SUƐI LEBOLII 32
Masale Mɛlɛkaleŋ Le Kanduŋ Niŋ!
O wɔsi 1914 niŋ Masale Mɛlɛkaleŋ le kanduŋ o choo choo niŋ ni. O wɔsi koŋ niŋ koni palɛi mɛɛlɛi masɛi waŋnda chieeya kanduŋ ni. Vɛɛ naŋ looku yɛ hei sina? Huuluŋ Baabuiyo, sɔɔŋ cho yɔŋnɔŋndo o chieeŋndo choo woŋ, vɛlɛ a kaala waŋnda chieeya mala naa le hei sinaa ni. Ŋ cho yaasiaa mɛɛ muŋ kpou cho peelɔŋndo, chɔŋ a wɔsi 1914 yɛ.
1. Yɛɛ huuluŋ Baabuiyo dimi yɛ?
Mi yau Daaniɛɛ wo chɔm maa, Masale Mɛlɛkaleŋ le cho kandɔŋ a teleŋ ‘wɔsila ŋɔmmɛu’ laŋ lapum la cho mɛɛlu wo. (Daaniɛɛ 4:16, 17) Mɛɛ wɔsila bɔɔbɔɔ hiou okoŋ kɔɔli, mi Chiisu veelu wɔsila ŋɔmmɛula laŋ aa “boondii wanaa lekaa wa.” Nduyɛ mbo dimi pɛŋ maa wɔsilaŋ ndaŋ laa mɛɛlu wɔ le. (Luku 21:24) A mɛɛ naŋ cho hunɔɔ chɔ yɛ, o wɔsi 1914 niŋ wɔsila ŋɔmmɛulaŋ ndaŋ la mɛɛlu ni.
2. Chɔŋ a wɔsi 1914, sɔɔŋ kuɛɛ cho yɛ niŋ yɔŋnɔŋndo nduyɛ, vɛɛ kaala waŋnda chieeya la cho yɛ?
Mi buɛiyaa Chiisuaa nyuna ndu aa: “Tamasi yɛɛ yɔŋnuŋ yɛ niŋ le chɔmndo maa a miiŋgu nanuŋ? Yɛɛ yɔŋnuŋ yɛ niŋ le sinaa maa mɛɛlula chieeŋndo hoo la fuuluu?” (Maatiu 24:3) Mi Chiisu chɔm nda sɔɔŋ bɔɔbɔɔ muŋ nɔ le yɔŋnɔŋndo woŋ, te o kandu pɛ masaleŋ choo choo. Sɔɔŋ muŋ ŋpum cho muŋ ni: Chɔulaŋ, nyɛdiaa lepɛŋndo, a lɛŋnde nyiiyaaleŋ. (Nuawɔ Maatiu 24:7.) Mi Baabuiyo dimi vɛlɛ maa o “palɛi mɛɛlɛi niŋ,” kaala waŋnda chieeya la cho tosa mi ‘nyɔɔ kendu.’ (2 Timoti 3:1-5) O wɔsi 1914 niŋ sɔɔŋ muŋ kandu yɔŋnɔŋndo o nɛi teŋgeŋndo choo ni. Nduyɛ, mi kaala waŋnda chieeya bɛɛ la siŋgaŋ.
3. Le yɛɛ chieeŋndo cho yɛ hiouwɔɔ lachi a wɔuleŋ, chɔŋ a teleŋ Masale Mɛlɛkaleŋ le kanduŋ ndo?
Mɛɛ Chiisu simnuŋ dɔɔ Masaa le Masale Mɛlɛkaleŋ, mi chɔuwo del nda tɛɛŋ nda Setana a nyinaa nduaa wɔɔŋnda o choo choo niŋ. Kɛ mbo yam Setana o chɔu koŋ. Baabuiyo dimi maa “ma nyindu ndu a maalikɛiyaa nduaa latulu o chieeŋndo choo.” (Sɔɔŋ Chɔɔmaŋndoŋ 12:9, 10, 12) Setana cho a tumboo tau tau kanifuule, o sina maa o cho hunɔɔ tambei sɔla. Le saboo hoo o cho tosaa ni mi nyɛ nɛiyaa a saŋgaa wa hau o chieeŋndo choo. Hei mala naa le sinaa nyɛ tosa mi sɔɔŋ wɔɔŋndoŋ hɔba wo! Masale Mɛlɛkaleŋ le cho hunɔɔ sɔɔŋ muŋ kpou faŋa.
