BUŊGƐI 8
Le yɛɛ Mɛlɛka Chɛllɛ mi Dɛnɛwɔɔŋndo a Nyɛpalaa Wa?
1. Vɛɛ dɛnɛ wɔɔŋndo kanduŋ yɛ?
Mɛlɛka chɛl le mi wanachioo wa masa. Le yɛɛ? Le chɔmndo maa masale wanachioo tiuba le bahawɛila wanachioo soli le
Teleŋ Setana dimul Ifi choolaŋndo dɛnɛ wɔɔŋndo kanduŋ ni. Maalikɛinɔ kɛndɔɔ pila Setana wa ni, kɛ “o sim o tonya choo le.” (Chɔŋ 8:44) Mbo yeema le mi waŋnda ke ndu saŋgala cho le Mɛlɛka wo. Okoŋ, mbo dimul Ifi choolaŋ le mbo diikuŋ ndu, kɛ o diikuŋ Mɛlɛka le. Mi Ifi yaŋ Setana nilaŋ. Mi Adam bɛɛ tual laa ndɔ kɔɔli le Mɛlɛka kiɔɔ diikɔŋndo. Kɛɛsiaa Adam tosa hoo mbo tual laa ndɔ kɔɔli wo chuu naa hau nyɛpalaa a piɔmndo ni.—Nuawɔ Chɛnɛsee 3:1-6, 19.
Mɛɛ Setana dimul Ifi maa o kɛɛ Mɛlɛka diikɔŋ, simullo o wa koŋ di Mɛlɛkaa le waa Masa Kpou Kpou Wo ni. Wanaa siaama tol hau Setana kɔɔli. A tol ndu haa kɔɔli wa bɛɛ kɛɛ di Mɛlɛkaa le mbo wa Masa. Lelaŋ ‘Setana cho hau masaa ni le chieeŋndo hoo.’—Nuawɔ Chɔŋ 14:30; Chɔŋ Tasoo 5:19.
2. Baa Toosiaa Mɛlɛkaa ndoo nɔ pa sɔŋndo?
Toosiaa Mɛlɛkaa waŋnuŋ walaŋ. Waŋchieeya a maalikɛiya ndaa nɔla sawala Mɛlɛkalaŋ biyɔɔ nyɛkɛndɛi. (Ditɔnɔmii 32:4, 5) Mɛɛ Mɛlɛka toosiaa naa, mbo ke naa dioo le miŋ tosa chuaŋ chuaa o kɛndɔɔ tɛɛŋ a o wɔɔŋndo. Di o ke naa hoo wo mala naa le miŋ chɔm kaalaa le ndu.—Nuawɔ Chemisi 1:13-15; Chɔŋ Tasoo 5:3.
3. Le yɛɛ Mɛlɛka chɛllɛ dɛnɛ wɔɔŋndo tei boondei hei?
Chɔŋ a teleŋ suɛi keŋ yɔŋnuŋ Idɛŋnde, Chɛhowa chɛl mi waŋnda tɛɛndaŋ di ndɔɔ le waa masa. Le yɛɛ? Le chɔmndo maa masale ndɔleŋ kinɛi le chuu waŋnda tɔnɔɔ ni. (Ikilisiaatii 7:29; 8:9) Ŋ cha hei kpendekele. O wɔsila 6,000 hiou laŋ niŋ, masale wanachioo le tiuba le nyɛpalaa chii le. Le tiuba le chɔulaŋ, naalaŋ, sawala tɛɛmbaalaŋ vɛlɛ a kafalaŋ chii le.—Nuawɔ Chɛluimaya 10:23; Luomaŋnda 9:17.
