SUƐI LEBOLII 38
Chɔm Balika Melaa le Yoomu Mɛlɛka Ke Naa Wo
Te ŋ wa pɛ yoomu, ŋ nɔla miŋ tosa sɔɔŋ kɛndɛŋ bɔɔbɔɔ. O yɔŋ bɛɛ mi bahawɛilaŋ la wa naa choo, miŋ tuei ndu yeela teleŋndaŋ lapum. Vɛɛ naŋ chɔm yɛ maa ŋ nɔ balika melaa le yoomu Mɛlɛka ke naa wo? Nduyɛ sabu sɔvɛ kuɛɛ naŋ nɔ yɛ le balika melaa hoo chɔmndo?
1. Le yɛɛ naŋ nɔ yɛ miŋ chɔm balika melaa le yoomoo?
Ŋ nɔ miŋ chɔm balika melaa le yoomoo kanifuule, Finya naa kaalaa Chɛhowa ke naa ndu ni. Ndu “yɔŋgu yoomoo le nyɛ o nyɛ yoomaa ni.” (Sam 36:9) “Ndu ke waŋchieeya kpou yoomoo a nyɛ o nyɛ fee ni.” (Walta Kiilaa 17:25, 28) Mi Chɛhowa ke naa nyɛm naŋ yeema le waa yoomu woŋ. Kɛ o fulawɔ o koŋ kɔɔli, mbo tosa miŋ tuei yoomoo yeela.—Nuawɔ Walta Kiilaa 14:17.
2. Vɛɛ naŋ chɔm yɛ Chɛhowa maa ŋ nɔ balika melaa le yoomu o ke naa wo?
Chɔŋ a teleŋ nda chua foli numndo wo, mi Chɛhowa kandu num mandaa. Mi Deeve, buɛi Mɛlɛkaa poonyiaa o Baabuiyo niŋ aa: “Lɔɔpa bɛɛ mi vialuŋ, num oo chii niŋ ya chɔ.” (Sam 139:16) Chɛhowa che bɔɔ yoomu numndo nyɛ sɔvɛ bɛndu. (Nuawɔ Maatiu 10:29-31.) Mbo tambu kɔllo tau te waŋndo diinuŋ pɛ ɔɔ mbo dii chaaŋ ndɔ. a (Ɛsɔdɔɔ 20:13) Mbo tambu vɛlɛ kɔl tau, te ŋ wa pɛ tosaa sɔɔŋ luei yoomu naa a yoomula acheleŋnda o kpundɔɔ niŋndoŋ. Te ŋ manda pɛ yoomu naa nduyɛ miŋ chɔm bɛɛleŋ le yoomula wanaa cheleŋ, mɛɛ keŋ chɔm maa ŋ nɔ balika melaa le yoomu sɔvɛ Chɛhowa ke naa wo.
CHƆƆLU YAASIAA
Pɛɛku wɔ ma sina nɛila naŋ chɔm balikaa le yoomoo laŋ lapum.
3. Manda kɛndiaa numndo
Te Kilisiɔŋaa yɔŋguŋ o Mɛlɛka lo wa wa pɛ nyɛ o nyɛ tosaa o yoomoo niŋ, ma yiyaŋ a mɛɛ o piiliaŋ chaŋyɛi ndɛi a Chɛhowa yɛ okɔɔ. Kanifuule, a yɔŋgu dialuŋ ndaŋ kpou o Mɛlɛka lo maa sala. Nuawɔ Luomaŋnda 12:1, 2, okoŋ mi la suukaŋ o nyunalaŋ ndaŋ choo:
-
Yɛɛ nɔ yɛ mbo nyindu num le kɛndiaa numndo mandaa?
-
Ɔɔ nɛila ŋ tosa hei laŋ lapum?
4. Te a wa pɛ nyɛ o nyɛ tosaa, mandaŋ yɔŋii wana o wana yɔŋuluŋ ɔɔ mi waŋndo vi
Baabuiyo dɛɛniaa naa le miŋ fafaŋ sɔɔŋ huŋ a kpundɔɔ woŋ tosaa. Handu VIDUEIYO le ma che sɔɔŋ ŋ nɔ ma tosa le ma manda yoomu numndo wo.
Nuawɔ Pulɔwaa 22:3, okoŋ mi la suukaŋ le sinaa mɛɛ ŋ manda numpila a wanaa cheleŋ yɛ te a wa pɛ . . .
-
o numndo bɛɛ.
-
wallo.
-
pisultaŋ.
-
o nyɛ nyaanaŋndo niŋ ɔɔ ma wa kɔlaŋ a ndu.
5. Chɔm bɛɛleŋ le yoomu chɛlɛkpɛ cho o demboo niŋndo
Mi Deeve chɔm o chondei niŋ mɛɛ kpɛ Chɛhowa buulaŋ a yoomu chɛlɛkpɛ cho o demboo niŋndo yɛ. Nuawɔ Sam 139:13-15, 17, okoŋ mi la suukaŋ o nyunaa hoo choo:
-
O yiyaŋ Chɛhowaa niŋ, baa teleŋ nda vialu waŋndo wo yoomu ndɔɔ kanduŋ ni ɔɔ teleŋ nda chua foli ndɔɔ wo?
