SUƐI LEBOLII 40

Vɛɛ Naŋ Wa yɛ a Diandaa Mɛlɛka o Hɔl?

PILEI

Yiyaŋndɔ maa kala chuaa cho po ndɔ o kaala wo toosiaa le kɔlaŋ o sukuu. O pulu po ndɔɔ nduyɛ mbo wou ndu nyɛla diandaa laŋ. Hei tosa mi po ndɔɔ wa kɛndiaa, nduyɛ mi acheleŋnda che maa wanaa velu ndu wa cho ndu chaa biyɔɔ. Lende koni, Finya naa kaalaa Chɛhowa yeema naa miŋ wa a diandaa o dialloŋ niŋ a o kaa niŋ. Te ŋ wa pɛ a diandaa, tɔnɔɔ o cho le naa ni, nduyɛ miŋ tosa mbo sɔla bɛɛleŋ tau.

1. Vɛɛ naŋ nɔla yɛ miŋ wa a diandaa?

Chɛhowa dimul naa aa: “La nɔ mi la wa a diandaa.” (1 Pitɛ 1:16) Le miŋ wa a diandaa, ŋ nɔ miŋ tosa mi dialuŋ naŋ a kaala naalaŋ bɛɛ wa walaŋ. Dialuŋ naŋ nɔla miŋ wa ŋ diandaa te ŋ wa pɛ pulɔŋndo lepaa o lepaa nduyɛ miŋ wa nyɛla naalaŋ tɔɔ. Ŋ nɔ miŋ kɛsi fondaŋ naŋ cho wo a nyɛm naŋ nyaanaŋndoŋ ŋ diandaa, nduyɛ mi nyɛ o nyɛ wa kpɛ kpɛ. Ŋ nɔ vɛlɛ miŋ yɔŋguŋ le Toŋgo leMasaa dindioo. Te ŋ kɛsi pɛ dialuŋ naŋ, fonda naŋ cho wo, a nyɛm naŋ nyaanaŋndoŋ ŋ diandaa, miŋ tosa mi Chɛhowa sɔla bɛɛleŋ tau.—2 Kɔliŋtiaŋ 6:3, 4.

2. Le miŋ wa a diandaa, kaala yɛɛ naŋ nɔ yɛ miŋ fafaŋ?

Baabuiyo dimi maa naŋ nɔ miŋ mal “nyɛ o nyɛ nɔɔliaa dialuŋ naŋ a yiyaŋnda naalaŋ.” (2 Kɔliŋtiaŋ 7:1) Le hei, nyɛ o nyɛ wa pɛ maa mbo tɛɛmbuu dialuŋ naŋ a yiyaŋnda naalaŋ, ŋ nɔ miŋ kindiŋ kpoke le miŋ fafaŋ ndu. Yiyaŋnda naalaŋ la nɔ mi la nɛŋi Chɛhowa kɔllo. Lelaŋ, mɛɛ miŋ kindiŋ o nɛi o nɛi niŋ le yiyaŋnda wɔɔŋndaŋ soliŋndo o kɔl. (Sam 104:34) Ŋ nɔ vɛlɛ miŋ wa diomnda wɔɔŋndaŋ soliŋndo o sondo le.—Nuawɔ Koloosiaŋnda 3:8.

