Ŋ WAŊNUŊ MAA ŊKILISIƆŊ
Faŋaŋ Nɛilaŋ Ndaŋ Kɔɔli Te a Wa Pɛ Pɛɛku Baabuiyo Tosaa
Suɛi Tau: Yiyaŋ naa maa a nɔ ma tɛɛsiaa nyɛ o nyɛ fee le. Mi Chiisu soliŋ nyunalaŋ kpeku le waŋnda malaa le ma bii nyɛ o wa dimioo wo bila. (Mat 17:24-27) Nyunalaŋ la tosa mi pɛɛkoo yeela nduyɛ la mala num le sinaa te wana ŋ cho pɛɛkoo wo cho pɛ pɛɛkoo biyɔɔ bila vɛlɛ a nyɛ o laalaŋndo. (be 253 ¶3-4) Te a nyuna ndu pɛ, biunuŋ nduyɛ ma chum kpɛ le mulioo. Te wana ŋ cho pɛɛkoo wo chiee muli le, yɔŋii ŋ chɔm ndu muli kpeekpeiyo, soliŋ nyunala cheleŋ kpeku le ndu malaa mbo saaluŋ muli kpeekpei nyuna koŋ. (be 238 ¶1-2) Soo o nɛi mala wana ŋ cho pɛɛkoo wo le mbo bii sɔɔŋ sɛnɛŋ nya cho pɛɛkoo woŋ bila.
Pɛɛkoo Tosaa Laasi Laasi: Faŋaŋ kaa tosa num le tɛɛsiaa nyɛ o nyɛ ŋ sina a nyɛ nya cho pɛɛkoo wo kɔɔli. (Chɔŋ 16:12) Handu kɔllo o suɛi kulii cho o pɛllo niŋnde choo. (be 226 ¶4-5) Sɔɔŋ hiuwo tɛɛsiaa o pɛɛkoo niŋ, hali o wa bɛɛ sɔɔŋ kɛndɔŋ, o tosa ma mɛi sɔɔŋ kulloŋ kɔɔli. (be 235 ¶3) Te wana ŋ cho pɛɛkoo wo bii pɛ suɛi kulle bila, la hiou lachi o pɛllo o pilɔɔ.
Le Buŋgɛi Chiiyo Kinɛi: Ŋ yeema miŋ pilaŋ wanaa naŋ pɛɛku wa kɔltaŋ kɛ o wa ko le buŋgɛi chiiyo kinɛi le. (Luk 24:32) Soliŋ Diom Mɛlɛkaa kpeku ma tofa le bolii Baabui kpeekpei cho o buŋgɛi nya cho pɛɛkoo ve niŋ. (2Kɔl 10:4; Hibu 4:12; be 144 ¶1-3) Soliŋ tamaseliila cho tɛtɛlɛ le bila biyɔɔ laŋ kpeku. (be 245 ¶2-4) Kɛsiŋ simulta wana ŋ cho pɛɛkoo wo o kɔl vɛlɛ a nyɛ o laalaŋndo, nduyɛ ma tosa pɛɛku ndɔɔ o nɛi mala ndu wo choo. A nyuna ndu nyunalaŋ ndaŋ: “Vɛɛ ŋ yiyaŋ yɛ a nyɛ ŋ cho hoo pɛɛkoo wo?” “Yɛɛ hoo cho yɛ naa pɛɛkoo a Chɛhowa okɔɔ?” “Tɔnɔ yɛɛ ŋ sɔla yɛ te a tol pɛ silaa hoo kɔɔli?”