Chieeŋndo balɔɔ silɔ yalale chieeŋndeŋ le tosa niŋ hau mi wanaa bɔɔbɔɔ wa a piɔuviaŋ tɛɛŋ. A wɔsii 2022 mi Wanaa Yaasiaa a Sɔɔŋ Okɔɔ wa duaunuŋ kona maa, feleŋguaa hiouwɔɔ “65 o waŋ 100 tɛɛŋ, fulaa o lɛŋnde 19 niŋ dimi ni maa, pesiŋ bɛɛ diompilɛ cho wanaa cho kundala yɛ yɛla tooloo o yalale chieeŋndeŋ niŋnda tɛɛŋ te.”

 Baa a che niŋ pa waŋnda a piɔuviaŋ tɛɛŋ o fondaŋ ŋ cho wo le sabu yalale chieeŋndeŋ? Le yɛɛ hei yɔŋnuŋ yɛ? Baa nɛiyo cho pa le bahawɛiyo hoo solioo? Ŋ yaasiaŋndɔ nyɛ Baabuiyo dimi wo.

 Mi Baabuiyo suaa a, “palɛi mɛɛlɛi” okɔɔ maa wanaa bɔɔbɔɔ cho nɔ kaala tosa ndi ikala le mi waŋnda wa o diompilɔɔ niŋndaŋ

•   “Maa o palɛi mɛɛlɛi niŋ, nyɔɔ kiandu niŋ bɔɔ. Waŋnda kaala niŋ ndapila, . . . A chɛl niŋ acheleŋnda diom te”—2 Timoti 3:​1-3.

 Mi che bɛɛ mi wanaa bɔɔbɔɔ dɔu sɛmbɔɔ le masaa chieeŋnda tooloo, ke batiuwaa bɛɛ a sɔla le. Mi wa ikala le ma tosa wallo diompilɛ a wanaa nɔ yiyaŋnda yɛyɛlaŋ nda le bahawɛilaŋ solioo. Hei cho chɔmndo nyɛ Baabuiyo dimi o paandoo niŋ le teleŋ vilɛiyo.

•   “Mi saaluŋ maa waŋnda pum a nɔ hau kpaayalaŋ, mi waŋnda a wa nda saŋgaa o ba bɛŋgu.”—Ikilisiaatii 8:​9.

 A koŋ kpou, mi Baabuiyo chɔm naa mɛɛ bahawɛilaŋ ndaŋ la fula niŋ o masale wana pilɛ bɛŋgu yɛ. O faŋa niŋ sɔɔŋ palaŋ cho hau waŋnda chieeyaa choo woŋ.

 Mi Baabuiyo chɔm naa Masa bɛnda nduyɛ mbo suliŋ le bahawɛilaŋ ndaŋ solioo wo: Ndu cho yɛɛ Chiisu Kiliti ni. O nɔ kpaayaa a yeemɛi le mbo hiŋ a diompilɔɔ nduyɛ a kɔl nyuloo waŋnda tɛɛŋ.

•   “A teleŋ o cho wa o masaleŋ choo wo, wanaa cho sakpo wa cho wa puiyo tɛɛ tɛɛ.”—Sam 72:​7.

•   “Nduyɛ mi wanaa cho o lɛŋnde niŋnda kpou tosal ndu wallo.”—Sam 72:​11.

 Chiisu bɛnda ni le mbo wa Masa kanifuule o buulaŋ, le waŋnda nduyɛ o nɔ yeemɛi le nda malaa, taama taama wanaa nda cho biiyɔ wɔɔŋndo wa.

•   “Kanifuule o cho wanaa bala fonduaa cho chaŋndo le malaa wa piŋi, Vɛlɛ a wanaa cho mɔnɛi biyɔɔ kɛ a nɔ wana malaa le wa. O cho wanaa cho mɔnɛi biyɔɔ wa a wanaa bala fonduaa nyiɛɛye tuiinɔŋ, Nduyɛ mbo piŋi yoomula wanaa bala fonduaa. O cho nda piŋi wanaa handu nda nyɛkindilaa choo wa a wanaa bii nda ŋuasu ŋuasu wa o ba.” —Sam 72:​12-14.

 Chɔɔlu pɛɛku a Masale Mɛlɛkaleŋ okɔɔ, masale cho o choo choo niŋ mi Chiisu wa masaa wo. Nuuviaa nɛila ŋ tiuba le ma sɔla tɔnɔɔ nduyɛ ma toolu masale ndɔleŋ ndo.

•   La tofa vidueiyo hoo Yɛɛ Cho yɛ Masale Mɛlɛkaleŋ?

•   La veelu diomndaŋ o suɛi lebolle hei bɛŋgu “Masale Mɛlɛkaleŋ O Cho Masale Nɔ Lakafa Le.”