Baa wana ŋ kaala tau wo vi niŋ pa? A boondii kɔl tambɛi waa naa, ma nyunaŋ dɔɔ aa: ‘Yɛɛ yɔŋnuŋ yɛ naa te ŋ vi pɛ? Baa tiindaŋndo cho pa maa ŋ cho vɛlɛ wanaa naa kaalaa vi wa chɔ?’ O suɛi lebolle hei niŋ a i cho lachi ve, ŋ cho yaasiaa mulila kɔl dɛɛniaala Baabuiyo yɔŋgu le nyunalaŋ ndaŋ ndo.

1. Yɛɛ yɔŋnuŋ yɛ naa te ŋ vi pɛ?

Mi Chiisu tuu piɔmndo a luaŋ. Te waŋndo wa pɛ o luaŋ yikpi, o sina nyɛ wa yɔŋnɔŋndo ndu ikɛiyo le. Vɛɛ piɔmndo velaŋ yɛ a luaŋ? Te waŋndo vi pɛ, o sinaŋ nyɛ nɛiyaa le. Nduyɛ, mɛɛ mɛɛ ndoo kaala chaaŋaa nduaa a wanayaŋ ndɔŋ, yeemɛi bii lɛ ndu le nda le. Baabuiyo dimi aa: “Wanaa vi niŋ nda, nda nɔ yiyaŋ . . . te.”—Nuawɔ Ikilisiaatii 9:​5.

2. Tɔnɔ yɛɛ naŋ sɔla yɛ te ŋ sina pɛ tonya cho a piɔmndo okɔɔ wo?

Wanaa bɔɔbɔɔ nɔ siooŋnde le piɔmndo a waŋvilɛiya! Kɛ nyɛ Baabuiyo dimi a piɔmndo okɔɔ wo nɔla mbo ke num kɔl dɛɛniaa. Mi Chiisu dimi aa: “Tonyaa cho nya soli o chɛleŋ niŋ.” (Chɔŋ 8:​32) Kaaŋnde ipum pɛɛku maa te wana chioo vi pɛ, nyina ndɔɔ fulaŋ ndu niŋ o kɔ wa achal naa cheleŋ. Kɛ o cho lende le Baabuiyo pɛɛku le. Lelaŋ te waŋndo vi pɛ, o saŋga lɛ le. Mɛɛ waŋvilɛiya sinaŋ lɛ nyɛ o nyɛ le yɛ, a nɔla ma yɔŋ naa nyɛ le. Le hei, ŋ nɔ miŋ biilu nda ɔɔ miŋ sooluu nda le. Nduyɛ ŋ nɔ vɛlɛ miŋ piɛi le nda le.

Waŋnda apum dimi maa a tiuba ma suukaŋ a waŋvilɛiya. Kɛ keŋ cho tonya le. A mɛɛ naŋ laŋga pɛɛku yɛ, “wanaa vi niŋ nda, nda nɔ yiyaŋ . . . te.” Te waŋndo dimi pɛ maa mbo suukaŋ a wanaa nduaa kaalaa vi wa, o kpeekpei niŋ, o cho nda ndaa le wa koŋ suukaŋndo le. Kɛ nda nyinaa wɔɔŋnda wa suukaŋndo ni. Mi nyinaa wɔɔŋaa kaŋ tosa naŋ chaa nda cho wanaa vi wa ni. Te ŋ sina pɛ tonyaa a piɔmndo okɔɔ, koŋ mala naa nyinaa wɔɔŋnda paaliaŋ naa le. Chɛhowa sila naa maa naŋ kindiŋ bɛɛ le suukaŋndo a waŋvilɛiya le. Kanifuule, o sina maa te ŋ holnuŋ pɛ nyinaa wɔɔŋnda, kpundɔɔ i wa le naa ni.—Nuawɔ Ditɔnɔmii 18:​10-12.

3. Pɛɛku tonya cho a waŋvilɛiya okɔɔ wo

Chieeŋndo balɔɔ silɔ, waŋnda nɔ laalaŋnda yɛ yɛlaŋ a nyɛ yɔŋnuŋ naa wo te ŋ vi pɛ. Kɛ o kpeekpei niŋ, o cho laalaŋnda laŋ kpou le la cho tonya le.

