BUŊGƐI 7
Yɛ Cho yɛ Masale Mɛlɛkaleŋ?
1. Yɛɛ cho yɛ Masale Mɛlɛkaleŋ?
Le yɛɛ Chiisu bɛnda yɛ mbo wa Masa?—MAKI 1:40-42.
Kuamɛtii Mɛlɛka wo choo choo Masale Mɛlɛkaleŋ le cho ni. Le huŋ niŋ mi le faŋa masɛi hei hau kpou, nduyɛ mi le tosa mi hɛnaŋ Mɛlɛkaa yɔŋnuŋ o choo choo niŋ vɛlɛ a o lɛŋndeŋ choo. Yooŋgu cho a Masale Mɛlɛkaleŋ okɔɔ wo naŋ bɔɔ. Masale Mɛlɛkaleŋ le tosa niŋ mi waŋchieeya kpou hini kɔl. Le mɔɔsa niŋ waŋchieeya o lɛŋndeŋ choo kpou le ma wa o diompilɔɔ niŋ.—Nuawɔ Maatiu 6:9, 10, 24:14, NW; Daaniɛɛ 2:44.
Masaleŋ le nɔ mi le nɔ masaa. Chiisu Chɛhowa yulu iso ni le mbo wa Masaa o Masale Ndɔleŋ choo.—Nuawɔ Sɔɔŋ Chɔɔmaŋndoŋ 11:15.
Tofa vidueiyo Yɛɛ cho yɛ Masale Mɛlɛkaleŋ?
2. Le yɛɛ Chiisu bɛnda yɛ mbo wa Masa?
Masa kɛndɔɔ Po Mɛlɛkaa cho ni, kanifuule o nɔ kɛndɛi, nduyɛ mbo sim o kala poŋ le tosaa nyɛ cho sakpo wo. (Chɔŋ 1:14) O nɔ vɛlɛ kpaayaa le waŋchieeya malaa. O wa niŋ o masaleŋ choo o choo choo niŋ, kɛ kpaaya ndɔɔ cho tiu o lɛŋndeŋ choo kpou. Mɛɛ Mɛlɛka soli ndu o sɛiyo niŋ, mbo helnuŋ choo choo. Okoŋ, mbo kɔ chal chumndo o bakɛndɛ Chɛhowaa choo. (Hibuluiya 10:12, 13) Mɛɛ okoŋ kɔɔli, mi Mɛlɛka ke ndu kpaayaa le mbo wa masa.—Nuawɔ Luku 1:32, 33.
3. Nɛɛ yaa cho yɛ wa o masaleŋ choo a Chiisu?
Kunda nda veelu aa “wanaa Mɛlɛkaa” wa cho wa a Chiisu latulu o masaleŋ choo o choo choo niŋ ni. (Daaniɛɛ 7:27) Kunda tasoo o wanaa diandaa haa tɛɛŋ, cho buɛiyaa tasiaa Chiisu hɛli wa ni. Chɔŋ a teleŋ koŋ, Chɛhowa cho wɔ tuŋ hiouwɔɔ lachi a wanaa diandaa haa hɛlioo. Maa Chiisu, o dialuŋ inyinayaŋ niŋ nda bɛɛ fula o sɛiyo niŋ ni.—Nuawɔ Chɔŋ 14:1-3; Kɔliŋtiaŋ Tasoo 15:42-44.
Vɛɛ kpɛ waŋnda nɔ yɛ le kɔlaŋ choo choo? Chiisu veelu nda aa “kunda pɔmbɔɔ.” (Luku 12:32) A cho 144,000 bolle pilɛ. Kundaa hoo wa niŋ a Chiisu latulu o masaleŋ choo ni. A cho wa o masaleŋ choo o choo choo niŋ le chieeŋndo hoo.—Nuawɔ Sɔɔŋ Chɔɔmaŋndoŋ 14:1.
4. Mɛɛ Chiisu kandu masaleŋ, yɛɛ ndoo yɔŋnuŋ yɛ?
O wɔsila 1914 * laŋ niŋ Masale Mɛlɛkaleŋ le kanduŋ o choo choo niŋ ni. Nyɛ tase Chiisu tosa maa Masa wo cho ni, mbo tusi Setana a nyinaa nduaa wɔɔŋnda lɛŋ naŋ. Okoŋ mi Setana duaunuŋ tumbe, mbo kandu niko kpundɛlaŋ mɛlioo ba o ba fee o chieeŋndo choo. (Sɔɔŋ Chɔɔmaŋndoŋ 12:7-10, 12) Chɔŋ a boondii keŋ, kpundɛlaŋ la cho wɔ tuŋ hiouwɔɔ lachi a kuiyo waŋchieeya choo. Chɔulaŋ, yiaaŋ, naalaŋ, vɛlɛ a lɛŋnde nyiiyaale cho yɔŋnɔŋndo leŋ kpou chɔm “taamasioo” ni maa Masale Mɛlɛkaleŋ le cho suŋ fondaa chua o lɛŋndeŋ choo.—Nuawɔ Luku 21:7, 10, 11, 31.
5. Yɛɛ Masale Mɛlɛkaleŋ le tosa yɛ niŋ?
Masale Mɛlɛkaleŋ le tosa mi waŋchieeya o kaala yɛ yɛlaŋ niŋ hau wa chuuŋgiaŋndo kunda bɛndoo naapilɛ. Wali dimiaa yooŋgu kɛndɛ lemasa cho dimiŋndo o chieeŋndo choo kpou wo cho hei tosaa ni. Waŋnda kɛmɛ chuu chɔm te laŋ a chɛl niŋ hau le waa o masale Chiisuleŋ bɛŋgu. Te Mɛlɛka hiŋ pɛ wanaa dɛnɛ wɔɔŋnda tɛɛmbuu wo o chieeŋndo hoo choo, o cho wanaa diikuŋ ndu haa wa kiindiaa. Lelaŋ, wana o wana yeema pɛ ma de Masale Mɛlɛkaleŋ tɔnɔ, a nɔ ma tusiŋ Chiisu o babɛŋgu.—Nuawɔ Sɔɔŋ Chɔɔmaŋndoŋ 7:9, 14, 16, 17.
O wɔsila 1,000 laŋ bɛŋgu, Masale Mɛlɛkaleŋ le cho tosa mi tuu tase Mɛlɛka ndoo nɔ le waŋchieeya wo yɔŋnuŋ. Chieeŋndo kpou simnuŋ niŋ kpele hɛnɛkiɔɔ. Te wɔsila 1,000 laŋ la chuu pɛ, Chiisu chua Masaleŋ o miŋgi Finya ndɔ ke. (Kɔliŋtiaŋ Tasoo 15:24-26) A sina pa waŋndo o num yeema niŋ ma dimul a Masale Mɛlɛkaleŋ okɔɔ wo?—Nuawɔ Sam 37:10, 11, 29.
^ pɛl. 6 Le chɔɔloo sinaa nyɛkɛndɛi a sɔɔŋ dimiŋ paandu a wɔsila 1914 laŋ okɔɔ wo, tofa o pei 215-218 o yauwo hoo niŋ, Yɛɛ Kpeekpei Baabuiyo Pɛɛku Yɛ?
