A mɛɛ kɔɔna Chieeŋndo dimi yɛ [UN]

•   Chɔŋ a Saa 7 haa Saa 23 2023, Sɔŋgɔ cho Isɔluɛi tɛɛŋ a Kasa wo dii niŋ waŋnda hiouwɔɔ 6,400 nduyɛ a nda yɔŋulla hiou niŋ 15, 200, a bɔɔbɔɔ wanaa kue o chɔu le wa nda cho ni. Waŋnda o waalaŋ niŋ faŋaŋ o chalta ndalaŋ ni ma kua o foŋndaŋ nda cheleŋ.

•   Chɔŋ a Tapioo 24 2023, chɔu cho Yukileŋ nda Lɔɔsiaa tɛɛŋndo dii niŋ waŋnda 9,701, nduyɛ wanaa nda yɔŋul o Yukileŋ niŋnda cho niŋ 17,748.

 Tiindaŋ yɛ Baabuiyo ke yɛ wanaa cho saŋgaa o chɔulaŋ niŋnda?

 Baabuiyo dimi maa Mɛlɛka cho “tosa mi chɔulaŋ la chuu ba o ba fee o chieeŋndo choo.” (Sam 46:​9) O cho masɛi waŋchieeya tɛɛmbuu okoŋ mbo miŋgi Masale ndɔleŋ o foofo ndaa. (Daaniɛɛ 2:​44) Masale Mɛlɛkaleŋ le cho hunɔɔ waŋchieeya soli o saŋgaa niŋ.

 Tofawɔ nyɛ Chiisu Kiliti Masaa le Masale Mɛlɛkaleŋ cho hunɔɔ tosa wo

•   “Kani fondole ndu chiindiaa niŋ wanaa tambɛiyaa wa niŋ chaŋndo naa ndu chua le nda malaa wa ni. Wanaa nda cho nyɛ palaa tusioo choo, a nɔ wana o wana malaa le wa, ndu mala nda niŋ ni. Wanaa cho o kuɛi niŋ a nɔ kpaaya o kpaaya le wa, o tuiinuŋ nda niŋ inyiɛɛ, nduyɛ mbo chiindiaa nda. Ndu chiindiaa niŋ wanaa tambɛiyaa nda cho nyɛ palaa tusioo choo ma wa nda sɔɔŋ wɔɔŋndoŋ tosallo wa ni.”—Sam 72:​12-14.

 Sanaa a masaleŋ ndeŋ Mɛlɛka cho hunɔɔ sɔɔŋ palaŋ wanaa dɛnɛ wɔɔŋnda cho tosaa mi waŋchieeya wa hau saŋgala woŋ chii kpou.

•   “O cho nda mamɛmɛ o mamɛmɛ wɔɔsuu o hɔl fo. Piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa, kanifuule nyɛ o nyɛ paandu chuu faŋaŋ.”—Sɔɔŋ Chɔɔmaŋndoŋ 21:​4.

 Masale Mɛlɛkaleŋ le cho suŋ hunɔɔ a siŋgaŋndaŋ o chieeŋndo choo. Mi Baabuiyo dimi huuluei aa “La tuɛi niŋ a chɔulaŋ okɔɔ, vɛlɛ a konala chɔulaŋ” nduyɛ ŋ cho hau sɔɔŋ muŋ chɔɔ o yɔŋnɔŋndo. (Maatiu 24:​6) Sɔɔŋ muŋ a ŋ cheleŋndoŋ chɔm maa ŋ cho niŋ o “palɛi mɛɛlɛi” niŋ le masale waŋchieeya.—2 Timoti 3:​1.