Yɛɛ cheleŋ nɔla yɛ vɛlɛ mbo nɔɔliaa dialuŋ naŋ a kaa naa? Nyɔɔŋ pum cho te ŋ de muŋ pɛ ŋ nɔɔliaa dialuŋ naŋ. Lelaŋ ŋ nɔ miŋ fafaŋ nyɔɔŋ muŋ: Sikɛɛtiiyo, taaŋ bɛndoo, taaŋ heelaŋndo, kauve sɔsaa, a koowaŋ chuaa o nɛi bɛnda le wo choo. Te ŋ fafaŋ pɛ nyɔɔŋ muŋ, ŋ cho nɔ kɛndiaa kɛndɔɔ, nduyɛ miŋ chɔm maa ŋ nɔ bɛɛleŋ le yoomu Mɛlɛka ke naa wo. Ŋ nɔla vɛlɛ miŋ wa a diandaa o kaa niŋ te ŋ kindiŋ pɛ kpoke miŋ mal kaala nɔɔlɛilaŋ ndaŋ. Laŋ la cho ni, pisultaŋ a labɛŋguniŋndo a wunduma tum fonduaŋ tofaa. (Sam 119:37; Ɛfisiaŋnda 5:5) I ve suɛi bɛɛŋ bɛɛŋ le kaalaŋ ndaŋ malɔɔ le. Kɛ Chɛhowa nɔla mbo mala naa le miŋ mal taŋ.—Nuawɔ Aisaya 41:13.

CHƆƆLU YAASIAA

Pɛɛku ma sina mɛɛ diondɔɔ o dialloŋ niŋ chuu Chɛhowa saŋgalaa yɛ, nduyɛ ma che nyɛ mala naa miŋ mal kaala nɔɔlɛilaŋ ndo.

3. Diondɔɔ o dialloŋ niŋ tosa mi Chɛhowa sɔla bɛɛleŋ

Ŋ nɔla miŋ sina mɛɛ Chɛhowa che diondɔɔ yɛ, te ŋ pɛɛku pɛ a sawala o ke sindɛ Isɔluɛiya laŋ okɔɔ. Nuawɔ Ɛsɔdɔɔ 19:10, NWT a 30:17-19, okoŋ mi la suukaŋ o nyunalaŋ ndaŋ choo:

Vɛɛ bolii Baabuiye hei chɔm yɛ yiyaŋ Chɛhowaa a mandaŋndo okɔɔ?
Yɛɛ ŋ nɔ yɛ ma wa tosaa lɔɔlɔɔ le ma wa o diandaa?

Mandaŋndo cho suɛi bɛɛŋ te. Teleŋndo a wallo pila yeemaŋ ni le miŋ wa a diandaa. Kɛ ba o ba naŋ wa, ŋ nɔla miŋ wa a diandaa o yɔŋ bɛɛ miŋ nɔla sɔla tau le. Handu VIDUEIYO, okoŋ mi la suukaŋ o nyunaa hoo choo:

VIDUEIYO: Mɛlɛka Kaala Wanaa Diandaa (4:10)

Te nyɛm naŋ wa pɛ kpɛ kpɛ nduyɛ miŋ wa ŋ diandaa, vɛɛ keŋ piiliaŋ yɛ wali naa dimiaa yooŋgu kɛndɔɔ?

4. Mal kaala nɔɔlɛilaŋ

Chɛhowa nɔla mbo mala naa miŋ mal kaa nɔɔlɛi kɛ kɛ

Te a wa pɛ sikɛɛtiiyo a taando kolɔɔ, ɔɔ koowaŋ chuaa o nɛi bɛnda le wo choo le yelelaŋndo, mii wa ikala le kaa hoo malɔɔ. Kɛ yɛɛ nɔla yɛ mbo mala num le ndu malɔɔ? Tofawɔ ma che mɛɛ kaalaŋ ndaŋ la paaliaŋ num yɛ. Nuawɔ Maatiu 22:37-39, okoŋ mi la suukaŋ le sinaa mɛɛ sikɛɛtiiyo, taaŋ bɛndoo, ɔɔ koowaŋ chuaa o nɛi bɛnda le wo choo paaliaŋ . . .

chaŋyɛi numnde a Chɛhowa yɛ.
yuŋgu numndo vɛlɛ a wanaa cheleŋnda yɛ.

Tosa kɛɛsiaa mala num ma tiu kaa nɔɔlɛiyo ba wo. a Handu VIDUEIYO.

