SUƐI LEBOLII 06
Vɛɛ Yoomoo Kanduŋ Yɛ?
“[Mɛlɛka] yɔŋgu yoomoo le nyɛ o nyɛ yoomaa ni.” (Sam 36:9) A laalaŋ pa keŋ? Waŋnda apum yiyaŋ maa wana sina mɛɛ yoomoo kanduŋ yɛ le. Te lende i cho ni, mɛɛ a ba naa naŋ hiŋ ni. Kɛ te o yɔŋ pɛ aa Chɛhowa Mɛlɛka toosiaa yoomoo ni, mɛɛ le sabu o toosiaa ndu ni, lende le? Baabuiyo chɔm naa mɛɛ yoomoo looku kandɔŋ yɛ. a Ŋ yaasiaa wɔ nyɛ o dimi wo, nduyɛ ma che le sabu naŋ nɔ miŋ laalaŋndo.
1. Vɛɛ chieeŋndo a nyɛm cho o halaa niŋndoŋ looku yɛ kandɔŋ?
Baabuiyo dimi aa, “Mɛlɛka toosiaa fondaŋ ndaŋ choo choo a lɛŋ o kandɔŋndo ni.” (Chɛnɛsee 1:1) Wanaa pɛɛku a chieeŋndo okɔɔ wa a bɔɔbɔɔ dimi maa, nyɛm cho o halaa niŋndoŋ a chieeŋndo hoo nɔ teleŋ ŋ kanduŋ ndo. Vɛɛ Mɛlɛka looku yɛ muŋ toosiaa? Nyina diandaa ɔɔ “kpaaya ndɔɔ” o soliŋ kpeku ni le muŋ toosiaa. A ndu o toosiaa chieeŋndo ni, looŋ kundaŋ cho choo choo woŋ, a fondaŋnda cheleŋ o halaa niŋ.—Chɛnɛsee 1:2.
2. Le yɛɛ Mɛlɛka toosiaa yɛ chieeŋndo?
Chɛhowa “toosiaa [chieeŋndo] le mbo wa fonda lakasi lakasi le. Kɛ o toosiaa ndu le mi waŋnda chieeya a wa leniŋ.” (Aisaya 45:18) Mɛlɛka toosiaa chieeŋndo o kɛndɛ kɛndɛ le mi waŋchieeya wa leniŋ lefafɛɛŋ. (Nuawɔ Aisaya 40:28; 42:5.) Wanaa pɛɛku a chieeŋndo okɔɔ wa dimi maa fondaŋ cheleŋ cho maa chieeŋndo hoo le. Lechoo kinɛi wanachioo nɔla ni mbo wa yoomu.
3. Yɛɛ tosa yɛ mi waŋnda chieeya wa teŋgeŋ a visiaa?
Mɛɛ Chɛhowa chii lɛŋndeŋ toosiaa, mbo toosiaa vɛlɛ nyaa yoomaa lechoo. O toosiaa fɛŋ tɔlɔɔlaŋ a visiaa. Okoŋ, “mi Mɛlɛka toosiaa wana chioo maa velaŋ ndɔ.” (Nuawɔ Chɛnɛsee 1:27.) Kɛ yɛɛ tosa yɛ mi waŋnda chieeya wa teŋgeŋ? O velaŋ ndɔɔ niŋ Mɛlɛka toosiaa naa ni. Lelaŋ naŋ nɔ suliŋnda ndɔlaŋ ni mɛɛ kaalaa a sandei cho nuaa yɛ. Mbo ke naa vɛlɛ kɔl kaloo le sɔɔŋ maŋgalaŋ pɛɛkoo, le miŋ che nyɛm kɛndɔŋ, nduyɛ miŋ tuei nyɛchaa yeela. O faŋaŋ o waŋnda chieeya kɔɔli, visiaa nɔ yiyaŋ le Wana Toosiaa naa wo piɛiyo le.