• O fondaŋ ŋ cho wo, laalaŋnda kuɛɛ waŋnda nɔ yɛ a waŋvilɛiya okɔɔ?

 4. Sinaa tonya cho a piɔmndo okɔɔ wo chuu naa tɔnɔɔ

Te ŋ sina pɛ tonya cho a piɔmndo okɔɔ wo, ŋ nɔ lɛ isiooŋ le waŋvilɛiya le. Nuawɔ Ikilisiaatii 9:​10 NWT, okoŋ mi la suukaŋ o nyunaa hoo choo:

• Baa mi waŋvilɛiya yɔŋ naa pa nyɛ?

Te ŋ laalaŋ pɛ tonya cho o Baabuiyo niŋndo, o mala naa ŋ laalaŋ choola waŋnda dimi maa ŋ nɔ miŋ biilu waŋvilɛiya ɔɔ miŋ sooluu nda wo le. Nuawɔ Aisaya 8:​19 a Sɔɔŋ Chɔɔmaŋndoŋ 4:​11, okoŋ mi la suukaŋ o nyunaa hoo choo:

• O yiyaŋ numndo niŋ, vɛɛ Chɛhowa che yɛ wana sooluu hoo waŋvilɛiya ɔɔ mbo nyuna nda le malaa wo?

5. Tonya cho a piɔmndo okɔɔ wo dɛɛniaa naa kɔltaŋ

Wanaa bɔɔbɔɔ sɔla niŋ pɛɛkoo maa te waŋndo vi pɛ, a cho ndu nyɛ palaa tusi choo le sɔɔŋ wɔɔŋ o tosa woŋ. Kɛ, i cho suɛi kɔl dɛɛniaa le sinaa maa te waŋndo vi pɛ, a tusi ndu nyɛ palaa choo le, o yɔŋ bɛɛ mi ndoo tosa sɔɔŋ wɔɔŋ wɔɔŋ ndoŋ. Nuawɔ Luomaŋnda 6:​7, okoŋ mi la suukaŋ o nyunaa hoo choo:

• Baabuiyo dimi maa te waŋndo vi pɛ, Mɛlɛka bii lɛ ndu le hakila ndɔlaŋ te. Lelaŋ, a yiyaŋ pa maa te waŋndo vi pɛ mi Mɛlɛka tusi ndu nyɛpalaa choo le hakila ndɔla paandu laŋ?

Mɛɛ naŋ hiau lachi a Chɛhowa sinaa fau, lende koni naŋ chɔɔlu pɛɛku ni maa o tusi wanaa vi wa saŋgaa choo le. Nuawɔ Ditɔnɔmii 32:​4 a 1 Chɔŋ 4:​8, okoŋ mi la suukaŋ o nyunalaŋ ndaŋ choo:

• Te Mɛlɛka nɔ pɛ suliŋnda naŋ che laŋ o bolii Baabuiye hei niŋndaŋ, a yiyaŋ pa maa mbo chɛl mi wanaa vi wa wa o nyɛ nɛiyaa niŋ?

• A yiyaŋ pa maa tonya cho a piɔmndo okɔɔ wo dɛɛniaa naa kɔllo? Le yɛɛ ŋ dimi yɛ lende?

 SƆƆŊ KULLOŊ

Te waŋndo vi pɛ, yoomu ndɔɔ mɛɛlu. Wanaa vi wa cho o saŋga niŋ te nduyɛ, a yɔŋ wanaa cho yoomu wa nyɛ o nyɛ le.

Nyunala miiŋgaa choo laŋ

• Yɛɛ yɔŋnuŋ yɛ naa te ŋ vi pɛ?

• Vɛɛ tonyaa sinaa a piɔmndo okɔɔ chuu yɛ naa tɔnɔɔ?

• Vɛɛ tonyaa sinaa a piɔmndo okɔɔ dɛɛniaa yɛ naa kɔllo?