SUƐI LEBOLII 25
Yɛɛ Cho yɛ Tuu Mɛlɛkaa le Naa?
Baabuiyo dimi maa ‘yoomu wana chioo bendu le.’ Nduyɛ ‘nyɛ palaa komal ndu wo cho bɔɔ.’ (Choobu 14:1) Baa naa Mɛlɛka yeema ni mi yoomu naa wa? Te o cho lende le, mɛɛ yɛɛ cho yɛ tuu ndɔɔ le naa? Baa tuu o nɔ le naa wo yɔŋnuŋ niŋ pa? Tofawɔ mulila kɔl dɛɛniaa Baabuiyo ke naa le nyunalaŋ ndaŋ ndo.
1. Vɛɛ Chɛhowa yeema yɛ mi yoomu naa wa?
Chɛhowa yeema naa miŋ tuei yoomoo yeela. Mɛɛ o toosiaa Adam nda Ifi, mbo kɛsi nda o kpele kɛndɛ kɛndɔɔ niŋ diolaŋ aa Idɛŋ. Okoŋ, “mi Mɛlɛka duau nda sala aa, ‘La violu chuauwa mi la kuii mi la pɛ o chieeŋndo choo, nduyɛ mi chieeŋndo wa nya o ba bɛŋgu.’” (Chɛnɛsee 1:28) Chɛhowa ndoo yeema nda ma velu chuauwa, nduyɛ ma siiŋguu chieeŋndo kpou kpele hɛnɛkiɔɔ. Ndoo yeema nda vɛlɛ ma manda visiaa. Ndoo yeema mi waŋnda chieeya kpou ndaa tuei kɛndiaa walaŋndo yeela, nduyɛ mi ndaa wa achal lefafɛɛŋ.
Yoomu wanachioo cho hau mɛɛ Mɛlɛka ndoo yeema yɛ le. a Kɛ keŋ siŋga tuu o nɔ le naa wo le. (Aisaya 46:10, 11) O yeema wɔ mi wanaa cho hɛnaŋ ndɔɔ tosaa wa, wa achal lefafɛɛŋ o kpele hɛnɛkiɔɔ niŋ.—Nuawɔ Sɔɔŋ Chɔɔmaŋndoŋ 21:3, 4.
2. Yɛɛ naŋ nɔ yɛ miŋ tosa le miŋ nɔ yoomu sɔviɔɔ suŋ suŋ?
Chɛhowa toosiaa naa a yeemɛi le miŋ sina ndu, nduyɛ miŋ piɛi ndu. (Nuawɔ Maatiu 5:3-6.) O yeema naa miŋ nɔ chaŋyɛi kpɛɛluŋnde a ndu, ‘miŋ kuɛ o nɛi ndɔɔ choo, miŋ kaala ndu, nduyɛ miŋ piɛi ndu a kɔl naa kpou.’ (Ditɔnɔmii 10:12; Sam 25:14) Te ŋ tosa pɛ hei, ŋ cho nyaale kpeekpeiyo sɔla o yɔŋ bɛɛ mi bahawɛilaŋ la wa naa choo. Te ŋ wa pɛ Chɛhowa piɛiyo, miŋ sinaŋ maa ŋ cho wanaa sɔvɛ kanifuule, ŋ cho kɔlaŋ o nɛi ndɔɔ choo.
CHƆƆLU YAASIAA
Pɛɛku ma sina mɛɛ kpɛ Chɛhowa chɔm maa o kaala naa yɛ, mɛɛ o wa chieeŋndo toosiaa. Nduyɛ ma che mɛɛ Diom ndɔɔ pɛɛku naa le sinaa sabu naŋ cho yoomu wo.
3. Chɛhowa yeema mi waŋnda chieeya nɔ yoomu sɔviɔɔ
Handu VIDUEIYO, okoŋ mi la suukaŋ o nyunaa hoo choo:
-
Le yɛɛ Mɛlɛka toosiaa yɛ chieeŋ naa kɛndɔɔ hoo?
