SUƐI LEBOLII 24

Nɛɛ Yaa Cho yɛ Maalikɛiya?

PILEI

Chɛhowa yeema naa miŋ pɛɛku a yuŋgu ndɔ cho o choo choo niŋndo okɔɔ. Maalikɛiya bɛɛ cho o yuŋgoo hoo niŋ. Baabuiyo veelu nda aa “chuauwaa Mɛlɛkaa.” (Choobu 38:7, NWT) Yɛɛ Baabuiyo pɛɛku yɛ naa a maalikɛiya okɔɔ? Yɛɛ nda tosallɛ waŋnda? Baa maalikɛiya kpou cho o yuŋgu Mɛlɛkaa niŋ ni?

1. Nɛɛ yaa cho yɛ maalikɛiya?

Chɛhowa toosiaa fɛŋ maalikɛiya tuupa mbo toosiaa chieeŋndo. O choo choo niŋ nda cho ni. Nda bɛɛ dialuŋ inyinayaŋ nda nɔ ni maa Chɛhowa. (Hibuluiya 1:14) Maalikɛiya cho o miiliɔŋndaŋ niŋ nduyɛ, o kɛ kɛ nɔ suliŋndo o ndɔɔ. (Sɔɔŋ Chɔɔmaŋndoŋ 5:11) Ma “tosa nyɛ [Chɛhowa] hɛnaŋndo nduyɛ ma tuei ndu diom.” (Sam 103:20) O sindɔɔ niŋ, mi Chɛhowa ndoo vem maalikɛiya a yooŋgu ndɔɔ. Mi ndoo yɔŋ nda vɛlɛ le wanaa nduaa malaa a nda piŋioo. Te Kilisiɔŋnda wa pɛ yooŋgu kɛndɔɔ dimioo, mi maalikɛiya mala nda ma saaluŋ wanaa yeema pɛɛkoo a Mɛlɛka okɔɔ wa.

2. Nɛɛ cho yɛ Setana, nduyɛ nɛɛ yaa cho yɛ nyinaa nduaa wɔɔŋnda?

Mi maalikɛiya apum mal Chɛhowa piɛiyo. Maalikɛinɔ tase simul ndu wo cho Setana, “wana tɛɛmbuu chaanda tɔɔ wo ni. Ndu cho waŋnda o chieeŋndo niŋ kpou huiyo ni.” (Sɔɔŋ Chɔɔmaŋndoŋ 12:9) Setana ndoo yeema mbo simnuŋ masa. Le hei, mbo hui wanaa tasiaa Mɛlɛka toosiaa wa a maalikɛiya apum le ma tol ndu kɔɔli ma simul Mɛlɛka. Maalikɛiyaa simul kaŋ Mɛlɛka wa nda veelu ni aa nyinaa wɔɔŋnda. Mi Chɛhowa soli nda o choo choo niŋ mbo mal nda lɛŋ. Nduyɛ a cho hunɔɔ tambei sɔla.—Nuawɔ Sɔɔŋ Chɔɔmaŋndoŋ 12:9, 12.

3. Vɛɛ Setana nda nyinaa nduaa wɔɔŋnda kindiŋ yɛ le naa huiyo?

Mi Setana a nyinaa nduaa wɔɔŋnda soliŋ nɛila yɛ yɛlaŋ kpeku le wanaa bɔɔbɔɔ huiyo. Nɛilaŋ ndaŋ waŋnda kei ni le suukaŋndo a nyinaa wɔɔŋnda. Le tamaseliiyo, te suɛi pum komal pɛ waŋnda, ma kuɛ o wana yawaa lo, wana maŋgalaa, mandenɔɔ, a choomanɔɔ. Mi apum luei vɛlɛ balaŋ o dandala chiɛɛliaŋ a nyinaa wɔɔŋnda laŋ niŋ. Mi Setana hui vɛlɛ waŋnda le ma laalaŋ maa a tiuba ma suukaŋ a waŋvilɛiya. Kɛ Chɛhowa sila naa aa, “La kua o wanaa waŋvilɛiya lo nduyɛ a o mandiaa lo, le nya layawa vim te.” (Lɛvitikɔɔ 19:31) O ke naa silaa hoo le naa mandaa yɔŋii Setana a nyinaa nduaa wɔɔŋnda yɔŋ naa nyɛ. Yaamɔɔwaa Mɛlɛkaa nda cho ni nduyɛ, a yeema ma paaliaŋ naa.

CHƆƆLU YAASIAA

Pɛɛku ma sina sɔɔŋ kɛndɛŋ maalikɛiya tosa woŋ, a kpundɛla cho le balaŋ lueiyo o walta nyinaa wɔɔŋnda niŋndo. Okoŋ, ma che mɛɛ naŋ mandaŋ a Setana vɛlɛ a nyinaa nduaa wɔɔŋnda yɛ.

4. Mi maalikɛiya mala waŋnda ma pɛɛku a Chɛhowa okɔɔ

Maalikɛiyaa Mɛlɛkaa pila fula waŋnda o hɔl le nda yooŋgu kɛndɔɔ dimullo le. Kɛ ma mala wanaa Mɛlɛkaa le ma saaluŋ wanaa yeema pɛɛkoo a ndu okɔɔ wa. Nuawɔ Sɔɔŋ Chɔɔmaŋndoŋ 14:6, 7, okoŋ mi la suukaŋ o nyunalaŋ ndaŋ choo:

Le yɛɛ naŋ yeema yɛ mi maalikɛiya mala naa le yooŋgu kɛndɔɔ dimioo?
Baa hei dɛɛniaa num pa kɔllo le sinaa maa, mi maalikɛiya mala num le saalɔŋndo wanaa yeema Baabuiyo pɛɛkoo wa? Le yɛɛ ŋ dimi yɛ lende?