VIDUEIYO: Yɔŋguŋ o Pɛɛku Kala Kalaa Chuaa Niŋ (2:47)

Nuawɔ Filipiaŋnda 4:13, okoŋ mi la suukaŋ o nyunaa hoo choo:

Vɛɛ piɛileŋ lɔɔlɔɔ, Baabuiyo pɛɛkoo, a kɔlaŋ o bɔŋaŋndaŋ mala yɛ waŋndo mbo mal kaa nɔɔlɛiyo?

5. Chɔulaba yiyaŋnda nɔɔlɛilaŋ a kaala nɔɔlɛilaŋ

Nuawɔ Koloosiaŋnda 3:5, okoŋ mi la suukaŋ o nyunalaŋ ndaŋ choo:

Vɛɛ naŋ looku yɛ sina maa wunduma tum fonduaŋ nuaa, sɔɔŋ kpeeŋiaa waŋndo yeemɛi yoŋ yɔŋndo, a pisultaŋ a labɛŋguniŋndo cho nyɛ nɔɔlɛi Chɛhowa o hɔl?
A yiyaŋ pa maa i cho isɔvɛ le mi Chɛhowa yeema naa miŋ wa a diandaa o kaa niŋ? Le yɛɛ ŋ dimi yɛ lende?

Tofawɔ ma che mɛɛ wana chɔulaba yiyaŋnda nɔɔlɛilaŋ yɛ. Handu VIDUEIYO.

VIDUEIYO: Faŋaŋ Kaala Kuuna Num Lo Lechoo Wo Chɔmndo wo Kɔɔli (1:51)

Mi Chiisu soliŋ tamaseliiyo kpeku le naa chɔmndo maa, le miŋ wa a diandaa o kaa niŋ, ŋ nɔ miŋ tosa lamamɔɔ le. Nuawɔ Maatiu 5:29, 30, okoŋ mi la suukaŋ o nyunaa hoo choo:

O cho dimi le Chiisu wa maa naŋ nɔ miŋ kelu falei naa o ŋdial miŋ viou le. Kɛ dimioo o wa ni maa ŋ nɔ miŋ tosa nyɛ chɔ chɔ le kaala nɔɔlɛilaŋ malɔɔ. Yɛɛ waŋndo nɔ yɛ mbo tosa le yiyaŋnda wɔɔŋndaŋ keleŋaa soliŋndo o kɔl? b

Te o yɔŋ pɛ maa a cho fafalaa le yiyaŋnda nɔɔlɛilaŋ soliŋndo o kɔl, mɛɛ loonuŋ maa Chɛhowa cho chɔɔ kindi kindiŋ ŋ cho wo. Nuawɔ Sam 103:13, 14, okoŋ mi la suukaŋ o nyunaa hoo choo:

Te o yɔŋ pɛ maa a cho chɔulabaa le kaa nɔɔlɛiyo malɔɔ, vɛɛ bolle Baabuileŋ ndeŋ le mala yɛ num le ma hiou lachi a kindiŋndo?

A del pɛ, a nɔla vɛlɛ ma chɛŋ!

Te a wa pɛ kindiŋndo le kaa pum malɔɔ, haupa ma kuɛ le yiyaŋndo aa, ‘Mbɔ ya I bumba, I tiu lɛ niŋ ba le ndu malɔɔ le.’ Te waŋnda wa pɛ kilulaŋndo o kiltaŋ niŋ mi opilɛ boŋ mbo del, koŋ sim naa maa o nɔla mbo hiou lachi a kiltaŋ te le. Nduyɛ o miiŋgu vɛlɛ kɔɔli mbo kɔ kandu pila le. O nɛi pilɛ koŋ choo, te ŋ wa pɛ kindiŋndo le kaa nɔɔlɛiyo malɔɔ kɛ miŋ miŋgi vɛlɛ balaŋ leniŋ, koŋ chɔm naa maa ŋ nɔla lɛ miŋ mal ndu le le. Nduyɛ maa kindi kindiŋ naŋ wa paandu wo kpou kuɛŋnuŋ fondo fuu le. Wana o wana bianduŋ. Lelaŋ, biondɔŋndo mala naa le hiouwɔɔ lachioo tosaa. Wu ŋdial te. Chɛhowa cho num mala ma mal kaa nɔɔlɛi koŋ.

