BUŊGƐI 15
Le Yɛɛ Ŋ nɔ Yɛ Ma Lambaŋ Pɛɛkoo a Chɛhowa Okɔɔ?
1. Tɔnɔ yɛɛ ŋ sɔla yɛ te a labaŋ pɛ Baabuiyo pɛɛkoo?
I cho a tonya maa nyɛ ŋ pɛɛku o yauwo hoo niŋ a Baabuiyo okɔɔ wo, chɔɔlu kaala numndo kindi le Chɛhowa. Le miŋ lo o kaalaa choo le Mɛlɛka, mɛɛ miŋ tosa wallo. (Pitɛ Tasoo 2:2) Lambaŋndo Mɛlɛka naŋnɔŋndo ikɛi vɛlɛ a Diom ndɔɔ pɛɛkoo chɔm ni maa, ŋ nɔ tiindaŋndo le yoomu fafɛɛŋndo.—Nuawɔ Chɔŋ 17:3; Chudi 21.
Mɛɛ ŋ sɔla kɔlkaloo a Mɛlɛka okɔɔ fau, lende koni tiindaŋ numndo hiau lachi a kaloo ni. Tiindaŋ koŋ cho num mala ni ma nɛŋi Mɛlɛka kɔl. (Hibuluiya 11:1, 6) O cho num vɛlɛ mala ma mulul yɔŋ num wɔɔŋndo kɔɔ, okoŋ ma tosa siŋgaŋndaŋ o yoomu numndo niŋ.—Nuawɔ Walta Wanaa Chiisuaa 3:19.
2. Vɛɛ ŋ mala yɛ acheleŋnda a nyɛ ŋ pɛɛku a Mɛlɛka okɔɔ wo?
A tiuba ma luɛi o chaŋyɛi teŋgeŋnde niŋ nya Chɛhowa
O kpeekpei niŋ, nyɔɔ pila hɛnaŋ naa ni le acheleŋnda dimullo a nyɛ naŋ pɛɛku wo okɔɔ, taama taama yooŋgu kɛndɔɔ. Mɛɛ ŋ hiau lachi a Baabuiyo pɛɛkoo fau, lende koni ŋ sɔla kɔlkaloo ni. Koŋ mala num le laalaŋ ŋ nɔ o Chɛhowa niŋndo tɛɛsiaa o wanaa cheleŋnda lo vɛlɛ a yooŋgu kɛndɔɔ dimioo.—Nuawɔ Luomaŋnda 10:13-15.
Apum, o yuŋgu ndaa lo nda kandu yooŋgu kɛndɔɔ dimioo ni vɛlɛ a chaaŋaa ndaa. Kɛ mɛɛ ma chaa suɛi o ndalo. A nɔ ma pɛɛsa piɛile ndaleŋ te. A nɔ ma dimul nda a nyɛ Mɛlɛka dimi le hunɔɔ tosaa wo okɔɔ. Loonuŋ maa kaa num kɛndɔɔ waŋnda cho nuaa ni mbo hiau nyɛ ŋ cho dimioo wo.—Nuawɔ Timoti Diiŋ Ndɔɔ 2:24, 25.
3. Chaŋyɛi kuɛɛ ŋ tuɛiyɛ yeela a Mɛlɛka?
Le mi chaŋyɛi nya Mɛlɛka hindu, mɛɛ ma wa Diom ndɔɔ pɛɛkoo. Koŋ tosa ni ma luɛi o chaŋyɛi teŋgeŋnde niŋ nya Chɛhowa. Hei mala vɛlɛ num ma wa waŋndo opilɛ o yuŋgu ndɔɔ tɛɛŋ.—Nuawɔ Kɔliŋtiaŋ Diiŋ Ndɔɔ 6:18.
4. Vɛɛ ŋ looku yɛ hiouwɔɔ lachioo tosa?
A tiuba ma hiou lachi o chaŋyɛi numnde niŋ nya Mɛlɛka te o yɔŋ pɛ ma lambaŋ Baabuiyo pɛɛkoo. (Hibuluiya 5:13, 14) Nyuna Seiyaa Chɛhowaa opilɛ le mbo mala num Baabuiyo pɛɛku o yauwo hoo niŋ Yɛɛ Kpeekpei Baabuiyo Pɛɛku Yɛ? Mɛɛ ŋ pɛɛku Diom Mɛlɛkaa fau, lende koni yoomu numndo hiau lachi a waa o kɛndɛ ni.—Nuawɔ Sam 1:1-3; 73:27, 28.
O Chɛhowa lo yooŋgu kɛndɔɔ chɛŋ ni. Chɛhowa yɛ, Mɛlɛka kɔl nyuloo o cho ni. Te a naŋnuŋ pɛ wanaa Mɛlɛkaa ikɛi, mɛɛ ndu ŋ naŋnuŋ koŋ ikɛi ni. (Hibuluiya 10:24, 25) Te o yɔŋ pɛ ma hiou lachi a sɛmbɔɔ dɔuwɔɔ le Chɛhowa kɔllo nɛŋioo, mɛɛ a cho yoomu kpeekpei nɔ lamɛɛlu le wo sɔla. Nyɛ naŋ tau le tosaa wo choni, sɔɔŋgoo Mɛlɛka ikɛi kpɛɛluŋ.—Nuawɔ Timoti Tasoo 1:11, NW; 6:19.
Naapum a Yeema Dɔɔ Vɛlɛ
A NAA OKƆƆ
Le yɛɛ ŋ Pɛɛku yɛ Baabuiyo?—Ndu Kpou
Baabuiyo cho waŋnda o miiliɔŋndaŋ niŋ chieeŋndo balɔɔ silɔ mulilaŋ kioo le nyunala sɔvɛlaŋ o yoomoo niŋ. A yeema ma wa waŋndo opilɛ?
