Chiisu wa fɛŋ achal o inyinaya o choo choo niŋ tuupa ma vialu ndu o chieeŋndo choo. O kendu yoomu ndɔɔ lɛŋ naŋ maa naa ŋwaŋ chiee le. (Chɔŋ 8:​23) Ndu wa wana tase Mɛlɛka toosiaa wo ni. Ndu mala niŋ Mɛlɛka nyɔɔŋ kpou toosiaa ni. Ndupilɛ kpe Chɛhowa Mɛlɛka toosiaa a ba ndɔ ni. Nyɛ koŋ o bɛnda ni mbo sɔla veelɔŋndo aa, Po pilɛ kpe Mɛlɛkaa. (Chɔŋ 1:14) Sondo Suaa Mɛlɛkaa Chiisu wa ni. Nyɛ koŋ o sɔla vɛlɛ veelɔŋndo ni aa “Diomndo.”​—Nuawɔ Pulɔwaa 8:22, 23, 30; Kolosiaŋnda 1:15, 16.

Mi Mɛlɛka chua yoomu Po ndɔɔ mbo wou ndu chua Chuunɔ pum o dembe. Chuaa hoo ndoo sina wɔ suɛi wana pɔnɔ le. Diola ndɔlaŋ aa Meele. Lelaŋ, Chiisu nɔ finya wana chiee le. (Luku 1:30-35) Le sabulaŋ la yaa Chiisu hiŋ o lɛŋndeŋ choo ni. (1) Le mbo pɛɛku waŋnda tonya cho a Mɛlɛka okɔɔ wo, (2) le mbo kɛsul naa taamaseliiyo mɛɛ naŋ looku miŋ tosa hɛnaŋ Mɛlɛkaa yɛ, o yɔŋ bɛɛ miŋ wa o nyɛkindilaa bɛŋgu, (3) le mbo soliŋ yoomu ndɔ walaŋndo sala le naa “baŋaa.”​—Nuawɔ Maatiu 20:28.

Baŋaa cho machuaa nyɛ waŋndo yɔŋgu le waŋndo solioo o kpundɛ piɔmndo niŋndo. (Ɛsɔdɔɔ 21:29, 30) Piɔmndo a yuuwɛi ve tuu Mɛlɛka le wanachioo le. Vɛɛ naŋ looku yɛ hei sina? Mi Mɛlɛka dimul wana chiee tase o toosiaa wo, Adam maa te o tosa pɛ “hakioo,” o cho wu. Lelaŋ te Adam ndoo tosa haki le, o ve wu le. (Chɛnɛsee 2:​16, 17; 5:5) A mɛɛ Baabuiyo dimi yɛ, mi piɔmndo “huŋ” o chieeŋndo niŋ. Mi haki Adam ndo tiu  niŋ hau waŋchieeya choo kpede. Paawa hakioo cho yɛ piɔmndo ni. Nyɛ koŋ naŋ yeema wana baŋaa ni le miŋ fula o piɔm Adam luei naa hoo niŋndo.​—Nuawɔ Luomaŋnda 5:12; 6:23.

Nɛɛnɛ cho yɛ niko naa baŋa o kpundɛ piɔmndo hoo niŋ? Te ŋ vi pɛ, mɛɛ paawa naa hakioo cho koŋ ni. Wana hakioo opilɛ bɛɛ tiuba mbo vi le hakila waŋnda le.​—Nuawɔ Sam 49​:7-9.

Wanaa lahakiaa naŋ cho ni. Chiisu ndoo nɔ haki kposoŋ te. Lelaŋ, ndoo nɔ mi ndoo vi le, kanifuule o tosa haki le. Le hakila naalaŋ Chiisu vi ni. Mɛlɛka chɔm kaala ndɔ bɛndoo le naa a mɛɛ o yɔŋ Po ndɔɔ mbo huŋ wu le naa yɛ. Mi Chiisu bɛɛ chɔm naa kaalaa. Ndu cho ni, mbo diikuŋ Finya ndɔ, okoŋ, mbo chɛl le mbo vi le hakila naalaŋ.​—Nuawɔ Chɔŋ 3:​16; Luomaŋnda 5:​18, 19.

Tofa vidueiyo Le Yɛɛ Chiisu Vi Yɛ?

Teleŋ Chiisu wa o chieeŋndo hoo choo wo, mbo siŋgi wanaa lanaa, mbo miŋgi waŋvilɛiya yoomu, nduyɛ mbo soli wanaa wa o kpundɔɔ niŋnda. Hoo chɔm nyɛ Chiisu huŋ niŋ mbo tosa o chilaŋ niŋ le wanaa diikaŋnda wa. (Maatiu 15:30, 31; Chɔŋ 5:28) Mɛɛ Chiisu vi, mi Mɛlɛka miŋgi ndu yoomu o inyinaya. (Pitɛ Tasoo 3:18) Okoŋ, mi Chiisu kɔ chal chumndo o bakɛndɛ Mɛlɛkaa choo. O cho lo chumndo tei mi Chɛhowa ke ndu dioo le mbo wa Masaa o lɛŋndeŋ choo kpou. (Hibuluiya 10:12, 13) Mɛɛ naŋ suaa bɛɛ naa yɛ, Chiisu cho niŋ masa o Masale Mɛlɛkaleŋ choo o choo choo niŋ. Nduyɛ, buɛiyaa nduaa cho yooŋgu kɛndɛ koŋ keiyo dimioo o chieeŋndo choo kpede.​—Nuawɔ Daaniɛɛ 7:​13, 14; Maatiu 24:14.

O lo niŋ nyɛ biŋgiinii mi Chiisu soliŋ kpaaya Finya ndɔ ke ndu wo kpeku. O cho hunɔɔ nyɛpalaa chii vɛlɛ a wanaa cho hunɔɔ a nyɛpalaa wa. Wana o wana chɔm laalaŋndo o Chiisu niŋ pɛ, a cho yoomu fafɛɛŋndo sɔla o kpele hɛnɛkiɔɔ niŋ o chieeŋndo hoo choo.​—Nuawɔ Sam 37:​9-11.