SUƐI LEBOLII 01
Vɛɛ Baabuiyo Nɔla yɛ Mbo Mala Num?
Naa kpou nɔ nyunalaŋ a yoomoo, nyɛpalaa, piɔmndo, vɛlɛ a siɔdii lachioo okɔɔ. Ŋ yeema vɛlɛ malaa le nyɛm naŋ hau ba woŋ sɔlaa, le mi yuŋgu naa wa a nyaale, a sɔɔŋ cheleŋ. Wanaa bɔɔbɔɔ saaluŋ maa o cho ko nyunala sɔvɛlaŋ o yoomoo niŋ te Baabuiyo muli le. Kɛ, mbo ke nda vɛlɛ silaa a mɛɛ nda nɔ ma bii yoomu ndaa yɛ okɔɔ. A yiyaŋ pa maa Baabuiyo nɔla mbo mala wana o wana?
1. Ɔɔ nyunala Baabuiyo nɔla mbo muli laŋ lapum?
Baabuiyo nɔ mulioo le nyunala sɔvɛlaŋ ndaŋ: Vɛɛ yoomoo kanduŋ yɛ? Le yɛɛ naŋ cho yɛ naŋ? Le yɛɛ nyɛpalaa cho yɛ? Yɛɛ yɔŋnuŋ yɛ waŋndo te o vi pɛ? Wana o wana yeema kɔl nyuloo, kɛ le yɛɛ mi chɔulaŋ la wa tau? Yɛɛ cho yɛ hunɔɔ yɔŋnɔŋ a chieeŋndo? Baabuiyo cho naa dɛɛniaa le miŋ nuuviaa mulilaŋ le nyunalaŋ ndaŋ. Nduyɛ waŋnda o miiliɔŋndaŋ niŋ saaluŋ niŋ mulila nɛŋi nda kɔllo laŋ leniŋ.
2. Vɛɛ Baabuiyo mala yɛ naa miŋ tuei yoomoo yeela suŋ suŋ?
Mi Baabuiyo ke naa sila kɛndɔɔ. Le taamaseliiyo, mbo pɛɛku yuŋgulaŋ mɛɛ nda looku ma sɔla nyaale kpeekpeiyo yɛ. Mbo chɔm naa nyɛ naŋ nɔ miŋ tosa wo te ŋ tambu pɛ kɔl, a nyɛ mala naa miŋ kaala wali naa wo. Te ŋ wa pɛ sɔɔŋ muŋ pɛɛkoo, a cho sina nyɛ Baabuiyo pɛɛku naa a muŋ okɔɔ wo. Ŋ cho vɛlɛ sina a sɔɔŋ cheleŋ okɔɔ. A cho chɛlɔɔ maa “diom o diom cho o Yau Mɛlɛkaa niŋ, [nyɛ o nyɛ cho o Baabuiyo niŋ] . . . nɔ malaa leniŋ.”—2 Timoti 3:16.
Yauwo hoo miiŋgu o foofo Baabuiyo le. O cho num pɛŋ dɛɛniaa le ma pɛɛku Baabuiyo. Lelaŋ, ŋ cho num dɛɛniaa le ma veelu diomndaŋ o bolii Baabui cho o sɔɔŋ lebolloŋ muŋ bɛŋgu woŋ, okoŋ ma tuu ndi a nyɛ ŋ cho pɛɛkoo wo.
CHƆƆLU YAASIAA
Yaasiaa ma sina mɛɛ Baabuiyo mala niŋ waŋnda yɛ, nyɛ ŋ nɔ ma tosa le ma tuei diomndaŋ veeloo leniŋ yeela wo, a sabu o bɛnda mi waŋndo mala num le ndu biyɔɔ bila wo.
3. Baabuiyo nɔla mbo chɔm naa nɛiyo
Baabuiyo cho ko maa tɔɔsu. Ŋ soliŋ ndu kpeku le naa chɔmndo mɛɛ naŋ tosa kɛɛsiaala kɛndɛlaŋ yɛ. Nduyɛ mbo mala naa le sinaa nyɛ cho yɔŋnɔŋ o siɔdii lachioo niŋndo.
Nuawɔ Sam 119:105, okoŋ mi la suukaŋ o nyunalaŋ ndaŋ choo:
-
Vɛɛ wana poonyiaa ŋchondoo hoo yiyaŋ yɛ a Baabuiyo okɔɔ?
-
Yɛɛ ŋ yiyaŋ yɛ a Baabuiyo?
