SUƐI LEBOLII 08
A Nɔla Ma Simnuŋ Chaaŋ o Chɛhowa
Chɛhowa yeema num ma sina ndu nyɛkɛndɛi. Le yɛɛ? Kanifuule o sina maa te a pɛɛku pɛ a suliŋnda ndɔlaŋ okɔɔ, ma sina mɛɛ o bii waŋchieeya yɛ, a nyɛ o yeema le numndo, a cho yeema le simnɔŋndo chaaŋ ndɔ. Baa a nɔla pa ma wa chaaŋ o Mɛlɛka? (Nuawɔ Sam 25:14.) Yɛɛ ŋ nɔ yɛ ma tosa le ma simnuŋ chaaŋ ndɔ? Baabuiyo nɔ mulioo le nyunalaŋ ndaŋ. Nduyɛ, o chɔm naa le sabu chaŋyɛi tosaa a Chɛhowa cho o sɔvɛ mbo hiau nyɛ o nyɛ wo.
1. Chɛhowa yeema num le ma simnuŋ chaaŋ ndɔ
“La sɔɔŋguu Mɛlɛka ikɛi, ndu bɛɛ cho nya sɔɔŋguu ikɛi.” (Chemisi 4:8) Yɛɛ hei sim yɛ? Chɛhowa cho num dimullo le ma simnuŋ chaaŋ ndɔ. Mi apum yiyaŋ maa a nɔla ma simnuŋ chaaŋ o Mɛlɛka le kanifuule, a chi ndu le. Chɛhowa chɔm naa nyɛ o nyɛ naŋ nɔ miŋ sina a suliŋnda ndɔlaŋ okɔɔ o Baabuiyo niŋ, le miŋ sɔɔŋguu ndu ikɛi kpɛɛluŋ. Mi che bɛɛ ŋ chi ndu le, kɛ chaŋyɛi naŋ nɔ a ndu ve nɔla mii kendu poŋ te ŋ wa pɛ diomndaŋ veeloo o Baabuiyo niŋ.
2. Le yɛɛ chaŋyɛi tosaa a Chɛhowa bɛnda yɛ mbo hiau chaŋyɛi kɛ kɛ?
Wana o wana kaala num maa Chɛhowa le. O yeema num ma wa a kɔl kɛndɛ, nduyɛ ma piɛi o ndu lo teleŋ o teleŋ ŋ hau ba pɛ. A nɔla ma ‘nyindul ndu buulaŋnda numndaŋ kpou, kanifuule o buulaŋ le num.’ (1 Pitɛ 5:7) Chɛhowa cho o bɛɛndiaŋ lɔɔlɔɔ le chaaŋaa nduaa malaa a nda dɛɛniaa. Nduyɛ, mbo yaŋ nda nilaŋ nyɛkɛndɛi.—Nuawɔ Sam 94:18, 19.
3. Yɛɛ Chɛhowa yeema yɛ mi chaaŋaa nduaa tosa?
Chɛhowa kaala wana o wana fee. “Kɛ wanaa tosa sɔɔŋ kɛndɔŋ nda” cho chaaŋaa nduaa kpɛɛluŋnda ni. (Pulɔwaa 3:32) Chɛhowa yeema mi chaaŋaa nduaa tosa sɔɔŋ bɛnda ndu o hɔlloŋ, nduyɛ ma faŋaŋ sɔɔŋ wɔɔŋndoŋ tosaa. Mi waŋnda apum yiyaŋ maa a nɔla ma bii sawala ndɔlaŋ kpou le. Kɛ, Mɛlɛka inyiɛɛyo o cho ni. Wana o wana kaala ndu pɛ a kɔllo kpou, nduyɛ mbo kindiŋ le o kɛndɔɔ tosaa, chɛlɔɔ o chɛl ni mbo wa chaaŋ ndɔ.—Sam 147:11; Walta Kiilaa 10:34, 35.
CHƆƆLU YAASIAA
Pɛɛku ma sina nyɛ ŋ nɔ ma tosa le simnɔŋndo chaaŋ o Chɛhowa wo, nduyɛ ma che mɛɛ chaŋyɛi tosaa a ndu bɛnda mbo hiau chaŋyɛi kɛ kɛ yɛ
4. Chaaŋ o Chɛhowa Ebilaham wa ni
Ebilaham ndaa veelu vɛlɛ ni aa Ebilam. Bundɛi cho a ndu okɔɔ o Baabuiyo niŋnde mala naa le sinaa nyɛ naŋ nɔ miŋ tosa le simnɔŋndo chaaŋaa Mɛlɛkaa wa. Veelu diomndaŋ o Chɛnɛsee bolle 12:1-4 a Ebilaham okɔɔ. Okoŋ, mi la suukaŋ o nyunalaŋ ndaŋ choo:
-
Yɛɛ Chɛhowa ndoo dimullɛ Ebilaham le tosaa?
