BUŊGƐI 6
Tiindaŋ Yɛɛ Cho yɛ le Wanaa Vi niŋ Nda?
1. Yooŋgu kɛndɛ kuɛɛ cho yɛ le wanaa vi niŋnda?
Lasalɔɔ chaaŋ o Chiisu ndoo vi ni. Ndoo chua niŋ palɛi ihiɔɔlu o sɛiyo niŋ. Okoŋ, mi Chiisu kua Bɛtani Chulusɛlɛm ikɛi. Mɛɛ o fuuluu, Mbo kua nda Meele a Mata waa latulu naa nda chɔ Lasalɔɔ yema nda wa. Faŋgaa pila ndoo wa loŋ ni. Okoŋ, mi Chiisu miŋgi Lasalɔɔ yoomu pila. Nuawɔ se kɔl kɛndɛ Meele a Mata dɔunuŋndo!—Nuawɔ Chɔŋ 11:21-24, 38-44.
Mata ndoo sina niŋ yooŋgu kɛndɛ diom Mɛlɛkaa dimi a waŋvilɛiya okɔɔ wo. O sina maa Chɛhowa cho vɛlɛ wanaa vi niŋnda miŋgi yoomu pila o chieeŋndo choo.—Nuawɔ Choobu 14:14, 15.
2. Yɛɛ yɔŋnuŋ yɛ naa ti ŋ vi pɛ?
Mi Mɛlɛka dimul Adam aa: “Puuloo ŋ cho ni, nduyɛ o puuloo niŋ ŋ cho vɛlɛ miiŋgu ni.”—CHƐNƐSEE 3:19.
A puuloo lɛŋ Mɛlɛka toosiaa waŋchieeya ni. (Chɛnɛsee 2:7; 3:19) O cho dialuŋ inyinaya le naŋ nɔ le. Lelaŋ te ŋ vi pɛ, nyɛ o nyɛ fulaŋ naa o ŋdial mbo kɔ wa achal naa cheleŋ te. Dialuŋ iwana chieeyaŋ naŋ nɔ ni. Te ŋ vi pɛ, hulma naŋ bɛɛ ma vi. Yiyaŋnda naalaŋ bɛɛ la vi. Mɛɛ Lasalɔɔ miiŋgu yoomu, o chɔm wana o wana lawaa piɔm te. Waŋvilɛiya sinaŋ te.—Nuawɔ Ikilisiaatii 9:5, 6, 10, NW; Sam 146:4.
Baa mi Mɛlɛka tusi waŋvilɛiya nyɛpalaa choo o yiŋndeŋ niŋ? Baabuiyo dimi maa waŋvilɛiya sinaŋ te. Lelaŋ, Pɛɛkoo waŋnda maa Mɛlɛka tusi waŋvilɛiya nyɛpalaa choo o yiŋndeŋ niŋ cho pɛɛku tonya le. Mɛlɛka nda cho choolaŋ nyiindoo ni. I tɛɛmbuu ndu kɔl le dimioo maa o tusi waŋvilɛiya nyɛpalaa choo o yiŋndeŋ niŋ.—Nuawɔ Chɛluimaya 7:31.
Tofa vidueiyo Baa Tiindaŋ Cho pa le Wanaa Vi Wa?
3. Baa mi waŋvilɛiya soo pa o naa lo nɛ?
Waŋvilɛiya suu le kɛlɛŋgaa ma tuei. (Sam 115:17) Mi maalikɛiya apum simnuŋ nyinaa wɔɔŋnda. Ma soo o waŋnda lo le chɔmndo maa waŋvilɛiya cho suɛi ni. (Pitɛ Diiŋ Ndɔɔ 2:4) Chɛhowa kɛɛ wana o wana kindiŋ le suɛi o waŋvilɛiya lo.—Nuawɔ Ditɔnɔmii 18:10, 11.
4. Nɛɛ yaa cho yɛ miiŋgu yoomu?
Waŋchieeya kɛmɛ chuu chɔm te laŋ, a vi niŋ nda miiŋgu niŋ yoomu o lɛŋndeŋ choo. A ndaa tuii a Mɛlɛka okɔɔ le wa bɛɛ miiŋgu niŋ yoomu.—Nuawɔ Luku 23:43, NW; Walta Wanaa Chiisuaa 24:15.
Wanaa cho hunɔɔ miiŋgu yoomu wa pɛɛku niŋ tonyaa a Mɛlɛka okɔɔ. Okoŋ, ma chɔm laalaŋ ndaa o Chiisu niŋ. A tosa hei a mɛɛ nda diikuŋ ndu yɛ. (Sɔɔŋ Chɔɔmaŋndoŋ 20:11-13) Le wanaa miiŋgu niŋ yoomu wa, te a tosa pɛ sɔɔŋ kɛndɔŋ, a wa niŋ achal lefafɛɛŋ o chieeŋndo choo.—Nuawɔ Chɔŋ 5:28, 29, NW.
5. Yɛɛ fulasɛiniŋndo dimul lɛ naa a Chɛhowa okɔɔ?
Mɛlɛka tosa tiindaŋ fulasɛiniŋndo suɛi kpeekpei a mɛɛ o yɔŋ Po ndɔɔ mbo huŋ wu le naa yɛ. O hei niŋ, tiindaŋ fulasɛiniŋndo dimul naa maa Mɛlɛka kaalaa Chɛhowa cho ni. O dimul naa vɛlɛ maa Mɛlɛka tosal naa kɛndɛi naŋ ve kɔl tei. Te waŋvilɛiya miiŋgu pɛ yoomu, nɛɛ kpeekpei ŋ yeema yɛ ma che?—Nuawɔ Chɔŋ 3:16; Luomaŋnda 6:23.
