SUƐI LEBOLII 12
Yɛɛ Cho yɛ Num Mala Ma Hiou Lachi a Baabuiyo Pɛɛkoo?
Wali kɛndɔɔ pila Baabuiyo pɛɛkoo cho ni. Kɛ o wa bɛɛ lende, teleŋndaŋ lapum, mbo wa ikala le ndi tosaa. Lepum, ma yiyaŋ maa a nɔla niŋ ma hiou lachi a Baabuiyo pɛɛkoo le. Le yɛɛ o bɛnda yɛ ma dɔu sɛmbɔɔ le hiouwɔɔ lachi a ndu pɛɛkoo? Yɛɛ mala yɛ num ma tosa hei o yɔŋ bɛɛ mi simultaŋ la wa?
1. Le yɛɛ Baabuiyo pɛɛkoo cho yɛ nyɛ sɔvɛ?
“Diom Mɛlɛkaa cho yoomu, nduyɛ kpaayaa pila o nɔ ni.” (Hibuluiya 4:12) Baabuiyo cho bɔɔ yau sɔvɛ kanifuule, leniŋ Mɛlɛka chɔm naa yiyaŋnda ndɔlaŋ ni vɛlɛ a kaala o nɔ le numndo. O cho ko kɔl kaloo le Baabuiyo mala num ma sɔla le. Kɛ, o nɔla vɛlɛ mbo ke num taasi kpeekpeiyo a tiindaŋndo. Kɛ i hiou kpou ve, Baabuiyo nɔla mbo mala num ma simnuŋ chaaŋ o Chɛhowa. Te a wa pɛ Baabuiyo pɛɛkoo, kpaaya ndɔɔ nɔla mbo mala num tau o yoomoo niŋ.
2. Le yɛɛ o bɛnda yɛ miŋ chua tonya cho o Baabuiyo niŋndo o sɔvɛ?
Tonya cho o Baabuiyo niŋndo cho ko maa nyɛ baa kala. Lelaŋ Baabuiyo dɛɛniaa naa ni maa, naŋ ‘piondu tonyaa,’ nduyɛ ŋ ‘pisi ndu le.’ (Pulɔwaa 23:23) Te ŋ yiyaŋ pɛ a mɛɛ tonya Baabuiyo cho o sɔvɛ yɛ, koŋ mala naa miŋ dɔu sɛmbɔɔ le hiouwɔɔ lachi a ndu pɛɛkoo, o yɔŋ bɛɛ mi simultaŋ la wa.—Nuawɔ Pulɔwaa 2:4, 5.
3. Vɛɛ Chɛhowa mala yɛ num ma hiou lachi a Baabuiyo pɛɛkoo?
Chɛhowa cho Mɛlɛka kpou kpou toosiaa nyɛ o nyɛ fee wo ni. Nduyɛ chaaŋ num o cho ni. Lelaŋ, o yeema mbo mala num ma pɛɛku a ndu okɔɔ. O nɔla mbo tosa ma nɔ “yeemɛi a kpaayaa le hɛnaŋ ndɔɔ tosaa.” (Nuawɔ Filipiaŋnda 2:13.) Le hei, te dialloŋ vi num pɛ le pɛɛkoo ɔɔ le dɔwɔɔ nyɛ ŋ cho pɛɛkoo wo o wali niŋ, o nɔla mbo mala num. Te a yeema pɛ ma chɔɔlu yoomuaŋ sɔla le simultaŋ ɔɔ sɔɔŋ palaŋ biuwɔŋndo, o nɔla mbo ke num maŋ. Wa Chɛhowa nyunaa o piɛileŋ niŋ le num malaa ma hiou lachi a Baabuiyo pɛɛkoo.—1 Tɛsaloniaŋ 5:17.
CHƆƆLU YAASIAA
Pɛɛku ma sina nyɛ mala num ma hiou lachi a Baabuiyo pɛɛkoo wo, o yɔŋ bɛɛ ma wa kpɔndi kpɔndi ɔɔ mi waŋnda simul num. Okoŋ, ma che mɛɛ Chɛhowa bɛɛ mala num ma biunuŋ yɛ.
4. Kɛsi teleŋ ŋ pɛɛku Baabuiyo wo nyɛ tase
Lepum te ŋ hiu pɛ waa kpɔndi kpɔndi, miŋ yiyaŋ maa ŋ nɔ lɛ teleŋ bɔɔ le Baabuiyo pɛɛkoo le. Kɛ yɛɛ mala yɛ naa? Nuawɔ Filipiaŋnda 1:10, okoŋ mi la suukaŋ o nyunalaŋ ndaŋ choo:
-
Sɔɔŋ kuɛɛ ŋ yiyaŋ yɛ maa muŋ hiou wa ŋ “sɔvɛ” o yoomoo niŋ?
-
Vɛɛ ŋ kɛsi yɛ teleŋ ŋ pɛɛku Baabuiyo wo nyɛ tase?
-
Te a dɔu fɛŋ pɛ siooŋnde o kpɛiyo niŋ, poutaŋ la chuu lɛ luɛiyɔɔ le
-
Kɛ te a dɔu fɛŋ pɛ poutaŋ, a sɔla niko fondaa le siooŋnde dɔwɔɔ chalaŋ. Mɛɛ lende koni i cho ni, te a kɛsi pɛ “sɔɔŋ hiou wa ŋ sɔvɛ woŋ” nyɛ tase o yoomu numndo niŋ, a nɔla ma chii a muŋ okoŋ, ma sɔla vɛlɛ teleŋndo le ŋ cheleŋ tosaa
Te ŋ wa pɛ Baabuiyo pɛɛkoo, ŋ nɔla miŋ nɔ kɔl hiniaa wana sɔla le Mɛlɛka sinaa a ndu piɛiyo wo. Nuawɔ Maatiu 5:3, okoŋ mi la suukaŋ o nyunaa hoo choo:
-
Tɔnɔ yɛɛ naŋ sɔla yɛ te ŋ kɛsi pɛ teleŋ naŋ pɛɛku Baabuiyo wo nyɛ tase?
