SUƐI LEBOLLE 19
Baa Seiyaa Chɛhowaa Cho Kilisiɔŋaa Tonyaa Ni?
Naa Seiyaa Chɛhowaa, ŋ laalaŋ maa naŋ cho Kilisiɔŋaa tonyaa ni. Le yɛɛ? Tofawɔ nyɛ laalaŋnda naalaŋ la tɔlnuŋ choo wo, le sabu naŋ nɔ diola teŋgeŋ ndaŋ ndo vɛlɛ a kaala cho naa tɛɛŋ vellaa velle wo.
1. O yɛɛ choo laalaŋnda Seiyaa Chɛhowaa la tɔlnuŋ yɛ?
Mi Chiisu dimi aa: “Diom [Mɛlɛkaa], ndu cho tonyaa ni.” (Chɔŋ 17:17) Maa Chiisu, naa Seiyaa Chɛhowaa bɛɛ, o Diom Mɛlɛkaa choo laalaŋnda naalaŋ la tɔlnuŋ ni. Tofawɔ mɛɛ bundɛi nɛi chɔm hei yɛ. O wɔsiŋ 1,900 mɛɛlulaŋ, mi sukuwaa pɛɛkaa Baabuiya kandu Baabuiyo yaasiaa. O nyɛ o dimi wo cho ndaa tual laalaŋnda ndalaŋ ni, kɛ o cho o nyɛ kaaŋii cheleŋnde wa pɛɛkoo wo choo le. Ma kandu pɛŋ waŋnda tonya nda saaluŋ o Baabuiyo niŋndo pɛɛkoo. a
2. Le yɛɛ naŋ nɔ yɛ diolaŋ aa Seiyaa Chɛhowaa?
Chɛhowa pila veelu wanaa cho ndu piɛiyo wa ni aa seiyaa niaa. Kanifuule, nda dimul waŋnda tonya cho a ndu okɔɔ wo ni. (Hibuluiya 11:4–12:1) Le tamaseliiyo, o sindɔɔ niŋ, mi Mɛlɛka dimul wanaa nduaa aa: “Nya cho seiyaa niaa ni.” (Nuawɔ Aisaya 43:10.) Baabuiyo veelu Chiisu aa: “Sei Tonyaa.” (Sɔɔŋ Chɔɔmaŋndoŋ 1:5) Lelaŋ, a wɔsi 1931, miŋ sɔla diolaŋ aa Seiyaa Chɛhowaa. Ŋ naŋ bɔɔ kɔl le mɛɛ diolaŋ ndaŋ la cho naa choo yɛ.
3. Vɛɛ Seiyaa Chɛhowaa tuallɛ tamasi Chiisu wo kɔɔli le kaalaa chɔmndo?
Chiisu ndoo kaala bɔɔ buɛiyaa nduaa. Le hei, mbo chua nda pɛŋ maa yuŋgu pilɔɔ nda cho ni. (Nuawɔ Maki 3:35.) Seiyaa Chɛhowaa bɛɛ, yuŋgu nɔ diompilɔɔ o chieeŋndo choo kpou wo nda cho ni. Lelaŋ naŋ veelaŋ ni aa puaapiliaa a ndepiliaa. (Filimɔŋ 1, 2) Miŋ diikuŋ vɛlɛ nyɛ Baabuiyo dimi hoo wo. Ndu cho ni, “La kaala puaapiliaa nyaa kpou.” (1 Pitɛ 2:17) Mi Seiyaa Chɛhowaa chɔm kaalaa hoo o nɛila bɔɔbɔɔ niŋ. Le tamaseliiyo, miŋ mala chaaŋaa naa laalaŋnda chieeŋndo balɔɔ silɔ te a wa pɛ o bahawɛiyo niŋ.
CHƆƆLU YAASIAA
Tofawɔ bundɛi a Seiyaa Chɛhowaa okɔɔ, le ma chɔɔlu sina maa naŋ cho Kilisiɔŋaa tonyaa ni.
