SUƐI LEBOLII 60
Hiou Lachi a Chɛhowa Sɔɔŋguuwo Ikɛi Kpɛɛluŋ
Chɔŋ a teleŋ ŋ kandu Baabuiyo pɛɛkoo o yauwo hoo niŋndo, a sina niŋ sɔɔŋ bɔɔbɔɔ a Chɛhowa okɔɔ. Sɔɔŋ ŋ pɛɛku muŋ ndoŋ tosa ma chɔɔlu ndu kaala. Naapum muŋ nyindu num pɛŋ ni ma yɔŋguŋ o ndu lo, nduyɛ ma sɔla yiŋɔɔ. Kɛ te a tosa wɔ lende le, kɛlɛŋgaa a cho niŋ dɔɔ yiyaŋndo le ndi hunɔɔ tosaa. Kɛ te a yiŋ pɛ, o cho lamɛɛlu le la cho laŋ te. A nɔla ma hiou lachi a Chɛhowa sɔɔŋguuwo ikɛi lefafɛɛŋ. Vɛɛ keŋ yɔŋnuŋ yɛ?
1. Le yɛɛ o bɛnda yɛ ma hiou lachi a chaŋyɛi numnde kindioo a Chɛhowa?
Ŋ nɔ miŋ tosa wallo kalaŋ le hiouwɔɔ lachi a chaŋyɛi nɛi kindioo a Chɛhowa. Le yɛɛ? “Yɔŋii naŋ mal laalaŋ naa” o ndu niŋ. (Hibuluiya 2:1) Yɛɛ mala yɛ naa miŋ hiou lachi a Chɛhowa piɛiyo o laalaŋndo choo? Ŋ nɔ miŋ wa a tuandaŋ o wali dimiaa yooŋgu kɛndɔɔ niŋ, nduyɛ miŋ chɔɔlu yɔŋgɔŋ le walta cheleŋ tosaa o wali Mɛlɛkaa niŋ. (Nuawɔ Filipiaŋnda 3:16.) Nyɛ o nyɛ tosa yoomoo o sɔvɛ mbo hiau Chɛhowa piɛiyo le!—Sam 84:10.
2. Yɛɛ cheleŋ naŋ nɔ yɛ miŋ hiou lachi a tosaa?
Mi che bɛɛ yauwo hoo hiŋ niŋ chuwɔɔ, kɛ a nɔ ma hiou lachi a yoomu numndo biyɔɔ o nɛi leKilisiɔŋndo choo. Baabuiyo dimi maa naŋ nɔ miŋ “wounuŋ wana chieeyɛi sɛnɛiye.” (Ɛfisiaŋnda 4:23, 24) Te a wa pɛ hiouwɔɔ lachi a Diom Mɛlɛkaa pɛɛkoo nduyɛ ma wa bɔŋaŋndaŋ biyɔɔ, a cho sɔɔŋ sɛnɛiyoŋ pɛɛku a Chɛhowa okɔɔ vɛlɛ a suliŋnda ndɔlaŋ. Kindiŋ ma chua suliŋnda ndɔlaŋ nduyɛ, ma dɔu laŋ o wali niŋ nyɛkɛndɛi o yoomu numndo niŋ. Hiou lachi a siŋgaŋnda yeemaŋ ndɔ num o ba laŋ tosaa le ma nɛŋi Chɛhowa kɔl.
3. Vɛɛ Chɛhowa mala yɛ num ma chɔɔlu ndu sɔɔŋguu ikɛi kpɛɛluŋ?
Baabuiyo dimi aa: “Mɛlɛka . . . ndupila cho nya siou pɛɛku. O cho tosa mi la sim yi, mbo luei nya yoomuaŋ, nduyɛ mbo tosa la hiiluŋ te.” (1 Pitɛ 5:10) Naa kpou mi tɔɔndaŋ ndaŋ la komal naa le tosaa sɔɔŋ wɔɔŋndoŋ. Kɛ mi Chɛhowa ke naa mala naŋ yeema wo le laŋ chɔulabaa. (Sam 139:23, 24) O chuel naa buŋgɛi maa, o cho naa ke yeemɛi a kpaayaa le hiouwɔɔ lachi a ndu piɛiyo o laalaŋndo choo.—Nuawɔ Filipiaŋnda 2:13.
CHƆƆLU YAASIAA
Tofawɔ ma che mɛɛ ŋ hiau lachi a Chɛhowa sɔɔŋguuwo ikɛi kpɛɛluŋ yɛ, nduyɛ ma che mɛɛ o duau num sala yɛ.
4. Hiou lachi a suukaŋndo nya chaaŋ num kɛndɔɔ
Piɛileŋ a Baabuiyo pɛɛkoo mala num niŋ ma simnuŋ chaaŋ o Chɛhowa. Vɛɛ sɔɔŋ muŋ nɔla yɛ miŋ chɔɔlu num mala ma sɔɔŋguu ndu ikɛi kpɛɛluŋ?
Nuawɔ Sam 62:8, okoŋ mi la suukaŋ o nyunaa hoo choo:
-
Le ma hiou lachi a chaŋyɛi kpɛɛluŋnde nɔɔ a Chɛhowa, vɛɛ ŋ nɔla yɛ ma tosa mi piɛile numndeŋ le chɔɔlu bɛnda?
