SUƐI LEBOLII 26

Le Yɛɛ Dɛnɛ Wɔɔŋndo a Saŋgaa Cho Yɛ?

PILEI

Te kpundɔɔ del pɛ, mi wanaa bɔɔbɔɔ nyuna aa, “Le yɛɛ hei yɔŋnuŋ yɛ?” Nyunaa hoo cho bɔɔ o sɔvɛ. Nduyɛ, ŋ cho a kɔl kɛndɛ le sinaa maa Baabuiyo nɔ mulila sɔvɛlaŋ le ndu!

1. Yɛɛ Setana tosa yɛ mi dɛnɛ wɔɔŋndo kanduŋ o chieeŋndo niŋ?

Mi Setana Nyina Wɔɔŋndo simul Mɛlɛka. Setana ndoo yeema mbo simnuŋ masa. Le hei, mbo tosa mi Adam nda Ifi tual ndu kɔɔli le Mɛlɛka simullo. Le batiuwaa hoo sɔlaa, mbo dimul Ifi choolaŋ. (Chɛnɛsee 3:1-5) Mbo tosa mi Ifi yiyaŋ maa Chɛhowa yeema nyɛkɛndɛ le ndu le. Nduyɛ maa waŋnda chieeya nɔla ma wa a kɔl kɛndɛ tau, te a kɛɛ pɛ Mɛlɛka diikɔŋndo. Mi Setana dimul Ifi maa o cho wu le. Choola tasela o dimi laŋ la wa laŋ ni. Le saboo hoo Baabuiyo dimi ni maa “wana lachoowaa o cho ni, nduyɛ ndu cho finyaa le choolaŋ ni.”—Chɔŋ 8:44.

2. Yɛɛ Adam nda Ifi ndaa kɛɛsiaa yɛ le tosaa?

Chɛhowa ndoo kaala bɔɔ Adam nda Ifi. Mbo dimul nda maa yɔm o yɔm cho o kpeloo niŋ a dia, mɛɛ o pilɛ kpe mbo kuuna nda le dioo. (Chɛnɛsee 2:15-17) Kɛ a koŋ kpou, ma kɛɛsiaa le ma de komɔɔ yɔm koŋ. Mi “Ifi kendi mbo dia. Okoŋ kɔɔli, mi Adam bɛɛ dia.” (Chɛnɛsee 3:6) Mi nda ŋiɔɔŋ kpou kɛɛ Mɛlɛka diom. Adam nda Ifi ndaa nɔ haki le. Lelaŋ, o cho suɛi kala le i wa le ma tosa nyɛ bɛnda wo le. Kɛ mɛɛ nda kɛɛ Mɛlɛka diikɔŋndo a siɛlɛi fuu, ma simnuŋ wanaa lahakiaa, nduyɛ ma fula o ba ndɔɔ bɛŋgu. Mi kɛɛsiaa nda tosa koŋ ndo chuu nda saŋgaa tau.—Chɛnɛsee 3:16-19.

3. Vɛɛnɛ kɛɛsiaa Adam nda Ifi tosa wo paaliaŋ yɛ naa?

Mɛɛ Adam nda Ifi kɛɛ Mɛlɛka diom, ma simnuŋ wanaa lahakiaa. Okoŋ, ma tɛɛŋguu chuauwaa ndaa kpou haki koŋ. Mi Baabuiyo dimi a Adam okɔɔ aa: “Waŋndo ndupilɛ kpe tosa ni mi hakioo huŋ o chieeŋndo choo. Nduyɛ mi hakioo huŋ a piɔmndo. Le hei, mi piɔmndo tiu ŋwaŋnda chiee choo kpou.”—Luomaŋnda 5:12.

Mi saŋgaa komal naa le sabula bɔɔbɔɔ. Lepum, mi saŋgaa komal naa le mɛɛ naŋ tosa kɛɛsiaala wɔɔŋndaŋ yɛ. Lepum, le mɛɛ acheleŋnda tosa kɛɛsiaala wɔɔŋndaŋ yɛ. Lepum yɛ, miŋ saŋga le mɛɛ kpundɛ naŋ ve kɔl te wo komal naa yɛ.—Nuawɔ Ikilisiaatii 9:11.

CHƆƆLU YAASIAA

Tofawɔ ma che le sabu naŋ nɔ miŋ bii Mɛlɛka tɔɔyaŋ le dɛnɛ wɔɔŋndo, a saŋga cho hau o chieeŋndo niŋndo le. Okoŋ, ma sina mɛɛ kɔllo wa ndu yɛ, te o che naa pɛ o saŋgaa niŋ.

4. Wana cho tosaa miŋ wa hau saŋgaa wo

Wanaa bɔɔbɔɔ laalaŋ maa Mɛlɛka chieeŋndo cho hau o ba bɛŋgu ni. Kɛ tonya pa keŋ cho ni? Handu VIDUEIYO.

