SUƐI LEBOLII 05
Yooŋgu Chɛŋ o Mɛlɛka Lo le Naa wo Baabuiyo Cho Ni
Chɛhowa ke naa Baabuiyo ni nduyɛ, ke sɔviɔɔ pila o cho ni. O nɔ yaula pɔmbɔlaŋ 66 leniŋ. Mi kɔndɔfillo bii num dɔɔ ma nyuna aa, ‘Vɛɛ naŋ looku yɛ Baabuiyo sɔla? Yau nɛɛnɛ o cho yɛ?’ Le nyunalaŋ ndaŋ mulioo, ŋ yaasiaa wɔ miŋ sina mɛɛ naŋ looku Baabuiyo sɔla yɛ.
1. Te waŋchieeya poonyiaa Baabuiyo ni, vɛɛ o cho yɛ yau Mɛlɛkaa?
Waŋnda 40 poonyiaa Baabuiyo ni. Nduyɛ a chua wɔsilaŋ 1,600 le ndu chiiyo. A kandu ndu poonyiaa a wɔsi 1513 tuupa mi Chiisu vialuŋ, mbo chuu a wɔsi 98 o faŋaŋ Chiisoo kɔɔli. Wanaa poonyiaa Baabuiyo wa ve o fondaŋ pilɛ le, nduyɛ a ve wanaa suu pilɛ le. Kɛ, nyɛ nda poonyiaa wo cho o chɛlaŋ. Le yɛɛ? Kanifuule, yau Mɛlɛkaa Baabuiyo cho ni. (Nuawɔ 1 Tɛsaloniaŋ 2:13.) Lelaŋ, o cho yiyaŋ ndaa le nda poonyiaa le. Kɛ, “nyina diandaa a nyindu nda ni” le ndu poonyiaa. (2 Pitɛ 1:21) Mɛlɛka ke waŋnda haa nyina ndɔ diandaa ni ma poonyiaa yooŋgu cho o Baabuiyo niŋndo.—2 Timoti 3:16.
2. Le nɛɛ yaa Baabuiyo cho yɛ?
Yooŋgu kɛndɛ cho o Baabuiyo niŋndo “cho le waŋnda lekaa o lekaa, a lelɛŋ o lelɛŋ, a isɔɔ o isɔɔ maŋgalaa, a waŋnda suu o suu.” (Nuawɔ Sɔɔŋ Chɔɔmaŋndoŋ 14:6.) Yau o yau cho hau o sɔɔŋ maŋgalaŋ niŋ tau mbo sulaŋ a Baabuiyo le. Kanifuule, Mɛlɛka tosa ni ma hivi ndu o sɔɔŋ maŋgalaŋ bɔɔbɔɔ niŋ. Ŋ dimi maa ba o ba waŋnda wa, a nɔla ma tuei yooŋgu cho o Baabuiyo niŋndo o suɛi ndɛi maŋgalɛi niŋ.
3. Vɛɛ Chɛhowa manda yɛ Baabuiyo?
Nyɛm ndaa poonyiaa sindɛ Baabuiyo lechoo woŋ muŋ nɛi a tambu le. Le taamaseliiyo, yau visioo wa nyɔɔ opilɛ o ndaa soliŋ kpeku wo. Kɛ mi wanaa ndaa kaala Baabuiyo wa ndaa miŋgi ndu poonyiaa te a che dɔɔ pɛ maa o hiŋ le tambei. Mi masaa a simlachiaa lepiɛiya apum kindiŋ le Baabuiyo faŋaa. Kɛ mi waŋnda apum pisi yoomula ndalaŋ le ndu mandaa. Chɛhowa chɛl mi wana o wana ɔɔ nyɛ o nyɛ tɛɛmbuu yooŋgu o nɔ le naa wo le. Baabuiyo dimi aa: “Mɛlɛka ndu diom ndɔɔ o cho le fɛɛŋ a fɛɛŋ.”—Aisaya 40:8.
CHƆƆLU YAASIAA
Pɛɛku ma sina mɛɛ Mɛlɛka ke waŋ piaanduaa apum yooŋgu ndɔɔ ma poonyiaa o Baabuiyo niŋ yɛ, mɛɛ o manda ndu yɛ, a mɛɛ o tosa mi waŋchieeya sɔla ndu hau yɛ.
4. Baabuiyo pila chɔm wana nɔ ndu wo
Handu VIDUEIYO. Okoŋ, mi la nua 2 Timoti 3:16, mi la suukaŋ o nyunalaŋ ndaŋ choo:
-
Te waŋchieeya poonyiaa Baabuiyo ni, mɛɛ le yɛɛ nda veelu yɛ ndu aa Diom Mɛlɛkaa?
-
Baa kɔl kaloo cho pa leniŋ le laalaŋndo maa Mɛlɛka nɔla mbo chɔm waŋchieeya yiyaŋnda ndɔlaŋ ma poonyiaa?
A dimul waŋndo le mbo poonyial num yauwo ma yɔŋ. Kɛ te o chii pɛ yau koŋ poonyiaa, o cho yooŋgu ndɔɔ le wa leniŋ te. Kanifuule, num soo ni mbo poonyiaa. Mɛɛ lende koni i cho ni. Waŋchieeya poonyiaa Baabuiyo ni, kɛ o Mɛlɛka lo yooŋgu cho leniŋndo fula ni.
