Mɛlɛka toosiaa naa wo nɔ taasioo mbo hiau naa. Maa Finya kaalaa, o buulaŋ le naa. Nduyɛ, o yeema miŋ wa a ba naa le. (Chɛluimaya 10:​23) Mɛɛ mɛɛ finyaa saa naa chua ndɔɔ baa yɛ, lende ko naa bɛɛ yeema nɛi chɔmaa Mɛlɛkaa ni. (Aisaya 48:17, 18) Sawala mandaala cho o Baabuiyo niŋndaŋ la cho machuaa nɛi chɔmaa Mɛlɛka cho naa kioo wo.—Nuawɔ Timoti Diiŋ Ndɔɔ 3: ​16.

Sawala Chɛhowalaŋ la chɔm naa nɛi sɔviɔɔ suŋ suŋ. Nduyɛ la chɔm naa nɛi naŋ chua le yoomu fafɛɛŋndo sɔlaa o chilaŋ niŋndo. Le mɛɛ Mɛlɛka toosiaa naa yɛ, o wa i kɛndɛ te ŋ chɛl pɛ nɛi o cho naa chɔmndo wo a balika melaa.​—Nuawɔ Sam 19:​7, 11; Sɔɔŋ Chɔɔmaŋndoŋ 4:​11.

Sawala mandaalaŋ o Baabuiyo niŋ la cho ŋgemelaa le tonyaa ni. Sawalaŋ lapum la cho le sɔɔŋ fau. Lapum yɛ, le suɛi kpeekpeiye ipum Mɛlɛka dɔu laŋ ni. (Ditɔnɔmii 22:​8) Mɛɛ miŋ chal miŋ yiyaŋ a mɛɛ naŋ nɔ miŋ soliŋ sawala mandaalaŋ ndaŋ kpeku le isɔɔ o isɔɔ tosa yɛ. (Pulɔwaa 2:10-12) Le taamaseliiyo, Baabuiyo dimi maa Mɛlɛka yɔŋgu naa yoomoo ni. Sinaa hei tosa miŋ mandaŋ te ŋ wa pɛ wallo tosaa, te ŋ wa pɛ o bɛɛ vɛlɛ a o kelaa niŋ. Sawa mandaa tosa miŋ mandaŋ o nyɛ o nyɛ naŋ cho tosaa niŋ.​—Nuawɔ Walta Wanaa Chiisuaa 17:28.

Mi Chiisu suaa a sawala mandaalaŋ la tiɔɔŋ okɔɔ. Mbo dimi maa sawala mandaalaŋ ndaŋ la hiou sawalaŋ kpou. O tasoo chɔm sabu naŋ cho yoomu wo. Ndu cho ni, le miŋ sina Mɛlɛka, miŋ kaalaa ndu, nduyɛ, miŋ piɛi ndu o sandei choo. Nyɛ o nyɛ naŋ wa pɛ kɛɛsiaa le tosaa, mɛɛ miŋ  yiyaŋ o sawa mandaa tasoo hoo choo. (Pulɔwaa 3:​6) Wana o wana kɛsiŋ sawa mandaa hoo o kɔl pɛ, o tosa chaŋyɛi kɛndɛi a Mɛlɛka, mbo sɔla nyaaloo, nduyɛ, mbo huŋ sɔla yoomu fafɛɛŋndo o chilaŋ niŋ.​—Nuawɔ Maatiu 22:36-​38.

Sawa mandaa diiŋndɔɔ mala naa miŋ wa o kɔl nyulu niŋ a wanaa cheleŋnda. (Kɔliŋtiaŋ Tasoo 13:​4-7) Vɛɛ naŋ tuallɛ sawa mandaa hoo kɔɔli? Tuulaa Mɛlɛka mɛɛ o bii waŋnda yɛ.​—Nuawɔ Maatiu 7:​12; 22:39, 40.

Sawala mandaala Baabuiyo la mala waŋnda o yuŋgoo niŋ ma wa diompilɛ o kaalaa niŋ. (Kolosiaŋnda 3:​12-​14) Diom Mɛlɛkaa pɛɛku vɛlɛ pɔnɔɔ a lanɔɔ sawa mandaa cheleŋ. Ndu cho ni, te wana pɔnɔɔ a wana lanɔɔ chal pɛ o nɔɔ niŋ, a nɔ ma piɔuwaŋ te.​—Nuawɔ Chɛnɛsee 2:​24.

O yɔŋ pɛ miŋ tol vɛlɛ nyɛ Baabuiyo dimul naa wo kɔɔli, o mala naa miŋ hini kɔl a nyɛ naŋ nɔ o ba wo nduyɛ, miŋ wa a kɔl kɛndɛ. Te o yɔŋ pɛ mi waŋndo chua num le wallo, yiyaŋndo a sawala Baabuiyo mala num ma tosa ndu o sandei choo nduyɛ a kɔllo kpou. O hei niŋ, waŋnda duau laalaŋndo o num niŋ. (Pulɔwaa 10:​4, 26; Hibuluiya 13:18) Diom Mɛlɛkaa dimul naa le miŋ hini kɔl a nyɛ o nyɛ naŋ nɔ. O dimul naa vɛlɛ maa chaŋyɛi nɛi naa Mɛlɛka waa tɛɛŋ bɛnda mbo hiau nyɛm kiɔɔŋ.​—Nuawɔ Maatiu 6:​24, 25, 33; Timoti Tasoo 6:​8-​10.

Tolɔɔ sawala mandaala Baabuiyo kɔɔli mala naa vɛlɛ miŋ wa kɛndiaa. (Pulɔwaa 14:30; 22:24, 25) Le taamaseliiyo, sawa Mɛlɛkaa dimi maa naŋ kol miŋ tambu labɛɛ le. Te ŋ tol pɛ sawaa hoo kɔɔli, o mala naa ŋ sɔla naa piɔm te. O mala naa vɛlɛ ŋ yɔŋuluŋ te. (Pulɔwaa 23:​20) Chɛhowa kɛɛlu naa muɛiyaŋ kolɔɔ le, kɛ o dimi maa naŋ kol nyɛ pɔmbɔ. (Timoti Tasoo 5:23; Kɔliŋtiaŋ Tasoo 6:​10) O cho ko mɛɛ naŋ nɔ miŋ tosa sɔɔŋ yɛ le sawala mandaala Mɛlɛkalaŋ la chɔm naa le, kɛ la manda vɛlɛ yiyaŋnda naalaŋ. (Sam 119:97-100) Kilisiɔŋaa tonyaa tul sawala Mɛlɛkalaŋ kɔɔli le tɔnɔ ndaa suee le. Kɛ a tosa nyɛ Chɛhowa dimul nda wo le ndu diikɔŋndo.​—Nuawɔ Maatiu 5: ​14-​16.