CHƆƆLU YAASIAA
O wɔsi 1914 niŋ Masale Mɛlɛkaleŋ le kanduŋ ni. Pɛɛku ma che nyɛ mala naa le hei sinaa wo. Okoŋ, ma che vɛlɛ nyɛ hei sim le naa wo.
4. Wɔsilaŋ o Baabuiyo niŋ tosa miŋ sina maa Masale Mɛlɛkaleŋ le kanduŋ a wɔsi 1914
Nɛbukanɛɛsa wa sindɛ Masaa Babilɔŋ ni. O lɔmasɔlaŋ niŋ, mi Mɛlɛka chɔm ndu nyɛ ndoo nɔ le yɔŋnɔŋndo o siɔdii lachioo niŋndo. Mɛɛ Daaniɛɛ tɛɛsiaa lɔma sɔlaama maŋ yɛ chɔm ni maa, ma sim le masale Nɛbukanɛɛsaleŋ a Masale Mɛlɛkaleŋ.—Nuawɔ Daaniɛɛ 4:17. a
Nuawɔ Daaniɛɛ 4:20-26, okoŋ mi la soliŋ kɔfoo kpeku le nyunalaŋ ndaŋ mulioo:
-
(A) Yɛɛ Nɛbukanɛɛsa che yɛ o lɔma o sɔl laŋ niŋ?—Tofa sɔɔŋ 20 a 21.
-
(B) Yɛɛ ndoo nɔ yɛ mbo yɔŋnuŋ a yɔmndo?—Tofa sɔɔŋ 23.
-
(C) Yɛɛ ndoo nɔ yɛ mbo yɔŋnuŋ te ‘wɔsila ŋɔmmɛu’ laŋ laa hiou pɛ?—Tofa sɔɔŋ 26.
Mɛɛ Lɔma Sɔlaŋ a Yɔmndo Okɔɔ Chiɛɛliaŋ a Masale Mɛlɛkaleŋ Yɛ
HUULUEI (Daaniɛɛ 4:20-36)
Masaleŋ
(A) Yɔm tɔɔma bɛndoo
Masaleŋ le mɛɛlu wɔ
(B) “La kioŋ yɔmndo hoo,” mi la mal ndu le “wɔsilaŋ la ŋɔmmɛu”
Masaleŋ le miiŋgu
(C) “Masale numndeŋ Mɛlɛka cho num ndeŋ hunɔɔ miŋgi o ba”
O teleŋ tase huuluei hei peeluŋndo niŋ . . .
-
(D) Nɛɛnɛ yɔmndo ndoo sim yɛ lewundu?—Tofa sɔɔŋ 20-22.
-
(E) Vɛɛ masale ndɔleŋ lee mɛɛlu yɛ wɔ?—Nuawɔ Daaniɛɛ 4:29-33.
-
(F) Yɛɛ ndoo yɔŋnuŋ yɛ Nɛbukanɛɛsa mɛɛ ‘wɔsila ŋɔmmɛu’ laŋ la hiou?—Nuawɔ Daaniɛɛ 4:34-36.
PEELƆŊ TASOO
Masaleŋ
(D) Nɛbukanɛɛsa, Masaa le Babilɔŋ
Masaleŋ le mɛɛlu wɔ
(E) Mɛɛ wɔsi 606 hiou tuupa mi Chiisu vialuŋ, mi Nɛbukanɛɛsa seema, nduyɛ mbo faŋaŋ o lemasa le wɔsilaŋ la ŋɔmmɛu
Masaleŋ le miiŋgu
(F) Nɛbukanɛɛsa miiŋgu o ndupila niŋ mbo kandu vɛlɛ masaleŋ
O teleŋ diiŋ ndɔ huuluei hei peeluŋndo niŋ . . .
