wo

O sindɔɔ niŋ, wanaa bɔɔbɔɔ ndaa laalaŋ maa o nyɛ choo chieeŋndo chal ni. Handu VIDUEIYO.

VIDUEIYO: Nyɛ o Nyɛ See Chieeŋndo Le (1:13)

Tofawɔ nyɛ poonyiaŋ o yau Choobu wo niŋ a chieeŋndo okɔɔ wo. O hiou niŋ hau suɛi wɔsila 3,500 chɔŋ a teleŋ nda poonyiaa ndu wo. Nuawɔ Choobu 26:7, okoŋ mi la suukaŋ o nyunaa hoo choo:

Baabuiyo dimi maa chieeŋndo landuŋ “naa nyɛ o nyɛ cho le saa le wa.” Yɛɛ teleŋ hei dimiŋndo cho yɛ naa pɛɛkoo a Baabuiyo okɔɔ?

Wanaa pɛɛku a chieeŋndo okɔɔ wa yala sina mɛɛ mɛŋndaŋ ma hiŋnuŋ yɛ le. O wɔsiŋ 1800 woŋ niŋ pɔ nda bii ndi bila ni. Kɛ Baabuiyo ndoo soo niŋ a hei okɔɔ le wɔsilaŋ o waalaŋ niŋ. Tofawɔ nyɛ o dimi wo. Nuawɔ Choobu 36:27, 28, okoŋ mi la suukaŋ o nyunalaŋ ndaŋ choo:

Yɛɛ hɛnaŋ yɛ num a nyɛ Baabuiyo dimi hoo a hiŋnɔŋ mɛŋndaŋ ma hiŋnuŋ ndo okɔɔ wo?
Baa bolii Baabui naŋ laŋga nua hei ve chɔɔlu pa laalaŋ numndo kindi o nyɛ Baabuiyo dimi wo niŋ?

5. Mi Baabuiyo dimi huuloŋ a lɛŋnde i pum okɔɔ

Nuawɔ Aisaya 44:27–45:2, okoŋ mi la suukaŋ o nyunaa hoo choo:

Yɛɛ Baabuiyo ndoo dimi yɛ a Babilɔŋ okɔɔ mɛɛ nyɔɔ lo le suɛi wɔsila 200 tuupa mbo sɔla tambei?

Handu VIDUEIYO.

VIDUEIYO: Mi Baabuiyo Suaa a Tambii Babilɔŋnde Okɔɔ (0:58)

Sɔɔŋ masindɔŋ chɔm maa Masa wa Paasiaa wo Sailɔɔ, a puaa nduaa chɔuwa yem Babilɔŋ ni. Hei yɔŋnuŋ o wɔsi 539 ve niŋ tuupa mi Chiisu vialuŋ. Ma tɛnda pee bɛndu balu chioo wo. Mɛɛ nda taŋ, a komal diola kpaki chioo la kumbiaa, okoŋ ma bii chioo bɛɛŋ bɛɛŋ. Chɔŋ a teleŋ Babilɔŋ sɔla tambeiyo, o hiou niŋ hau wɔsilaŋ 2,500. Kɛ o cho wɔ a bembelaŋ. Tofawɔ nyɛ Baabuiyo dimi a ndu okɔɔ wo.

Nuawɔ Aisaya 13:19, 20, okoŋ mi la suukaŋ o nyunaa hoo choo:

Vɛɛ nyɛ yɔŋnuŋ a Babilɔŋ ndo chɔm yɛ maa mi huuluei hei peeluŋ?

Bembela Babilɔŋ ndaŋ o lɛŋnde Ilakileŋ niŋ

6. Mi Baabuiyo suaa a sɔɔŋ cho hau yɔŋnɔŋ ndo woŋ okɔɔ

Baabuiyo veelu teleŋ naa hoo aa “palɛi mɛɛlɛi.” (2 Timoti 3:1) Tofawɔ sɔɔŋ o dimi le yɔŋnɔŋndo o palɛi mɛɛlɛi hei niŋ ndoŋ ŋpum.

Nuawɔ Maatiu 24:6, 7, okoŋ mi la suukaŋ o nyunaa hoo choo:

Sɔɔŋ bɛnduŋ kuɛɛ Baabuiyo dimi yɛ maa ŋ cho wa yɔŋnɔŋndo o palɛi mɛɛlɛi niŋ?

Nuawɔ 2 Timoti 3:1-5, okoŋ mi la suukaŋ o nyunalaŋ ndaŋ choo:

Kaala kuɛɛ Baabuiyo dimi yɛ maa wanaa bɔɔbɔɔ nɔ niŋ o palɛi mɛɛlɛi niŋ?
O kaalaŋ ndaŋ tɛɛŋ, la kuɛɛ num che yɛ niŋ waŋnda tosaa?

TE WAŊNDO DIMI PƐ AA: “Bundɔŋ yɔŋaŋ koni cho o Baabuiyo niŋ ni nduyɛ ŋ cho tonya le.”

O yiyaŋ numndo niŋ, yɛɛ chɔm yɛ kɛsɛ maa sɔɔŋ cho o Baabuiyo niŋndoŋ kpou cho tonya?

SƆƆŊ KULLOŊ

Sɔɔŋ masindɔŋ, sɔɔŋ wanaa pɛɛku a chieeŋndo okɔɔ wa, a huuloŋ kpou chɔm maa a nɔla ma tiindaŋ Baabuiyo.

Nyunala miiŋgaa choo laŋ

Baa sɔɔŋ tonyaŋ cho o Baabuiyo niŋ ni, ɔɔ bundɔŋ yɔŋaŋ koni?
Tamaseliila kuɛɛ chɔm yɛ maa, sɔɔŋ wanaa pɛɛku a chieeŋndo okɔɔ wa chɛlaŋ a nyɛ Baabuiyo dimi wo?
A yiyaŋ pa maa Baabuiyo nɔla mbo dimul naa a siɔdii lachioo okɔɔ? Le yɛɛ ŋ dimi yɛ lende?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Le laalaŋ numndo kindioo o Baabuiyo niŋ, nua yauwo ɔɔ vidueiyo o naa nda dimi aa, Chɔɔlu Sɔɔŋ Pum Tofa wa.

Nyɛ cheleŋ:

Your other goal