-
Yɛɛ Chɛhowa ndoo dimi yɛ le ndu tosallo?
-
Yɛɛ Ebilaham ndoo tosa yɛ?
5. Nyɛ Chɛhowa yeema mi chaaŋaa nduaa tosa wo
Naa kpou yeema mi chaaŋaa naa tosal naa sɔɔŋ kɛndɔŋ.
-
Sɔɔŋ kɛndɛŋ kuɛɛ num yeema yɛ mi chaaŋaa numnda tosal num?
Nuawɔ 1 Chɔŋ 5:3, okoŋ mi la suukaŋ o nyunaa hoo choo:
-
Yɛɛ Chɛhowa yeema yɛ mi chaaŋaa nduaa tosa?
Le miŋ diikuŋ Chɛhowa, ŋ nɔ miŋ siŋga kaala naalaŋ. Nuawɔ Aisaya 48:17, 18, okoŋ mi la suukaŋ o nyunaa hoo choo:
-
Le yɛɛ Chɛhowa dimullɛ chaaŋaa nduaa le ma mal kaala wɔɔŋndaŋ?
6. Yɛɛ Chɛhowa tosa yɛ le chaaŋaa nduaa?
Mi Chɛhowa mala chaaŋaa nduaa te bahawɛiyo komal nda pɛ. Handu VIDUEIYO, okoŋ mi la suukaŋ o nyunaa hoo choo:
-
Vɛɛ Chɛhowa mala yɛ chua naŋ che hoo o vidueiyo niŋndo le mbo pɛŋgi yiyaŋ wɔɔŋndo a ndupila okɔɔ?
Nuawɔ Aisaya 41:10, 13, okoŋ mi la suukaŋ o nyunalaŋ ndaŋ choo:
-
Buŋgɛi yɛɛ Chɛhowa chuellɛ chaaŋaa nduaa kpou?
-
A yiyaŋ pa maa te a bii pɛ Chɛhowa chaŋyɛi a cho tɔnɔɔ sɔla? Le yɛɛ ŋ dimi yɛ lende?
7. Le waa chaaŋ o Chɛhowa, ŋ nɔ miŋ wa suukaŋndo a ndu
Suukaŋndo nɔla mbo tosa mi chaŋyɛi cho waŋnda tɛɛŋnde i kendu. Nuawɔ Sam 86:6, 11, okoŋ mi la suukaŋ o nyunalaŋ ndaŋ choo:
-
Vɛɛ naŋ suaa yɛ o Chɛhowa lo?
-
Vɛɛ Chɛhowa suaa yɛ o naa lo?
TE WAŊNDO DIMI PƐ AA: “Wana nɔla ma simnuŋ chaaŋ o Mɛlɛka le.”
-
Bolle Baabuile kuɛɛ ŋ soliŋ yɛ kpeku le ndu chɔmndo maa ŋ nɔla miŋ simnuŋ chaaŋ o Chɛhowa?
SƆƆŊ KULLOŊ
Chɛhowa yeema mbo wa chaaŋ num, nduyɛ o cho num mala le ma sɔɔŋguu ndu ikɛi kpɛɛluŋ.
Nyunala miiŋgaa choo laŋ
-
Vɛɛ Chɛhowa mala yɛ chaaŋaa nduaa?
-
Le yɛɛ Chɛhowa dimullɛ chaaŋaa nduaa le ma mal kaala wɔɔŋndaŋ?
-
A yiyaŋ pa maa nyɛ Chɛhowa dimul chaaŋaa nduaa le tosaa wo kendu bɔɔ? Le yɛɛ ŋ dimi yɛ lende?
CHƆƆLU SƆƆŊ PUM TOFA
Vɛɛ chaŋyɛi tosaa a Mɛlɛka siŋga yɛ yoomu numndo?
“Mɛlɛka Naŋ le Sinaa Wo Chɛhowa Cho Ni” (Bandu Mɛŋgɛlaa, Doŋdoŋndo 15, 2003)
Pɛɛku ma sina nyɛ ŋ nɔ ma tosa le simnɔŋndo chaaŋ o Mɛlɛka wo.
Mi chua pilɛ dimi maa chaŋyɛi o tosa a Chɛhowa ve chiindiaa yoomu ndɔɔ ni. Tofawɔ ma che le sabu o dimi lende wo.
Tofa vidueiyo hoo ma tuei nyɛ feleŋguaa apum dimi a Chɛhowa okɔɔ wo.