5. Mi waŋnda kindiŋ le Baabuiyo tɛɛmbuu wo kɛ ma dema
Te yau Mɛlɛkaa Baabuiyo cho ni, mɛɛ o nɔla mbo manda ndu. Chɔŋ o sindɔɔ niŋ mbo huŋ bii a hau, masaa apum kindiŋ niŋ le Baabuiyo tɛɛmbuu wo. Simlachiaa lepiɛiya bɛɛ kindiŋ niŋ le waŋnda kuunaa Baabuiyo soliŋndo kpeku. Mi che bɛɛ mi ndaa kɔŋgɔlaŋ wanaa nɔ ndu wa le nda diyɔɔ, kɛ mi a bɔɔbɔɔ pisi yoomula ndalaŋ le ndu mandaa. Le sinaa a waŋnda haa opilɛ okɔɔ, handu VIDUEIYO, okoŋ mi la suukaŋ o nyunalaŋ ndaŋ choo:
-
Te a yiyaŋ pɛ a mɛɛ waŋnda kindi kindiŋ le Baabuiyo mandaa yɛ, baa mi keŋ nyindu num pa le diomndaŋ veeloo leniŋ? Le yɛɛ?
Nuawɔ Sam 119:97, okoŋ mi la suukaŋ o nyunaa hoo choo:
-
Yɛɛ nyindu yɛ wanaa bɔɔbɔɔ ma pisi yoomula ndalaŋ le Baabuiyo hivioo le halikpeŋ mi waŋnda sɔla ndu?
6. Yau cho le wana o wana wo
Chɔŋ o sindɔɔ niŋ mbo huŋ bii a hau, waŋnda hivi niŋ Baabuiyo mbo hiau yau o yau. Nduyɛ, ndu hiou wa waŋnda o laba. Nuawɔ Walta Kiilaa 10:34, 35, okoŋ mi la suukaŋ o nyunalaŋ ndaŋ choo:
-
Le yɛɛ Mɛlɛka yeema yɛ mi Diom ndɔɔ hiviŋ o sɔɔŋ maŋgalaŋ yɛ yiɔɔŋ niŋ nduyɛ mi wana o wana sɔla ndu?
-
Yɛɛ hɛnaŋ yɛ num a Baabuiyo okɔɔ?
O ŋwaŋ
100
kɛ kɛ tɛɛŋ o chieeŋndo choo sɔŋgɔ wana o wana
nɔ Baabuiyo o suɛi maŋgalɛi o bii bila ve niŋ
O cho kpou ɔɔ o tiŋ
3,000
o sɔɔŋ maŋgalaŋ
niŋ hiouwɔɔ
5,000,000,000.
La nda soli niŋ ndaŋ la kɛɛ niŋ wa le
Yau o yau cho ma soli ndu nuaa maa Baabuiyo le
TE WAŊNDO DIMI PƐ AA: “Yau puuluaa poonyiaa wo Baabuiyo cho ni.”
-
Vɛɛ ŋ cho yɛ dimi?
-
Yɛɛ chɔm yɛ maa Diom Mɛlɛkaa Baabuiyo cho ni?
SƆƆŊ KULLOŊ
Diom Mɛlɛkaa Baabuiyo cho ni, nduyɛ o tosa mi waŋchieeya kpou wa ndu sɔlaa.
Nyunala miiŋgaa choo laŋ
-
Te ŋ dimi pɛ maa nyina Mɛlɛkaa tosa ni mi puaa apum poonyiaa Baabuiyo, yɛɛ o sim yɛ?
-
Yɛɛ hɛnaŋ yɛ num a mɛɛ waŋnda looku Baabuiyo manda yɛ, mɛɛ kpɛ o cho hiviŋndo yɛ, a mɛɛ kpɛ waŋnda sɔla niŋ ndu yɛ?
-
Te a yiyaŋ pɛ a mɛɛ Mɛlɛka kindiŋ o nɛi o nɛi niŋ ma sɔla yooŋgoo ndɔɔ yɛ, vɛɛ ŋ nɔ yɛ ma che ndu?
CHƆƆLU SƆƆŊ PUM TOFA
Veelu diomndaŋ a bundɛi Baabuiye okɔɔ ma sina mɛɛ nda looku ndu soli o yaula masindɛ laŋ niŋ ma hivi ndu o sɔɔŋ maŋgalaŋ niŋ waalioo yɛ.
“Mɛɛ Naŋ Looku Baabuiyo Sɔla Yɛ” (“Tiondoo!”, Bɛŋgufɔnɔɔ 2007)
Pɛɛku ma sina mɛɛ Baabuiyo looku hiɔlɔŋ simulta bɛndaŋ la yaa mbo wa hau yɛ.
“Bundɛi A Mɛɛ Baabuiyo Looku Fula Leniŋ Yɛ” (Bandu Mɛŋgɛlaa No. 4 2016)
Tofawɔ mɛɛ waŋnda pisi yoomula ndalaŋ le Baabuiyo hivioo yɛ.
A miŋgi niŋ Baabuiyo poonyiaa o yaula cheleŋ choo le teleŋnda bɔɔbɔɔ nduyɛ, a hivi niŋ ndu tau. Lelaŋ, yɛɛ chɔm yɛ maa a siŋga yooŋgu cho leniŋndo le?
“Baa Yooŋgu Mɛlɛkaa Cho Wɔ o Baabuiyo Niŋ Ni ɔɔ Waŋnda Siŋga Niŋ Ndu?” (Kɔ o tɛɛŋgei choo)
a A mɛɛ naŋ cho yaasiaa o Suɛi Lebolii 07 niŋ yɛ, kpaaya Mɛlɛkaa nyina diandaa cho ni.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