O Isɔluɛi niŋ sindɛ, mi Chɛhowa duau sawalaŋ le wana folioo mandaa a chɛlɛkpɛ cho ndu o dembe wo. Nuawɔ Ɛsɔdɔɔ 21:22, 23, okoŋ mi la suukaŋ o nyunalaŋ ndaŋ choo:
-
Vɛɛ Chɛhowa ndoo cha yɛ wana sulɛi hɛluŋ mbo dii chɛlɛkpɛ cho o demboo niŋndo?
-
Vɛɛ kɔllo wa yɛ ndu niko te waŋndo tosa pɛ hei kpɛsɛkɛɛ? b
-
Vɛɛ num yiyaŋ yɛ a mɛɛ Mɛlɛka che sɔɔŋ muŋ yɛ?
Lepum, mi wana lanɔ nɔ bɛɛ bɛɛleŋ le yoomoo wo yiyaŋ maa, folioo tɛɛmbuuwo kinɛi nɔla ni mbo soli bahawɛi ndɔɔ. Nuawɔ Aisaya 41:10, okoŋ mi la suukaŋ o nyunalaŋ ndaŋ choo:
-
Te a wa pɛ wana lanɔɔ baŋɔɔ le folioo tɛɛmbuuwo, nɛɛ o nɔ yɛ mbo tiindaŋ? Le yɛɛ ŋ dimi yɛ lende?
TE WAŊNDO DIMI PƐ AA: “Te waŋndo chua folioo pɛ mbo yeema le tɛɛmbuuwo, o lo a ndupila. Ndu nɔ foli ndɔ ni.”
-
Le yɛɛ ŋ laalaŋ yɛ maa Chɛhowa che yoomu wana folioo, a hɔɔ cho ndu o dembe wo nyɛ sɔvɛ?
SƆƆŊ KULLOŊ
Baabuiyo pɛɛku naa le miŋ kaala yoomu Chɛhowa ke naa wo, miŋ nɔ bɛɛleŋ le ndu, nduyɛ miŋ manda ndu. O cho ko yoomu naa le naŋ nɔ miŋ manda le, kɛ ŋ nɔ miŋ manda vɛlɛ yoomula wanaa cheleŋnda.
Nyunala miiŋgaa choo laŋ
-
Le yɛɛ yoomu wanachioo cho yɛ nyɛ sɔvɛ bɛndu Chɛhowa o hɔl?
-
Vɛɛ kɔllo wa yɛ Chɛhowa te waŋndo dii pɛ wanachioo kpɛsɛkɛɛ?
-
Le yɛɛ ŋ nɔ yɛ balika melaa le yoomu Mɛlɛka ke naa wo?
CHƆƆLU SƆƆŊ PUM TOFA
Vɛɛ naŋ mel lɛ Chɛhowa balikaa le yoomu o ke naa wo?
Nuuviaa mulioo le nyunaa hoo, Baa mi Mɛlɛka mal pa wana tɛɛmbuu paandu folioo wo haki?
“Yɛɛ Baabuiyo Dimi yɛ a Foli Tɛɛmbaa Okɔɔ?” (Kɔ o tɛɛŋgei choo)
Pɛɛku ma sina mɛɛ yiyaŋ Mɛlɛka nɔ a yoomoo okɔɔ wo, mala naa miŋ hɛli pisulta kɛndɛlaŋ yɛ.
“A Nɔ Pa Ma Tosa Pisulta Luei Yoomu Numndo o Kpundɔɔ Niŋndaŋ?” (“Tiondoo!”, Saa 8, 2000)
Vɛɛ Baabuiyo mala yɛ wana cho yiyaŋndo le diinɔŋndo wo?
“I Yeema Mi Diinuŋ—Baabuiyo Nɔla Pa Mbo Mala Ya Mi Soliŋ Yiyaŋndo Hoo o Kɔl?” (Kɔ o tɛɛŋgei choo)
a Chɛhowa buulaŋ tau le wanaa cho a kɔl tambɛiyo wa. (Sam 34:18) O sina yiyaŋnda wɔɔŋnda huŋ naa o kɔl le diinɔŋndo laŋ. Nduyɛ o yeema mbo mala naa. Le chɔɔ mɛɛ o mala naa miŋ siŋga yiyaŋnda waa ndoo yɛ, tofa buŋgɛi hei “I Yeema Mi Diinuŋ—Baabuiyo Nɔla Pa Mbo Mala Ya Mi Soliŋ Yiyaŋndo Hoo o Kɔl?” I cho o fondaa hoo, “Chɔɔlu Sɔɔŋ Pum Tofa” o suɛi lebolle hei bɛŋgu.
b Chɛhowa nɔla mbo mal wanaa tɛɛmbuu niŋ folilaŋ paandu wa haki. Lelaŋ a nɔ ma hiu kɔllo tambu le. Le chɔɔloo sinaa a hei okɔɔ, tofa buŋgɛi hei, “Yɛɛ Baabuiyo Dimi yɛ a Foli Tɛɛmbaa Okɔɔ?” I cho o fondaa hoo, Chɔɔlu Sɔɔŋ Pum Tofa o suɛi lebolle hei bɛŋgu.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