4. Baabuiyo nɔla mbo muli nyunala naalaŋ
Mi wɛɛŋ pum saaluŋ mulilaŋ o Baabuiyo niŋ le nyunala wa ndu o kɔl le wɔsiŋ bɔɔbɔɔ wo. Handu VIDUEIYO, okoŋ mi la suukaŋ o nyunalaŋ ndaŋ choo:
-
O vidueiyo hoo niŋ, nyunala kuɛɛ wɛɛŋndo hoo ndoo nɔ yɛ?
-
Tɔnɔ yɛɛ o sɔla yɛ o Baabuiyo pɛɛkoo niŋ?
Baabuiyo dɛɛniaa naa le miŋ wa nyunaa. Nuawɔ Maatiu 7:7, okoŋ mi la suukaŋ o nyunaa hoo choo:
-
Nyunala kuɛɛ cho yɛ num o kɔl la ŋ yeema mi Baabuiyo muli laŋ?
5. A tiuba ma tuei diomndaŋ veeloo o Baabuiyo niŋ yeela
Mi wanaa bɔɔbɔɔ tuei diomndaŋ veeloo o Baabuiyo niŋ yeela nduyɛ a cho tɔnɔɔ sɔlaa leniŋ. Handu VIDUEIYO, okoŋ mi la suukaŋ o nyunalaŋ ndaŋ choo:
-
Baa feleŋguaa cho o vidueiyo hoo niŋnda ndaa hɛnaŋ pa a diomndaŋ veeloo o yaulaŋ niŋ?
-
Le yɛɛ nda hɛnaŋ yɛ niŋ a diomndaŋ veeloo o Baabuiyo niŋ?
Baabuiyo dimi maa o tiuba mbo pɛɛku naa nduyɛ mbo ke naa kɔl dɛɛniaa a tiindaŋndo. Nuawɔ Luomaŋnda 15:4, okoŋ mi la suukaŋ o nyunaa hoo choo:
-
Baa a hɛnaŋ pa a kɔl dɛɛniaa vɛlɛ a tiindaŋ Baabuiyo dimi le naa kioo wo?
6. Wanaa cheleŋ nɔla ma mala naa miŋ bii Baabuiyo bila
Mi wanaa bɔɔbɔɔ veelu diomndaŋ o Baabuiyo niŋ. Kɛ ma sɔla tɔnɔɔ tau te waŋndo mala nda pɛ ma bii ndu bila. Nuawɔ Walta Kiilaa 8:26-31, okoŋ mi la suukaŋ o nyunaa hoo choo:
-
Vɛɛ naŋ nɔla yɛ miŋ bii Baabuiyo bila?—Tofa sɔɔŋ 30 a 31..
TE WAŊNDO DIMI PƐ AA: “Teleŋndo wana tɛɛmbuu ni le Baabuiyo pɛɛkoo.”
-
Vɛɛ ŋ cho yɛ muli? Le yɛɛ?
SƆƆŊ KULLOŊ
Mi Baabuiyo ke naa silaa a mɛɛ naŋ tuɛi yoomoo yeela suŋ suŋ yɛ okɔɔ, mbo muli nyunala sɔvɛlaŋ, nduyɛ mbo ke waŋnda kɔl dɛɛniaa a tiindaŋndo.
Nyunala miiŋgaa choo laŋ
-
Silala kuɛɛ naŋ sɔla yɛ o Baabuiyo niŋ?
-
Ɔɔ nyunala Baabuiyo nɔla mbo muli laŋ lapum?
-
Yɛɛ ŋ yeema yɛ ma pɛɛku o Baabuiyo niŋ?
CHƆƆLU SƆƆŊ PUM TOFA
Baabuiyo nɔ sila mala naa le bahawɛilaŋ solioo o yoomoo niŋndo.
“Pɛɛkula Cho o Baabuiyo Niŋndaŋ, Taasi Nɔ la Mɛɛlu le Wo La Cho Ni” (Bandu Mɛŋgɛlaa No. 1 2018)
Tofawɔ suɛi yɔŋnaŋnde hei ma che mɛɛ Baabuiyo mala po pilɛ yɛ. Chɔŋ o chuaambɔyɛi nduɛi niŋ, poo hoo ndoo yiyaŋ maa o cho wana sɔvɛ le.
Nuawɔ mɛɛ sila cho o Baabuiyo niŋndo mala yuŋgulaŋ yɛ.
“Sɔɔŋ 12 Tosa Mi Yuŋgoo Wa a Nyaale Woŋ” (“Tiondoo!” No. 2 2018)
O cho wana waŋnda yiyaŋndo le chieeŋndo hoo cho hau o ba bɛŋgu le. Tofawɔ ma che mɛɛ Baabuiyo mala naa le hei sinaa yɛ.