CHƆƆLU YAASIAA
Tofawɔ nyɛ chɔm maa waŋndo toosiaa yoomoo ni wo. Okoŋ, ma che vɛlɛ le sabu kona cho o Baabuiyo niŋ a hei okɔɔ wo cho tonya wo. Yaasiaa wɔ ma sina nyɛ suliŋnda wanachioo nɔ laŋ la pɛɛku naa a Mɛlɛka okɔɔ wo.
4. Waŋndo toosiaa yoomoo ni
Te waŋchieeya tofa pɛ nyaa yoomaa a nyɛm cheleŋ o chieeŋndo niŋ ma toosiaa nyɔɔ pum, mi waŋnda saŋgala nda le nyɛ nda toosiaa koŋ ndo. Mɛɛ nɛɛ nɔ yɛ niko mbo sɔla saŋgalaa le nyɛm nda tofa muŋ ma toosiaa nyɛ wo? Handu VIDUEIYO, okoŋ mi la suukaŋ o nyunaa hoo choo:
-
Yɛɛ wanaa toosiaa nyɛm mapuuloŋ nda nua yɛ le muŋ toosiaa?
Chiɛi o chiɛi fee waŋndo taŋgul ndu ni. Mɛɛ nɛɛ toosiaa yɛ niko nyaa yoomaa a nyɛm cho o chieeŋndo choo woŋ kpou? Nuawɔ Hibuluiya 3:4, okoŋ mi la suukaŋ o nyunalaŋ ndaŋ choo:
-
O nyɛm Mɛlɛka toosiaa woŋ tɛɛŋ kpou, ŋ kuɛɛ hɛnaŋ yɛ num?
-
Baa saboo cho pa le laalaŋndo maa nyɛm cho o halaa niŋndoŋ a muŋ o chieeŋndo choo kpou waŋndo toosiaa muŋ ni? Le yɛɛ ŋ dimi yɛ lende?
A sina pa?
Te a yeema pɛ ma chɔɔlu sina a suɛi hei okɔɔ, tofa buŋgaŋ pum a vidueilaŋ o jw.org o sɔɔŋ lebolloŋ muŋ bɛŋgu “Baa Waŋndo Toosiaa Ndu Ni?” a “Yiyaŋnda Waŋnda Nɔ a Kandɔŋ Yoomoo Okɔɔ Wo.”
“Chiɛi o chiɛi, waŋndo taŋgul ndu ni. Kɛ wana toosiaa nyɔɔŋ kpou wo cho Mɛlɛka ni”
5. Kona cho o Baabuiyo niŋ a kandɔŋ chieeŋndo okɔɔ wo cho tonya
O Chɛnɛsee bolleŋ 1 niŋ, mi Baabuiyo tɛɛsiaa mɛɛ chieeŋndo a yoomoo looku kandɔŋ yɛ. Baa kona koŋ cho pa tonya ɔɔ kona lachoowaa ko o cho ni? Handu VIDUEIYO, okoŋ mi la suukaŋ o nyunalaŋ ndaŋ choo:
-
Baa o palɛi naŋ niilu hei miŋ lɔl le i ŋɔmpum bɛŋgu, Baabuiyo dimi ni maa mi Mɛlɛka toosiaa chieeŋndo?
-
A yiyaŋ pa maa nyɛ Baabuiyo dimi a kandɔŋ chieeŋndo a choo choo okɔɔ wo cho tonya? Le yɛɛ?
Nuawɔ Chɛnɛsee 1:1, okoŋ mi la suukaŋ o nyunaa hoo choo:
-
Wanaa pɛɛku a nyɛm Mɛlɛka toosiaa woŋ okɔɔ wa dimi maa choo choo a chieeŋndo nɔ kandɔŋndo. Vɛɛ nyɛ nda dimi koŋ ndo, a nyɛ Baabuiyo dimi hoo wo chɛlaŋ yɛ?
