BUŊGƐI 2
Nɛɛ Cho Yɛ Mɛlɛka?
1. Le yɛɛ naŋ piɛi yɛ Mɛlɛka?
Mɛlɛka tonyaa toosiaa nyɔɔŋ kpou ni. O nɔ kandɔŋ te, o nɔ lamɛɛlu le. (Sam 90:2) Ndu cho puundule yooŋgu kɛndɔɔ o Baabuiyo niŋ ni. (Timoti Tasoo 1:11, NW) Mɛlɛka ke naa yoomoo ni, lelaŋ ndu koni naŋ nɔ ni miŋ piɛi.—Nuawɔ Sɔɔŋ Chɔɔmaŋndoŋ 4:11.
2. Vɛɛ Mɛlɛka cho yɛ?
O inyinaya Mɛlɛka cho ni. Lelaŋ, wana o wana chiee chi ndu le. Yoomu ndɔɔ cho maa yoomu wana chiee le. (Chɔŋ 1:18; 4:24) Kɛ, ŋ cha suliŋnda Mɛlɛkalaŋ o nyɛm o toosiaa woŋ niŋ. Le taamaseliiyo, nyɛmdiaŋ yɛ yɛ o toosiaa woŋ, a bil lapeeŋgoo chɔm naa maa Mɛlɛka nɔ kaalaa a taasioo. Mɛɛ o toosiaa chieeŋndo yɛ chɔm naa vɛlɛ maa Mɛlɛka nɔ kpaayaa.—Nuawɔ Luomaŋnda 1:20.
Ŋ chɔɔlu pɛɛku a suliŋnda Mɛlɛkalaŋ okɔɔ te ŋ wa pɛ nuaa o Baabuiyo niŋ. Baabuiyo dimul naa nyɛ Mɛlɛka yeema wo vɛlɛ a nyɛ o yeema le wo. O dimul naa vɛlɛ mɛɛ o bii waŋnda yɛ, nduyɛ a mɛɛ o tosa sɔɔŋ lepum yɛ.—Nuawɔ Sam 103:7-10.
3. Baa Mɛlɛka nɔ pa diolaŋ?
Mi Chiisu dimi o piɛileŋ niŋ aa: ‘Mɛlɛka finya naa, num cho hoo o fondaŋ numndo wo, diola numndaŋ la sɔla diondɔɔ.’ (Maatiu 6:9) Mi che bɛɛ naa mi waŋnda veelu Mɛlɛka o nɛila yɛ yɛlaŋ choo, kɛ diolaŋ la pilɛ kpe o nɔ ni. Sɔɔŋ maŋgalaŋ kpou nɔ mɛɛ nda veelu diola laŋ yɛ. O Kisiei niŋ, ŋ veelu laŋ aa Chɛhowa. Apum veelu laŋ aa “Yaawɛɛ.”—Nuawɔ Chɛnɛsee 4:26.
O Baabuilaŋ lapum niŋ, mi waŋnda faŋa diola Mɛlɛkalaŋ ma miŋgi Masanɔɔ ɔɔ Mɛlɛka. Kɛ teleŋ Baabuiyo kandu poonyiaŋndo wo, ma poonyiaa diola Mɛlɛkalaŋ leniŋ haaa le 7,000. Teleŋ Chiisu wa waŋnda pɛɛkoo o lɛŋndeŋ choo wo bɛɛ, mbo chɔm nda diola Mɛlɛkalaŋ kpendekele.—Nuawɔ Chɔŋ 17:26, NW.
Tofa vidueiyo Baa Mɛlɛka Nɔ Pa Diolaŋ?
4. Baa Mɛlɛka buulaŋ pa kpeekpei a naa okɔɔ?
Maa finya kaalaa, Mɛlɛka cho nyɛ o nyɛ tosaa le tɔnɔ naa
Nyɛpalaa kuii bɔɔ hau. Kɛ baa koŋ chɔm ni maa Chɛhowa Mɛlɛka buulaŋ a naa le? Waŋnda apum dimi maa le naa tɔɔndaŋndo Mɛlɛka tusi naa nyɛpalaa choo ni. Kɛ o cho tonya le i cho le.—Nuawɔ Chemisi 1:13, NW.
Mɛlɛka ke wanachioo dioo le mbo tosa chuaŋ chuaa. O bɛnda miŋ mel Mɛlɛka balika le di o ke naa hoo wo le? (Chɔɔsuaa 24:15) Kɛ wanaa bɔɔbɔɔ heli le chaanda iwɔɔŋnde tosallo. Nyɛ koŋ nyɛpalaa kuii hau ni. Chɛhowa tambu kɔl tau a sɔɔŋ wɔɔŋ cho muŋ yɔŋnɔŋndo woŋ.—Nuawɔ Chɛnɛsee 6: 5, 6.
Chɛhowa buulaŋ tau a naa okɔɔ. O yeema naa miŋ tuei yoomoo yeela. O cho hunɔɔ suŋ wanaa wɔɔŋnda chii vɛlɛ a nyɛpalaa. Le suŋ suŋ ndu, o nɔ sabu o chɛl mi nyɛpalaa wa wɔ naa wo. O Buŋgɛi 8 niŋ, ŋ cho hunɔɔ pɛɛku a sabu koŋ okɔɔ.—Nuawɔ Pitɛ Diiŋ Ndɔɔ 2:9; 3:7, 13
5. Vɛɛ naŋ naŋnuŋ yɛ Mɛlɛka ikɛi?
Mɛlɛka veelu naa le miŋ naŋnuŋ ndu ikɛi. Ŋ tosa hei te ŋ wa pɛ suɛi o ndulo o piɛileŋ niŋ. O nɔ yeemɛi o naa niŋ mɛɛ naŋ cho kpou. (Sam 65:2; 145:18) O cho o bɛɛndiaŋ le naa malɔɔ haki. Mi che bɛɛ naa miŋ benduŋ lepum, kɛ o naŋ kɔl te ŋ kindiŋ pɛ le ndu kɔllo nɛŋioo. Wanaa lahakiaa naŋ cho ni. Kɛ a koŋ kpou, ŋ nɔla miŋ wa o chaŋyɛi niŋ kpɛɛluŋ a Mɛlɛka.—Nuawɔ Sam 103:12-14; Chemisi 4:8.
Chɛhowa ke naa yoomoo ni. Lelaŋ, ŋ nɔ miŋ kaala ndu mbo hiou wana o wana cheleŋ. (Maki 12:30) Te o wa pɛ miŋ wa pɛɛkoo a Mɛlɛka okɔɔ, nduyɛ miŋ wa tosaa nyɛ o dimul naa wo, mɛɛ koŋ chɔm maa ŋ kaala ndu. O hei niŋ, ŋ nɔla miŋ naŋnuŋ ndu ikɛi kpɛɛluŋ.—Nuawɔ Timoti Tasoo 2:4; Chɔŋ Tasoo 5:3.