TE WAŊNDO DIMI PƐ AA: “I chii niŋ dɛli a kaa hoo. Lelaŋ I nɔla lɛ mi mal ndu le.”

Bolle Baabuile kuɛɛ ŋ soliŋ yɛ kpeku le ndu malaa mbo sina maa, Chɛhowa nɔla mbo mala ndu mbo mal kaa koŋ?

SƆƆŊ KULLOŊ

Miŋ nɛŋi Chɛhowa kɔl te ŋ kɛsi pɛ dialuŋ naŋ, yiyaŋnda naalaŋ, a kaala naalaŋ la diandaa.

Nyunala miiŋgaa choo laŋ

Le yɛɛ i cho yɛ suɛi sɔvɛ le miŋ wa a diandaa?
Vɛɛ naŋ wa yɛ a diandaa o dialloŋ niŋ?
Vɛɛ ŋ tosa yɛ mi yiyaŋnda numndaŋ a kaala numndaŋ la wa la diandaa?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Nyuna Chɛhowa le mbo mala num ma sina naa ŋ nɔ ma tosa hiouwɔɔ lachioo le waa o diandaa wa.

Nyɛ cheleŋ:

Your other goal

CHƆƆLU SƆƆŊ PUM TOFA

Sɔɔŋ kuɛɛ ŋ tosa yɛ le waa o diandaa o dialloŋ niŋ, o yɔŋ bɛɛ ma nɔla sɔla tau le?

Mandaŋndo a Kɛndiaa—Balaŋ Pulɔɔ 3:01

Pɛɛku ma sina nɛila mala num ma mal sikɛɛtiiyo ɔɔ taaŋ bɛndoo kolɔɔ wo.

“Vɛɛ Ŋ Nɔla yɛ Ma Mal Sikɛɛtiiyo Kolɔɔ?” (“Tiondoo!”, Bukuloo 2010)

Pɛɛku wɔ ma che nyɛ wunduma tum fonduaŋ nuaa ma tosal wana wo.

“Wunduma Tum Fonduaŋ Nuaa—Ma Wɔu ɔɔ Ma Wɔu Le?” (Bandu Mɛŋgɛlaa, Naandɔɔ 1, 2013)

Tofawɔ ma che nyɛ mala po pilɛ mbo mal wunduma tum fonduaŋ nuaa wo.

“I Bumba Fɛlɛŋ Teleŋnda Bɔɔbɔɔ Malaŋ Ya Mɛɛlu Niŋ Batiuwaa Sɔla” (Bandu Mɛŋgɛlaa No. 4 2016)

a Le sinaa nɛila mala num ma mal sikɛɛtiiyo kolɔɔ laŋ, tofa buŋgɛi hei, “Vɛɛ Ya Nɔla yɛ Mi Mal Sikɛɛtiiyo Kolɔɔ.” I cho o fondaa hoo, Chɔɔlu Sɔɔŋ Pum Tofa o suɛi lebolle hei bɛŋgu.

b Le sinaa nyɛ mala waŋndo mbo mal pisultaŋ a labɛŋguniŋndo wo, tofa buŋgɛi hei, “Vɛɛ Ya Mallɛ Pisultaŋ a Labɛŋguniŋndo?” I cho o yauwo hoo niŋ, Nyunala Feleŋguaa Nyuna Laŋ—Mulila Mala Nda Laŋ, O Tasoo, buŋgɛi 25.

Naapum a Yeema Dɔɔ Vɛlɛ

NYUNALA WAŊNDA NYUNA LƆƆLƆƆ LAŊ

Yɛɛ Cho yɛ Pɛɛku Baabuiyo?

Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.

TUEI YOOMOO YEELA LEFAFƐƐŊ!—YAUWO LE BAABUIYO PƐƐKOO.