Masale wanachioo le dema le nyɛpalaa chiiyo, kɛ masale Mɛlɛkaleŋ ndeŋ le cho dema le. Le cho chuu wanaa chɛlteŋ nda tɔnɔɔ. (Aisaya 48:17, 18) O lo niŋ nyɛ biŋgiinii, Chɛhowa cho hunɔɔ masɛi wanachioo pesi wɔ wɔ. Wanaa chɛl le mi Mɛlɛka wa nda choo masa wa kinɛi cho lo o chieeŋndo hoo choo ni.—Aisaya 11:9. Nuawɔ Sɔɔŋ Chɔɔmaŋndoŋ 11:15.
Tofa vidueiyo Le Yɛɛ Mɛlɛka Chɛllɛ mi Dɛnɛ Wɔɔŋndo a Nyɛpalaa Wa?
4. Yɛɛ biuwɔŋ Mɛlɛka cho wo nyindu yɛ naa le tosaa?
Setana dimi maa te o ve nyɛm kiɔɔŋ te, ŋ tiuba miŋ piɛi Mɛlɛka a kɔl te. A tiuba ma chɔm maa choolaŋ o dimi ni? Kpeekpei a tiuba! O biuwɔŋ Mɛlɛka cho hoo wo niŋ, ŋ nɔla miŋ chɔm te ŋ chɛl masale ndɔleŋ ɔɔ masale wanachioo. Ŋ nɔla miŋ chɔm kpendekele masale naŋ hɛlileŋ a mɛɛ naŋ bii yoomula naalaŋ yɛ.—Nuawɔ Choobu 1:8-12; Pulɔwaa 27:11.
5. Vɛɛ naŋ chɔm yɛ maa Mɛlɛka cho Masa naa ni?
Chuaŋ chua naŋ cho tosa wo cho chɔm ni maa ŋ yeema mi Mɛlɛka wa naa choo Masa
Te ŋ chɛl pɛ Mɛlɛka maa Masa naa, ŋ nɔ miŋ nuuviaa piɛile tonyaleŋ. Piɛile tonyale pɛɛku waŋnda nyɛ kpeekpei Baabuiyo dimi wo. O cho ko le dimioo a sondo le, kɛ ma tosa nyɛ nda cho pɛɛkoo wo. (Chɔŋ 4:23) Te ŋ yeema a masale Setanaleŋ te, mɛɛ ŋ nɔ miŋ soli balaŋ o chɔulaba lemasa chieeŋndo hoo niŋ, vɛlɛ a chɔulaŋ. Lende ko Chiisu bɛɛ tosa ni.—Nuawɔ Chɔŋ 17:14.
Kaa nɔɔlɛiyo, yɔŋultaŋ, a sɔɔŋ wɔɔŋ kɛ kɛ fee, o kpaaya Setanaa niŋ ŋ cho hau yɔŋnɔŋndo ni. Te o wa pɛ miŋ soli balaŋ o sɔɔŋ waa naa niŋ, wanayaŋ naŋ a chaaŋaa naa kandu naa mamɔɔ. (Pitɛ Tasoo 4:3, 4) O hei niŋ, ŋ nɔ miŋ tosa chuaŋ chuaa. O naŋ miŋ chua le waa diompilɛ a wanaa nɔ kaalaa le Mɛlɛka wa. Ŋ nɔ miŋ diikuŋ sawala Mɛlɛkalaŋ. Setana dimi vɛlɛ maa wana o wana nɔla mbo piɛi Mɛlɛka o nyɛ kindilaa bɛŋgu le. Kɛ te ŋ tosa hei pɛ, mɛɛ ŋ chɔm maa choolaŋ o dimi ni.—Nuawɔ Kɔliŋtiaŋ Tasoo 6:9, 10; 15:33.
Kaala Mɛlɛka Chɔm naa wo ke naa tiindaŋndo maa nyɛpalaa a dɛnɛ wɔɔŋndo cho suŋ chuuwɔɔ. Wanaa chɔm maa a laalaŋ hei ya cho hunɔɔ yoomoo tueiyɔɔ yeela o lɛŋndeŋ choo lefɛɛŋ.—Nuawɔ Chɔŋ 3:16.
