SUƐI LEBOLII 15
Nɛɛnɛ Cho yɛ Chiisu?
O wanaa fula tɔɔ o chieeŋndo choo wa tɛɛŋ, Chiisu cho waŋndo opilɛ. Kɛ diola ndɔlaŋ koni wanaa bɔɔbɔɔ sina ni. A sina wana suu kpeekpei o cho wo le. Wanaa bɔɔbɔɔ nɔ yiyaŋnda yɛ yɛlaŋ a Chiisu okɔɔ. Yɛɛ Baabuiyo dimi yɛ a ndu okɔɔ?
1. Nɛɛnɛ cho yɛ Chiisu?
Maalikɛinɔ kpaaya bɛndoo pila Chiisu cho o choo choo niŋ ni. Ndu cho Po tase Chɛhowaa ni. Kanifuule, Baabuiyo dimi maa “ndu fɛlɛŋ Mɛlɛka toosiaa a nyɛ o nyɛ fee.” (Koloosiaŋnda 1:15) Baabuiyo veelu Chiisu aa “Mɛlɛka Po ndɔ pilɔɔ kpe” kanifuule, Chɛhowa pila toosiaa ndu ni. (Chɔŋ 3:16) Chiisu wa Chɛhowa Finya ndɔ ikɛi, mbo mala ndu ma toosiaa nyɛm cheleŋndoŋ kpou. (Nuawɔ Pulɔwaa 8:30.) O cho chaŋyɛi kpɛɛluŋnde tueiyɔɔ yeela a Chɛhowa. Ndu Baabuiyo veelu ni aa “Diomndo” ɔɔ sondo suaa Mɛlɛka wo. Kanifuule, ndu hivul waŋnda yooŋgu Mɛlɛkaa ni.—Chɔŋ 1:14.
2. Le yɛɛ Chiisu ndoo hiŋ yɛ o chieeŋndo choo?
O hiou niŋ wɔsilaŋ 2,000 chɔŋ a teleŋ Chɛhowa tosa kaamaa wo. Mbo soliŋ nyina ndɔ diandaa kpeku le yoomu Chiisu wo hivioo o dembe yufuaanɔ pilɛ niŋ diolaŋ aa Meele. Mɛɛ o nɛiyo hoo choo Chiisu veluŋ o chieeŋndo choo ni. (Nuawɔ Luku 1:34, 35.) Mi Chiisu huŋ o chieeŋndo choo le mbo wa Mɛsayanɔɔ ɔɔ Kiliti. Nduyɛ, ndu Mɛlɛka vem le waŋnda chieeya piŋioo ni. a Nyɛ o nyɛ Baabuiyo dimi a Mɛsayanɔɔ okɔɔ, mbo peeluŋ o ndu niŋ. Hei tosa ni mi waŋnda sina maa Chiisu “cho Kiliti ni, Po Mɛlɛka cho yoomu wo.”—Maatiu 16:16.
3. Kuɛɛnɛ Chiisu cho yɛ niŋ suŋ suŋ?
Mɛɛ Chiisu sɔla piɔmndo, mi Mɛlɛka miŋgi ndu yoomu a dialuŋ inyinayaŋ, okoŋ mbo miiŋgu choo choo. Mɛɛ o miiŋgu loŋ, “mi Mɛlɛka heelu ndu tema mbo hiau bɛɛ maa paandu.” (Filipiaŋnda 2:9) Suŋ suŋ niŋ, foofo Chiisu nɔ wo cho foofo bɛɛŋ bɛɛŋ te. Kanifuule, te Chɛhowa faŋaŋ pɛ, ndu cho wana diiŋ ndɔɔ ni.
CHƆƆLU YAASIAA
Chɔɔlu pɛɛku ma sina wana Chiisu cho kpeekpeiyo, a sabu i cho suɛi sɔvɛ le pɛɛkoo a ndu okɔɔ wo.
4. O cho Chiisu le cho Mɛlɛka Kpaaya Kpou Kpou Wo le
Baabuiyo pɛɛku naa maa, mi che bɛɛ maalikɛinɔ kpaaya bɛndoo pila Chiisu cho o choo choo niŋ ni, kɛ Chɛhowa cho Mɛlɛka ndɔɔ a Finya ndɔ ni. Nduyɛ, ndu o ba bɛŋgu o cho ni. Le yɛɛ naŋ dimi yɛ lende? Handu VIDUEIYO le ma che teŋgeŋ Baabuiyo chɔm Mɛlɛka kpou kpou wo tɛɛŋ nda Chiisu wo.
Bolii Baabuiye hei mala naa le sinaa teŋgeŋ cho Chɛhowa tɛɛŋ nda Chiisu wo. Veelu diomndaŋ o bolle Baabuile kɛ kɛ niŋ okoŋ, mi la suukaŋ o nyunala cho lebɛŋgu laŋ choo:
Nuawɔ Luku 1:30-32.
-
Vɛɛ maalikɛinɔɔ tɛɛsiaa yɛ teŋgeŋ cho Chiisu tɛɛŋ nda Chɛhowa, “Mɛlɛka Bɛndoo” wo?
Nuawɔ Maatiu 3:16, 17.
-
Mɛɛ Chiisu sɔla yiŋɔɔ, yɛɛ diom fula choo choo wo ndoo dimi yɛ?
-
O yiyaŋ numndo niŋ, diom nɛɛnɛ wa yɛ koŋ?
Nuawɔ Chɔŋ 14:28.
-
Finyaa nda poleŋ, nɛɛ cho yɛ kaasoŋnɔɔ? Nduyɛ nɛɛ hiou yɛ chaaŋ ndɔ kpaaya?