O Baabuiyo choo Kilisiɔŋaa tonyaa tɔl laalaŋnda ndalaŋ ni, nduyɛ ma pɛɛku waŋnda tonya cho leniŋ ndo
4. O Baabuiyo choo laalaŋnda naalaŋ la tɔlnuŋ ni
Mi Chɛhowa dimi maa waŋnda cho tonya Baabuiyo sina. Nuawɔ Daaniɛɛ 12:4, okoŋ mi la suukaŋ o nyunaa hoo choo:
-
Yɛɛ Mɛlɛka dimi yɛ maa wanaa nduaa cho “sɔla . . . tau tau” te a wa pɛ hiouwɔɔ lachi a Baabuiyo pɛɛkoo?
Tofawɔ ma che mɛɛ Chaas Lɔɔsɛl nda chaaŋaa nduaa sukuwaa pɛɛkaa Baabuiya ndaa pɛɛku Diom Mɛlɛkaa yɛ. Handu VIDUEIYO, okoŋ mi la suukaŋ o nyunaa hoo choo:
-
O vidueiyo hoo niŋ, vɛɛ Ŋgɔɔ Lɔɔsɛl nda chaaŋaa nduaa ndaa pɛɛku yɛ Baabuiyo?
A sina pa?
Ŋ siŋga niŋ laalaŋnda naalaŋ latiŋ a teleŋndaŋ lapum. Le yɛɛ? Kanifuule, mɛɛ paaleŋ le sia nuaa idii mi nyɔɔ kuɛ a teŋgaa o pɔmpɔmbɔ yɛ, lende koni Mɛlɛka mala naa ni miŋ bii Diom ndɔɔ bila o pɔmpɔmbɔ. (Nuawɔ Pulɔwaa 4:18.) Mi che bɛɛ tonya cho o Baabuiyo niŋndo siŋgaŋ te, kɛ lepum miŋ siŋga mɛɛ naŋ bii sɔɔŋ pum bila yɛ, te ŋ chɔɔlu pɛ sinapɛŋgoo sɔla a muŋ okɔɔ o Baabuiyo niŋ.
5. Miŋ tosa nyɛ diola naalaŋ la sim ndo
Le yɛɛ naŋ nɔ yɛ diolaŋ aa Seiyaa Chɛhowaa? Handu VIDUEIYO, okoŋ mi la suukaŋ o nyunaa hoo choo:
-
Le yɛɛ diolaŋ ndaŋ Seiyaa Chɛhowaa la bɛnda yɛ a wanaa Mɛlɛkaa?
Le yɛɛ Chɛhowa hɛli yɛ waŋnda le ma wa Seiyaa nduaa? Le ma tosa mi wana o wana sina maa ndu cho Mɛlɛka tonyaa ni. Kanifuule, waŋnda cho hau choola bɔɔbɔɔ dimioo a ndu okɔɔ. Tofawɔ tamaseliilaŋ la tiɔɔŋ a choolaŋ ndaŋ okɔɔ.
Mi piɛiye ipum pɛɛku wanaa ndaa maa Mɛlɛka yeema nda ma soliŋ piɔmnda kpeku le ndu piɛiyo. Kɛ, nuawɔ Lɛvitikɔɔ 26:1, okoŋ mi la suukaŋ o nyunalaŋ ndaŋ choo:
-
Yɛɛ cho yɛ tonyaa o hei niŋ? Vɛɛ Chɛhowa yiyaŋ yɛ a piɔmnda?
Simlachiaa lepiɛiya apum pɛɛku maa Chiisu cho Mɛlɛka ni. Kɛ, nuawɔ Chɔŋ 20:17, okoŋ mi la suukaŋ o nyunalaŋ ndaŋ choo:
-
Yɛɛ cho yɛ tonyaa o hei niŋ? Baa Mɛlɛka ndu koni cho vɛlɛ Chiisu ni?
-
Vɛɛ kɔllo cho yɛ num le sinaa maa Chɛhowa vem Seiyaa nduaa le ma dimul waŋnda tonyaa a ndupila vɛlɛ a Po ndɔɔ okɔɔ?