Nuawɔ Ikilisiaatii 3:11, okoŋ mi la suukaŋ o nyunaa hoo choo:
-
Yɛɛ hei pɛɛku yɛ num a Chɛhowa okɔɔ?
4. Tuu Chɛhowa nɔ le naa wo siŋgaŋ ndɔ le
Nuawɔ Sam 37:11, 29 a Aisaya 55:11, okoŋ mi la suukaŋ o nyunaa hoo choo:
-
Vɛɛ naŋ looku yɛ sina maa tuu Chɛhowa nɔ le naa wo siŋgaŋ ndɔ le?
O yɔŋ bɛɛ mi chiɛiyo tambu, wana nɔla ma miŋgi ndu toosiaa. Lende koni, Mɛlɛka cho hunɔɔ chieeŋ waŋnda chieeya tɛɛmbuu hoo wo toosiaa, le wanaa kaala ndu wa
5. Chɛhowa piɛiyo tosa ni miŋ nɔ yoomu sɔviɔɔ
Miŋ wa a kɔl kɛndɛ te ŋ sina pɛ le sabu naŋ cho yoomu wo. Handu VIDUEIYO, okoŋ mi la suukaŋ o nyunaa hoo choo:
-
Tɔnɔ yɛɛ Tɛlumi sɔla yɛ, mɛɛ o pɛɛku a sabu naŋ cho yoomu wo okɔɔ?
Nuawɔ Ikilisiaatii 12:13, okoŋ mi la suukaŋ o nyunaa hoo choo:
-
Le mɛɛ Chɛhowa tosal naa niŋ sɔɔŋ kɛndɔŋ tau yɛ, yɛɛ naa bɛɛ nɔ yɛ miŋ tosa le ndu balikaa mello?
TE WAŊNDO NYUNA PƐ AA: “Le sabu yɛɛ naŋ cho yɛ yoomu?”
-
Vɛɛ ŋ cho yɛ muli?
SƆƆŊ KULLOŊ
Chɛhowa yeema naa miŋ tuei yoomoo yeela lefafɛɛŋ o lɛŋndeŋ choo. Te ŋ piɛi ndu pɛ a kɔl naa kpou, suŋ suŋ bɛɛ ŋ tiuba miŋ nɔ yoomu sɔviɔɔ.
Nyunala miiŋgaa choo laŋ
-
Yɛɛ kpeekpei wa yɛ tuu Chɛhowaa le Adam nda Ifi?
-
Vɛɛ naŋ looku yɛ sina maa tuu Mɛlɛka nɔ le waŋnda chieeya wo siŋgaŋ te?
-
Yɛɛ ŋ nɔ yɛ ma tosa le ma nɔ yoomu sɔviɔɔ suŋ suŋ?
CHƆƆLU SƆƆŊ PUM TOFA
Tofawɔ ma che nyɛ chɔm maa kpeloo Idɛŋ wa kɛsɛ wo.
“Kpeloo Idɛŋ—O Wa ɔɔ O Ve Le?” (Bandu Mɛŋgɛlaa, Tɛɛkpaa 1, 2011)
Pɛɛku ma che le sabu naŋ laalaŋ maa chieeŋndo cho wa lefafɛɛŋ ndo.
Yaasiaa wɔ ma sina nyɛ Baabuiyo dimi maa ŋ nɔ miŋ tosa le miŋ sɔla yoomu sɔviɔɔ wo.
Mi po pum yiyaŋ maa o nɔ nyɛ o nyɛ o yoomu ndɔɔ niŋ. Kɛ tofawɔ ma che nyɛ ndoo saaluŋ maa o nɔ le wo.
a O suɛi lebolii cho lachi ve niŋ, a cho pɛɛku a nyɛ hiŋ a bahawɛi koŋ ndo okɔɔ.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