Nuawɔ Sam 1:2, okoŋ mi la suukaŋ o nyunaa hoo choo:
-
Le ma hiou lachi a chaŋyɛi kpɛɛluŋnde nɔɔ a Chɛhowa, yɛɛ ŋ nɔ yɛ ma tosa le ma sɔla tɔnɔɔ tau, te a wa pɛ diomndaŋ veeloo o Baabuiyo niŋ?
Yɛɛ ŋ nɔ yɛ ma tosa le ma chɔɔlu tɔnɔɔ sɔla te a wa pɛ pɛɛkoo? Le chɔɔ sɔɔŋ muŋ ŋpum, handu VIDUEIYO, okoŋ mi la suukaŋ o nyunalaŋ ndaŋ choo:
-
Kɛɛsiaala kuɛɛ la cho yɛ o vidueiyo hoo niŋ ma yeema le laŋ dɔwɔɔ o wali niŋ?
-
Sɔɔŋ kuɛɛ ŋ yeema yɛ ma pɛɛku a muŋ okɔɔ?
5. Kɛsi kpeleŋndaŋ o Mɛlɛka piɛiyo niŋ
Te a kɛsi pɛ kpeleŋndaŋ le tosaa tau o wali Chɛhowaa niŋ, koŋ cho num mala ma tosa hiouwɔɔ lachioo. Handu VIDUEIYO, okoŋ mi la suukaŋ o nyunaa hoo choo:
-
O vidueiyo hoo niŋ, vɛɛ Kamɛluŋ sɔla yɛ tɔnɔɔ le kpeleŋndaŋ kɛsioo o Mɛlɛka piɛiyo niŋ?
O cho wana o wana le nɔla mbo kuɛ o lɛŋnde cheleŋ niŋ le yooŋgu kɛndɔɔ dimioo le. Kɛ o wa bɛɛ lende, naa kpou nɔla miŋ kɛsi kpeleŋnda naŋ nɔla miŋ komal taŋ. Nuawɔ Pulɔwaa 21:5, okoŋ ma yiyaŋ a kpeleŋnda ŋ yeema ma kɛsi o fondaŋ nda tiɔɔŋ ndaŋ ndo:
-
O kundaa niŋ.
-
O yooŋgu kɛndɔɔ dimioo niŋ.
A mɛɛ bolle Baabuileŋ ndeŋ le dimi yɛ, yɛɛnɛ mala yɛ num ma komal kpeleŋnda numndaŋ?
Kpeleŋnda ŋ nɔla ma kɛsi laŋ
-
Tosa hiouwɔɔ lachioo a mɛɛ ŋ piɛi yɛ.
-
Veelu diomndaŋ o Baabuiyo niŋ kpou.
-
Kindiŋ ma sina wana o wana o kundaa niŋ.
-
Tosa ma kandu waŋndo Baabuiyo pɛɛkoo.
-
Chua kɔɔfale malalaŋndeŋ ɔɔ kɔɔfale lɔɔlɔɔ leŋ.
-
Te puaapilɛnɔɔ ŋ cho ni, kindiŋ ma simnuŋ buɛi malalaŋndo.
6. Tuei yoomoo yeela lefafɛɛŋ!
Nuawɔ Sam 22:26, NWT, okoŋ mi la suukaŋ o nyunaa hoo choo:
-
Yɛɛ ŋ nɔ yɛ ma tosa le ma tuei yoomoo yeela suŋ suŋ a lefafɛɛŋ?
SƆƆŊ KULLOŊ
Hiou lachi a chaŋyɛi cho num tɛɛŋ nya Chɛhowa ve kindioo poŋ, nduyɛ ma kɛsi kpeleŋndaŋ o Mɛlɛka piɛiyo niŋ. Te a tosa lende pɛ, a cho yoomoo tueiyɔɔ yeela lefafɛɛŋ!
Nyunala miiŋgaa choo laŋ
-
Le yɛɛ ŋ nɔ yɛ tiindaŋndo maa Chɛhowa cho num mala ma hiou lachi a ndu piɛiyo o laalaŋndo choo?
-
Vɛɛ ŋ kindi yɛ chaŋyɛi cho num tɛɛŋ nya Chɛhowa ve?
-
Vɛɛ kpeleŋndaŋ kɛsioo o Mɛlɛka piɛiyo niŋ la mala yɛ num ma tosa hiouwɔɔ lachioo?
CHƆƆLU SƆƆŊ PUM TOFA
Yɛɛ Chɛhowa hiou yɛ chua o sɔvɛ, tosaa nyɛ nɛŋi ndu kɔllo wo lepilɛ kpe, ɔɔ hiouwɔɔ lachi a ndu piɛiyo o laalaŋndo choo haaa a yoomu naa mɛɛlulaŋ?
Wana cho Chɛhowa piɛiyo o laalaŋndo choo wo bɛɛ mi nyaale ndɔɔ hɛluŋ ndu lepum. Kɛ tofawɔ ma che mɛɛ o looku ndu sɔla yɛ.
Nyaaloo Miŋgioo Sɔlaa Sanaa o Pɛɛkoo Niŋ Vɛlɛ a Yiyaŋndo (5:25)
Vɛɛ ŋ kɛsi yɛ kpeleŋndaŋ o Mɛlɛka piɛiyo niŋ nduyɛ ma komal taŋ?
Le yɛɛ kaasoŋyɛi leKilisiɔŋnde yeemaŋ yɛ nduyɛ, yɛɛ mala yɛ num ma sɔla ndi?