5. Hiou lachi a pɛɛkoo o yɔŋ bɛɛ mi waŋnda simul num
Teleŋndaŋ lapum, mi waŋnda kindiŋ le naa kuunaa Baabuiyo pɛɛkoo. Tofawɔ tamaselii Filaŋsiko wo. Handu VIDUEIYO, okoŋ mi la suukaŋ o nyunalaŋ ndaŋ choo:
-
O vidueiyo hoo niŋ, yɛɛ chaaŋaa Filaŋsiko wa a yuŋgu ndɔɔ tosa yɛ, mɛɛ o dimul nda a nyɛ o wa pɛɛkoo wo okɔɔ?
-
Tɔnɔ yɛɛ o sɔla yɛ le hiouwɔɔ lachi a pɛɛkoo?
Nuawɔ 2 Timoti 2:24, 25, okoŋ mi la suukaŋ o nyunalaŋ ndaŋ choo:
-
Vɛɛ yuŋgu numndo a chaaŋaa numnda yiyaŋ yɛ a nyɛ ŋ cho pɛɛkoo wo okɔɔ?
-
A mɛɛ bolle Baabui leŋ le dimi yɛ, yɛɛ ŋ nɔ yɛ ma tosa te waŋndo simul num pɛ le mɛɛ ŋ cho Baabuiyo pɛɛkoo yɛ? Le yɛɛ ŋ dimi yɛ lende?
6. Tiindaŋ Chɛhowa le mbo mala num
Mɛɛ naŋ sɔɔŋguu Chɛhowa ikɛi fau, lende koni yeemɛi naŋ nɔ le ndu kɔllo nɛŋioo ve hiau lachi ni. Kɛ o wa bɛɛ lende, lepum miŋ che ndi ikala kpoke le yoomu naa biyɔɔ mɛɛ o yeema yɛ. Te o yɔŋ pɛ maa lende ŋ yiyaŋ teleŋndaŋ lapum ni, mɛɛ wu ŋdial te. Chɛhowa cho num mala. Handu VIDUEIYO, okoŋ mi la suukaŋ o nyunalaŋ ndaŋ choo:
-
O vidueiyo hoo niŋ, siŋgaŋnda yɛɛ Jim ndoo tosa yɛ le Chɛhowa kɔllo nɛŋioo?
-
Yɛɛ hɛnaŋ yɛ num a tamasi ndɔɔ?
Nuawɔ Hibuluiya 11:6, okoŋ mi la suukaŋ o nyunalaŋ ndaŋ choo:
-
Yɛɛ Chɛhowa cho yɛ tosa le “wanaa cho ndu nuuviaa wa,” ɔɔ wanaa cho kindiŋndo kpoke le ndu sinaa nduyɛ ma nɛŋi ndu kɔllo wa?
-
A mɛɛ bolle Baabuileŋ ndeŋ le chɔm yɛ, vɛɛ kɔllo wa yɛ Chɛhowa te o che num pɛ kindiŋndo le Baabuiyo pɛɛkoo?
TE WAŊNDO NYUNA PƐ AA: “Le yɛɛ ŋ cho yɛ Baabuiyo pɛɛkoo?”
-
Vɛɛ ŋ cho yɛ muli?
SƆƆŊ KULLOŊ
Mi che bɛɛ i ve lepum bɛɛŋ bɛɛŋ le Baabuiyo pɛɛkoo le, kɛ o mala num ma tuei yoomoo yeela lefafɛɛŋ. Hiou lachi a Chɛhowa tiindaŋndo, o cho num fandaa ke.
Nyunala miiŋgaa choo laŋ
-
Le yɛɛ tonya cho o Baabuiyo niŋndo cho yɛ o sɔvɛ le num?
-
Yɛɛ mala yɛ num ma kɛsi “sɔɔŋ hiou wa ŋ sɔvɛ woŋ” nyɛ tase?
-
Le yɛɛ ŋ nɔ yɛ ma nyuna Chɛhowa le mbo mala num, ma hiou lachi a Baabuiyo pɛɛkoo?
CHƆƆLU SƆƆŊ PUM TOFA
Nuawɔ sɔɔŋ ŋ hiɔɔlu, ŋ mala niŋ hau wanaa bɔɔbɔɔ le ma soliŋ teleŋ ndaa kpeku a taasi wo.
“Mɛɛ Ŋ Soliŋ Teleŋ Numndo Kpeku a Taasi Yɛ” (Tiondoo!”, Doŋdoŋndo 2014)
Tofawɔ mɛɛ Chɛhowa mala chua pilɛ, o pɔnɔ ndɔ wa kindiŋndo le ndu kuunaa hɛnaŋ Mɛlɛkaa tosaa wo yɛ.
Pɛɛku wɔ ma sina mɛɛ po pilɛ sɔla tɔnɔɔ o biuwɔŋ laa ndɔ wo niŋ yɛ.
Mi waŋnda baa lepum Seiyaa Chɛhowaa suɛi maa nda kei yuŋgulaŋ pesioo ni. Baa keŋ cho pa tonya?
“Baa Yuŋgulaŋ Seiyaa Chɛhowaa Kei Pesioo Ni ɔɔ Malaa Nda Mala Ni le Mi La Sim?” (Kɔ o tɛɛŋgei choo)
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