-
(G) Nɛɛ yaa yɔmndo ndoo sim yɛ lewundu?—Nuawɔ Koloniko Tasoo 29:23.
-
(H) Vɛɛ masale ndaleŋ lee mɛɛlu yɛ wɔ? Vɛɛ naŋ looku yɛ sina maa a teleŋ Chiisu wa o chieeŋndo choo wo, lee miiŋgu wɔ le?—Nuawɔ Luku 21:24.
-
(I) Teleŋ kuɛɛ masaleŋ ndeŋ lee miiŋgu yɛ? Nduyɛ kuɛɛnɛ?
PEELƆŊ DIIŊ NDƆƆ
Masaleŋ
(G) Masaa ndaa sim le Masale Mɛlɛkaleŋ o Isɔluɛi niŋnda
Masaleŋ le mɛɛlu wɔ
(H) Chulusalɛm sɔla tambei, mi masale Isɔluɛileŋ le mɛɛlu wɔ le wɔsilaŋ 2,520
Masaleŋ le miiŋgu
(I) Chiisu kandu Masale Mɛlɛkaleŋ o choo choo niŋ
Vɛɛnɛ kpɛ wɔsila ŋɔmmɛu laŋ la bandu yɛ?
Le miŋ bii bolii Baabuiye ipum bila, mɛɛ miŋ tuu ndi a nyɛ dimiŋ o bolii Baabui cheleŋ niŋndo. Le tamaseliiyo, yau Sɔɔŋ Chɔɔmaŋndoŋ dimi maa teleŋndaŋ la yaa a tɛndaa tɛɛŋ ɔɔ wɔsilaŋ la yaa a tɛndaa tɛɛŋ, sim le palɛi 1,260. (Sɔɔŋ Chɔɔmaŋndoŋ 12:6, 14) Mɛɛ teleŋndaŋ la ŋɔmmɛu la chua nɔmbɛiyo hoo lediiŋ. Koŋ cho ni, palɛi 2,520. Teleŋndaŋ lapum, mi paaleŋ le sim le wɔsioo o Baabuiyo niŋ. (Isikiaa 4:6) Mɛɛ lende i cho a wɔsila ŋɔmmɛula yau Daaniɛɛ wo soo okɔɔ laŋ ni. La sim le wɔsilaŋ 2,520.
5. Chieeŋndo siŋgaŋ chɔŋ a wɔsi 1914
Mi Chiisu dimi maa sɔɔŋ pum nɔ le yɔŋnɔŋndo o chieeŋndo niŋ te o simnuŋ pɛ Masa. Nuawɔ Luku 21:9-11, okoŋ mi la suukaŋ o nyunaa hoo choo:
-
O sɔɔŋ muŋ tɛɛŋ, i kuɛɛ num che yɛ niŋ ɔɔ ma tuɛi a ndi okɔɔ?
Mi kiilanɔɔ Pɔɔl tɛɛsiaa mɛɛ waŋnda cho wa o palɛi mɛɛlɛi niŋ yɛ. Nuawɔ 2 Timoti 3:1-5, okoŋ mi la suukaŋ o nyunaa hoo choo:
-
A che niŋ pa waŋnda kaalaŋ ndaŋ tosaa?
6. Mɛɛ Masale Mɛlɛkaleŋ le kanduŋ niŋ yɛ, ŋ nɔ miŋ tosa nyɛ
Nuawɔ Maatiu 24:3, 14, okoŋ mi la suukaŋ o nyunalaŋ ndaŋ choo:
-
Wali sɔvɛ kuɛɛ cho yɛ hau tosaŋndo le chɔmndo maa Masale Mɛlɛkaleŋ le kanduŋ niŋ?
-
Vɛɛ num bɛɛ nɔla yɛ ma sɔɔŋguu le wallo hoo tosaa?