5. Wou laba o walta nyinaa wɔɔŋnda niŋ te

Yaamɔɔwaa Chɛhowaa Setana nda nyinaa nduaa wɔɔŋnda cho ni. Naa bɛɛ yaamɔɔwaa naa nda cho ni. Nuawɔ Luku 9:38-42, okoŋ mi la suukaŋ o nyunaa hoo choo:

Yɛɛ nyinaa wɔɔŋnda tosallɛ waŋnda?

Ŋ nɔ miŋ nɔ nyɛ o nyɛ le tosa a nyinaa wɔɔŋnda le. Nuawɔ Ditɔnɔmii 18:10-12, okoŋ mi la suukaŋ o nyunalaŋ ndaŋ choo:

O nɛila kuɛɛ niŋ nyinaa wɔɔŋnda kindiŋ yɛ le naa huiyo le suukaŋndo a nda? Sɔɔŋ kuɛɛ ŋ cha yɛ waŋnda tosaa o fondaŋ ŋ cho wo ŋ chiɛɛliaŋ a nyinaa wɔɔŋnda woŋ?
A yiyaŋ pa maa sila Chɛhowa ke naa hoo le faŋaŋndo sɔɔŋ nyinaa wɔɔŋnda kɔɔli wo bɛnda? Le yɛɛ ŋ dimi yɛ lende?

Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: “La Simul Masa Nyinaa Wɔɔŋnda” (5:02)

A yiyaŋ pa maa nyɛ Palesa baa chua ndɔɔ o ba wo wa nyɛ kpundɛ? Le yɛɛ ŋ dimi yɛ lende?
Yɛɛ Palesa ndoo nɔ yɛ mbo tosa le mi nyinaa wɔɔŋnda faŋaŋ ndu kɔɔli?

Kani masindɛ, Kilisiɔŋaa tonyaa cho lɔɔlɔɔ nyinaa wɔɔŋnda simullo. Nuawɔ Walta Kiilaa 19:19 a 1 Kɔliŋtiaŋ 10:21, okoŋ mi la suukaŋ o nyunaa hoo choo:

Te a nɔ pɛ nyɛ o nyɛ mbo chiɛɛliaŋ a nyinaa wɔɔŋnda, le yɛɛ o bɛnda yɛ ma tɛɛmbuu ndu?

6. A nɔla ma yem Setana a nyinaa nduaa wɔɔŋnda

Setana cho masa nyinaa wɔɔŋnda ni. Kɛ Maikɛl cho maalikɛiya kpou bolleŋ ni. Chiisu nɔ vɛlɛ diolaŋ ni aa Maikɛl. Vɛɛ kpɛ Maikɛl nɔ yɛ kpaayaa? Nuawɔ Sɔɔŋ Chɔɔmaŋndoŋ 12:7-9, okoŋ mi la suukaŋ o nyunalaŋ ndaŋ choo:

Nɛɛnɛ hiou yɛ kpaaya? Maikɛl nda maalikɛiyaa nduaa ɔɔ Setana nda nyinaa nduaa wɔɔŋnda?
A yiyaŋ pa maa buɛiyaa Chiisuaa nɔ ma wo Setana a nyinaa nduaa wɔɔŋnda?

A nɔla ma yem Setana a nyinaa nduaa wɔɔŋnda. Nuawɔ Chemisi 4:7, okoŋ mi la suukaŋ o nyunaa hoo choo:

Yɛɛ ŋ nɔ yɛ ma tosa Setana nda nyinaa nduaa wɔɔŋnda tiu num ba le?

TE WAŊNDO DIMI PƐ AA: “Wana nua bɛɛ waŋndo maŋgaliaalaŋ tosaa ɔɔ ma kuɛ choomanɔɔ nuaa o yolaŋ, koŋ yɔŋ wana nyɛ o nyɛ le.”

Le yɛɛ yiyaŋ waa lende cho yɛ suɛi kpundɛ?

SƆƆŊ KULLOŊ

Mi maalikɛiyaa Chɛhowaa mala naa. Yaamɔɔwaa Chɛhowaa Setana nda nyinaa nduaa wɔɔŋnda cho ni, nduyɛ ma kindiŋ le waŋnda chieeya huiyo a walta ndalaŋ.

Nyunala miiŋgaa choo laŋ

Vɛɛ maalikɛiyaa Chɛhowaa cho yɛ waŋnda malaa le pɛɛkoo a ndu okɔɔ?
Nɛɛnɛ cho yɛ Setana? Nduyɛ nɛɛ yaa cho yɛ nyinaa nduaa wɔɔŋnda?
Le yɛɛ o bɛnda ma wou laba o sɔɔŋ nyinaa wɔɔŋnda niŋ te?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Challɔ ma yiyaŋ te a nɔ pɛ nyɛ o nyɛ mbo chiɛɛliaŋ a walta nyinaa wɔɔŋnda. Okoŋ ma piɛi o Chɛhowa lo le mbo ke num taasioo, ma kɛɛsiaa le nyɛ ŋ cho tosa a ndu wo.

Nyɛ cheleŋ:

Your other goal