Mɛɛ Mɛlɛka kɔɔna chuauwaa Ebilahamnda, mbo siiŋguu nda kaaleŋ, okoŋ mbo ke nda sawalaŋ. Mbo veelu kaaleŋ ndeŋ aa, “Isɔluɛi.” Kaaleŋ ndeŋ le wa puudule piɛile tonyaleŋ ni vɛlɛ a diom ndɔɔ. (Sam 147:19, 20) Mɛɛ waŋnda o kaala cheleŋ ndaŋ niŋ chieeŋndo balɔɔ kpou cho tɔnɔɔ sɔla o kaaleŋ Isɔluɛi niŋ.​—Nuawɔ Chɛnɛsee 22:18.

Mi Mɛlɛka hɛli Isɔluɛiya le ma wa seiyaa ndɔ. Nyɛ nda tosa o sindɔɔ niŋndo chɔm mɛɛ waŋnda sɔla tɔnɔɔ yɛ, te o yɔŋ pɛ ma bii sawala Mɛlɛkalaŋ. (Ditɔnɔmii 4:​6) Mi wanaa bɔɔbɔɔ huŋ sina Mɛlɛka tonyaa o Isɔluɛiya babɛŋgu.​—Nuawɔ Aisaya 43:10, 12.

O boondii pum niŋ, mi Mɛlɛka kɛɛ kaaleŋ Isɔluɛi. Okoŋ, mbo miŋgi Kunda leKilisiɔŋndo sɔŋgɔ ndaa. (Maatiu 21:43; 23:37, 38) Wanaa miiŋgu sɔŋgɔ Isɔluɛiya wa cho Kilisiɔŋaa tonyaa ni. Nda cho yɛ hau Seiyaa Chɛhowaa ni.​—Nuawɔ Walta Wanaa Chiisuaa 15:14, 17.

Mi Chiisu chuuŋgiaa buɛiyaa nduaa le ma dimi yooŋgu kɛndɔɔ nduyɛ ma siiŋguu waŋnda buɛiya o kaalaŋ niŋ kpede. (Maatiu 10:7, 11; 24:14; 28:19, 20) Wallo hoo cho niŋ fuuloo o mɛɛlulaŋ, kanifuule mɛɛlula chieeŋndo hoo cho niŋ kpɛɛluŋ. O sindɔɔ niŋ pa Chɛhowa kandu waŋnda kɛmɛ chuu chɔm te laŋ chuuŋgiaa o kaala yɛ yɛlaŋ niŋ ni, mbo wa hunɔɔ a nda o piɛile tonyaleŋ niŋ. (Sɔɔŋ Chɔɔmaŋndoŋ 7:9, 10) Kilisiɔŋaa tonyaa cho a kɔɔnaa le ndapila dɛɛniaŋndo vellaa velle. O chieeŋndo choo kpede, pɛɛku Baabui pilɔɔ kpe nda sɔla o bɔŋaŋnda ndalaŋ ni.​—Nuawɔ Hibuluiya 10:24, 25.

Kunda pɔmbuiinii nda kanduŋ ni o wɔsila 1870 laŋ niŋ. Ndaa veelu nda aa sukuuwaa pɛɛkaa Baabuiya. A lo Baabuiyo pɛɛkoo ma saaluŋ tonya ndoo lo sindɛ pa wo. Ma sina maa mi Chiisu kɔɔna sindɛ kunda leKilisiɔŋndo le yooŋgu kɛndɔɔ dimioo. Le hei, ma kandu yooŋgu kɛndɔɔ dimioo o lɛŋndeŋ choo kpou. O wɔsi 1931 niŋ, ma chua diolaŋ aa Seiyaa Chɛhowaa.​—Nuawɔ Walta Wanaa Chiisuaa 1:8; 2:​1, 4; 5:​42.

O wɔsila kɛmɛla taselaŋ niŋ, mi Kundala leKilisiɔŋndaŋ o lɛŋii bɔɔbɔɔ niŋ sɔla tɔnɔɔ o dialii kuumbaŋ choo ve babɛŋgu. Mi dialle hei bɛɛ sinapɛŋgu maa Chiisu cho kunda leKilisiɔŋndo Bolleŋ ni. (Walta Wanaa Chiisuaa 16:​4, 5) Hau bɛɛ, Seiyaa Chɛhowaa chieeŋndo balɔɔ kpede cho tɔnɔɔ sɔlaa o Dialii Kuumbaŋ Choo Ve hei babɛŋgu. Bɛnduaa taasiaa cho o Dialle hei niŋ ni. O lɛŋnde ipum niŋ, Seiyaa Chɛhowaa nɔ lɛuwoŋ. O lɛuwoŋ ŋpum niŋ, ma hivi yaulaŋ o sɔɔŋ maŋgalaŋ yɛ yɔŋ niŋ, ma toosiaa laŋ, nduyɛ ma piɔu yaula mala waŋnda le Baabuiyo pɛɛkoo laŋ o sɔɔŋ maŋgalaŋ niŋ hiouwɔɔ 600. Lɛuwoŋ muŋ kpou Dialii Kuumbaŋ Choo Ve hei cho muŋ hɔlteŋ choo ni. O fulawɔ okoŋ kɔɔli, Dialle hei yɔŋgu kɔl dɛɛniaa a nɛi chɔmaa cho o Baabuiyo niŋndo. A tosa hei le kundalaŋ hiouwɔɔ 100,000 o chieeŋndo choo kpou. O kunda o kunda niŋ, puaa komal suliŋnda cho o Baabuiyo niŋndaŋ a cho a hɛliaŋ le chilaŋ chuaa. A veelu nda aa bɛnduaa kundaa. Bɛnduaa haa cho kunda wanaa laalaŋaa Mɛlɛkaa mandaa o kaalaa niŋ.​—Nuawɔ Pitɛ Tasoo 5:​2, 3, NW.

Seiyaa Chɛhowaa bɛɛ cho hau a kɔɔnaa le yooŋgu kɛndɔɔ dimioo, nduyɛ a cho waŋnda siiŋgoo buɛiyaa Chiisuaa. Maa wanaa Chiisu vem sindɛ hɔlte ndɔ wa, Seiyaa Chɛhowaa bɛɛ cho hau kɔlaŋ yooŋgu kɛndɔɔ dimioo chiɛiyo a chiɛiyo. (Walta Wanaa Chiisuaa 20:20) Ma pɛɛku vɛlɛ wanaa kaala tonyaa wa Baabuiyo. O cho ko le waa a kɔɔnaa le, kɛ yuŋgu pilɔɔ kpe Seiyaa Chɛhowaa cho ni. Finya kaalaa opilɛ kpe nda nɔ ni. Nyɛ koŋ nda veelaŋ ni aa puaapiliaa a ndepiliaa. Nduyɛ a buulaŋ le opilɛ a o cheleŋndo. (Tɛsaloniaŋ Diiŋ Ndɔɔ 1:3) Le mɛɛ Seiyaa Chɛhowa cho a kɔɔnaa le Mɛlɛka kɔllo nɛŋioo vɛlɛ a wanaa cheleŋnda malaa yɛ, nyɛ koŋ nda nɔ yuŋgu kɔl nyuloo o chieeŋndo choo ni.​—Nuawɔ Walta Wanaa Chiisuaa 20:35; Pitɛ Tasoo 2:⁠9.