Mɛlɛka veelu waŋnda kpou le ma hiŋ naa ndu cha o piɛileŋ niŋ. (Chɔŋ Tasoo 5:14) Kɛ, o cho piɛiye kpou le o yaŋ nilaŋ te. Nduyɛ o cho piɛiye kpou le o chɛl te. Le taamaseliiyo, te wana pɔnɔɔ bii pɛ laa ndɔ biyɔɔ wɔɔŋndo, o piɛi bɛɛ, ­Mɛlɛka yeŋ ndu lani le. (Pitɛ Tasoo 3:7) Mɛɛ yuŋgoo Isɔluɛi kɛɛ yɔŋnda ndala wɔŋndaŋ malɔɔ, Mɛlɛka yeŋ nilaŋ o piɛile nda leŋ te. Piɛileŋ o Mɛlɛka lo kioo le cho ni. Hali wana cho hakioo tosaa wo, te o mal pɛ yɔŋ ndɔ wɔɔŋndo mbo piɛi o Mɛlɛka lo, o yaŋ ndu nilaŋ.​—Nuawɔ Aisaya 1:​15; Walta Wanaa Chiisuaa 3:19.

Tofa vidueiyo Baa Mɛlɛka yaŋ pa nilaŋ o piɛiye kpou?

Piɛileŋ le cho machuaa nɛi naŋ biilu Chɛhowa wo. Ndu cho Wana Toosiaa naa wo ni. Lelaŋ, o ndulo kinɛi naŋ nɔ ni miŋ piɛi. (Maatiu 4:10; 6:9) Le mɛɛ naŋ cho wanaa lahaki yɛ, ŋ nɔ miŋ piɛi o diola Chiisulaŋ niŋ. Hei bɛnda kanifuule, ndu huŋ wu le hakila naalaŋ ni. (Chɔŋ 14:6) Chɛhowa yeema naa miŋ poonyiaa piɛileŋ o yau choo le piɛiyo o ndulo le. O yeema naa miŋ dimi nyɛpilɔɔ lɔɔlɔɔ le. O yeema mi piɛile naaleŋ le chɛŋ naa o kɔl.​—Nuawɔ Maatiu 6:7; Filipiaŋnda 4:​6, 7.

Piɛile toololeŋ bɛɛ Mɛlɛka tuɛi. (Chɛnɛsee 24:45) O dimul naa maa naŋ piɛi o ndulo lɔɔlɔɔ. Ŋ piɛi idii, ŋ piɛi ichɔl, te ŋ wa pɛ nyɛdiaa dioo, nduyɛ te ŋ nɔ pɛ bahawɛiyo.​—Nuawɔ Pitɛ Tasoo 5:⁠7; Maatiu 15:36.

O cho suɛi bɛɛŋ bɛɛŋ le naŋnɔŋndo Mɛlɛka ikɛi le. Le yɛɛ? Kanifuule, ŋ cho wanaa nɔ laalaŋ o Mɛlɛka niŋ te wa tɛɛŋ, nduyɛ ma wa mamɔɔ nyɛ Mɛlɛka dimi le hunɔɔ tosaa wo. Ndu cho ni maa o cho hunɔɔ a kɔl nyuloo o chieeŋndo hoo choo. (Timoti Diiŋ Ndɔɔ 3:​1, 4; Pitɛ Diiŋ Ndɔɔ 3:​3, 13) Lelaŋ, ŋ nɔ miŋ wa chuuŋgiaŋndo naa wanaa naŋ cho o laalaŋ pilɔɔ choo wa, okoŋ, miŋ wa dɛɛniaŋndo vellaa velle. Ŋ yeema a nda nduyɛ nda bɛɛ yeema a naa.​—Nuawɔ Hibuluiya 10:24, 25.

 Chuuŋgiaŋndo naapilɛ a wanaa nɔ kaalaa le Mɛlɛka wa mala naa miŋ naŋnuŋ Mɛlɛka ikɛi kpɛɛluŋ. Bɔŋaŋnda Seiyaa Chɛhowaa cho maa nɛiyo le dɛɛniaŋndo o laalaŋndo niŋ vellaa velle.​—Nuawɔ Luomaŋnda 1:11, 12.

Te o yɔŋ pɛ ma nua bolii Baabuiye, okoŋ, ma chal ma yiyaŋ lechoo, a nɔla ma naŋnuŋ Chɛhowa ikɛi kpɛɛluŋ. Yiyaŋ a nyɛm o toosiaa woŋ, a silala ndɔlaŋ vɛlɛ a mɛila ndɔlaŋ. Piɛileŋ a yiyaŋndo o sɔɔŋ waa naa choo mala naa miŋ nɔ balikaa o kɔl le kaala Mɛlɛkaa a taasi ndɔɔ.​—Nuawɔ Timoti Tasoo 4:​15, 16.

A naŋnuŋ Mɛlɛka ikɛi kinɛi te o yɔŋ pɛ ma dɔu tiindaŋndo a laalaŋndo o ndu niŋ. Kɛ laalaŋndo cho machuaa maa nyɛ yoomaa. A nɔ ma wa ndu nyɛdiaa kioo lɔɔlɔɔ. A tosa hei a mɛɛ ŋ yiyaŋ o nyɛ ŋ laalaŋndo choo yɛ.​—Nuawɔ Maatiu 4:4; Hibuluiya 11: ​1, 6.

Chɛhowa buulaŋ le wanaa kaala ndu wa. O nɔla mbo kiindiaa nda o nyɛ o nyɛ faŋa nda o laalaŋndo choo, nduyɛ a o nyɛ o nyɛ faŋa nda kɔllo o tiindaŋ nda nɔ le yoomu fafɛɛŋndo wo. (Sam 91:​1, 2, 7-​10) O sila naa le miŋ faŋaŋ nyɛ o nyɛ tɛɛmbuu kɛndiaa naa vɛlɛ a kɔl naa nyuloo wo kɔɔli. Chɛhowa pɛɛku naa le kɔlaŋ o nɛi sɔviɔɔ choo.​—Nuawɔ Sam 73:27, 28; Chemisi 4: ​4, 8.