VIDUEIYO: Nɛɛnɛ Chieeŋndo Cho yɛ O Ba Bɛŋgu? (1:24)

Nuawɔ Chemisi 1:13 a 1 Chɔŋ 5:19, okoŋ mi la suukaŋ o nyunaa hoo choo:

Baa ŋ nɔ pa miŋ bii Mɛlɛka tɔɔyaŋ le saŋgaa a dɛnɛ wɔɔŋ cho hau wo?

5. Tofawɔ sɔɔŋ cho yɔŋnɔŋndo o masale Setanaleŋ bɛŋgu woŋ

Handu VIDUEIYO.

VIDUEIYO: Le Yɛɛ Mɛlɛka Chɛllɛ Mi Nyɛpalaa Wa?—Buŋgɛi Pɔmbɔ (3:07)

Nuawɔ Chɛnɛsee 3:1-6, okoŋ mi la suukaŋ o nyunalaŋ ndaŋ choo:

Choola yɛɛ Setana dimi yɛ?—Tofa sɔɔŋ 4 a 5.
Vɛɛ Setana ndoo tɛɛmbuu yɛ Chɛhowa tɔɔ maa, o yeema nyɛ kɛndɛ le waŋnda chieeya le?
A mɛɛ Setana dimi yɛ, baa mɛɛ mi waŋnda chieeya wa o masale Chɛhowaleŋ bɛŋgu malaŋ nda wa a kɔl kɛndɛ?

Nuawɔ Ikilisiaatii 8:9, okoŋ mi la suukaŋ o nyunaa hoo choo:

Chɔŋ a teleŋ chieeŋndo hoo fula o kpaaya Chɛhowaa bɛŋgu wo, yɛɛ cho yɛ hau yɔŋnɔŋndo?

Adam nda Ifi ndaa nɔ haki le. Nduyɛ o Kpele Hɛnɛkiɔɔ niŋ nda wa ni. Kɛ ma yaŋ Setana nilaŋ ma simul Chɛhowa
Mɛɛ nda simul Chɛhowa, mi hei huŋ a hakioo, saŋgaa a piɔmndo o chieeŋndo choo
Chɛhowa cho hunɔɔ hakioo, saŋgaa a piɔmndo faŋa. Waŋnda chieeya cho vɛlɛ hunɔɔ simnɔŋ walaŋ ma wa o Kpele Hɛnɛkiɔɔ niŋ

6. Chɛhowa buulaŋ a saŋga naŋ cho niŋndo

Baa Mɛlɛka buulaŋ a saŋga cho naa choo wo le? Tofawɔ nyɛ Masaa Deeve a kiilanɔɔ Pitɛ poonyiaa wo. Nuawɔ Sam 31:7 a 1 Pitɛ 5:7, okoŋ mi la suukaŋ o nyunaa hoo choo:

Vɛɛ kɔllo cho yɛ num le sinaa maa Chɛhowa cho chɔɔ saŋga naŋ cho niŋndo, nduyɛ maa o buulaŋ a naa?

7. Chɛhowa cho hunɔɔ chii saŋga o saŋga cho naa choo

Nuawɔ Aisaya 65:17 a Sɔɔŋ Chɔɔmaŋndoŋ 21:3, 4, okoŋ mi la suukaŋ o nyunaa hoo choo:

Le yɛɛ i cho yɛ suɛi kɔl dɛɛniaa le sinaa maa, Chɛhowa cho hunɔɔ faŋa sɔɔŋ wɔɔŋ cho waŋnda chieeya paaliaŋndo woŋ kpou?

A sina pa?

Mɛɛ Setana dimi choola taselaŋ, mbo tɛɛmbuu Chɛhowa tɔɔ. Mbo tosa mi waŋnda nɔ yiyaŋ wɔɔŋndo a Chɛhowa okɔɔ maa o sendu le, nduyɛ maa o nɔ kaala le naa le. Te Chɛhowa huŋ chii pɛ saŋgala cho waŋnda chieeya choo laŋ, o cho tɔɔ wɔɔŋ cho ndu choo wo faŋa. Koŋ cho ni maa, o cho chɔm maa masale ndɔleŋ le hiou bɛnda. Suɛi hiou wa i sɔvɛ o chieeŋndo choo kpou ve cho tɔɔ wɔɔŋ nɔ hoo le faŋaŋndo o diola Chɛhowalaŋ choo wo ni.—Maatiu 6:9, 10.

TE WAŊNDO DIMI PƐ AA: “Mɛlɛka mal saŋgaa ni.”

Vɛɛ ŋ cho yɛ muli?

SƆƆŊ KULLOŊ

Setana Nyina Wɔɔŋndo, a Adam nda Ifi tosa ni mi dɛnɛ wɔɔŋndo wa hau o chieeŋndo niŋ. Chɛhowa buulaŋ tau a saŋgala cho naa choo laŋ, nduyɛ o cho laŋ suŋ hunɔɔ faŋa.