-
Mi Chiisu veelu Chɛhowa aa, “Finya nuu.” Yɛɛ keŋ cho yɛ naa pɛɛkoo?
Nuawɔ Chɔŋ 12:49.
-
Baa Chiisu yiyaŋ pa maa foofo pilɔɔ nda nɔ nda Finya ndɔ ni? Vɛɛ num yiyaŋ yɛ?
5. Yɛɛ chɔm yɛ maa Chiisu wa Mɛsayanɔɔ ni?
Baabuiyo nɔ huuloŋ tau a Mɛsayanɔɔ okɔɔ. Huuloŋ muŋ mala waŋnda ni le sinaa wana wa Mɛsayanɔɔ wo. Koŋ cho ni, wana Mɛlɛka hɛli le waŋnda chieeya piŋioo wo. Handu VIDUEIYO le ma che huuluŋ Chiisu peelu woŋ ŋ tiŋ, mɛɛ o hiŋ o chieeŋndo choo.
Veelu diomndaŋ o Baabuiyo niŋ a huuloŋ muŋ okɔɔ okoŋ, mi la suukaŋ o nyunala cho lebɛŋgu laŋ choo:
Nuawɔ Maika 5:2 le sinaa naa Mɛsayanɔɔ ndoo nɔ mbo veluŋ nda. b
-
Baa mi violɔŋ Chiisu wo ndoo peelu pa huuluei hei?—Maatiu 2:1.
Nuawɔ Sam 34:20 a Sɛkalaya 12:10 le sinaa sɔɔŋ muŋ dimiŋ a Mɛsayanɔɔ okɔɔ woŋ.
-
Baa mi huuloŋ muŋ peeluŋ pa?—Chɔŋ 19:33-37.
-
A yiyaŋ pa maa Chiisu pila tosa ni mi huuloŋ muŋ peeluŋ?
-
Yɛɛ hei pɛɛku yɛ num a Chiisu okɔɔ?
6. Te ŋ pɛɛku pɛ a Chiisu okɔɔ miŋ sɔla tɔnɔɔ
Baabuiyo dimi maa i cho bɔɔ suɛi sɔvɛ le miŋ pɛɛku a Chiisu okɔɔ, vɛlɛ a wali Mɛlɛka ke ndu le tosaa wo. Nuawɔ Chɔŋ 14:6 a 17:3, okoŋ mi la suukaŋ o nyunaa hoo choo:
-
Le yɛɛ o bɛnda yɛ miŋ pɛɛku a Chiisu okɔɔ?
Chiisu kumbul naa nɛiyo ni le miŋ simnuŋ chaaŋaa Mɛlɛkaa. Ndu pɛɛku naa tonyaa a Chɛhowa okɔɔ ni, nduyɛ o ndu niŋ naŋ sɔla yoomu fafɛɛŋndo ni
TE WAŊNDO DIMI PƐ AA: “Seiyaa Chɛhowaa laalaŋ o Chiisu niŋ te.”
-
Vɛɛ ŋ cho yɛ muli?
SƆƆŊ KULLOŊ
Maalikɛinɔ kpaaya bɛndoo pila Chiisu cho ni. Ndu cho Po Mɛlɛkaa ni, nduyɛ ndu cho vɛlɛ Mɛsayanɔɔ ni.
Nyunala miiŋgaa choo laŋ
-
Le yɛɛ Baabuiyo veelu yɛ Chiisu aa Po tase Mɛlɛkaa?
-
Tuupa mi Chiisu huŋ o lɛŋndeŋ choo, wali yɛɛ ndoo tosa yɛ?
-
Vɛɛ naŋ looku yɛ sina maa Chiisu cho Mɛsayanɔɔ ni?
CHƆƆLU SƆƆŊ PUM TOFA
Chɔɔlu pɛɛku a sɔɔŋ chɔm maa Chiisu cho Mɛsayanɔɔ ni woŋ okɔɔ.
“Baa Huuluŋ Dimiŋ a Mɛsayanɔɔ Okɔɔ Woŋ Chɔm Pa Maa Chiisu Cho Mɛsayanɔɔ Ni?” (Kɔ o tɛɛŋgei choo)
Yaasiaa wɔ ma sina te mi Baabuiyo pɛɛku maa, mɛɛ waŋnda chieeya vialu chuauwa yɛ koni Mɛlɛka simnuŋ finyaa Chiisu ni.
“Le Yɛɛ Nda Veelu yɛ Chiisu aa Po Mɛlɛkaa?” (Kɔ o tɛɛŋgei choo)
Yaasiaa wɔ ma sina le sabu pɛɛku Mɛlɛkaa yaa wo cho o Baabuiyo niŋ te wo.
“Baa Mɛlɛka Chiisu Cho Ni?” (Bandu Mɛŋgɛlaa, Nyaakuɛiyo 1, 2009)
Veelu diomndaŋ ma sina mɛɛ chua pilɛ siŋga yoomu ndɔɔ yɛ, mɛɛ o yaasiaa nyɛ Baabuiyo dimi a Chiisu okɔɔ wo.
“Chua Chuunɔɔ Tɛɛsiaa le Sabu O Siŋga Laalaŋ Ndɔɔ Wo” (“Tiondoo!”, Bukuloo 2013)
a Suɛi lebolii 26 a 27 cho naa tɛɛsial le sabu waŋnda chieeya yeema wana piŋiaa wo, nduyɛ miŋ che mɛɛ Chiisu piŋi naa yɛ.
b Tofa Diomnda Chɔɔlaala 2 le sinaa huului dimiŋ a teleŋ kpeekpei Chiisu ndoo nɔ le hunɔɔ o lɛŋndeŋ choo wo okɔɔ.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