Mi waŋnda apum yiyaŋ maa nyɛ yoomaa taaniŋndo opum Mɛlɛka toosiaa ni, mbo maŋgaŋ nyaa yoomaa suula yɛ yiaa. Nuawɔ Chɛnɛsee 1:21, 25, 27, okoŋ mi la suukaŋ o nyunalaŋ ndaŋ choo:
-
Baa Baabuiyo dimi pa maa nyɛ yoomaa taaniŋndo opum Mɛlɛka toosiaa ni, mbo maŋgaŋ suuwa, visiaa a waŋchieeya? Ɔɔ, ndupila toosiaa nda kpou a “suulaŋ yɛ yɛ” ni? b
6. Waŋnda chieeya cho teŋgeŋ o nyaa yoomaa Mɛlɛka toosiaa wa tɛɛŋ
Ŋ cho nyɛ pilɛ a visiaa Chɛhowa toosiaa wa le. Nuawɔ Chɛnɛsee 1:26, okoŋ mi la suukaŋ o nyunaa hoo choo:
-
Te Mɛlɛka toosiaa naa pɛ o velaŋ ndɔɔ niŋ, yɛɛ kaalaa a nyɛyii naŋ nɔ ve chɔm yɛ a ndu okɔɔ?
TE WAŊNDO DIMI PƐ AA: “Kona cho o Baabuiyo niŋ a kandɔŋ choo choo vɛlɛ a chieeŋndo okɔɔ wo cho tonya le.”
-
Vɛɛ ŋ cho yɛ dimi? Le yɛɛ?
SƆƆŊ KULLOŊ
Chɛhowa toosiaa choo choo, chieeŋndo, a nyaa yoomaa kpou ni.
Nyunala miiŋgaa choo laŋ
-
Yɛɛ Baabuiyo dimi yɛ a kandɔŋ chieeŋndo vɛlɛ a nyɛm cho o halaa niŋndoŋ okɔɔ?
-
Baa nyɛ yoomaa taaniŋndo opum Mɛlɛka toosiaa ni, mbo maŋgaŋ nyaa yoomaa suula yɛ yiaa ɔɔ ndupila toosiaa nda kpou a suulaŋ yɛ yɛ ni?
-
Yɛɛ tosa yɛ mi waŋnda chieeya wa teŋgeŋ?
CHƆƆLU SƆƆŊ PUM TOFA
Tofawɔ tamaseliiyo a nyaa yoomaa pum le chɔmndo maa waŋndo toosiaa chieeŋndo a nyɛm cho o halaa niŋndoŋ ni.
“Yɛɛ Nyaa Yoomaa a Nyɛm Cheleŋ o Chieeŋndo Choo Pɛɛku yɛ Naa?” (“Tiondoo!”, Tapioo 2006)
Tofawɔ mɛɛ finyaa nɔla mbo tɛɛsial po ndɔ pɔmbɔɔ kona cho o Baabuiyo niŋ a mɛɛ Mɛlɛka toosiaa nyɔɔŋ yɛ.
Tofawɔ ma che te nyɛ waŋnda dimi a kandɔŋ yoomoo okɔɔ wo chɛlaŋ a nyɛ Baabuiyo ndu dimi wo.
“Baa Nyɛ Yoomaa Opilɛ Mɛlɛka Toosiaa Ni Mbo Maŋgaŋ Nyaa Yoomaa Suula Yɛ Yiaa?” (Kɔ o tɛɛŋgei choo)
Wanaa sinaa dɛniaa pɛɛku niŋ a paala nyaa yoomaa sindɛ, nduyɛ ma tosa yaasiaalaŋ lapum le sinaa naa yoomoo kanduŋ nda. Tofawɔ te nyɛ nda saaluŋndo chɔm pɛ maa waŋndo toosiaa yoomoo ni ɔɔ a ba ndɔ o hiŋ ni.
Nyunala Sɔvɛlaŋ La Ŋuɛɛnu a Mɛɛ Yoomoo Kanduŋ yɛ Okɔɔ (buluchiɔɔ)
a Ŋ cho yaasiaa a tuu Mɛlɛka nɔ le waŋnda chieeya wo okɔɔ o suɛi lebolii 25 bɛŋgu.
b Te Baabuiyo dimi pɛ aa “suulaŋ yɛ yɛ”, hei chɔm maa o cho nyɛ yoomaa pilɛ le Mɛlɛka toosiaa le.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