6. Ŋ nɔ kaalaa naapila tɛɛŋ
Baabuiyo tuu Kilisiɔŋnda a faluŋ yɛ yiɔɔŋ o dialuŋ wanachioo niŋ. Nuawɔ 1 Kɔliŋtiaŋ 12:25, 26, okoŋ mi la suukaŋ o nyunalaŋ ndaŋ choo:
-
Yɛɛ Kilisiɔŋaa tonyaa nɔ yɛ ma tosa, te a che pɛ chaaŋaa ndaa laalaŋnda o saŋgaa niŋ?
-
O nɛila kuɛɛ choo ŋ che yɛ niŋ kaala cho Seiyaa Chɛhowaa tɛɛŋ ndo?
Te kpundɔɔ komal pɛ Seiyaa Chɛhowaa o lɛŋnde cheleŋ niŋ, mi chaaŋaa ndaa laalaŋnda chieeŋndo balɔɔ silɔ keleŋa yɔŋgɔŋ le nda malaa. Le tamaseliiyo chɔɔ a hei okɔɔ, handu VIDUEIYO. Okoŋ mi la suukaŋ o nyunaa hoo choo:
-
Vɛɛnɛ mala Seiyaa Chɛhowaa yɔŋgu chaaŋaa ndaa laalaŋnda wo chɔm yɛ kɛsɛ maa, kaalaa cho nda tɛɛŋ?
Mi Kilisiɔŋaa tonyaa chɔm wanaa cho o bahawɛiyo niŋnda kaalaa
TE WAŊNDO DIMI PƐ AA: “Kaaŋnde sɛnɛileŋ Seiyaa Chɛhowaa cho ni.”
-
Teleŋ kuɛɛ Chɛhowa kandu yɛ buɛiyaa nduaa veeloo maa Seiyaa nduaa nda cho ni?
SƆƆŊ KULLOŊ
Seiyaa Chɛhowaa cho Kilisiɔŋaa tonyaa ni. Chieeŋndo balɔɔ silɔ, yuŋgu pilɔɔ kpe naŋ cho ni, nduyɛ o Baabuiyo choo laalaŋnda naalaŋ la tɔlnuŋ ni. Miŋ chɔm vɛlɛ waŋnda tonyaa a Chɛhowa okɔɔ.
Nyunala miiŋgaa choo laŋ
-
Le yɛɛ naŋ nɔ yɛ diolaŋ aa Seiyaa Chɛhowaa?
-
Vɛɛ naŋ biinaŋ yɛ vellaa velle?
-
A yiyaŋ pa maa Seiyaa Chɛhowaa cho Kilisiɔŋaa tonyaa ni?
CHƆƆLU SƆƆŊ PUM TOFA
Chɔɔlu pɛɛku a bundɛi nɛi okɔɔ.
Seiyaa Chɛhowaa—Laalaŋ Ndaa Cho Wallo, Pɛl 1: A Fula o Nyumndaŋ Niŋ (1:00:53)
Tofawɔ tamaseliiyo ma che mɛɛ Seiyaa Chɛhowaa chɔɔmuu niŋ pɛɛkula lachoowalaŋ yɛ.
Tofawɔ mulilaŋ le nyunala ŋ nɔ a Seiyaa Chɛhowaa okɔɔ laŋ.
“Nyunala Waŋnda Nyuna Lɔɔlɔɔ a Seiyaa Chɛhowaa Okɔɔ Laŋ” (Kɔ o tɛɛŋgei choo)
Mi Stiiviŋ del chaaŋaa nduaa choo le wanaa nda tul leyɛ wa sɔɔŋ wɔɔŋ wɔɔŋndoŋ tosallo. Tofawɔ nyɛ o che Seiyaa Chɛhowaa tɛɛŋ mbo siŋga yoomu ndɔɔ wo.
“Yoomu Nuu Wa Hiouwɔɔ Lachi a Lakasiaŋndo” (Bandu Mɛŋgɛlaa, Suɛɛsɔɔ 1, 2015)
a Chɔŋ a wɔsi 1879, mi wanaa Chɛhowaa kandu Bandu Mɛŋgɛlaa solioo le nyɛ cho o Baabuiyo niŋndo tɛɛsiaa.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