Masale Mɛlɛkaleŋ le kanduŋ niŋ. Nduyɛ paale le cho hunɔɔ masɛi waŋnda chieeya faŋa leŋ le cho niŋ kpɛɛluŋ. Nuawɔ Hibuluiya 10:24, 25, okoŋ mi la suukaŋ o nyunaa hoo choo:
-
Yɛɛ naa pilɛŋ pilɛŋnda nɔ yɛ miŋ tosa, mɛɛ naŋ cho chɔɔ maa “paale Masanɔɔ le cho niŋ kpɛɛluŋ” yɛ?
Te a pɛɛku pɛ isɔɔ ma sina maa i nɔla mii mala waŋnda, nduyɛ mii piŋi yoomula ndalaŋ, yɛɛ ŋ cho yɛ tosa?
TE WAŊNDO NYUNA PƐ AA: “Le yɛɛ Seiyaa Chɛhowaa chua yɛ wɔsi 1914 wɔsi sɔvɛ?”
-
Vɛɛ ŋ cho yɛ muli?
SƆƆŊ KULLOŊ
Huuluŋ Baabuiyo, wɔsila Baabuiyo soo okɔɔ laŋ, a sɔɔŋ cho yɔŋnɔŋndo o chieeŋndo niŋndoŋ chɔm kɛsɛ maa Masale Mɛlɛkaleŋ le kanduŋ niŋ. Ŋ chɔm maa ŋ laalaŋ hei, te ŋ wa pɛ yooŋgu kɛndɔɔ dimioo a Masaleŋ ndeŋ okɔɔ, nduyɛ miŋ wa bɔŋaŋnda leKilisiɔŋndaŋ biyɔɔ.
Nyunala miiŋgaa choo laŋ
-
Yɛɛ ndoo yɔŋnuŋ yɛ mɛɛ wɔsila ŋɔmmɛula Baabuiyo soo o yau Daaniɛɛ wo niŋndaŋ la mɛɛlu?
-
Le yɛɛ ŋ laalaŋ yɛ maa Masale Mɛlɛkaleŋ le kanduŋ o wɔsi 1914 niŋ?
-
Yɛɛ ŋ nɔ yɛ ma tosa le chɔmndo kɛsɛ maa a laalaŋ maa, Masale Mɛlɛkaleŋ le kanduŋ niŋ?
CHƆƆLU SƆƆŊ PUM TOFA
Wanaa poonyiaa a sɔɔŋ paandoŋ okɔɔ wa, vɛlɛ a wanaa bɔɔbɔɔ dimi maa chieeŋndo siŋgaŋ chɔŋ a wɔsi 1914. Tofawɔ ma che nyɛ nda dimi wo.
“Kaala Waŋnda Chieeya La Siŋgaŋ o Lepilɛ Niŋ Kpe” (“Tiondoo!”, Nyaakuɛiyo 2007)
Veelu wɔ diomndaŋ ma che mɛɛ huului cho o Maatiu 24:14 niŋndo piiliaŋ po pilɛ yɛ.
“Yaa Kaala Bɔllo Lɔɔ Mbo Hiau Nyɛ o Nyɛ!” (Bandu Mɛŋgɛlaa No. 3 2017)
Vɛɛnɛ naŋ looku yɛ sina maa huului cho o Daaniɛɛ bolle 4 niŋnde chiɛɛliaŋ a Masale Mɛlɛkaleŋ?
“Teleŋ Kuɛɛ Masale Mɛlɛkaleŋ Le Kanduŋ Yɛ?” (Pɛl 1) (Bandu Mɛŋgɛlaa, Saa 1, 2014)
Yɛɛ chɔm yɛ maa ‘wɔsila ŋɔmmɛula’ Daaniɛɛ bolle 4 soo laŋ, o wɔsi 1914 niŋ la mɛɛlu ni?
“Teleŋ Kuɛɛ Masale Mɛlɛkaleŋ Le Kanduŋ Yɛ?” (Pɛl 2) (Bandu Mɛŋgɛlaa, Bɛŋgufɔnɔɔ 1, 2014)
a Tofa buŋgaŋ mɛɛlaŋ muuŋ ndoŋ o “Chɔɔlu Sɔɔŋ Pum Tofa” bɛŋgu, o suɛi lebolle hei bɛŋgu.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
