Mi wana cho chilaŋ le Kunda Kɛsi Nyɛsɔlaa Le Chieeŋndo Kpou wo duaŋ kona a Kooŋndo wɔsii 2022 maa “Nyɛsɔlaa chieeŋndo luɛi vɛlɛ o kpundɔɔ niŋ. Suŋ suŋ niŋ nyɔɔŋ hel baa tau nduyɛ waŋnda nɔ nyɛsɔlaa le muŋ piondɔɔ le.”

 Kunda cho le Nyɛsɔlaa Chieeŋndo wo dimi aa: “Bɛŋsiiyaŋ (esaŋsiaŋ) a nyɛdiaa cho baa helɔɔ lepaa o lepaa. Hei cho tosaa ni mi lɛŋii nɔ nyɛsɔlaa bɔɔ le ve, wa saŋgaa tau.”

 Baabuiyo mala naa le miŋ bii bila le sabu kpeekpei sɔɔŋ muŋ cho hau kaloo woŋ. O chɔm naa mɛɛ naŋ biunuŋ muŋ yɛ, nduyɛ a tiindaŋ naŋ nɔ le bahawɛilaŋ ndaŋ hunɔɔ chiiyo le fafɛɛŋndo.

•   Baabuiyo veelu teleŋ naŋ cho hoo niŋndo aa “palɛi mɛɛlɛi.”—2 Timoti 3:​1.

•   Mi Chiisu dimi maa “sɔɔŋ ŋsiooŋndoŋ” ɔɔ kpundɛlaŋ la cho wa yɔŋnɔŋndo o teleŋ naa hoo niŋ. (Luku 21:​11) Mi siooŋnde bii waŋnda le mɛɛ nyɔɔŋ cho hau baa helɔɔ tau yɛ. Mi waŋnda buulaŋ tau a chila ndalaŋ okɔɔ, nduyɛ mi apum buulaŋ te a tiu niŋ pɛ ba ma ke yuŋgula ndalaŋ nyɛm nda hauba woŋ.

•   Mi yau Sɔɔŋ Chɔɔmaŋndoŋ suaa a mɛɛ nyɛdiaa hel niŋ baa o teleŋ naa hoo niŋ yɛ. “Mi tuɛi mi diomndo suaa . . . aa: ‘Witiiyoŋ kiloo cha le dinaluɛiye ipilɛ. Baliiyoŋ kiloo le yaa cho wa le wali waŋndo tosa le paaleŋ kpɛŋ.’”—Sɔɔŋ Chɔɔmaŋndoŋ 6:​6.

 Le chɔɔloo sinaa a “palɛi mɛɛlɛi” okɔɔ nduyɛ a huuluŋ cho o yau Sɔɔŋ Chɔɔmaŋndoŋ niŋndo, tofa vidueiyo hoo Chieeŋndo Siŋgaŋ Chɔŋ a Wɔsi 1914, nduyɛ ma veelu diomndaŋ o suɛi lebolle hei niŋ “Suaa Hiɔɔluaa Yau Sɔɔŋ Chɔɔmaŋndoŋ Soo a Nda Okɔɔ Wa—Yɛɛ Nda Sim yɛ Lewundu?”

•   ‘Waŋnda a taŋgul niŋ chiɛɛla ndalaŋ mi ndapila waŋnuŋ o chiɛɛla ndalaŋ niŋ. A tosa niŋ kpelela ndala makilepiilaŋ, ma de kilepiima ndaŋ. Wana o wana o teŋgul lɛ niŋ chiɛi ndɔɔ, mi wana cheleŋ ndo huŋ chua chiɛi koŋ mbo wa leniŋ te. Wana o wana o tosa lɛ niŋ kpele ndɔɔ, mi wana cheleŋ ndo huŋ dio le.’—Aisaya 65:​21, 22.

•   “Mbɔ maa nyɛ diaa wa tau tau o lɛŋndeŋ niŋ fɔ. Mbɔ maa tɔlɔɔlaŋ la wa naŋɔɔ o pemboŋ choo fɔ.”—Sam 72:​16.

•   “Kɛ nduyɛ Mɛlɛka Yaawɛɛ a o dimi aa: ‘I che nyɛ palaa nda cho wanaa nɔ wana malaa le wa tusioo cho wo. I tuei kuŋnda wanaa tambɛiya a cho a nyɛ nɛiyaa laŋ. I cho hunɔɔ mi huŋ chiindiaa nda.’”—Sam 12:​5.

 Mɛlɛka cho suŋ hunɔɔ tosa mi bahawɛila nyɛsɔlaa mɛɛlu. O cho ko o lɛŋndeŋ lepilɛ niŋ te, kɛ o chieeŋndo choo kpou. Le sinaa mɛɛ o cho hunɔɔ hei tosa yɛ, veelu diomndaŋ o suɛi lebolle hei niŋ “Baa Teleŋ Cho Pa Fuuluu Mi Bahawɛi Nyɛsɔlaa Mɛɛlu?”

 Hau bɛɛ, Baabuiyo tiuba mbo mala num te nyɔɔŋ wa pɛ baa helɔɔ. O nɛi kuɛɛ choo? O nɔ silala mala num le ma chaa nyɛsɔlaa numndo biyɔɔ laŋ. (Pulɔwaa 23:​4, 5; Ikilisiaatii 7:​12) Le chɔɔloo sinaa veelu diomnda o suɛi lebolle hei niŋ “Manda Nyɛsɔlaa Ŋ Nɔ Wo” a “Vɛɛ Naŋ Soliŋ yɛ Nyɛsɔlaa Pɔmbɔ Naŋ Nɔ wo Kpeku?”